Ko e Tangata Mālohi Tahá

ʻOKÚ KE ʻilo ʻa e hingoa ʻo e tangata mālohi taha kuo moʻui mai? Ko e fakamaau ia naʻe hingoa ko Samisoni. Ko Sihova ia naʻá ne ʻoange kia Samisoni ʻa hono ivi mālohí. Naʻa mo e ki muʻa ke fanauʻi ʻa Samisoní, naʻe tala ʻe Sihova ki heʻene faʻeé: ‘ʻE vavé ni pē ke ke maʻu ha tama tangata. Te ne taki ʻi hono fakahaofi ʻa e kau ʻIsilelí mei he kau Filisitiá.’

Ko e kau Filisitiá ko e kakai kovi naʻa nau nofo ʻi Kēnani. Naʻe ʻi ai ʻenau kau tangata tau tokolahi, pea naʻa nau fakamamahiʻi lahi ʻa e kau ʻIsilelí. ʻI he taimi ʻe taha, ʻi he ʻalu ʻa Samisoni ki he feituʻu naʻe nofo ai ʻa e kau Filisitiá, naʻe haʻu ha fuʻu laione ʻo ngungulu kiate ia. Ka naʻe tāmateʻi ʻe Samisoni ʻa e laioné ʻaki hono ongo nimá pē. Naʻá ne toe tāmateʻi foki ha laui teau ʻo e kau Filisitia koví.

Ki mui mai naʻe ʻofa ʻa Samisoni ʻi ha fefine naʻe hingoa ko Tilila. Naʻe talaʻofa ʻa e kau taki ʻo Filisitiá kia Tilila te nau taki taha ʻoange kiate ia ʻa e konga siliva ʻe 1,100 ʻo kapau te ne tala ange kiate kinautolu pe ko e hā ʻokú ne ʻai ʻa Samisoni ke fuʻu mālohi pehē faú. Naʻe fiemaʻu ʻe Tilila ʻa e fuʻu paʻanga kotoa ko iá. Naʻe ʻikai ko ha kaumeʻa moʻoni ia kia Samisoni pe ki he kakai ʻa e ʻOtuá. Ko ia naʻá ne toutou ʻeke kia Samisoni pe ko e hā ʻokú ne ʻai ia ke fuʻu mālohi pehē faú.

Faifai atu pē, naʻe ʻai ʻe Tilila ʻa Samisoni ke ne tala ange ʻa e fakapulipuli ki he tupuʻanga hono mālohí. Naʻe pehē ʻe Samisoni: ‘Kuo teʻeki ai ʻaupito ke kosi hoku ʻulú. Talu mei hoku fanauʻi, naʻe fili au ʻe he ʻOtuá ke hoko ko ha sevāniti makehe ʻaʻana ʻoku ui ko e Nāsili. Kapau ʻe kosi hoku ʻulú ʻe mole leva hoku mālohí.’

ʻI hono ʻiloʻi pē ʻeni ʻe Tililá, naʻá ne ʻai leva ʻa Samisoni ke mohe ʻi hono fungá. Pea naʻá ne toki ui leva ha tangata ke hū ange ʻo kosi ʻa e ʻulu ʻo Samisoní. ʻI he ʻā hake ʻa Samisoní kuo mole hono mālohí. Naʻe hū mai leva ʻa e kau Filisitiá ʻo puke pōpula ia. Naʻa nau taʻaki hono ongo matá pea ʻai ia ko ʻenau pōpula.

ʻI he ʻaho ʻe taha naʻe fai ʻe he kau Filisitiá ʻa e kātoanga lahi ke fai ʻenau lotu ki honau ʻotua ko Tākoni, pea naʻa nau ʻomi ʻa Samisoni mei he pilīsoné ʻo nau fakakataʻaki ia. Kuo toe tupu hake ʻa e louʻulu ʻo Samisoní. Naʻe pehē ʻe Samisoni ki he tamasiʻi naʻá ne taki ia ʻi hono nimá: ‘Taki au ke u ala ki he ongo pou ʻokú na puke ʻa e falé.’ Pea naʻe lotu ʻa Samisoni kia Sihova ki ha mālohi, peá ne puke ʻa e ongo poú. Naʻá ne kalanga: ‘Tuku au ke u mate mo e kau Filisitiá.’ Naʻe ʻi ai ʻa e kau Filisitia ʻe toko 3,000 ʻi he kātoangá, pea ʻi he tulolo atu pē ʻa Samisoni ʻo tekeʻi ʻa e ongo fuʻu poú naʻe holo ʻa e falé ʻo tāmateʻi kotoa ʻa e kakai koví ni.