Ko Saula—Ko e ʻUluaki Tuʻi ʻo ʻIsilelí

SIO kia Sāmiuela ʻokú ne lilingi ʻa e lolo ʻi he ʻulu ʻo e tangatá ni. Ko e meʻa ʻeni naʻa nau fai ki ha tokotaha ke fakahā kuo ʻosi fili ia ke hoko ko e tuʻi. Naʻe tala ʻe Sihova kia Sāmiuela ke lilingi ha lolo ʻi he ʻulu ʻo Saulá. Ko e lolo makehe ʻoku namu-lelei.

Naʻe fakakaukau ʻa Saula ʻoku ʻikai ke feʻunga ia ke hoko ko ha tuʻi. Naʻá ne tala kia Sāmiuela: ‘ʻOku ou kau ki he matakali ʻo Penisimaní, ko e siʻisiʻi taha ia ʻi ʻIsileli. Ko e hā ʻokú ke pehē ai te u hoko ko e tuʻí?’ Naʻe saiʻia ʻa Sihova ʻia Saula koeʻuhi he naʻe ʻikai te ne fakangalingali ko e lahi ia pe ko ha tokotaha mahuʻinga. Ko hono ʻuhinga ia naʻá Ne fili ai ia ko e tuʻí.

Ka ko Saulá naʻe ʻikai ke masiva pe ko ha tangata siʻisiʻi ia. Naʻe tupu ia mei ha fāmili koloaʻia pea ko ha tangata lōloa mo talavou ia. Naʻá ne lōloaʻaki ʻa e fute ʻe taha ʻi ha taha pē ʻi ʻIsileli! Ko Saulá ko e tokotaha naʻe veʻe vave ʻaupito, pea ko e tangata ivi lahi. Naʻe fiefia ʻa e kakaí ʻi hono fili ʻe Sihova ʻa Saula ko e tuʻí. Naʻa nau kaila kotoa: ‘Ke moʻui fuoloa ʻa e tuʻi!’

Naʻe fuʻu mālohi ʻaupito ʻa e ngaahi fili ʻo e kau ʻIsilelí. Naʻa nau kei fakatupu ha faingataʻaʻia lahi ki he kau ʻIsilelí. Taimi nounou pē mei hono fakanofo tuʻi ʻo Saulá, naʻe haʻu ʻa e kau ʻĀmoní ke tau mo kinautolu. Ka naʻe tānaki ʻe Saula ha kau tau tokolahi, pea naʻá ne ikuna ʻa e kau ʻĀmoní. Naʻe ʻai ʻe he meʻá ni ke fiefia ʻa e kakaí ʻi he hoko ʻa Saula ko e tuʻí.

ʻI he faai mai ʻa e ngaahi taʻu, naʻe taki ʻe Saula ʻa e kau ʻIsilelí ʻo lahi ʻenau ikunaʻi honau ngaahi filí. Naʻe ʻi ai foki mo e foha loto-toʻa ʻo Saula ko Sionatane. Pea naʻe tokoni ʻa Sionatane ki he kau ʻIsilelí ʻo nau ikunaʻi ai ʻa e ngaahi tau lahi. Naʻe kei hoko pē ʻa e kau Filisitiá ko e fili kovi taha ia ʻo e kau ʻIsilelí. ʻI he ʻaho ʻe taha naʻe haʻu ha kau Filisitia ʻe laui afe ke faitau mo e kau ʻIsilelí.

Naʻe fakahā ʻe Sāmiuela kia Saula ke tatali kaeʻoua ke ne haʻu ʻo fai ha feilaulau, pe meʻaʻofa, kia Sihova. Ka naʻe tuai mai ʻa Sāmiuela. Naʻe ilifia ʻa Saula naʻa kamata ʻa e taú ʻe he kau Filisitiá, ko ia naʻá ne fai leva ʻe ia ʻa e feilaulau. ʻI he taimi naʻe toki haʻu ai ʻa Sāmiuelá, naʻá ne tala ange kia Saula kuó ne talangataʻa. Naʻe pehē ange ʻe Sāmiuela: ‘ʻE fili ʻe Sihova ha tangata kehe ke tuʻi ki ʻIsileli.’

Ki mui ai naʻe toe talangataʻa ʻa Saula. Ko ia naʻe fakahā ki ai ʻe Sāmiuela: ‘ʻOku lelei ange ke talangofua kia Sihova ʻi ha foaki ha meʻaʻofa kiate ia ʻaki ʻa e sipi lelei tahá. Koeʻuhi ko hoʻo talangataʻa kia Sihová, heʻikai ke kei tuku koe ʻe Sihova ke ke tuʻi ki ʻIsileli.’

ʻOku tau ako ha meʻa lelei mei heni. ʻOku fakahā heni ʻa hono mahuʻinga ke talangofua maʻu pē kia Sihová. ʻOku toe fakahā heni ʻe lava pē ke liliu ʻo hoko ʻo kovi ha tangata naʻe lelei ʻo hangē pē ko Saulá. ʻOku ʻikai ʻaupito te tau fiemaʻu ke tau hoko ʻo kovi, ʻikai ko ia?