ʻUluaki Tuʻi ʻo ʻIsilelí

Naʻe ʻoange ʻe Sihova ki he kau ʻIsilelí ʻa e kau fakamaau ke nau tataki kinautolu, ka naʻa nau fiemaʻu ke ʻi ai hanau tuʻi. Naʻa nau pehē kia Sāmiuela: ‘Ko e ngaahi puleʻanga takatakai ʻiate kimautolú ʻoku ʻi ai honau ngaahi tuʻi. ʻOku mau fiemaʻu foki hamau tuʻi.’ Naʻe fakakaukau ʻa Sāmiuela naʻe hala ʻa e meʻa ko ení, ko ia naʻá ne lotu kia Sihova fekauʻaki mo ia. Naʻe pehē ange ʻe Sihova kiate ia: ‘ʻOku ʻikai ke liʻaki koe ʻe he kakaí. ʻOku nau liʻaki au. Tala kiate kinautolu ʻe lava ke ʻai hanau tuʻi ka ʻe fiemaʻu ʻe he tuʻí ʻa e ngaahi meʻa lahi meiate kinautolu.’ Neongo ia, naʻe kei pehē pē ʻe he kakaí: ‘ʻOku ʻikai te mau tokanga ki ai. ʻOku mau fiemaʻu ha tuʻi!’

Naʻe tala ʻe Sihova kia Sāmiuela ʻe hoko ha tangata ko Saula ko e ʻuluaki tuʻí. ʻI he ʻalu ʻa Saula ki Lama ʻo ʻaʻahi kia Sāmiuelá, naʻe pani ai ʻe Sāmiuela ʻa Saula ke ne hoko ko e tuʻi ʻaki hono lilingi ʻa e lolo ʻi hono ʻulú.

Ki mui ai naʻe ui mai ʻe Sāmiuela ʻa e kau ʻIsilelí ʻo fakahaaʻi kiate kinautolu ʻa honau tuʻi foʻoú. Ka naʻe ʻikai te nau sio kia Saula ʻi ha feituʻu. ʻOkú ke ʻiloʻi ʻa hono ʻuhingá? Koeʻuhí naʻá ne toitoi ʻi he ʻū meʻá. ʻI heʻenau ʻilo ʻa Saulá, naʻa nau ʻomai ia ʻo fokotuʻu ʻi loto ʻi he kakaí. Naʻe lōloa ange ʻa Saula ʻi ha taha pē, pea naʻá ne talavou ʻaupito. Naʻe pehē ʻe Sāmiuela: ‘Mou sio ki he tokotaha kuo fili ʻe Sihová.’ Naʻe kaila ʻa e kakaí: ‘Ke moʻui fuoloa ʻa e tuʻí!’

ʻI he ʻuluaki taimí naʻe fanongo ʻa Tuʻi Saula kia Sāmiuela peá ne talangofua kia Sihova. Ka naʻá ne liliu ki mui. Ko e fakatātaá, naʻe ʻikai fiemaʻu ke fai ʻe he tuʻí ʻa e ngaahi feilaulaú. ʻI he taimi ʻe taha, naʻe tala ai ʻe Sāmiuela kia Saula ke ne tatali ange kiate ia, ka naʻe ʻikai ke vave ʻa e haʻu ʻa Sāmiuelá. Ko ia naʻe fili ai ʻa Saula ia ke ne fai ʻe ia ʻa e ngaahi feilaulaú. Naʻe fēfē ʻa e tali ki ai ʻa Sāmiuelá? Naʻá ne tala ange: ‘Naʻe ʻikai totonu ke ke talangataʻa kia Sihova.’ Naʻe ako ʻa Saula mei heʻene fehālaakí?

Ki mui ai, ʻi he ʻalu ʻa Saula ke tau mo e kau ʻAmalekí, naʻe tala ʻe Sāmiuela kia Saula ke ʻoua te ne tuku ke moʻui ha taha ʻo kinautolu. Ka naʻe fili ʻa Saula ia ke ʻoua ʻe tāmateʻi ʻa Tuʻi ʻĒkaki. Naʻe tala ai ʻe Sihova kia Sāmiuela: ‘Kuo liʻaki au ʻe Saula, pea ʻoku ʻikai te ne fanongo kiate au.’ Naʻe loto-mamahi ʻaupito ʻa Sāmiuela, peá ne tala ange kia Saula: ‘Koeʻuhi ko e tuku ʻa hoʻo talangofua kia Sihová, te ne fili ʻe ia ha tuʻi ʻe taha.’ ʻI he tafoki ʻa Sāmiuela ke ne ʻalú, naʻe puke ia ʻe Saula ʻo mahae ʻa e pelu ʻo e kofu ʻo Sāmiuelá. Ko ia naʻe tala ange ʻe Sāmiuela kia Saula: ‘Kuo hae ʻe Sihova ʻa e puleʻangá meiate koe.’ Naʻe fiemaʻu ʻe Sihova ke foaki ʻa e puleʻangá ki ha taha te ne ʻofa mo talangofua kiate ia.