Naʻe Falala ʻa Sihosafate kia Sihova

ʻOKÚ KE ʻilo pe ko hai ʻa e kau tangata ko ʻení pea ko e hā ʻenau meʻa ʻoku faí? ʻOku nau ʻalu atu ki he tau, pea ko e kau tangata ʻi muʻá ʻoku nau hiva. Ka mahalo te ke ʻeke: ‘Ko e hā ʻoku ʻikai ke ʻi ai ai ha ngaahi heletā mo ha ngaahi tao ʻa e kau hivá ke nau tauʻaki?’ Ka tau vakai ange.

Ko Sihosafaté ko e tuʻi ia ʻo e puleʻanga matakali ʻe ua ʻo ʻIsilelí. Naʻe moʻui ʻi he taimi tatau mo e Tuʻi ko ʻĒhapi mo Sisipeli ʻo e puleʻanga matakali ʻe 10 ʻi he tokelaú. Ka ko e tuʻi lelei ʻa Sihosafate, pea ko ʻene tamai ko ʻAsa ko e tuʻi lelei mo ia foki. Ko ia ʻi he ngaahi taʻu lahi ko e kakai ʻo e puleʻanga matakali ʻe ua ʻi he tongá naʻa nau maʻu ha moʻui lelei.

Ka naʻe toki hoko ha meʻa naʻe ʻai ai ʻa e kakaí ke nau ilifia. Naʻe fakahā ʻe ha kau talafekau kia Sihosafate ʻo pehē: ‘ʻOku haʻu ha fuʻu kau tau mei he ngaahi fonua ʻo Mōape, ʻĀmoni mo e Moʻunga Sēiá ke ʻohofi kimoutolu.’ Naʻe tokolahi ʻa e kau ʻIsileli naʻe fakatahataha ki Selusalema ke kumi ki ha tokoni ʻa Sihova. Naʻa nau ʻalu ki he temipalé, pea lotu ai ʻa Sihosafate: ‘ʻE Sihova ko homau ʻOtua, ʻoku ʻikai te mau ʻilo pe ko e hā ʻa e meʻa te mau fai. Heʻikai te mau lavaʻi ʻa e fuʻu kau tau ko ʻení. ʻOku mau hanga atu kiate koe ki ha tokoni.’

Naʻe fanongo mai ʻa Sihova, peá ne ʻai ʻa e tokotaha ʻo ʻene kau sevānití ke tala ki he kakaí: ‘ʻOku ʻikai ke ʻamoutolu ʻa e taú, ka ʻoku ʻa e ʻOtuá. ʻE ʻikai fiemaʻu ke mou tau. Mou mamata pē, mo vakai ki he anga hono fakahaofi kimoutolu ʻe Sihová.’

Ko ia ʻi he pongipongi hono hokó naʻe tala ʻe Sihosafate ki he kakaí: ‘Mou falala kia Sihova!’ Naʻá ne fokotuʻu leva ʻa e kau hiva ʻi muʻa ʻi heʻene kau sōtiá, pea ʻi heʻenau laká naʻa nau hiva fakamālō kia Sihova. ʻOkú ke ʻilo ʻa e meʻa naʻe hoko ʻi heʻenau ofi atu ki he taú? Naʻe ʻai ʻe Sihova ʻa e kau sōtia ʻa e filí ke nau fetauʻaki pē ʻiate kinautolu. Pea ʻi he aʻu atu ʻa e kau ʻIsilelí, kuo mate hono kotoa ʻa e kau sōtia ʻa e filí!

ʻIkai naʻe poto ʻa Sihosafate ʻi heʻene falala kia Sihová? Te tau poto ʻo kapau te tau falala kiate Ia foki.