Kau Faifekau Ngāue Taimi-Kakato ʻOku Nau Takimuʻa ʻi he Ngāue Fakamalangá
Mahalo ko e ʻuluaki tokotaha ʻo e Kau Fakamoʻoni ʻa Sihová naʻe ʻaʻahi atu kiate koé ko ha faifekau taaimuʻa taimi-kakato pe ko ha misinale. Koeʻuhi ʻoku ʻikai totongi ʻa e ngāue fakafaifekau ʻa e Kau Fakamoʻoni ʻa Sihová, mahalo naʻá ke fifili pe ʻoku anga-fēfē ʻa e malava ke kau ki he ngāue fakafaifekau taimi kakató ʻa e kakaí ni.
Ko e kotoa ʻo e Kau Fakamoʻoni ʻa Sihova kuo fakatapui mo papitaisó ko e kau faifekau, ka ko e tokolahi taha ʻoku ʻi ai honau ngaahi fatongia fakafāmili pe fatongia kehe ʻa ia ʻokú ne taʻofi kinautolu mei heʻenau fakamoleki lahi ange he ngaahi houa ʻe niʻihi ʻi ha uike ki heʻenau ngāue fakafaifekaú. Ka neongo ia, ko e toko lauiafe ʻo e Kau Fakamoʻoní ʻi he māmaní kotoa kuo nau fakafaingofuaʻi ʻenau tuʻunga moʻuí kae lava ke totongi ʻenau ngaahi fakamolé ʻaki ʻa e ngāue fakataimi pē pea nau līʻoa ʻa e houa ʻe 1,000 pe lahi ange he taʻu ki he ngāue fakafaifekaú.
ʻOku moʻoni, ko e kau faifekau taaimuʻa taimi-kakató ʻoku ʻikai ke lahi ʻa e paʻanga ke fakamoleki maʻanautolú, ka kiate kinautolu ko ha founga ia ʻo e fuofua kumi ki he Puleʻanga ʻo e ʻOtuá. Pea ʻoku nau maʻu ha ngaahi tāpuaki lahi. Ko e faingamālie ke lea ki he niʻihi kehé fekauʻaki mo e Folofola ʻa e ʻOtuá ʻi ha houa ʻe 90 pe lahi ange ʻi ha māhina ko ha meʻa lelei ia. ʻOku fakaleleiʻi ʻe he faifekau taimi-kakató ʻene pōtoʻi ʻi he ngāue fakamalangá pea ʻoku toe ʻi ai mo e taimi ke ne toe foki ai ki he faʻahinga ʻoku mahuʻingaʻiá. ʻOku ʻomi ʻe he meʻá ni ha ola fakalototoʻa. ʻOku nau maʻu ʻa e ngaahi meʻa fakamatelie ʻoku nau fiemaʻú, pea ʻoku nau houngaʻia ʻaupito ʻi he ngaahi meʻa pē ʻoku nau maʻú.—Mātiu 6:33.
ʻI Fēpueli 1943, naʻe fokotuʻu ʻe he Watch Tower Society ʻa e Akoʻanga Tohitapu ʻa e Taua Leʻó ko Kiliati. Ko e taumuʻá ke teuteuʻi ʻa e kau faifekau taukei taaimuʻa taimi-kakató ke nau hoko ko e kau misinale ʻi he ngaahi fonua mulí. ʻOku kau ki he polokalama ako māhina nimá ni ha ako fakaʻauliliki ʻo e Tohitapú, hisitōlia faka-Tohitapú, kautaha ʻa Sihová, mo e ngaahi lēsoni kehekehe ʻi he teuteu ki he ngāue ʻi ha fonua muli.
ʻOku totongi ʻe he Sōsaietí ʻa e totongi folau ki he vāhenga-ngāue fakamisinalé pea ʻoange ʻenau meʻatokoni mo ha loki ʻoku feʻunga ke nau nofo ai ʻi ha ʻapi fakamisinale. ʻOkú ne toe ʻoange ki he kau misinale taki taha ha kiʻi totongi ki heʻenau fakamole fakafoʻituituí. ʻOku ngāue fetongitongi leva ʻa e kau misinalé ʻi ʻapi ʻi he fai ha fakatau, teuteu ha meʻatokoni, pea mo e fakamaʻa ʻapí. Koeʻuhi ko e tokoni feʻungamālie peheé, ʻoku malava ʻa e kau misinalé ke foaki līʻoa ʻo ʻikai siʻi hifo he houa ʻe 140 ʻi ha māhina ki he ngāue fakamalanga fale-ki-he-falé pea fai mo ha ngaahi ako Tohitapu mo e faʻahinga ʻoku mahuʻingaʻiá.
Kuo fekau atu ʻa e tokolahi ʻo e kau misinalé ni ki ha fonua ʻoku lauiafe maile hono mamaʻó mei honau fonuá mo e familí. Kuo nau liliu ki ha tuʻunga moʻui mo ha anga fakafonua ʻoku kehe, ki ha faʻahinga meʻakai foʻou, ki he kehe ʻa e anga ʻo e ʻeá, pea ke lea ʻi ha lea kehe. ʻOku nau fai ʻa e ngāué ni koeʻuhi ko ʻenau ʻofa ki he kakaí pea mo ʻenau loto-mālohi ke tokoniʻi kinautolu ke nau ʻiloʻi ʻa e Puleʻanga ʻo e ʻOtuá.
Mei he 1943 ʻo aʻu ki he 1988, naʻe fakalele ʻe he Akoʻanga Tohitapu ʻa e Taua Leʻó ko Kiliati ʻa e kalasi ʻe 86 pea fekau atu ha kau misinale naʻe laka hake he toko 6,200. ʻI he tataki ʻa e Sōsaietí, kuo nau takimuʻa ʻi hono fakalahi ʻo e ako ki he Tohitapú ʻi ʻAfilika, ʻAmelika Lotoloto mo e faka-Tongá, ʻĒsia Fakahahake, pea mo e Pasifiki Tongá, pea kuo nau lavameʻa lahi ʻi ʻIulope.
Pe ʻoku kau ʻa e Kau Fakamoʻoni ʻa Sihová ʻi he ngāue fakamalanga taimi kakató ko ha taaimuʻa pe ko ha misinale pe ngāue fakataimi pē, ʻoku nau fai ʻeni ʻo taʻemaʻu vāhenga. ʻOku nau fakamoleki ʻa e taimi mo e paʻanga pē ʻanautolu, pea nau līʻoa ke tokoniʻi ʻa e niʻihi kehé ke maʻu ʻa e ʻilo ʻoku fakatau ki he moʻui taʻengatá.—Sione 17:3.
• ʻOku anga-fēfē ʻa e malava ʻe he Kau Fakamoʻoni ʻa Sihova ʻe niʻihi ke foaki līʻoa atu honau taimí kakato ki he ngāue fakamalangá, pea ko e hā hono ʻuhinga ʻoku nau fai pehē aí?
• ʻOku anga-fēfē hono teuteuʻi ʻa e kau faifekaú ki he ngāue fakamisinalé?
• ʻOku anga-fēfē hono poupouʻi ʻo e kau misinalé ʻi honau vāhenga-ngāué ʻi ha fonua muli?
[Fakatātā ʻi he peesi 22]
Toʻohema: Ko e loki ako ʻi he Akoʻanga Kiliatí, Brooklyn, N.Y., U.S.A.
Toʻomataʻu: Ko ha misinale ʻokú ne akoʻi ʻa e Folofola ʻa e ʻOtuá ʻi Pāpua Niukini
[Fakatātā ʻi he peesi 23]
Ko e kau faifekau taaimuʻa mo e kau misinale ʻoku nau malangaʻi ʻa e Folofola ʻa e ʻOtuá ʻi he tukui fonua kehe
Pelēsila
Lepupelika Dominican
Sēpeni
Sierra Leone, ʻAfilika