Poupouʻi Fakapaʻanga ʻAki ʻa e Ngaahi Meʻaʻofa Loto-Fiefoaki

ʻOku poupouʻi ʻa e ngāue kotoa pē kuo ʻosi fai ki ai ʻa e fakamatalá ʻe he kau ngāue pole, ʻo siʻisiʻi ai pē ʻa e fakamolé. ʻOku fai taʻetotongi pē ʻe he Kau Fakamoʻoni ʻa Sihová ʻa e ngāue fakamalanga fale-ki-he-falé pea mo hono tufaki atu ʻo e ʻū tohí. ʻOku nau totongi pē ʻenau ngaahi fakamole ʻanautolú. Ko e kau mātuʻa ʻoku nau tokangaʻi ʻa e ngaahi fakatahaʻangá, ʻa ia ʻoku tokoni ki ai ʻa e kau sevānití, ʻoku ʻikai ha totongi ki heʻenau fai fatongiá. ʻOku nau fua kotoa pē ʻenau ngaahi fakamolé.

Naʻa mo e kau mēmipa ʻo e Kulupu Pulé mo e faʻahinga kehe kotoa ʻoku nau ngāue taimi kakato ki hono teuteu mo hono faʻu ʻo e Tohitapu mo e ngaahi tohi faka-Tohitapú, ʻoku nau maʻu pē honau loki mo e meʻatokoni mo ha kiʻi tokoni ke fuaʻaki ʻenau ngaahi fakamolé. ʻOku tatau pē ki he kau ʻovasia fefonongaʻaki ʻoku nau ngāue taimi-kakató.

Ko e kiʻi tokoni ʻoku maʻu ʻi hono tufaki atu ʻa e ngaahi tohí ʻoku fuaʻaki nai ia ʻa e fakamole ki he ngaahi nāunau, mo hono pulusi, pea mo hono fakafolaú. Ko e ngaahi fakamole kehé kotoa leva ʻoku totongiʻaki ia ʻa e ngaahi meʻaʻofa loto-fiefoaki ʻa e Kau Fakamoʻoni ʻa Sihová pē, ʻi he lī tokoni fakapaʻanga pe ʻi ha tohituku fakalao.

ʻI he ngaahi fakataha kotoa ʻa e Kau Fakamoʻoni ʻa Sihová, tatau pē ʻi he fakalotofonua pe ʻi he ngaahi fakataha lalahí, ʻoku ʻi ai ʻa e ngaahi līʻanga meʻaʻofa ai ki ha faʻahinga ʻoku nau fie fai ha tokoni fakapaʻanga. ʻOku ʻikai fai ha tānaki paʻanga ai. ʻOku ʻikai ha vahe hongofulu pe ko ha paʻanga kuo pau ke totongi. Hangē ko ia ʻoku fokotuʻu mai ʻi he Tohitapú, ke taki taha tokoni ʻo fakatatau ki he angi ʻi hono lotó.​—2 Kolinitō 8:12; 9:7.

• ʻOku anga-fēfē hono poupouʻi fakapaʻanga ʻa e ngāue kotoa ʻa e Kau Fakamoʻoni ʻa Sihová?