Fakahā ʻa e Houngaʻia ʻi he Ngaahi Tohí

¹ “ʻOku ʻikai hano ngataʻanga ʻo e faʻu tohi ke lahi.” (Koh. 12:12) ʻOku lahi ʻa e ngaahi tohi ʻoku mahuʻinga siʻisiʻi pē. Kaekehe, ʻoku ʻikai ke pehē ʻa e ngaahi tohi kuo pulusi ʻe he Watchtower Society. ʻOku mahuʻinga ia koeʻuhi ʻoku ʻi ai ʻa e meʻakai fakalaumālie ke ne fakahaofi ʻa e moʻuí. ʻOku tokoni ia kiate kinautolu ʻoku mahuʻingaʻiá ke nau hoko ʻo ʻiloʻi ʻa Sihova, pea ʻai ke mālohi ange ai ʻa e tui ʻa kinautolu kuo nau ʻosi hoko ko e kau sevāniti fakatapui ʻa Sihová.

² ʻOku tau loto ke ʻoatu ʻetau tohí ki ha niʻihi kehe koeʻuhi ʻoku tau ʻilo ʻe ʻaonga ia kiate kinautolu. Neongo ʻoku tau maʻu ia ʻo ʻikai ha totongi, ʻoku ʻi ai ʻa e fakamole ki hono ngaohí mo hono tufá. Ko ia ai, ʻoku ʻikai te tau loto ke tufa tavale ʻetau ngaahi tohí. Kapau ʻoku ʻikai te tau fakapapauʻi ʻoku ʻi ai ha mahuʻingaʻia ʻi he tokotaha-ʻapí, te tau tuʻuaki atu ha taha ʻo e ngaahi tatau ʻo e Ko e Taua Leʻo mo e Awake! pe ko ha tuleki pē nai. ʻOku totonu ke tau toe ʻaʻahi ki he tokotaha kotoa pē naʻá ne tali ha tohi, pea kapau ʻoku hā mai ha mahuʻingaʻia ʻi he taimi ko iá, te tau toki tuʻuaki atu ha tohi ʻe taha.

³ ʻOku ʻi ai ʻa e faʻahinga ʻoku nau toumoua ke fakahā ki he tokotaha-ʻapí ko e ngāué ni ʻoku poupouʻi ia ʻe he ngaahi tokoni fai loto-fiefoaki ki ai, ka ʻoku lelei ke leaʻaki ʻa e meʻá ni ʻi he ngaahi tuʻunga lahi taha. ʻE fakahā mahino ai ki he tokotaha-ʻapí ko ʻetau ngāué ʻoku ʻikai ke ʻi ai hano tupu fakakomēsiale. ʻOkú ne fakahā fakamuʻomuʻa atu ai ko ʻetau taumuʻá ko e malangaʻi ʻo e ongoongolelei ʻo e Puleʻangá mo ngaohi ākonga. ʻE tokoni ia kiate kitautolu ke tau ʻilo pe ʻoku ʻi ai ha mahuʻingaʻia moʻoni. ʻOku faʻa maʻu ʻe he kakaí ʻa e paʻanga ki he ngaahi meʻa hangē ko e tapaka mo e tohi fakamāmani. Kapau ʻoku moʻoni ʻenau mahuʻingaʻia ki he meʻa ko ia kuó ke fakahā kiate kinautolú, te nau sio leva ki he lelei ʻo hono fai ha tokoni ke poupouʻi ʻa e lotu faka-Kalisitiane moʻoní. ʻI hono fakamatalaʻi ʻa e founga hono poupouʻi ʻo e ngāué, ʻoku tau fakahāhā ai ʻetau houngaʻia ki he ngaahi tohí. ʻOku tau fakahā ai ʻoku tau ʻiloʻi ʻoku ʻi ai ʻa e fakamole naʻe fai ki hono ngaohi ʻo e tohí.

⁴ ʻI hono fakahā totonu ʻa e meʻa ʻo kau ki he tokoni ʻoku fai loto-fiefoakí, ʻoku tokolahi ʻa e kakai ʻoku nau fiefia ke tokoni ki heʻetau ngāue mātuʻaki mahuʻingá. ʻE ʻi ai ʻa e ngaahi taimi te ke ongoʻi nai ʻoku ʻikai ke feʻunga ke ke fakahā ʻa e fokotuʻutuʻu ko ia ke fai ʻa e tokoní, ka ko hono fakalūkufuá ʻoku lelei ke fakahā ia ʻi he ʻuluaki ʻaʻahí ʻi he mahuʻingaʻia ʻa e tokotaha-ʻapí ke ne lau ʻa e tohi ʻoku tau tuʻuakí.