Tauhi ʻa Sihova, ʻIkai ko Sētane

Ko kitautolu kotoa kuo pau ke tau fai ha fili. Pe te tau tauhi ʻa Sihova pe te tau tauhi ʻa Sētane mo ʻene kau tēmenioó. ʻOku ʻikai malava ke tau fai ʻa e ongo meʻá ni fakatouʻosi. Ko ha toki meʻa fakapotopoto ē ke tauhi ʻa Sihova!

ʻOku Lelei ʻa Sihova

Hangē ko ia kuo tau ʻilo ki aí, ʻoku maʻu ʻe he kau tēmenioó ʻa e fiefia ʻi hono fakamamahiʻi mo kākaaʻi ʻa e kakaí. ʻOku ʻikai ke pehē ʻa Sihova ia. ʻOkú ne ʻofa ki he faʻahinga ʻo e tangatá ʻo hangē ko e ʻofa ʻa ha tamai ki heʻene fānaú. Ko e Tokotaha-Foaki ia ʻo e “foaki lelei kotoabe moe foaki haohaoa kotoabe.” (Sēmisi 1:17, PM) ʻOku ʻikai te ne taʻofi ha meʻa lelei mei he faʻahinga ʻo e tangatá, neongo ʻene hoko ko e fakamole lahi kiate ia tonu.​—ʻEfesō 2:4-7.

Fakakaukau atu ki he ngaahi meʻa naʻe fai ʻi he māmaní ʻe Sīsū, ko e ʻAlo ʻo e ʻOtuá. Naʻá ne ʻai ke lea ʻa e kau noá pea ʻai ke sio ʻa e kau kuí. Naʻá ne fakamoʻui ʻa e kau kiliá mo e heké. Naʻá ne kapusi ʻa e kau tēmenioó pea fakamoʻui ʻa e alangamahaki kotoa pē. ʻI he mafai ʻo e ʻOtuá, naʻe aʻu ʻo fokotuʻu ʻe Sīsū ʻa e kau maté ke nau toe moʻui.​—Mātiu 9:32-35; 15:30, 31; Luke 7:11-15.

ʻI he ʻikai ke tala mai ʻe he ʻOtuá ha ngaahi loi ke takihalaʻiʻaki kitautolú, ʻoku tala mai maʻu pē ʻe he ʻOtuá ʻa e moʻoní. ʻOku ʻikai ʻaupito ke ne kākaaʻi ha taha.​—Nōmipa 23:19.

Fakaʻehiʻehi mei he Ngaahi Tōʻonga Taʻemaʻá

ʻOku hangē tofu pē ko hono puke ʻe he matamatakupenga ʻo e hiná ha lango, ko hono puke maʻu ʻa e kakai ʻe laui miliona ʻe he manavahē taʻeʻuhingá mo e loí. ʻOku nau manavahē ki he kau maté. ʻOku nau manavahē ki he kau tēmenioó. ʻOku nau hohaʻa ʻo kau ki he ngaahi talatuki, ngaahi fakaʻilonga mo e ngaahi meʻa ke ʻomi monū. ʻOku haʻisia kinautolu ʻe he ngaahi tui mo e ngaahi talatukufakaholo ʻoku makatuʻunga ʻi he ngaahi loi ʻa Sētane ko e Tēvoló. ʻOku ʻikai ke ʻefihia ʻa e kau sevāniti ʻa e ʻOtuá ia ʻi he ngaahi meʻa peheé.

ʻOku mālohi mamaʻo ange ʻa Sihova ʻia Sētane. Kapau te ke tauhi ʻa Sihova, te ne maluʻi koe mei he kau tēmenioó. (Sēmisi 4:7) He ʻikai ke hoko kiate koe ʻa e ngaahi talatukiʻí. Ko e fakatātaá, ʻi Naisīlia, naʻe talatukiʻi ʻe he kau faitoʻo fakafaʻahikehe mālohi ʻe toko tolu ʻe tāmateʻi ha taha ʻo e Kau Fakamoʻoni ʻa Sihová naʻá ne fakafisi ke mavahe mei he koló. ʻI he ʻikai ke lavameʻa ʻa e talatukiʻi naʻe faí, naʻe hoko ʻo ilifia ha taha ʻo e kau faitoʻo fakafaʻahikehé ʻo ne ʻalu ki he tokotaha Fakamoʻoní ʻo kole ha meesi.

Kapau ʻoku fakahohaʻasi koe ʻe he kau tēmenioó, ʻoku malava ke ke ui ʻa e huafa ʻo Sihová pea te ne maluʻi koe. (Palōveepi 18:10) Ka ke maʻu ʻa e maluʻi mei he ʻOtuá, kuo pau ke ke fakamavaheʻi koe mei he meʻa kotoa pē ʻoku fekauʻaki mo e fakahaʻele faʻahikehé mo e lotu ki he kau tēmenioó. Naʻe fai pehē ʻa e kau lotu ki he ʻOtuá ʻi ʻEfesō ʻo e kuonga muʻá. Naʻa nau tānaki mai ʻenau ngaahi tohi kotoa pē naʻe fekauʻaki mo e mēsikí pea nau tutu ia. (Ngāue 19:19, 20) Kuo pau ke fai ʻe he kau sevāniti ʻa e ʻOtuá ʻi he ʻahó ni ʻa e meʻa tatau pē. Fakaʻatā koe mei he ngaahi meʻa ʻoku kahoa pe ʻai ki he sinó ko e ʻomi monū, ko e ngaahi vesa ʻoku tui ke maluʻi kita, ngaahi tohi ʻo fekauʻaki mo e mēsikí, pea mo ha faʻahinga meʻa kehe pē ʻoku fekauʻaki mo e ngaahi tōʻonga fakahaʻele faʻahikehé.

Fai ʻa e Lotu Moʻoní

Kapau ʻokú ke loto ke fakahōifuaʻi ʻa e ʻOtuá, ʻoku ʻikai ke feʻunga pē ke liʻaki ʻa e lotu loí pea taʻofi ʻa hono fai ʻa e ngaahi meʻa ʻoku koví. Kuo pau ke ke kau longomoʻui ki he lotu maʻá. ʻOku fakahā ʻe he Tohitapú ʻa e meʻa ʻoku fiemaʻú:

Feohi mo e Kau Fakamoʻoni ʻa Sihová

ʻOku ʻi ai ʻa e kakai ʻa Sētane mo ʻene kau tēmenioó ʻi māmani ʻoku nau akoʻi pea fai ʻa e ngaahi meʻa ʻoku halá. Ka ʻoku toe ʻi ai ʻa e kakai ʻa Sihova. Ko e Kau Fakamoʻoni ʻa Sihova kinautolu. (ʻAisea 43:10) ʻOku lahi hake ʻi he toko ono miliona ʻa e Kau Fakamoʻoní ʻi māmani lahi. Ko kinautolu hono kotoa ʻoku nau feinga mālohi ke fai ʻa e ngaahi meʻa ʻoku leleí pea akoʻi ʻa e moʻoní ki he kakaí. ʻI he ngaahi fonua lahi, ʻoku malava ke ke feʻiloaki mo kinautolu ʻi he Kingdom Hall, ʻa e feituʻu te nau talitali māfana ai koe.

Ko ʻenau ngāué ke tokoniʻi ʻa e niʻihi kehé ke tauhi ʻa e ʻOtuá. Te nau ako ʻa e Tohitapú fakataha mo koe ʻi ho ʻapí, ʻo tokoniʻi koe ke ke ako ki he founga totonu ke lotu ai kia Sihová. ʻOku ʻikai fiemaʻu ke ke fai ha totongi ki he meʻá ni. ʻOku fiefia ʻa e Kau Fakamoʻoní ke akoʻi atu ʻa e moʻoní he ʻoku nau ʻofa ki he kakaí pea ʻoku nau ʻofa kia Sihova ko e ʻOtuá.