ʻOku Kovi ʻa e Mēsikí mo e Tōʻonga Fakafaimaná

ʻOku loto ʻa Sētane ke ke fai ʻa e mēsikí. ʻOku fai ʻe he tokolahi ʻa e ngaahi feilaulau ki he fanga kuí pe ki he ngaahi laumālié ke maluʻi kinautolu mei ha maumau. ʻOku nau fai eni koeʻuhi ʻoku nau manavahē ki he ngaahi mālohi ʻo e māmani laumālié. ʻOku nau tui ha ngaahi foʻi mama pe ngaahi vesa fakamēsiki. ʻOku nau inu pe miliʻaki honau sinó ʻa e “ngaahi faitoʻo” ʻoku pehē tokua ʻokú ne maʻu ʻa e mālohi fakamēsiki. ʻI honau ngaahi ʻapí pe ʻi he kelekelé, ʻoku fūfuuʻi ai ʻe he kakai ʻe niʻihi ʻa e ngaahi meʻa ʻoku nau tui ʻoku ʻi ai hono ngaahi mālohi fakaemaluʻi. ʻOku ngāueʻaki ʻe he niʻihi ʻa e “faitoʻo” fakamēsikí koeʻuhi ʻoku nau tui te ne ʻomai ʻa e lavameʻa ʻi he pisinisí, ngaahi sivi fakaakó, pe ko e faisoó.

Ko ho maluʻi lelei taha meia Sētané ko hono ʻai ʻa Sihova ke hoko ko ho kaumeʻa. Ko Sihova ko e ʻOtuá mo ʻene kau ʻāngeló ʻoku nau mālohi mamaʻo ange ʻia Sētane mo ʻene kau tēmenioó. (Semisi 2:19; Fakahā 12:9) ʻOku vēkeveke ʻa Sihova ke fakahaaʻi ʻa hono mālohí maʻa hono ngaahi kaumeʻá​—ʻa e faʻahinga ko ia ʻoku nau mateaki kakato kiate iá.​—2 Kalonikali 16:9 (2 Fakamatala Mea Hokohoko, PM).

ʻOku pehē ʻe he Folofola ʻa e ʻOtuá: “Tapu hoʻomou fai ʻa e tuki [“mēsiki,” NW].” ʻOku fakahalaiaʻi ʻe Sihova ʻa e mēsikí mo e tōʻonga fakafaimaná koeʻuhi he ko hono fai ʻo e ngaahi meʻa ko iá ʻoku lava ke ʻai fakahangatonu ai ha taha ke ʻi he mālohi ʻo Sētane ko e Tēvoló.​—Livitiko 19:26.