LĒSONI 13
Naʻe Loto ʻa Tīmote ke Tokoni ki he Kakaí
Ko Tīmoté ko ha kiʻi talavou naʻe fiefia ke tokoni ki he kakaí. Naʻá ne fononga ki he ngaahi feituʻu lahi ke tokoni ki he niʻihi kehé. ʻI he meʻá ni, naʻe ʻai ia ke ne moʻui fiefia ʻaupito. Te ke saiʻia ke fanongo ki he talanoa ʻo Tīmoté?—
Ko e faʻē ʻa Tīmoté mo ʻene kui fefiné naʻá na akoʻi ia fekauʻaki mo Sihova
Naʻe tupu hake ʻa Tīmote ʻi he kolo ko Līsita. ʻI heʻene kei siʻí, ko ʻene kui fefiné ʻa Loisi mo ʻene faʻeé ʻa ʻIunisi, naʻá na kamata akoʻi ia fekauʻaki mo Sihova. ʻI he lahi hake ʻa Tīmoté, naʻá ne loto ke tokoniʻi ʻa e niʻihi kehé ke ako fekauʻaki mo Sihova.
ʻI he kei talavou ʻa Tīmoté, naʻe kole ʻe Paula kiate ia ke na fononga fakataha ʻo malanga ki he ngaahi feituʻu kehé. Naʻe tala ange ʻe Tīmote: ‘ʻIo!’ Naʻá ne mateuteu ke ʻalu mo tokoni ki he niʻihi kehé.
Naʻe fononga ʻa Tīmote mo Paula ki ha kolo ʻi Masitōnia naʻe ui ko Tesalonaika. Ke aʻu ki aí, naʻe pau ke na lue ʻi ha fononga mamaʻo pea heka leva he vaká. ʻI heʻena aʻú pē, naʻá na tokoniʻi ʻa e kakai tokolahi ke ako fekauʻaki mo Sihova. Ka naʻe ʻita ʻa e kakai ʻe niʻihi mo feinga ke fakamamahiʻi kinaua. Ko ia naʻe pau ke mavahe ʻa Paula mo Tīmote ʻo malanga ʻi he ngaahi feituʻu kehé.
Naʻe maʻu ʻe Tīmote ha moʻui ʻoku fakafiefia mo fakalata
ʻI ha ngaahi māhina ki mui ai, naʻe kole ʻe Paula kia Tīmote ke toe foki ki Tesalonaika ʻo vakai pe ʻoku fēfē ʻa e fanga tokouá. Naʻe fiemaʻu ha loto-toʻa lahi ke toe foki ki he kolo fakatuʻutāmaki ko iá! Ka naʻe ʻalu ʻa Tīmote koeʻuhí naʻá ne hohaʻa fekauʻaki mo e fanga tokoua ʻi aí. Naʻá ne foki mai kia Paula mo e ongoongo lelei. Ko e fanga tokoua ʻi Tesalonaiká naʻa nau ʻi he tuʻunga lelei ʻaupito!
Naʻe ngāue fakataha ʻa Tīmote mo Paula ʻi he ngaahi taʻu lahi. Naʻe tuʻo taha ʻa e tohi ʻa Paula fekauʻaki mo Tīmote, ʻa e tokotaha lelei taha kuó ne ʻave ke tokoni ki he ngaahi fakatahaʻangá. Naʻe ʻofa ʻa Tīmote kia Sihova mo e kakaí.
ʻOkú ke ʻofa ki he kakaí mo loto ke tokoniʻi kinautolu ke ako fekauʻaki mo Sihova?— Kapau te ke fai ia, ʻe lava ke ke maʻu ha moʻui ʻoku fakafiefia mo fakalata ʻaupito ʻo hangē ko ia naʻe maʻu ʻe Tīmoté!