Ko ha Tohi mei he Kulupu Pulé

Siʻi Kaungā-Malanga ʻo e Ongoongo Leleí:

He monū maʻongoʻonga ē kuo tau maʻu ke hoko ʻo fāʻūtaha ʻi he lotu ki he ʻOtua moʻoni pē tahá, ʻa Sihova! ʻOku tau hoko ko hono “kaungāngāue,” ʻi heʻene tuku mai ʻa e fatongia ʻo e ngāue toputapu mo e faifakahaofi moʻuí ʻo fakafou ʻi he malanga mo e akoʻi ʻa e ongoongo lelei fekauʻaki mo hono Puleʻanga kuo ʻosi fokotuʻú. (1 Kol. 3:9; Māt. 28:19, 20) Ke fakahoko ʻi he melino mo e fāʻūtaha ʻa e ngāue ko ení ʻi māmani lahi, kuo pau ke tau hoko ʻo fokotuʻutuʻu maau.—1 Kol. 14:40.

Ko e tohi ko ení te ne tokoniʻi koe ke ke mahinoʻi ʻa e founga ʻoku fakalele ʻaki ʻa e fakatahaʻanga Kalisitiané ʻi he ʻahó ni. ʻOku fakamatala ai ki he ngaahi monū mo e ngaahi fatongia ko ia kuó ke maʻu ʻi ho tuʻunga ko e taha ʻo e Kau Fakamoʻoni ʻa Sihová. Kapau te ke fakamahuʻingaʻi ho ngaahi monuú pea fakahoko ho ngaahi fatongiá, te ke hoko ai ʻo “tuʻu mālohi ʻi he tuí.”—Ngā. 16:4, 5; Kal. 6:5.

Ko ia ai, ʻoku mau fakalototoʻaʻi koe ke ke ako fakamākukanga ʻa e tohi ko ení. Kumi ki ha ngaahi founga ʻe lava ke ke ngāueʻaki ai ʻa e ngaahi fakamatala ko ení ʻi hoʻo moʻuí tonu. Ko e fakatātaá, kapau kuó ke hoko ki muí ni ko ha tokotaha malanga teʻeki papitaiso, ko e hā ʻa e ngaahi sitepu kuo pau ke ke fou ai ke papitaiso ko e taha ʻo e Kau Fakamoʻoni ʻa Sihová? ʻI he tafaʻaki ʻe tahá, kapau ʻokú ke ʻosi papitaiso, ko e hā ʻe lava ke ke fai ke ke tupu fakalaumālie ai mo fakalahi atu hoʻo ngāue kia Sihová? (1 Tīm. 4:15) ʻE lava fēfē ke ke tokoni ki he melino ʻa e fakatahaʻanga? (2 Kol. 13:11) Kumi ʻa e tali ki he ngaahi fehuʻi ko iá ʻi he tohi ko ení.

Kapau ko ha tokoua ʻosi papitaiso koe, ko e hā ʻe lava ke ke fai ke taau ai ki he ngāue ko ha sevāniti fakafaifekau pea ki mui ko ha mātuʻa? ʻI he kei ʻaukolo mai ʻa e laui afe ʻo e faʻahinga foʻoú ki he kautaha ʻa e ʻOtuá, ʻoku ʻi ai ha fiemaʻu fakavavevave ki ha fanga tokoua taau ke nau takimuʻa. ʻE tokoni ʻa e tohi ko ení kiate koe ke ke ʻiloʻi ai ʻa e ngaahi meʻa ʻoku kau ʻi he “kakapa atu” ki he ngaahi taumuʻa fakalaumālie ko ení.—1 Tīm. 3:1.

ʻOku mau lotu tōtōivi ke tokoniʻi koe ʻe he tohi ko ení ke ke ʻiloʻi ho tuʻunga ʻi he fokotuʻutuʻu ʻa Sihová pea koloaʻaki ia. ʻOku mau ʻofa lahi atu kiate kimoutolu kotoa pea ʻoku mau lotu maʻu pē maʻa kimoutolu, ke mou ʻi he haʻohaʻonga ʻo e faʻahinga ko ia te nau maʻu ʻa e fiefia taʻengata ʻi he lotu ki heʻetau Tamai fakahēvaní, ʻa Sihova.—Saame 37:10, 11; ʻAi. 65:21-25.