Fanga Tokoua Kei Talavou, ʻOku Mou Kakapa Atu?
1. Ko fē ʻa e taimi ʻoku totonu ai ki ha tokoua kei talavou ke kamata ngāueʻaki ʻa e fakahinohino ʻoku maʻu ʻi he 1 Tīmote 3:1?
1 “Kapau ʻoku ʻi ai ha tangata ʻoku kakapa atu . . . , ʻokú ne holi ai ki ha ngāue lelei.” (1 Tīm. 3:1) Ko e ngaahi lea fakamānavaʻi ko iá ʻokú ne fakalototoʻaʻi ʻa e fanga tokouá ke nau kakapa atu ke taau ki he ngaahi monū ʻo e ngāue ʻi he fakatahaʻangá. Kuo pau nai ke ke hoko ko ha tokotaha lahi ka ke toki fai eni? Ko hono moʻoní, ko e lelei tahá ke kamata kakapa atu ʻi hoʻo kei talavoú. ʻI hoʻo fai ení ʻe lava ke ke maʻu ʻa e ngaahi ako pea fakahāhā hoʻo taau ke fakanofo ko ha sevāniti fakafaifekau ʻi hoʻo fuʻu lahi angé. (1 Tīm. 3:10) Kapau ko ha tokoua kei talavou ʻosi papitaiso koe, ʻe lava fēfē ke ke kakapa atu?
2. ʻE lava fēfē ke ke fakatupulekina mo fakahāhā ʻa e laumālie ʻo e feilaulauʻi-kitá?
2 Feilaulauʻi-Kita: Manatuʻi ʻokú ke kakapa atu ki ha ngāue lelei, kae ʻikai ko ha kumi tuʻunga. Ko ia ai, fakatupulekina ʻa e holi ke tokoniʻi ho fanga tokouá mo e tuofāfiné. Ko e founga ʻe taha ke fai ai ení ko e fakalaulauloto ki he faʻifaʻitakiʻanga lelei ʻa Sīsuú. (Māt. 20:28; Sione 4:6, 7; 13:4, 5) Kole kia Sihova ke ne tokoniʻi koe ke ke mahuʻingaʻia ʻi he niʻihi kehé. (1 Kol. 10:24) ʻE lava ke ke fai ha tokoni ʻaonga ki he faʻahinga ʻi he fakatahaʻangá ʻa ia ʻoku nau taʻumotuʻa pe mahamahakí? ʻOkú ke fakafaingamālieʻi ho taimí ke kosi e musié pe tokanga ki he ngaahi tafaʻaki kehekehe ʻi hono tauhi ʻa e Fale Fakatahaʻangá? ʻE lava ke ke pole ke fetongi ha malanga ʻi he Ako Fakafaifekau Fakateokalatí? Te ke ʻiloʻi ko hoʻo foaki atu ki he niʻihi kehé te ke maʻu ai ʻa e fiefia.—Ngā. 20:35.
3. ʻOku mahuʻinga fēfē ʻa e tuʻunga fakalaumālié pea ʻe lava fēfē ke fakatupulekina ia?
3 Tuʻunga Fakalaumālie: ʻOku mahuʻinga lahi ange ki ha sevāniti ʻi he fakatahaʻangá ke ne mālohi fakalaumālie ʻi haʻane maʻu ha ngaahi talēniti makehe pe lavameʻa. ʻOku feinga ʻa e tangata fakalaumālié ke vakai ki he ngaahi meʻá ʻo hangē ko Sihova mo Sīsuú. (1 Kol. 2:15, 16) ʻOkú ne fakahāhā ʻa e “fua ʻo e laumālié.” (Kal. 5:22, 23) Ko e tokotaha ʻevangeliō faivelenga ia ʻokú ne fakamuʻomuʻa ʻa e ngaahi meʻa mahuʻinga ʻo e Puleʻangá. (Māt. 6:33) ʻOku lava ke ke fakatupulekina ʻa e ngaahi ʻulungaanga fakalaumālié ʻaki hano ʻai ha founga tuʻumaʻu ʻo e ako fakafoʻituituí. ʻOku kau heni ʻa e lau ʻo e Tohi Tapú ʻi he ʻaho kotoa pē, lau ʻa e ʻīsiu taki taha ʻo e Taua Leʻo mo e ʻĀ Hake! pea mateuteu ke kau ki he ngaahi fakataha ʻa e fakatahaʻangá. (Saame 1:1, 2; Hep. 10:24, 25) ʻI hono fakalototoʻaʻi ʻa e talavou ko Tīmoté ke laka ki muʻa fakalaumālié, naʻe tohi ʻa Paula: “Tokanga maʻu ai pē . . . ki hoʻo faiako ʻoku faí.” (1 Tīm. 4:15, 16) Ko ia, ngāue mālohi ʻi hoʻo malanga kuo vaheʻi atu ʻi he Ako Fakafaifekau Fakateokalatí. Teuteu lelei ki he ngāue fakafaifekaú pea kau tuʻumaʻu ki ai. Fokotuʻu pea ngāue ki he ngaahi taumuʻa fakalaumālié ʻo hangē nai ko e tāimuʻá, ngāue Pēteli pe kau ki he Ako Fakatohitapu Maʻá e Fanga Tokoua Taʻemalí. ʻE tokoniʻi koe ʻe hoʻo tuʻunga fakalaumālié ke ke “hola mei he ngaahi holi fakatalavoú.”—2 Tīm. 2:22.
4. Ko e hā ʻa e mahuʻinga ʻo e falalaʻangá mo faitōnungá?
4 Falalaʻanga mo Faitōnunga: Koeʻuhi ko e fanga tokoua naʻe vaheʻi ke nau tufaki ʻa e meʻakaí ki he kau Kalisitiane masiva ʻi he ʻuluaki senitulí naʻa nau “ongoongo-lelei” pea toe ʻiloa ʻi he hoko ʻo falalaʻanga mo faitōnungá, naʻe ʻikai leva ke toe hohaʻa ʻa e kau ʻapositoló pe ʻe lava nai ʻo fakahoko ʻa e ngāué. Naʻe malava ai heni ke nau tāfataha ki he ngaahi meʻa mahuʻinga kehé. (Ngā. 6:1-4) Ko ia ai, ʻi he taimi ʻoku vaheʻi atu ai ha ngāue ʻi he fakatahaʻangá, fai ia ʻi he lelei taha te ke malavá. Faʻifaʻitaki kia Noa, ʻa ia naʻe muimui totonu ki he ngaahi fakahinohino naʻe ʻoange kiate ia ki hono faʻu ʻo e ʻaʻaké. (Sēn. 6:22) ʻOku fakamahuʻingaʻi ʻe Sihova ʻa e faitōnungá mo e fakahāhā ʻa e matuʻotuʻa fakalaumālié.—1 Kol. 4:2; sio ki he puha “Ko e ʻAonga ʻo e Akó.”
5. Ko e hā ʻoku totonu ai ke kakapa atu ʻa e fanga tokoua kei talavoú?
5 Hangē ko ia naʻe kikiteʻí, ko Sihova te ne fakavaveʻi hono fakatahatahaʻí. (ʻAi. 60:22) Ko e ʻavalisí, ko e kakai ʻe toko ua kilu nima mano ʻoku nau papitaiso ʻi he taʻu taki taha. ʻI he fuʻu tokolahi ʻa e faʻahinga foʻou ʻoku nau haʻu ki he moʻoní, ʻoku fiemaʻu ai ʻa e kau tangata ʻoku nau taau fakalaumālie ke tokangaʻi ʻa e ngaahi fatongia ʻi he fakatahaʻangá. ʻI he taimí ni ʻo laka ange ia ʻi ha toe taimi, ʻoku lahi fau ʻa e meʻa ke fai ʻi he ngāue ʻa Sihová. (1 Kol. 15:58) Fanga tokoua kei talavou, ʻoku mou kakapa atu? Kapau ko ia, ʻoku mou holi ai ki ha ngāue lelei ʻaupito!
[Fakamatala ʻi he peesi 2]
ʻI he fuʻu tokolahi ʻa e faʻahinga foʻou ʻoku nau haʻu ki he moʻoní, ʻoku fiemaʻu ai ʻa e kau tangata ʻoku nau taau fakalaumālie ke tokangaʻi ʻa e ngaahi fatongia ʻi he fakatahaʻangá
[Puha ʻi he peesi 3]
Ko e ʻAonga ʻo e Akó
ʻOku maʻu ʻaonga ʻa e fanga tokoua kei talavou kuo nau tāú ʻi he taimi naʻe vaheʻi ai ʻe he kau mātuʻá ke nau fai ha ngaahi konga mo akoʻi kinautolu. Naʻe tangutu ha ʻovasia sēketi ʻi he siteisí ʻo fai ha fakalototoʻa ki ha tokotaha malanga ʻi he tuku ʻa e fakatahá. Naʻá ne fakatokangaʻi ha kiʻi tamasiʻi ʻoku tuʻu ʻi he tafaʻakí, ko ia naʻá ne ʻeke ange pe ko ʻene tatalí ke lea ange ki ai. Naʻe tali ange ʻe he tokoua kei talavoú naʻe vaheʻi ia ke vekiume ʻa e siteisí ʻi he tuku ʻa e fakataha kotoa pē. ʻOku teu ke mavahe ʻene ongo mātuʻá, ka ʻoku ʻikai ke loto ia ke ʻalu ʻoku teʻeki ai fakahoko ʻene ngāué. Naʻe mavahe loto-lelei leva ʻa e sēketi ʻovasiá. Naʻá ne fakamatala: “Ko e kau mātuʻa ʻi he fakatahaʻanga ko iá naʻa nau tokanga ki hono akoʻi ʻa e fanga tokoua kei talavoú ʻaki hono ʻoange kiate kinautolu ʻa e ngaahi ngāue ʻi he fakatahaʻangá. Ko hono olá leva, ʻoku ʻikai ko ha meʻa foʻou ia kiate kinautolu ke fokotuʻu ha tokoua kei talavou ko ha sevāniti fakafaifekau ʻi he taimi naʻá ku ʻaʻahi ai ki he fakatahaʻangá.”