LĒSONI 34
ʻE Anga-Fēfē Haʻatau Fakahaaʻi ʻOku Tau ʻOfa kia Sihova?
Kuó ke ʻofa lahi ange ki he ʻOtuá talu mei hoʻo kamata ako ʻa e Tohi Tapú? ʻOkú ke loto ke hokohoko atu hono fakaivimālohiʻi ho kaumeʻa mo iá? Kapau ko ia, manatuʻi ko e lahi ange ʻa e sio mai ʻa Sihova ki he tupu hoʻo ʻofá, ko e lahi ange ia ʻene ʻofa mo tokanga mai kiate koé. ʻE anga-fēfē haʻo fakahaaʻi ʻokú ke ʻofa ʻiate ia?
1. ʻE anga-fēfē haʻatau fakahaaʻi kia Sihova ʻoku tau ʻofa ʻiate ia?
ʻOku tau fakahaaʻi ʻetau ʻofa kia Sihová ʻaki ʻa e talangofua kiate ia. (Lau ʻa e 1 Sione 5:3.) ʻOku ʻikai ke ne fakamālohiʻi ha taha ke talangofua kiate ia. Kae kehe, ʻokú ne ʻomai ki he tokotaha taki taha ʻo kitautolu ʻa e faingamālie ke fili pe te tau talangofua kiate ia pe ʻikai. Ko e hā hono ʻuhingá? ʻOku loto mai ʻa Sihova ke tau “talangofua mei he lotó.” (Loma 6:17) ʻA ia ko hono ʻuhingá, ʻokú ne loto ke ke talangofua ange kiate ia ʻo ʻikai ko e ʻuhingá pē kuo pau ke ke fai ia, ka koeʻuhí ʻokú ke ʻofa ʻiate ia. Ko e Konga 3 mo e 4 ʻo e tohi ko ení kuo fakataumuʻa ia ke ne tokoniʻi koe ke fakahaaʻi hoʻo ʻofa kia Sihová ʻaki hono fai ʻa e ngaahi meʻa ʻoku fakahōifua kiate iá pea fakaʻehiʻehi mei he ngaahi meʻa ʻoku taʻefakahōifua kiate iá.
2. Ko e hā ko ha pole ai ke fakahāhā ʻetau ʻofa kia Sihová?
“ʻOku lahi ʻa e faingataʻaʻia ʻa e tokotaha māʻoniʻoní.” (Saame 34:19) ʻOku tau faitau kotoa mo hotau ngaahi taʻehaohaoá tonu. ʻOku tau toe fehangahangai foki mo e ngaahi palopalema fakaʻekonōmika, fakamaau taʻetotonu mo e ngaahi faingataʻa kehe. ʻE faingataʻa nai ke tau fai ʻa e meʻa ʻoku kole mai ʻe Sihová ʻi he taimi ʻoku tau fehangahangai ai mo e ngaahi faingataʻá. Ko hono ʻuhingá he ko e ʻalunga halá ʻoku faingofua ange nai ke fou ai. Ka ʻi hoʻo faitōnunga pē ʻi he meʻa ʻoku tala atu ʻe Sihová, ʻokú ke fakahaaʻi ai ʻokú ke ʻofa ʻiate ia ʻo lahi ange ia ʻi ha toe meʻa. ʻOkú ke toe fakamoʻoniʻi ʻa hoʻo mateaki kiate iá. Ko ia ai, te ne mateaki atu kiate koe. Heʻikai ʻaupito ke ne liʻaki koe.—Lau ʻa e Saame 4:3.
KELI LOLOTO ANGE
Ako ki he ʻuhinga ʻoku fiefia ai ʻa Sihova ʻi hoʻo talangofuá pea mo e meʻa te ne tokoniʻi koe ke fai ení.
3. ʻOku tukuakiʻi koe ʻe Sētane
ʻOku tau lau ʻi he tohi ʻa Siopé naʻe tukuakiʻi ʻe Sētane ʻa Siope mo e kakai kotoa pē ʻoku nau loto ke tauhi kia Sihová. Lau ʻa e Siope 1:1, 6–2:10, pea lāulea leva ki he ongo fehuʻi ko ení:
Fakatatau kia Sētane, ko e hā naʻe talangofua ai ʻa Siope kia Sihová?—Sio ki he Siope 1:9-11.
Ko e hā naʻe leaʻaki ʻe Sētane fekauʻaki mo e kotoa ʻo e faʻahinga ʻo e tangatá, ʻo kau ai koe?—Sio ki he Siope 2:4.
Lau ʻa e Siope 27:5e, pea lāulea leva ki he fehuʻi ko ení:
Naʻe anga-fēfē hono fakamoʻoniʻi ʻe Siope naʻá ne ʻofa moʻoni kia Sihova?
Naʻe fakamoʻoniʻi ʻe Siope ʻene ʻofa kia Sihová ʻaki ʻa e hanganaki mateaki kiate ia
ʻOku tau fakamoʻoniʻi ʻetau ʻofa kia Sihová ʻaki ʻa e hanganaki mateaki kiate ia
4. ʻAi ʻa e loto ʻo Sihová ke fiefia
Lau ʻa e Palōveepi 27:11, pea lāulea leva ki he fehuʻi ko ení:
Ko e hā ʻoku fiefia ai ʻa Sihova ʻi hoʻo talangofua ange kiate ia mo fai ʻa e ngaahi fili leleí?
5. ʻOku lava ke ke mateaki kia Sihova
ʻOku ueʻi kitautolu ʻe heʻetau ʻofa kia Sihová ke tala ki he niʻihi kehé fekauʻaki mo ia. ʻOku ueʻi kitautolu ʻe heʻetau mateaki kiate iá ke fai pehē naʻa mo e taimi ʻoku ʻikai ke faingofua aí. Huluʻi ʻa e VITIOÓ, pea lāulea leva ki he ongo fehuʻi hokó.
ʻOku faingataʻa kiate koe ke lea ki he niʻihi kehé fekauʻaki mo Sihova?
ʻI he vitioó, ko e hā naʻá ne tokoniʻi ʻa Soni ke ne ikuʻi ʻene ilifiá?
ʻOku faingofua ange ke mateaki kia Sihova ʻi he taimi ʻoku tau ʻofa ki he meʻa ʻokú ne ʻofa aí pea fehiʻa ʻi he meʻa ʻokú ne fehiʻa aí. Lau ʻa e Saame 97:10, pea lāulea leva ki he ngaahi fehuʻi ko ení:
Makatuʻunga ʻi he meʻa kuó ke akó, ko e hā ʻa e ngaahi meʻa ʻoku ʻofa ai ʻa Sihová? Ko e hā ʻa e ngaahi meʻa ʻokú ne fehiʻa aí?
ʻOku lava fēfē ke ke fakatupulekina ʻa e ʻofa ki he meʻa ʻoku leleí pea fehiʻa ki he meʻa ʻoku koví?
6. ʻOku tau maʻu ʻaonga ʻi heʻetau talangofua kia Sihová
ʻOku tau maʻu ʻaonga maʻu pē ʻi heʻetau talangofua kia Sihová. Lau ʻa e ʻAisea 48:17, 18, pea lāulea leva ki he ngaahi fehuʻi ko ení:
ʻOkú ke tui moʻoni ko e meʻa kotoa pē ʻoku kole mai ʻe Sihova ke tau faí ʻoku ʻaonga maʻu pē kiate kitautolu? Ko e hā hono ʻuhingá?
Ko e hā ʻa e ngaahi ʻaonga kuó ke maʻu talu mei hoʻo ako ʻa e Tohi Tapú pea hoko ʻo ʻiloʻi ʻa e ʻOtua moʻoni ko Sihová?
ʻOKU PEHĒ ʻE HE NIʻIHI: “Tatau ai pē pe ko e hā ʻoku ou faí ʻoku ʻikai tokanga mai ʻa e ʻOtuá ia.”
Ko e hā ha konga Tohi Tapu ʻe lava ke ke ngāueʻaki ke fakahaaʻi ko ʻetau ngaahi ngāué ʻe lava ke mamahi pe fiefia ai ʻa Sihova?
FAKANOUNOU
ʻOku lava ke ke fakahaaʻi hoʻo ʻofa kia Sihová ʻaki ʻa e talangofua kiate ia pea hanganaki mateaki kiate ia neongo ʻa e ngaahi faingataʻá.
Fakamanatu
Ko e hā naʻá ke ako mei he faʻifaʻitakiʻanga ʻa Siopé?
ʻE anga-fēfē haʻo fakamoʻoniʻi hoʻo ʻofa kia Sihová?
Ko e hā te ne tokoniʻi koe ke nofoʻaki mateaki kia Sihová?
AKO LAHI ANGE
Ako ki he founga ke ke mateaki ai kia Sihova mo e fakatahaʻangá.
“Ki he Tokotaha ʻOku Mateakí ʻOkú Ke Faimateaki ki Ai” (16:44)
Ako lahi ange fekauʻaki mo hono tukuakiʻi ʻe Sētane ʻa e faʻahinga ʻo e tangatá.
“Naʻe Tauhi ʻe Siope ʻEne Anga-Tonú” (Ko e Tohi Tapú—Ko e Hā ʻEne Pōpoakí? konga 6)
Ako ki he anga hono fakahāhā ʻe he fānaú ʻenau ʻofa kia Sihová.
ʻOku anga-fēfē faitōnunga ʻa ha toʻutupu kia Sihova neongo ʻa e feinga ʻa e niʻihi kehé ke ʻai ia ke ne fai ha meʻa ʻoku hala?