ʻOku Fēfē Hono Lelei ʻa Hoʻo ʻIlo ʻa e Tohitapú?

‘Ko e tohi ʻa Tōmasi? ʻIo, ʻoku ʻi he Tohitapú ia. Ka ʻoku ʻikai ke ʻi ai ha tohi ia ʻa Siona. Ko e feituʻu naʻe ʻaloʻi ai ʻa Kalaisí? ʻIo, ko Selusalema​—pe ko Nasaleti ʻapē? ʻOku ʻikai te u ʻilo fakapapauʻi pē ko e tohi ʻa ʻAiseá ʻoku ʻi he ʻuluaki konga ʻo e Tohitapú pe ʻi he konga hono uá. Ko e tokolahi ʻo e kau ʻapositoló? ʻOku ʻikai te u ʻiloʻi ʻe au.’

“KAPAU naʻe tānaki pē eni mei ha faʻahinga ʻoku ʻikai ko ha kau Kalisitiane, ʻe ʻikai ke fakaʻohovale ʻa e ngaahi fakakaukau pehē,” ko e lau ia ʻa e makasini ko e Christianity Today. “Ko e meʻa ʻoku fakaʻohovalé​—mo fakahohaʻá​—ko e lahi ʻa e fakapoʻuli faka-Tohitapu naʻe ʻiloʻi ʻi he lotolotonga ʻo e kau Kalisitiane fanauʻi-foʻoú.”

Hangē ko ení, ko e peseti ʻe 22 ʻo e kau Kalisitiane lau pē naʻe saveaʻi naʻa nau fakakaukau ʻoku moʻoni ʻoku ʻi ai ʻa e tohi ʻa Tōmasi ʻi he Tohitapú, kae peseti ʻe 13 naʻe ʻikai te nau ʻilo fakapapauʻi. Fekauʻaki mo e tohi Sioná, ko e peseti ʻe 27 naʻa nau pehē ʻoku ʻikai ke ʻi he Tohitapú, mo e peseti ʻe 12 naʻe ʻikai ke ʻi ai haʻanau momoʻi fakakaukau ki ai. Ko e peseti ʻe 6 naʻe ʻikai te nau malava ʻo mateʻi pe ko e fē ʻa e feituʻu naʻe ʻaloʻi ai ʻa Kalaisí, kae peseti ʻe 16 naʻa nau pehē ko Selusalema, pea peseti ʻe 8 naʻa nau pehē ko Nasaleti. Ko e peseti ʻe 13 kakato naʻe ʻikai ke ʻi ai haʻanau momoʻi fakakaukau pē ʻe maʻu ʻa e tohi ʻAiseá ʻi fē ʻi he Tohitapú, kae peseti ʻe 11 naʻa nau pehē ʻoku tuʻu ia ʻi he Konga Tohitapu Faka-Kalisi Kalisitiané (“Fuakava Foʻou”). Pea neongo ko e tokolahi taha naʻa nau ʻilo naʻe ʻi ai ʻa e kau ʻapositolo ʻe toko 12, ka ko e peseti ʻe 12 naʻa nau toe ʻomai ʻa e fika kehe, mei he toko 2 ki he lahi hake he toko 20, pea peseti ʻe 10 naʻe ʻikai ke ʻi ai haʻanau momoʻi fakakaukau ki ai ʻe taha.

Ko e fehuʻi naʻe faingataʻa lahi tahá pe ʻoku ʻi he Tohitapú pe ʻikai ʻa e kupuʻi lea ko ení, “ʻOku tokoni ʻa e ʻOtua kiate kinautolu ʻoku nau tokoniʻi ʻa kinautolu pē.” Ko e peseti pē ʻe 38 ʻo e “kau Kalisitiane” naʻe saveaʻi naʻa nau ʻilo ʻoku ʻikai ke ʻasi ia ʻi he Tohitapú, ka ko e toko lahi angé, ko e peseti ʻe 42, naʻa nau fakakaukau ko e kupuʻi lea ʻoku ʻi he Tohitapú. Ko e toengá naʻe ʻikai te nau ʻiloʻi.

ʻOku ʻeke ʻe he Christianity Today: “Ko e hā hono ʻuhinga ʻoku ʻi ai ai ʻa e fakapoʻuli pehē fau ʻo kau ki he Tohitapú? ʻOku hangehangē ko ʻene hoko mai mei he siʻisiʻi hono lau ʻo e Tohitapú. Ko e vaeua ʻo e kakai ʻAmeliká kotoa ʻoku ʻikai te nau lau ʻa e Tohitapú. Ko e tokolahi taha ʻo e kau Kalisitiane fanauʻi-foʻoú ʻoku nau lau tuʻo taha pe tuʻo ua he uike ʻa e Tohitapú, pe ko e ʻikai ʻaupito. Tā neʻineʻi ke tokolahi ʻa e kau Kalisitiane ʻoku siʻisiʻi ʻenau ʻilo ʻo kau ki he Tohitapú!”