“Mālohi mo Fakatupu Tuipau”
“KAMATA ʻapongipongi te u ngāueʻaki ai ia ʻi he ngāue fakamalangá, he ko e ngaahi fakamatala ʻoku ʻi aí ʻoku mātuʻaki mālohi mo fakatupu tuipau,” ko e tohi ia naʻe fai ʻe ha taha ʻo e Kau Fakamoʻoni ʻa Sihová mei Falanisē. Naʻe tohi ha tokotaha Fakamoʻoni mei he ʻIunaite Seteté: “Naʻá ku lau leva ia pea ʻoku ʻikai lava ke u toe tatali ʻi hono ngāueʻaki ia ʻi he malaʻe malangá, ʻi heʻetau fetaulaki mo e kakai tokolahi fau ko ia ʻoku loto-noa pea ʻoku ʻikai te nau falala ki he Tohitapú.” Ko e hā ʻa e meʻa naʻá na fakamatala ki aí? Ko e polosiua peesi 32 ʻoku fakakaveinga A Book for All People, ʻa ia naʻe tuku ange mai ʻe he Sōsaieti Taua Leʻó ʻi he Fakataha-Lahi Fakavahe “Tui ki he Folofola ʻa e ʻOtuá” naʻe fai he lolotonga ʻo e 1997/1998.
Naʻe teuteu ʻa e tohí ni mo ha fakakaukau ki he kau fanongo tefitó—ʻa e faʻahinga naʻa nau ako lelei nai ka ʻoku siʻisiʻi ʻaupito ʻenau ʻilo fekauʻaki mo e Tohitapú. Ko e tokolahi ʻi he faʻahinga tāutaha peheé ʻoku nau maʻu ha ngaahi fakakaukau pau fekauʻaki mo e Tohitapú, neongo kuo teʻeki ai ʻaupito te nau lau ia. Ko e taumuʻa ʻo e polosiuá ke fakatuipauʻi ʻa e tokotaha lau tohí, ʻoku taau ke sivisiviʻi ʻa e Tohitapú neongo ko e meʻa pē ia ʻoku malavá. ʻOku ʻikai kounaʻi ʻe he polosiuá ʻa e tokotaha lau tohí ke ne tali ʻa e foʻi fakakaukau ko ia ko e Tohitapú ko e fakamānavaʻi ʻe he ʻOtuá. Ka, ʻokú ne tuku pē ki he ngaahi moʻoniʻi meʻá ke nau lea pē maʻanautolu. ʻOku ʻikai ke fakamamalu ʻa hono fakaleá, ka ʻoku mahino mo hangatonu.
Hangē ko ia ʻoku fakahaaʻi ʻe he ongo fakamatala ʻoku hiki ʻi ʻolungá, ko e faʻahinga naʻe ʻi he ngaahi fakataha-lahí naʻa nau loto-vēkeveke ke ngāueʻaki ʻa e polosiuá ni ʻi heʻenau ngāue fakamalangá. Ko e fakatātaá, naʻe fokotuʻutuʻu ʻi Falanisē ha feingangāue fakamoʻoni makehe ki ʻAokosi 23 mo e 24 ʻi he fakatahataha mai ʻa e kau ʻaʻahi kei talavou ʻe laui kilu mei he takatakai ʻo e māmaní ki Pālesi ki he ʻAho ʻa Māmani ki he Kau Talavoú. Ko e Kau Fakamoʻoni nai ʻe toko 2,500 (ko e tokolahi tahá mei he taʻu 16 ki he 30) naʻa nau tufa ʻa e ngaahi tatau ʻe 18,000 ʻo e polosiuá ʻi he lea faka-Falanisē, Pilitānia, Pōlani, Siamane, Sipeini, mo e faka-ʻĪtali.
ʻAki ʻa e founga kotoa ʻe ala lavá, tau ngāueʻaki ʻa e polosiuá ni, A Book for All People, ʻi heʻetau ngāue fakafaifekaú. ʻOfa ke fakamoʻoniʻi ʻa e ʻaonga ʻa e tohí ni ʻi hono fakatuipauʻi ʻa e kakai fakakaukau leleí ke nau ʻilo ʻoku totonu ke nau sivisiviʻi ʻa e Tohitapú maʻanautolu.