ʻOkú Ke ʻAʻā ki Hotau Taimí?
KO E hoko ʻo ʻāʻā ki he fakatuʻutāmakí ʻe lava ke ne ʻai ha faikehekehe ʻi he moʻuí mo e maté. ʻE lava ke fakatātaaʻi ʻa e meʻá ni ʻi he meʻa naʻe hoko ʻi he ongo motu moʻunga-afi ʻe ua.
Ko Moʻunga Pelée, ʻa e moʻunga-afi fakatupu mate taha ʻo e senituli hono 20, naʻe puna ai ʻa e afi ʻi he ʻaho 8 ʻo Mē, 1902, ʻi he motu Kalipiane ko Mātiniki. Naʻe mate ai ʻa e meimei kotoa ʻo e kakai ʻe toko 30,000 ʻo Saint Pierre, ko ha kolo ʻi he talalo ʻo e moʻunga-afí.
ʻI Sune 1991, naʻe pā ai ʻa Moʻunga Pinatubo ʻa ia ngalingali ko e puna lahi taha eni ʻa e afí ʻi he senituli ko ení. Naʻe hoko ia ʻi ha feituʻu nofoʻi tokolahi ʻo e ʻOtu Filipainí peá ne fakatupunga ʻa e mate ʻa ha toko 900 nai. Kae kehe, ʻi he taimi ko ení naʻe tokoni ai ʻa e meʻa tefito ʻe ua ki hono fakahaofi ʻa e ngaahi moʻui ʻe laui afe: (1) ʻāʻā ki he fakatuʻutāmakí pea (2) loto-lelei ke ngāue ʻo fehoanaki mo e ngaahi fakatokangá.
Ko e Ngāue Taimi Tonú Naʻá Ne Fakahaofi ʻa e Ngaahi Moʻui
Naʻe ʻikai ke toe ngāue ʻa Moʻunga Pinatubo feʻunga mo e taʻu ʻe lauingeau, ka, ʻi ʻEpeleli 1991, naʻe kamata ai ke ne fakahāhā ʻa e ngaahi fakaʻilonga ʻoku tuʻunuku mai ʻo haʻane pā. Naʻe kamata ke ʻalu hake ha mao mo ha sūlifa ʻokisaite mei he tumuʻaki ʻo e moʻungá. Naʻe ongoʻi ʻe he kau nofo ʻi he feituʻú ha ngalulululu hokohoko, pea naʻe kamata ke hā mai mei he moʻungá ha haʻahaʻa fuopotopoto ʻo e lava fefeka. Naʻe hanganaki siofi fakalelei ʻe he kau saienisi mei he Akoʻanga Filipaini ki he Saienisi ʻo e Moʻunga-Afí mo e Mofuiké pea faai pē ʻo nau fakalotoʻi ʻa e kau takí ʻe fakapotopoto ke fetukutuku ʻa e kau nofo ʻe toko 35,000 mei he fanga kiʻi feituʻu mo e kolo ofí.
ʻOku mahino naʻe ʻikai fiehola taʻehaʻuhinga ʻa e kakaí mei honau ngaahi ʻapí, ka naʻe ikuʻi ʻa e fakatuotuai ko iá ʻi hano huluʻi fakahāhā ha foʻi vitiō naʻe hā mataʻāʻā ai ʻa e ngaahi fakatuʻutāmaki ʻo ha puna ʻa ha moʻunga-afi. Naʻe taimi tonu ʻa e hiki tokolahi ko ení. ʻI he ʻaho ʻe ua ki mui ai, naʻe puhiʻi ai ʻe ha pahū lahi ʻa e efu kilomita ʻe valu ki he ʻatimosifiá. Naʻe tāmateʻi ai ʻa e lauingeau ki mui ʻe he pelepelá, pe pela fatú. Kae kehe, ngalingali naʻe fakahaofi ʻa e laui afe, koeʻuhi naʻe tokanga ʻa e kakaí ki he fakatuʻutāmakí pea naʻa nau fai ʻo fehoanaki mo e ngaahi fakatokangá.
Hao mei ha Fakatamaki Faʻu ʻe he Tangatá
ʻI he ʻuluaki senituli ʻo Hotau Kuongá, ko e kau Kalisitiane naʻe nofo ʻi Selusalemá naʻe toe pau foki ke nau fakapapauʻi pe naʻe totonu ke nau liʻaki honau ngaahi ʻapí. Ko e hola mei he kolo ko iá ʻi he 66 T.S. naʻá ne fakahaofi kinautolu mei he fakaʻauha naʻe tō ki he kau nofo kehe mo e kau Siu ko ia ʻe laui afe naʻa nau haʻu ki Selusalema ki he Pāsova ʻo e 70 T.S. Ko e kakai laka hake ʻi he taha milioná naʻa nau ʻi loto ʻi he kolo ʻaaʻi ko iá ki he kātoanga ʻo e Pāsová ʻi he taimi naʻe fakangata ai ʻe he kau tau Lomá ha toe faingamālie ki ha hola. Ko e hongé, ngaahi fefāingaʻaki fakaemafaí, mo e ngaahi ʻoho taʻefakavaivai ʻa e kau Lomá naʻe iku ia ki ha kau mate laka hake he taha milioná.
Ko e fakatamaki ko ia naʻá ne fakangata ʻa e anga-tuʻu ʻa e kau Siú ki Lomá naʻe ʻikai ke hoko mai ia taʻefanongonongo. ʻI he ngaahi hongofuluʻi taʻu ki muʻa ai, naʻe tomuʻa tala ai ʻe Sīsū Kalaisi ʻe ʻākoloʻi ʻa Selusalema. Naʻá ne pehē: “Ka ʻo ka mou ka vakai ki he kapui ʻo Selusalema ʻe he ngaahi matatau, te mou toki ʻilo kuo ofi hono fakaʻauha. Pea ke toki hola ki he moʻunga ʻa kinautolu ʻoku ʻi Siutea; pea ko kinautolu ʻoku ʻi loto kolo ke hiki mei ai; pea ko kinautolu ʻoku ʻi ʻuta ke ʻoua te nau hu ki he kolo.” (Luke 21:20, 21) Naʻe maʻalaʻala ʻa e ngaahi fakahinohino ko iá, pea naʻe tokanga fakamātoato ki ai ʻa e kau muimui ʻo Sīsuú.
ʻOku fakamatala ʻa e faihisitōlia Sesalia ko ʻIusepiuse he senituli hono faá naʻe fai ʻa e kau Kalisitiane ʻo e kotoa ʻo Siuteá ki he fakatokanga ʻa Sīsuú. ʻI he taimi naʻe liʻaki ai ʻe he kau Lomá ʻenau ʻuluaki ʻākoloʻi ʻo Selusalema ʻi he 66 T.S., naʻe ō ʻa e kau Kalisitiane Siu tokolahi ʻo nofo ʻi he kolo Senitaile ko Pelá, ʻi he vahefonua Loma ko Pēleá. ʻI heʻenau ʻāʻā ki honau taimí pea ʻi he fai ki he fakatokanga ʻa Sīsuú, naʻa nau hao ai mei he meʻa kuo fakamatalaʻi ko e “taha ʻo e ngaahi ʻākoloʻi fakalilifu taha ʻi he kotoa ʻo e hisitōliá.”
ʻI he ʻahó ni, ʻoku fiemaʻu ʻa e ʻāʻā meimei tatau. Pehē foki ki he ngāue pau. ʻE fakamatalaʻi ʻi he kupu hono hokó ʻa hono ʻuhingá.
[Maʻuʻanga ʻo e Tā ʻi he peesi 3]
Godo-Foto, West Stock