Ko e Ngaahi Palopalema Makehe ʻo e Ngaahi Fāmili-Uá
ALA MAʻU ʻA E NGAAHI FĀMILI-UA FIEFIA! ANGA-FĒFĒ?
Kuo hoko ʻa e fāmili-uá ko ha faʻahinga fāmili anga-maheni ia ʻi he ngaahi tafaʻaki lahi ʻo e māmaní. Neongo ia, ʻoku ʻi ai ʻa e ngaahi palopalema makehe ʻa e ngaahi fāmili-uá. Ko e tuʻunga faingataʻa tahá ʻoku ʻikai ha veiveiua ko hono ʻohake ʻo e fānaú. Kae kehe, hangē ko ia ʻe feinga ʻa e ongo kupu hoko maí ke fakahāʻí, ʻoku malava ke ʻohake lavameʻa ʻa e fānaú ʻi ha ʻātakai ʻo ha fāmili-ua.
ʻI he talatukufakaholó, ko e ngaahi tamai-uá mo e ngaahi faʻē-uá ne ʻikai fai ha lau lelei ki ai. ʻI he taimi ʻo ʻetau kei tamaikí, kuo fanongo ai ʻa e tokolahi ʻo kitautolu ki hono fakamatalaʻi ʻo e talanoa fananga kia Sinitalelá, ʻa ia naʻe faingataʻaʻia lahi ʻi he nima ʻo ʻene faʻē-ua anga-fakamamahí. Ko e fānau foki ʻi ʻIulopé ʻoku nau ʻiloʻi ʻa e talanoa fananga ko e Snow White and the Seven Dwarfs. Ko e faʻē-ua ʻa Snow White tā koā ko ha taula-faʻahikehe ia!
ʻOku ʻomai ʻe he ngaahi talanoa fananga peheé ha vakai totonu ki he ngaahi fāmili-uá? ʻOku mātuʻaki kovi moʻoni kotoa ʻa e ngaahi mātuʻa-uá ia? ʻIkai. Ko e tokolahi taha ʻo kinautolú ʻoku nau fiemaʻu pē ʻa e meʻa ʻe lelei taha ki he fānau ʻoku nau maʻu tupunga ʻi he malí. Ka kuo pau ke nau fehangahangai mo e ngaahi palopalema faingataʻa ʻe niʻihi ʻoku kau ki he moʻui ʻa e fāmili-uá.
Ko e Ngaahi Palopalema ʻo e Tauhi Fānaú
ʻI he taimi ʻoku movete ai ʻa e ʻuluaki nofo malí, ko e tupuʻangá ʻoku faʻa hoko ia ʻi he taʻematuʻotuʻa ʻa e ongo meʻá. ʻI ha nofo mali hono ua, ko e fekuki mo e fānaú ʻe lava ke ne fakafaingataʻaʻiaʻi ʻa e vahaʻangatae ko iá. ʻOku hā ʻi he ngaahi lēkooti ʻe niʻihi ʻoku laka hake he fāmili ʻe 4 mei he ngaahi fāmili tuifio ʻe 10 ʻoku iku ia ki ha vete mali ʻi loto ʻi he ʻuluaki ngaahi taʻu ʻe nimá.
ʻE ʻikai nai ʻiloʻi ʻe he ongo meʻa mali foʻoú ʻa e hohaʻa fakaeongó, ko e ngaahi fepakipaki ʻo e mateakí, mo e ngaahi ongoʻi meheka mo e tāufehiʻa ʻoku tupu hake ʻi he fānaú he hoko mai ʻa e mātuʻa-uá. ʻE fakakaukau nai ʻa e faʻahingá ni kuo fetongi ʻe he mātuʻa-uá kinautolu ʻi he ʻofa ʻa ʻenau mātuʻa totonú. ʻIkai ko ia pē, ko ha mātuʻa totonu kuo liʻaki ʻe ha hoa te ne ʻilo nai ʻoku faingataʻa ke mahino ʻa e hokohoko pipiki ʻa e fānaú ki he hoa ki muʻá. Naʻe feinga ʻa e tamasiʻi ʻe taha ke fakamatalaʻi hono vā lelei mo ʻene tamai totonú, ʻi heʻene pehē, “Mami, ʻoku ou ʻiloʻi ne ngaohikoviʻi koe ʻe Teti, ka naʻe failelei mai ia kiate au!” Ko ha fakamatala pehē, neongo ʻene moʻoní, ʻe lava ke ne ʻai ha faʻē ke ongoʻi tāufehiʻa loto-kona ki he tamai ʻene tamá.
Naʻe fakahaaʻi ʻe ha tamai-ua ʻe taha: “Ne ʻikai moʻoni te u mateuteu lelei ke fekuki mo e palopalema kotoa felāveʻi mo hono tauhi hake ʻeku fānau-uá. Ne u hoko ki he tuʻunga ʻo fakakaukau koeʻuhi kuó u mali eni mo ʻenau faʻeé, kuó u hoko ai ko ʻenau tamai. Ne hā ngali faingofua ia! Naʻe ʻikai mahino kiate au ʻa e pipiki ʻa e fānaú ki heʻenau tamai totonú, pea naʻá ku fai ʻa e ngaahi fehālaaki lahi.”
ʻOku malava ke malanga hake e ngaahi hohaʻa tautefito ʻi he meʻa fekauʻaki mo e akonakí. ʻOku fiemaʻu ʻe he fānaú ʻa e akonaki anga-ʻofa, ka ʻoku nau faʻa angatuʻu ki ai naʻa mo ʻene haʻu mei he mātuʻa totonú. He faingataʻa lahi ē ke tali ia mei he mātuʻa-uá! ʻI he anga-mahení, ʻi he taimi ʻoku fehangahangai ai mo e akonaki peheé, ko e tama-uá te ne leaʻaki e meʻa hangē ko e, “ʻOku ʻikai ʻaupito ko ʻeku tamaí koe!” He fakalotomamahi moʻoni ē ko e ngaahi lea peheé ki ha mātuʻa-ua ko e fai ʻuhinga lelei pē!
ʻE lava ke lavameʻa ʻa e tauhi fānaú ʻi ha fāmili tuifio pehē? ʻE lava ke fakahoko ʻe he ngaahi mātuʻa-uá ha ngafa pau ʻi hono langa hake ha fāmili-ua lavameʻa? Ko e tali ki he ongo fehuʻí fakatouʻosi ko e ʻio kapau ʻe muimui ʻa e tokotaha kotoa ʻoku kau ki aí ʻi he faleʻi he Folofola fakamānavaʻi ʻa e ʻOtuá, ko e Tohitapú.
[Fakatātā ʻi he peesi 3]
“ʻOku ʻikai ko ʻeku tamaí koe!”