Kilisimasí ʻi he Hahaké
• ʻI HE TAʻU NAI ʻE UANGEAU KUO MALIU ATÚ, naʻe ʻaʻahi ai ki Peking, Siaina, ha mataotao Kōlea ʻiloa. ʻI heʻene moʻusioa ʻi ha tāvalivali ʻi he ʻaofi ʻo ha falelotu, naʻá ne sio ai ki ha fakatātā ʻo Malia mo e kiʻi tama ko Sīsuú ʻi hono ongo nimá. Naʻá ne pehē fekauʻaki mo e tāvalivali fakaʻohovale ko ení:
“Ko ha fefine ʻokú ne pukepuke ʻi hono fungá ha kiʻi tama ʻoku mataʻi puke, ʻoku taʻu nima pe ono nai. Naʻá ne hā ngali naʻe ʻikai lava ke ne hanga hake ki ʻolunga, ʻo hangē ʻokú ne fakaʻofaʻia ʻo ʻikai lava ke sio ki heʻene tamá. Pea ʻi mui mamaʻo atu ʻiate kinauá, naʻe ʻi ai ʻa e ngaahi faʻahikehe tokolahi mo e fanga kiʻi pēpē mo honau ngaahi kapakau ʻoku nau puna takai holo. ʻI heʻeku moʻusioa ʻiate kinautolu ʻi ʻolunga ʻiate aú, ne hangē ia te nau tō hifo ʻiate au ʻi ha mōmeniti pē. ʻI heʻeku ʻohovalé, naʻá ku hapai hake hoku nimá ke hapo kinautolu.”
NAʻE hoko fuoloa e meʻa ko iá hili ʻa e kamata ʻi ʻIulope ʻa e Fakafoʻoú, ʻi ha taimi fuoloa hili ʻa e kuonga fakapoʻuli ʻo e Kuonga Lotolotó. Ka ki he tokolahi taha ʻo e faʻahinga ʻi he Hahaké, naʻe faikehe ʻa e lotu faka-Kalisitiané ʻo hangē pē ko e tāvalivalí. He liliu moʻoni ko e tuʻunga ko iá! ʻI he faʻahitaʻu Kilisimasi kotoa pē, ʻoku fakahaaʻi ai ʻa e ngaahi fakatātā ʻo e pēpē ko Sīsuú. Kuo hoko ʻo maheni ʻa e Hahaké mo e ngaahi fakatātā peheé, pea ʻi he taimí ni ʻoku tatau ʻa e ngaahi teuteu faka-Kilisimasi lahi ai mo ia ʻi ʻIulopé.
ʻI he efiafi ʻo Nōvema 25, 1998, ko ha māhina ʻe taha ki muʻa ʻi he Kilisimasí, ko Champs Élysées ʻi Pālesí ʻoku tutu ia ʻo fakaulo ngingila ia ʻi he fanga kiʻi foʻi ʻuhila laka hake ʻi he 100,000 ʻi he ʻuluʻakau ʻe 300 ʻoku nau laine ʻi he feituʻu ʻiloa ko iá. ʻI he fakahoa atu ki aí, ʻi ha hala he loto kolo ʻi Seoul, Kōleá, ʻoku fakaʻaliʻali ai ha fuʻu ʻakau Kilisimasi lahi ʻe ha falekoloa lahi pea kamata ke ne huhulu ʻa e poʻulí ʻi he kolomuʻa ko iá. Taimi nounou pē ʻoku teuʻi ʻa hono ngaahi halá ʻaki ʻa e ngaahi meʻateuteu Kilisimasí.
ʻOku ʻomai ʻi he televīsoné, letioó, mo e ngaahi nusipepá ʻi he ʻaho ki he ʻaho ʻa e ngaahi polokalama felāveʻi mo e Kilisimasí. ʻI hono ueʻi ʻe he ongo faka-Kilisimasí, ʻoku hoko leva ʻa e fonuá kotoa ʻo femoʻuekina ʻi hono talitali lelei ʻa e fakaʻosinga ʻo e taʻú. Ko e ngaahi siasi ʻi Seoul, ʻa ia ʻoku fakaʻohovale ʻa hono lahí ki he kau ʻaʻahi tokolahi, ʻoku teuteuʻi fakavave kinautolu. Ko ia ai, ko Kōlea mo e ngaahi fonua kehe ʻi he Hahaké ʻoku lōmekina kinautolu ʻe he laumālie ʻo e Kilisimasí ʻi he taimi nai ko ia ʻoku femoʻuekina ai ʻa e ʻIunaite Seteté ʻi he kātoanga ʻo e ʻAho Fakafetaʻí ʻi he konga ki mui ʻo Nōvemá.
Ko e ngaahi fonua lahi taha ʻo e Hahaké ʻoku ʻikai vakai ki ai ko ha konga ia ʻo Puleʻanga-Haʻa-Kalisitiane. Hangē ko ení, ko e peseti pē ʻe 26.3 ʻo e tokolahi ʻo Kōleá ʻoku nau taku ko e Kalisitiané. ʻI Hongo Kongo ʻoku peseti ʻe 7.9, ʻi Taiuani ʻoku peseti ʻe 7.4, pea ʻi Siapani ʻoku peseti pē ʻe 1.2. ʻOku hā mahino, ko e tokolahi taha ʻo e faʻahinga ʻi he Hahaké ʻoku ʻikai ke nau fai ʻa e lotu faka-Kalisitiané, ka ʻoku hā ʻoku ʻikai haʻanau fakafepaki ki hono kātoangaʻi ʻo e Kilisimasí. Ko hono moʻoní, ʻoku nau faʻa hā loto-māfana lahi ange fekauʻaki mo ia ʻi heʻene ngaahi faʻahi ʻi he Hihifó. Hangē ko ení, ʻoku ʻiloa ʻa Hongo Kongo, ʻi heʻene kātoanga Kilisimasi teuteuʻi mataʻāʻaá, neongo ko e tokolahi taha ʻo hono kakaí ʻoku nau lotu-Puta pē pe lotu-Tao. Naʻa mo Siaina, ʻa ia ko e peseti pē 0.1 ai ʻoku taku ʻoku nau Kalisitiané, ʻoku mātuʻaki manakoa fakautuutu ai ʻa e Kilisimasí.
Ko e hā ʻoku kātoangaʻi mātuʻaki lahi ai ʻa e Kilisimasí ʻi he Hahaké? Ko e hā ʻoku kau ai ʻa e kakai ʻa ia ʻoku ʻikai te nau tali ʻa Sīsū ko e Mīsaiá ʻi hono kātoangaʻi ʻa e Kilisimasí, ʻa ia ʻoku vakai ki ai ʻa e tokolahi taha ʻoku taku ko e kau Kalisitiané ko hono ʻaho ʻaloʻí? ʻOku totonu ke faʻifaʻitaki ʻa e kau Kalisitiane moʻoní ki heʻenau fakakaukau ki he Kilisimasí? Te tau maʻu ʻa e ngaahi talí ʻi heʻetau lāulea ki he founga naʻe hoko ai ʻo manakoa ʻa e Kilisimasí ʻi Kōlea, ko ha fonua motuʻa ʻo e Hahaké.