Ko e Kau Faitau Fakafepaki ki he ʻOtuá ʻe ʻIkai Te Nau Ikuna!
“Pea te nau tau mo koe; ka ʻe ʻikai te nau lavaʻi koe.”—SELEMAIA 1:19.
1. Ko e hā ʻa e fekau naʻe maʻu ʻe Selemaiá, pea ko e hā hono fuoloa ʻo e hokohoko atu ʻo ʻene ngāué?
NAʻE fekauʻi ʻe Sihova ʻa e kiʻi talavou ko Selemaiá ke ne hoko ko ha palōfita ki he ngaahi puleʻangá. (Selemaia 1:5) Naʻe hoko eni lolotonga ʻa e pule ʻa Tuʻi Siosaia lelei ʻo Siutá. Ko e ngāue fakapalōfita ʻa Selemaiá naʻe hokohoko mai ia ʻi he vahaʻa taimi taʻemanonga ki muʻa ʻi hono ikunaʻi ko ia ʻe Pāpilone ʻa Selusalemá ʻo aʻu mai ki hono takiheeʻi ʻo e kakai ʻa e ʻOtuá.—Selemaia 1:1-3.
2. Naʻe anga-fēfē hono fakaivimālohiʻi ʻe Sihova ʻa Selemaiá, pea ko e faitau ki he palōfita ko iá naʻe ʻuhinga ia ko e hā?
2 Ko e ngaahi pōpoaki fakaefakamaau naʻe teu ke fakahā ʻe Selemaiá naʻe pau ke ne langaʻi ʻa e fakafepaki. Ko ia ai, naʻe fakalotolahiʻi ʻe he ʻOtuá ia ki he meʻa naʻe toka mei muʻá. (Selemaia1:8-10) Hangē ko ení, naʻe fakaivia ʻa e laumālie ʻo e palōfitá ʻe he ngaahi lea: “Pea te nau tau mo koe; ka ʻe ʻikai te nau lavaʻi koe: he ʻoku ou ʻiate koe ke fai ho fakahaofi—ko Sihova ia mei he Taʻehamai.” (Selemaia 1:19) Ko e faitau kia Selemaiá ʻe ʻuhinga ia ko e faitau ki he ʻOtuá. ʻI he ʻahó ni, ko Sihová ʻoku ʻi ai ʻene kulupu ʻo e kau sevāniti hangē ha palōfitá ʻa ia ko ʻenau ngāué ʻoku meimei tatau mo e ngāue ko ia ʻa Selemaiá. Hangē ko iá, ʻoku nau talaki loto-toʻa ʻa e folofola fakaekikite ʻa e ʻOtuá. Pea ʻoku kaunga ʻa e pōpoaki ko ení ki he faʻahinga tāutaha mo e puleʻanga kotoa ki he lelei pe ki he kovi, ʻo fakatuʻunga ʻi he anga ʻo ʻenau tali ki aí. Hangē ko ia ʻi he taimi ʻo Selemaiá, ʻoku ʻi ai ʻa e faʻahinga ʻoku nau faitau ki he ʻOtuá ʻaki hono fakafepakiʻi ʻene kau sevānití mo ʻenau ngaahi ngāue fakaʻotua kuo vaheʻí.
ʻOhofi ʻa e Kau Sevāniti ʻa Sihová
3. Ko e hā kuo ʻohofi ai ʻa e kau sevāniti ʻa Sihová?
3 Kuo ʻohofi ʻa e kau sevāniti ʻa Sihová talu mei he konga ki muʻa ʻo e senituli hono 20. ʻI he ngaahi fonua lahi, ko e kau tangata ʻoku taumuʻa fulikivanú kuo nau kumi ke taʻofi—ʻio, ʻo fakasīlongoʻi—ʻa hono talaki ʻa e ongoongo lelei ʻo e Puleʻanga ʻo e ʻOtuá. Kuo fakaʻaiʻai kinautolu ʻe hotau Fili lahi, ko e Tēvoló, ʻa ia “ʻoku ne ʻalu fano ʻo hange ko ha laione ngungulu, heʻene kumi ha taha ke ne matuʻaki folo.” (1 Pita 5:8) Hili e ngata “ʻa e ngaahi kuonga ʻo e Senitaile” ʻi he 1914, naʻe fakanofo ʻe he ʻOtuá ʻa hono ʻAló ke hoko ko e Tuʻi foʻou ʻo e māmaní, fakataha mo e fekau: “ʻI he lotolotonga ʻo ho ngaahi fili, pule pe koe.” (Luke 21:24; Sāme 110:2) ʻI hono ngāueʻi ʻa hono mafaí, naʻe tuli hifo ʻe Kalaisi ʻa Sētane mei hēvani pea fakangatangata ia ʻi he feituʻu ʻo e māmaní. ʻI heʻene ʻiloʻi ʻoku nounou ʻa hono taimí, ʻoku tuku atu ai ʻe he Tēvoló ʻa ʻene ʻitá ki he kau Kalisitiane paní mo honau ngaahi takangá. (Fakahā 12:9, 17) Ko e hā kuo hoko ko e ngaahi ola ʻo e ngaahi toutou ʻoho ʻa e kau faitau ko eni ki he ʻOtuá?
4. Ko e hā ʻa e ngaahi ʻahiʻahi naʻe hokosia ʻe he kakai ʻa Sihová lolotonga ʻa e taimi Tau I ʻa Māmaní, ka ko e hā ne hoko ʻi he 1919 mo e 1922?
4 Naʻe fehangahangai ʻa e kau sevāniti pani ʻa Sihová mo e ngaahi ʻahiʻahi lahi ʻo ʻenau tuí lolotonga ʻa e Tau I ʻa Māmaní. Naʻe manukiʻi kinautolu mo lauʻikoviʻi loi, tuli ʻe he fuʻu kakai tokolahi, pea fai mo hono haha. Hangē ko ia naʻe tomuʻa tala ʻe Sīsuú, naʻa nau hoko ʻo “fehiʻanekina ʻe he ngāhi kakai kehekehe.” (Mātiu 24:9) Lolotonga ʻa e manavahētuʻu ʻi he taú, naʻe ngāueʻaki ʻe he ngaahi fili ʻo e Puleʻanga ʻo e ʻOtuá ha faʻufaʻu ʻa ia ne ʻosi ngāueʻaki kia Sīsū Kalaisi. Naʻa nau fakaʻilongaʻi loi ʻa e kakai ʻa Sihová ʻoku nau fakatupu-angatuʻu, pea naʻa nau taaʻi ʻa e uho ʻo e kautaha hāmai ʻa e ʻOtuá. ʻI Mē 1918, naʻe tuku atu ai ha ngaahi tohi fakamafai fakapuleʻanga ki hono puke ʻo e palesiteni ʻo e Sōsaieti Taua Leʻó, ʻa J. F. Rutherford, mo e toko fitu ʻo hono ngaahi kaungā-ngāue ofi tahá. Ko e kau tangata ʻe toko valu ko ení naʻe ʻoange kiate kinautolu ʻa e ngaahi tautea tuku pilīsone mamafa pea ʻave kinautolu ki he pilīsone fakapuleʻanga ʻi Atlanta, Georgia, U.S.A. ʻI he hili ha māhina ʻe hiva mei ai naʻe tukuange kinautolu. ʻI Mē 1919, naʻe tuʻutuʻuni ai ʻe he fakamāuʻanga tangi fakafeituʻú naʻe ʻikai ke maʻu ʻe he kau fakaʻiloá ha hopo taʻefilifilimānako, pea ko ia naʻe fakafoki ai ʻa e tuʻutuʻuní. Naʻe fakafoki ʻa e keisí ki ha hopo foʻou, ka ki mui ai naʻe toʻo ʻe he puleʻangá ʻa e tukuakiʻí, ʻo fakaʻatā fakaʻaufuli ai ʻa Tokoua Rutherford mo hono ngaahi kaungā-ngāué. Naʻa nau toe kamata ʻenau ngaahi ngāué, pea ko e ongo fakataha-lahi naʻe fai ʻi Cedar Point, Ohio, ʻi he 1919 mo e 1922 naʻá na hanga ʻo toe fakaivia foʻou ʻa e ngāue ko hono malangaʻi ʻo e Puleʻangá.
5. Naʻe anga-fēfē ʻa e tuʻunga ʻo e Kau Fakamoʻoni ʻa Sihová ʻi Siamane Nasi?
5 Naʻe ʻasi hake ʻa e ngaahi pule fakatikitató ʻi he 1930 tupú, pea naʻe fakatahataha ai ʻa Siamane, ʻĪtali, mo Siapani ke faʻu ʻa e ngaahi mafai ʻAkisisí. ʻI he kamataʻanga pē ʻo e hongofuluʻi taʻu ko iá, naʻe fai ai ha fakatanga fakapāpeliane ki he kakai ʻa e ʻOtuá, tautefito ki Siamane Nasi. Naʻe hilifaki ai ha ngaahi fakataputapui. Naʻe hua ʻa e ngaahi ʻapí, pea puke ʻa e kau nofo aí. Naʻe laku ʻa e laui afe ki he ngaahi kemi fakamamahí koeʻuhi naʻa nau fakafisi ke tukuange ʻenau tuí. Ko e faitau ki he ʻOtuá mo hono kakaí naʻe fakataumuʻa ia ke tafiʻi atu ʻa e Kau Fakamoʻoni ʻa Sihová ʻi he feituʻu puleʻi fakatikitato ko iá.a ʻI he taimi ne ō ai ʻa e Kau Fakamoʻoní ki he ngaahi fakamaauʻanga ʻi Siamané ke tauʻi ʻenau ngaahi totonú, naʻe teuteu ʻe he Potungāue Fakamaauʻanga ʻo Siamané ha fakamatala lōloa ke fakapapauʻiʻaki ʻe ʻikai te nau lavameʻa. Naʻe pehē ai: “Kuo pau ke ʻoua naʻa taʻelavameʻa ʻa e ngaahi fakamāuʻangá koeʻuhi pē ko ha ngaahi tuʻutuʻuni fakalao mahino; ka kuo pau ke fai ha kumi mo fakasio ha ngaahi founga neongo ʻa e ngaahi faingataʻa fakalaó, ke fakahoko honau ngaahi fatongia māʻolungá.” Naʻe ʻuhinga ení ʻe ʻikai lava ke maʻu ʻa e fakamaau totonú. Naʻe pehē ʻe he kau Nasí ko e ngaahi ngāue ʻa e Kau Fakamoʻoni ʻa Sihová naʻe taʻefakakaumeʻa, pe fakafili, pea ‘naʻá ne fakahohaʻasi ʻa e faʻunga Fakasōsiale Fakafonuá.’
6. Ko e hā ʻa e ngaahi feinga naʻe fai ke taʻofi ʻetau ngāué lolotonga ʻa e Tau II ʻa Māmaní pea mo e hili iá?
6 Lolotonga ʻa e Tau II ʻa Māmaní, naʻe hilifaki ai ʻa e ngaahi fakataputapui mo e ngaahi fakangatangata ki he kakai ʻa e ʻOtuá ʻi ʻAositelēlia, Kānata, pea mo e ngaahi fonua kehe naʻe kau ko ia ʻi he Komoniueli Pilitāniá—ʻi ʻAfilika, ʻĒsia, mo e ngaahi ʻotu motu ʻo e Kalipiané pea mo e Pasifikí. ʻI he ʻIunaite Seteté, ko e ngaahi fili maʻu mafaí mo e kakai naʻe tākihalaʻí naʻa nau ʻomai ʻa e ‘faʻu lao fakamamahi.’ (Sāme 94:20) Ka ko e ngaahi ʻīsiu ʻi he salute ki he fuká mo e ngaahi lao fakafeituʻu ko ia naʻá ne tapui ʻa e malanga fale ki he falé naʻe hopoʻi ia ʻi he ngaahi fakamāuʻangá, pea ko e ngaahi tuʻutuʻuni lelei ʻi he ʻIunaite Seteté naʻe langa hake ai ha maluʻanga ʻo e poupou ki he tauʻatāina ʻo e lotú. Fakamālō kia Sihova, naʻe ʻikai ke ikuna ʻa e ngaahi feinga ʻa e filí. ʻI he hoko ʻo ʻosi ʻa e tau ʻi ʻIulopé, naʻe toʻo ʻa e ngaahi fakataputapuí. Ko e Kau Fakamoʻoni ʻe laui afe naʻe tuku pōpula ʻi he ngaahi kemi fakamamahí naʻe fakatauʻatāinaʻi, ka naʻe teʻeki ke ʻosi ʻa e faitaú ia. ʻI he hili pē ʻa e Tau II ʻa Māmaní, naʻe hoko mai ʻa e Tau Momokó. Naʻe ʻomai ʻe he ngaahi puleʻanga ʻIulope fakahahaké ʻa e toe faingataʻa lahi ki he kakai ʻa Sihová. Naʻe fai ʻa e ngāue fakaʻofisiale ke fakafeʻātungiaʻi mo taʻofi ʻetau ngaahi ngāue fakamoʻoní, taʻofi ʻa e ʻaukolo mai ʻo e ngaahi tohi faka-Tohitapú, ʻo fakangata ʻosi ʻetau ngaahi ʻāsemipilī maʻá e kakaí. Naʻe tuku pilīsone ʻa e tokolahi pe ʻave ki he ngaahi kemi ngāué.
Hoko Atu ʻa e Ngāue Fakamalangá!
7. Ko e hā naʻe hokosia ʻe he Kau Fakamoʻoni ʻa Sihová ʻi Pōlani, Lūsia, mo e ngaahi fonua kehe ʻi he ngaahi taʻu ki mui maí?
7 ʻI he faai mai ʻa e ngaahi hongofuluʻi taʻú, naʻe fakaʻatā ʻa e ngāue malangaʻi ʻo e Puleʻangá. Ko Pōlani, neongo ʻene kei ʻi he malumalu ʻo e puleʻi faka-Kominiusí, naʻá ne fakaʻatā ʻa hono fai ʻo ha ngaahi fakataha-lahi ʻaho taha ʻi he 1982. Naʻe fai ai ʻa e ngaahi fakataha-lahi fakavahaʻapuleʻanga ʻi he 1985. Naʻe hoko atu ha ngaahi fuʻu fakataha-lahi fakavahaʻapuleʻanga ʻi he 1989, ʻo haʻu ki ai ʻa e laui afe mei Lūsia mo ʻIukalaine. ʻI he taʻu ko iá naʻe fakaʻatā ai ʻe Hungali mo Pōlani ke tuʻu fakalao ʻa e Kau Fakamoʻoni ʻa Sihová. ʻI he faʻahitaʻu fakatōlau ʻo e 1989, naʻe holoki ai ʻa e ʻĀ Pēliní. ʻI ha ngaahi māhina siʻi mei ai, naʻa tau maʻu ai ha tuʻu fakalao ʻi Siamane Hahake, pea taimi nounou hili iá naʻe fai ha fakataha-lahi fakavahaʻapuleʻanga ʻi Pēlini. Pea ʻi he kamata ʻa e hongofuluʻi taʻu fakaʻosi ʻo e senituli hono 20, naʻe fai ʻa e ngaahi feinga ke fai ha fetuʻutaki fakafoʻituitui mo e fanga tokoua ʻi Lūsiá. Naʻe fai ʻa e fetuʻutaki ki he kau maʻu mafai ʻe niʻihi ʻi Mosikou, pea ʻi he 1991, naʻe fakaʻatā ai ki he Kau Fakamoʻoni ʻa Sihová ke lēsisita fakalao. Talu mei ai mo e tupu fakaʻulia ʻa e ngāué ʻi Lūsia pea ʻi he ngaahi lepupilika ko ia ne hoko ko e konga ʻo e Sovieti ʻIunioni ki muʻá.
8. Ko e hā naʻe hoko ki he kakai ʻa Sihová ʻi he ngaahi taʻu ʻe 45 hili ʻa e ngata ʻa e Tau II ʻa Māmaní?
8 Lolotonga ʻa e tuku ʻo e fakatangá ʻi he ngaahi feituʻu ʻe niʻihi, naʻe fakautuutu ia ʻi he ngaahi feituʻu kehé. ʻI he taʻu ʻe 45 hoko atu ʻi he ngata ʻa e tau hono ua ʻa māmaní, naʻe fakafisi ʻa e ngaahi fonua lahi ke fakaʻatā ke tuʻu fakalao ai ʻa e Kau Fakamoʻoni ʻa Sihová. Tānaki atu ki ai, naʻe hilifaki ha ngaahi fakataputapui kiate kitautolu ʻi heʻetau ngaahi ngāué ʻi he ngaahi fonua ʻe 23 ʻi ʻAfilika, 9 ʻi ʻĒsia, 8 ʻi ʻIulope, 3 ʻi ʻAmelika Latina, pea 4 ʻi he ngaahi puleʻanga ʻotu motu ʻe niʻihi.
9. Ko e hā e meʻa ne hokosia ʻe he kau sevāniti ʻa Sihova ʻi Malauií?
9 Naʻe hokosia ʻe he Kau Fakamoʻoni ʻa Sihova ʻi Malauií ʻa e fakatanga anga-fakamamahi ʻo kamata ʻi he 1967. Koeʻuhi ko ʻenau tuʻuʻatā ʻi he tuʻunga ko e kau Kalisitiane moʻoní, ko hotau kaungātui ʻi aí naʻe ʻikai te nau fakatau ha ngaahi kaati faʻahi fakapolitikale. (Sione 17:16) ʻI he hili ha fakataha ʻa e Fale Alea Malauií ʻi he 1972, naʻe toe fakafoʻou ʻa e anga-fakamamahí. Naʻe tuli ʻa e fanga tokouá mei honau ngaahi ʻapí pea ʻikai tali ke ngāue. Naʻe hola mei he fonuá ʻa e laui afe ke kalofi hano tāmateʻi. Ka naʻe ikuna ʻa e kau faitau ki he ʻOtuá mo ʻene kakaí? Halaʻatā! Hili ha toe fakafoki ʻo e ngaahi tuʻungá, naʻe līpooti ai ha tumutumu ʻo e kau malanga ʻo e Puleʻangá ʻe toko 43,767 ʻi Malauī ʻi he 1999, pea naʻe laka hake he toko 120,000 naʻa nau maʻu ʻa e ngaahi fakataha-lahi fakavahe ʻi aí. Kuo ʻosi langa ha ʻōfisi vaʻa foʻou ʻi he kolomuʻá.
ʻOku Nau Kumi ki ha ʻUhinga Loi
10. Hangē ko ia ʻi he tuʻunga ʻo Tanielá, ko e hā kuo fai ʻe he kau fakafepaki ʻi he lolotongá ni ʻo e kakai ʻa e ʻOtuá?
10 Ko e kau tafoki mei he moʻoní, haʻa faifekaú, mo e niʻihi kehé ʻoku ʻikai lava ke nau makātakiʻi ʻetau pōpoaki mei he Folofola ʻa e ʻOtuá. ʻI hano tenge mei he ngaahi nofoʻanga fakalotu ʻo Puleʻanga-Haʻa-Kalisitiané, ʻoku kumi ʻa e kau fakafepakí ki ha founga fakalao tokua ke fakatonuhiaʻaki ʻenau faitau kiate kitautolú. Ko e hā ʻa e ngaahi foungafai ʻoku ngāueʻaki he taimi ʻe niʻihi? Sai, ko e hā naʻe fai ʻe he kau faʻufaʻufonó ʻi hono tauʻi ko ia ʻa e palōfita ko Tanielá? ʻI he Taniela 6:4, 5, ʻoku tau lau ai: “Pea nofo ʻa e kau minisita mo e ngaahi tuʻi-fakaleʻo ke kumi ha tuʻunga ke tuʻutamaki ai ʻa Taniela ʻi he ngaue fakapuleʻanga; ka naʻe ʻikai te nau lava ke maʻu ha momoʻi meʻa ke talatalaakiʻi ai ia, pe ha kovi; koeʻuhi naʻa ne fai tonunga, ko ia naʻe ʻikai ʻilo ha momoʻi faihala pe kovi ʻiate ia. Pea toki fealeleaʻaki ʻa e tuʻunga matapule ko é, ʻE ʻikai te tau maʻu ha meʻa ke tuʻutamaki ai ʻa e Taniela ni, ka ʻi heʻetau kumi ki ai ʻi he lao ʻo hono ʻOtua.” ʻI he ʻahó ni, ʻoku pehē ʻa e kumi ʻa e kau fakafepakí ki ha ʻuhinga loi. ʻOku nau vālau fekauʻaki mo e “ngaahi lotu fakatuʻutāmaki” pea feinga ke ʻai ʻa e lea paetaku ko ení ki he Kau Fakamoʻoni ʻa Sihová. ʻAki ʻa e fakafofongahalaʻi, heliaki, mo e loi, ʻoku nau ʻohofi ai ʻetau lotú mo ʻetau pipiki ko ia ki he ngaahi tefitoʻi moʻoni fakaʻotuá.
11. Ko e hā ʻa e ngaahi taukaveʻi loi kuo fai ʻe he kau fakafepaki ʻe niʻihi ki he Kau Fakamoʻoni ʻa Sihová?
11 ʻI he ngaahi fonua ʻe niʻihi, ʻoku fakafisi ai ʻa e ngaahi ʻelemēniti fakalotú mo fakapolitikalé ke fakahaaʻi ʻoku tau fai “ʻa e toʻonga lotu ʻoku maʻa mo taʻe hano ʻuli ʻi he ʻafio ʻa e ʻOtua.” (Semisi 1:27) Neongo ko ʻetau ngaahi ngāue faka-Kalisitiané ʻoku fai ia ʻi he ngaahi fonua ʻe 234, ʻoku taukaveʻi ʻe he kau fakafepakí ia ʻoku ʻikai ko ha “lotu ʻiloa” kitautolu. Taimi nounou pē ki muʻa ʻi ha fakataha-lahi fakavahaʻapuleʻanga ʻi he 1998, naʻe lave ai ha nusipepa Kalisi ki he taukaveʻi ʻe he haʻa faifekau ʻOfotokisī Kalisí ko e “[Kau Fakamoʻoni ʻa Sihová] ʻoku ʻikai ko ha ‘lotu ʻiloa,’” neongo ʻa e kehe ʻa e tuʻutuʻuni ia ʻa e Fakamaauʻanga ʻIulope ki he Ngaahi Totonu ʻa e Tangatá. ʻI ha ngaahi ʻaho siʻi ki mui ai, naʻe lave ai ha toe nusipepa ʻe taha ʻi he kolo tatau ki he pehē ʻe ha tangata-lea ʻi ha siasi: “[Ko e Kau Fakamoʻoni ʻa Sihová] ʻe ʻikai lava ke nau hoko ‘ko ha fakatahaʻanga Kalisitiane,’ koeʻuhi ʻoku halaʻatā ha meʻa te nau faitatau ai mo e tui faka-Kalisitiane ki he tokotaha ko Sīsū Kalaisí.” ʻOku fakaʻohovale eni, he ʻoku ʻikai ha toe kulupu fakalotu te ne fai ʻa e fakamamafa lahi ange ki hono faʻifaʻitakiʻi ʻa Sīsuú ʻo hangē ko e Kau Fakamoʻoni ʻa Sihová!
12. ʻI hono fakahoko ʻetau faitau fakalaumālié, ko e hā kuo pau ke tau faí?
12 ʻOku tau kumi ke taukapoʻi mo fokotuʻu ʻa e ongoongo leleí ʻaki ʻa e ngaahi founga fakalao. (Filipai 1:7) ʻIkai ko ia pē, ʻe ʻikai ke tau fakangaloku pe fakasiʻisiʻi ʻetau pipiki maʻu ki he ngaahi tuʻunga māʻoniʻoni ʻa e ʻOtuá. (Taitusi 2:10, 12) ʻI he hangē ko Selemaiá, ʻoku tau ‘huke hotau kofú pea lea ʻaki ʻa e ngaahi meʻa kotoa ʻoku tuʻutuʻuni ʻe Sihová,’ ʻo ʻikai fakaʻatā ʻa e kau faitau ki he ʻOtuá ke nau taaʻi kitautolu ʻaki ha manavahē. (Selemaia 1:17, 18) Ko e Folofola Māʻoniʻoni ʻa Sihová kuó ne fakaʻilongaʻi mahino ʻa e ʻalunga totonu kiate kitautolu ke tau fou aí. ʻOku ʻikai ʻaupito te tau loto ke falala ki he “nima kakano” vaivaí pe kumi “toi ʻi he malu ʻo Isipite,” ʻa ia, ko e māmani ko ení. (2 Kalonikali 32:8; Aisea 30:3; 31:1-3 [Isaia, PM]) ʻI he faitau fakalaumālié, kuo pau ke tau hokohoko atu ke falala kia Sihova ʻaki ʻa e kotoa ʻo hotau lotó, ʻo tuku kiate ia ke ne tataki ʻetau ngaahi laká, pea ʻoua ʻe falala ki he poto pē ʻo kitautolú. (Palovepi 3:5-7) Ka ʻikai te tau maʻu ʻa e poupou ʻa Sihová peá ne maluʻi tonu kitautolu, ko e kotoa ʻo ʻetau ngāué ʻe hoko ko e “kulanoa.”—Sāme 127:1.
Fakatangaʻi kae ʻIkai Fakangaloku
13. Ko e hā ʻoku lava ai ke pehē ko e ʻohofi fakasētane ʻo Sīsuú naʻe ʻikai lavameʻa?
13 Ko e faʻifaʻitakiʻanga tuʻu-ki-muʻa taha ʻi he līʻoa taʻefakangaloku kia Sihová ko Sīsū, ʻa ia naʻe tukuakiʻi loi ki he fakatupu angatuʻu mo hono fakahohaʻasi ʻa e fokotuʻutuʻu māú. Hili ʻa hono sivisiviʻi ʻa e keisi ʻa Sīsuú, naʻe loto-lelei ʻa Pailato ke tukuange ia. Ka ko e fuʻu kakaí, ʻi hono fakaʻaiʻai ʻe he kau taki lotú, naʻa nau kalanga ke tutuki ʻa Sīsū, neongo naʻá ne tonuhia. Ke fakafetongi iá, naʻa nau kalanga ke tukuange ʻa Palapasa—ko ha tangata naʻe tuku pōpula ʻi he fakatupu angatuʻu mo e fakapō! Naʻe toe feinga ʻa Pailato ke fakalotoʻi ʻa e kau fakafepaki taʻefaituʻungá, ka naʻe faifai pē ʻo ne foʻi ʻi he vālau ʻa e kakaí. (Luke 23:2, 5, 14, 18-25) Neongo naʻe pekia ʻa Sīsū ʻi ha ʻakau, ko e ʻohofi fakasētane fakalilifu ʻo e ʻAlo tonuhia ʻo e ʻOtuá naʻe taʻelavameʻa fakaʻaufuli ia, he naʻe fokotuʻu hake ʻe Sihova ʻa Sīsū pea hakeakiʻi ia ki Hono nima toʻomataʻú tonu. Pea ʻi he ʻaho ʻo e Penitekosi 33 T.S, fakafou ʻi he Sīsū kuo fakalāngilangiʻí, naʻe lilingi hifo ʻa e laumālie māʻoniʻoní, ʻo fokotuʻu ai ʻa e fakatahaʻanga Kalisitiané—“ko e fakatupufoʻou.”—2 Kolinito 5:17; Ngāue 2:1-4.
14. Ko e hā naʻe iku ki ai ʻi he taimi naʻe fakafepakiʻi ai ʻe he ʻelemēniti fakalotu faka-Siú ʻa e kau muimui ʻo Sīsuú?
14 Taimi nounou ʻi he hili iá naʻe fakamanamanaʻi ʻe he ʻelemēniti fakalotú ʻa e kau ʻapositoló, ka ko e kau muimui ko ia ʻo Sīsū Kalaisí naʻe ʻikai tuku ʻenau lea fekauʻaki mo e ngaahi meʻa ko ia ne nau mamata mo fanongo ki aí. Naʻe lotu ʻa e kau ākonga ʻa Sīsuú: “ʻEiki, ke ke meʻa ki heʻenau ngaahi fakamana, pea tuku ki hoʻo kau tamaioʻeiki, ke ʻoua ʻaupito te mau māluʻia ʻi heʻemau malangaʻaki hoʻo folofola.” (Ngāue 4:29) Naʻe tali ʻe Sihova ʻenau kolé ʻaki hono fakafonu kinautolu ʻaki ʻa e laumālie māʻoniʻoní mo fakaivimālohiʻi kinautolu ke hokohoko atu ʻenau fanongonongo taʻemanavaheé. Naʻe vave ʻa e toe fekauʻi ʻa e kau ʻapositoló ke tuku ʻenau malangá, ka naʻe tali ʻa Pita mo e kau ʻapositolo kehé: “ʻOku totonu pe ke fai ki he pule ʻa e ʻOtua ʻi he pule ʻa e tangata.” (Ngāue 5:29) Ko e ngaahi fakamanamaná, ngaahi puke pōpulá, mo e ngaahi hahá naʻe ʻikai lava ke ne taʻofi kinautolu mei heʻenau fakalahi ʻenau ngāue ki he Puleʻangá.
15. Ko hai ʻa Kāmelieli, pea ko e hā ʻa e faleʻi naʻá ne fai ki he kau fakafepaki fakalotu ʻo e kau muimui ʻo Sīsuú?
15 Naʻe anga-fēfē ʻa e tali ʻa e kau pule fakalotú? “Naʻe hange kuo kilisiua honau loto, pea nau kamata aleaʻi honau tamateʻi [ʻo e kau ʻapositoló].” Kae kehe, ko ha faiako Lao naʻe ui ko Kāmelieli, ko ha Fālesi, naʻe ʻi ai, pea naʻe tokangaekina ia ʻe he kakaí kotoa. ʻI hono tuku ki tuʻa ʻa e kau ʻapositoló mei he holo Sanetalimí ʻi ha taimi nounou, naʻá ne faleʻi ʻa e kau fakafepaki fakalotu ko iá: “ʻA Matāpule Isileli, mou meʻemeʻa lelei ki he meʻa ʻoku mou pehē ke fai ki he kau tangata ni. . . . ʻoku ou lēlea atu, Tuʻu ʻatā mo e kau tangata ni, pea tuku ai pe ā kinautolu: he kapau ʻoku mei he tangata ʻa e fakakaukau ko eni mo e ngāue ni, ʻe ngata: ka ʻo kapau ʻoku mei he ʻOtua, ʻe ʻikai te mou lava ke fakangata kinautolu: kaeʻumaʻā foki naʻa ʻiloange ʻoku mou tauʻi ʻa e ʻOtua.”—Ngāue 5:33-39.
ʻOku ʻIkai ha Meʻatau Kuo Faʻu ke Fakafepakiʻi Kitautolu ʻe Lavameʻa
16. ʻI he ngaahi lea pē ʻaʻau, ʻe anga-fēfē haʻo fakamatalaʻi ʻa e fakapapau ʻoku fai ʻe Sihova ki heʻene kakaí?
16 Naʻe lelei ʻa e faleʻi ʻa Kāmelielí, pea ʻoku tau houngaʻia ʻi he taimi ʻoku lea ai ha niʻihi maʻa kitautolú. ʻOku tau toe lāuʻilo ko e tauʻatāina ʻo e lotú kuo poupouʻi ia fakafou ʻi he ngaahi tuʻutuʻuni fakaefakamaauʻanga ʻa e kau fakamaau taʻefilifilimānakó. Ko e moʻoni, ko ʻetau pipiki ki he Folofola ʻa e ʻOtuá ʻoku ʻikai leleiʻia ai ʻa e haʻa faifekau ʻo Puleʻanga-Haʻa-Kalisitiané mo e kau taki kehe ʻo Pāpilone ko e Lahí, ʻa e ʻemipaea ʻo e lotu loí ʻi he māmaní. (Fakahā 18:1-3) Neongo ko kinautolu mo e faʻahinga ko ia kuo nau tākiekiná ʻoku nau faitau kiate kitautolu, ʻoku tau maʻu ʻe kitautolu ia ʻa e fakapapau ko ení: “ʻIlonga ha mahafu ʻoku faʻu ke fai ʻaki ha kovi kiate koe, ʻe ʻikai siaʻa; pea ʻilonga ha ʻelelo ʻoku hopo mo koe ʻi he fakamaau, te ke fakahalaia. Ko e ʻinasi eni ʻo e kau tamaioʻeiki ʻa Sihova, pea ko ʻenau fakatonuhia meiate au—ko Sihova ia mei he Taʻehamai.”—Aisea 54:17.
17. Neongo ʻoku faitau kiate kitautolu ʻa e kau fakafepakí, ko e hā ʻoku tau loto-toʻa aí?
17 ʻOku faitau taʻeʻuhinga kiate kitautolu hotau ngaahi filí, ka ʻoku ʻikai ke mole ʻetau loto-toʻá. (Sāme 109:1-3) ʻOua ʻaupito te tau fakaʻatā ʻa e faʻahinga ʻoku nau fehiʻa heʻetau pōpoaki faka-Tohitapú ke nau fakailifiaʻi kitautolu ke fakangaloku ʻetau tuí. Neongo ʻoku tau ʻamanekina ko ʻetau tau fakalaumālié ʻe mālohi ange, ʻoku tau ʻiloʻi ʻe kitautolu hono ikuʻangá. Hangē ko Selemaiá, te tau aʻusia ʻa hono fakahoko ʻo e ngaahi folofola fakaekikite: “Te nau tau mo koe; ka ʻe ʻikai te nau lavaʻi koe: he ʻoku ou ʻiate koe ke fai ho fakahaofi—ko Sihova ia mei he Taʻehamai.” (Selemaia 1:19) ʻIo, ʻoku tau ʻiloʻi ko e kau faitau ki he ʻOtuá ʻe ʻikai te nau ikuna!
[Fakamatala ʻi lalo]
a Sio ki he kupu “Anga-Tonu mo Taʻemanavahē ʻi he Fehangahangai mo e Fakafeʻātungia ʻa e Nasí,” peesi 24-28.
ʻE Fēfē Haʻo Tali?
• Ko e hā kuo ʻohofi ai ʻa e kau sevāniti ʻa Sihová?
• ʻI he ngaahi founga fē kuo faitau ai ʻa e kau fakafepakí ki he kakai ʻa Sihová?
• Ko e hā ʻoku lava ai ke tau fakapapauʻi ʻe ʻikai ke ikuna ʻa e kau faitau ki he ʻOtuá?
[Fakatātā ʻi he peesi 17]
Naʻe fakapapauʻi kia Selemaia ʻe kau ʻa Sihova mo ia
[Fakatātā ʻi he peesi 18]
Ko e kau hao ʻi he kemi fakamamahí
[Fakatātā ʻi he peesi 18]
Faifakamālohi ʻa e fuʻu kakaí ki he Kau Fakamoʻoni ʻa Sihová
[Fakatātā ʻi he peesi 18]
Ko J. F. Rutherford mo hono ngaahi kaungāngāué
[Fakatātā ʻi he peesi 21]
ʻI he keisi ʻa Sīsuú, ko e kau faitau ki he ʻOtuá naʻe ʻikai te nau ikuna