Līpooti ʻa e Kau Fanongonongo ʻo e Puleʻangá

ʻInitia—Ko ha “Fāʻūtaha Lolotonga ʻa e Kehekehé”

“FĀʻŪTAHA Lolotonga ʻa e Kehekehé” ko ha kupuʻi lea ʻiloa ia ʻoku ngāueʻaki ke fakamatalaʻi ʻaki ʻa e feongoongoi fakafonuá ʻi ʻInitia. Ko hono aʻusia ʻa e fāʻūtahá ʻi he fonua lahi fau ko eni ʻoku ʻi ai ʻa e kehekehe lahi ʻi he anga-fakafonuá, leá, lotú, ngaahi tupuʻanga fakaefaʻahingá, valá, mo e meʻakaí ʻoku ʻikai ke faingofua. Kae kehe, ko e fāʻūtaha peheé ʻoku mātā ia ʻi he ʻōfisi ʻokú ne tokangaʻi ʻa e ngāue ʻa e Kau Fakamoʻoni ʻa Sihova ʻi ʻInitiá, neongo ko e kau ngāue pole ʻoku nofo mo ngāue aí ko ʻenau omi mei he ngaahi kolo mo e ngaahi vahefonua fakatahataha lahi pea lea ʻi ha ngaahi lea kehekehe lahi.

• Tau feʻiloaki heni mo Rajrani—ko ha finemui mei he Punjab, ʻi he tokelau-hihifo taupotu taha ʻo ʻInitiá. ʻI he taimi naʻe kei ako ai ʻa Rajrani, naʻe kamata ke ako Tohitapu ai ha tokotaha ʻi heʻene kalasí mo e Kau Fakamoʻoni ʻa Sihová. Ko e kiʻi taʻahine ko ʻení naʻá ne feinga ke ʻai ʻa Rajrani ke ne mahuʻingaʻia ʻi he Tohitapú. Koeʻuhi ko e lea faka-Pilitānia ʻa e kiʻi taʻahiné naʻe fakangatangata pea Ko e Taua Leʻo naʻe ʻikai ala maʻu ia ʻi he lea faka-Punisapi ʻi he taimi ko iá, naʻá ne toe kole ʻa e tokoni ʻa Rajrani ki hono liliu ange kiate ia ʻa e ngaahi meʻa ʻi loto ʻi he makasiní. Ko e meʻa naʻe lau ʻe Rajrani ʻi he Taua Leʻo naʻe kamata ke ne tākiekina loloto ʻaupito ia ʻo ne fakalakalaka ai ʻo aʻu ki he tuʻunga ʻo e fakatapui ʻene moʻuí kia Sihova ko e ʻOtuá, neongo ʻa e fakafepaki mei heʻene ongo mātuʻá. ʻI he ngāue he Pēteli ʻo ʻInitiá he ʻaho ní, ʻokú ne fai ai ʻa e meʻa tatau tofu pē ko ia naʻe fakaʻāki ai hono matá ki he moʻoní. ʻOkú ne liliu ʻa e ngaahi tohi faka-Kalisitiané ki he lea faka-Punisapi!

• Fakakaukau atu foki kia Bijoe, ʻa ia ʻokú ne haʻu mei ha feituʻu ʻe taha ʻo ʻInitia—ko e kolo fakatonga-hihifo ko Kerala. Naʻe tuli ʻa Bijoe mei he ako māʻolungá koeʻuhi ko e tuʻu ʻatā lolotonga ʻa e ngaahi ouau fakafonuá. ʻI he hili ha hopo lahi fakaefakamaauʻanga ʻa ia naʻe iku ki ha ikuna mahuʻinga maʻá e lotu maʻá, naʻe toe foki ai ʻa Bijoe ki he akó.a Naʻá ne toe hoko atu ki he ʻunivēsití. Kae kehe, ko e ʻātakai fakaeʻulungaanga taʻetaau ʻi aí naʻá ne fakahohaʻasi hono konisēnisí, ko ia naʻá ne fakafisi ai ʻi heʻene ʻuluaki tēmí. ʻI he hili ha taʻu ʻe hongofulu he taimí ni ʻi he Pētelí, ʻokú ne ongoʻi ai kuó ne maʻu ha ʻaonga lahi ange mei heʻene hoko ko ha mēmipa ʻo e fāmili kehekehe kae fāʻūtaha ʻo Pētelí ʻi ha ʻaonga naʻá ne mei maʻu ʻi he tulitāupau ki ha feinga ako māʻolunga angé.

• Ko Norma mo Lily ʻoku laka hake hona taʻumotuʻá fakatouʻosi he taʻu 70 pea ko e ongo uitou kinaua ʻi ha ngaahi taʻu lahi. Ko kinaua taki taha kuo kakato hona taʻu laka he 40 ʻi he ngāue taimi-kakató. Ko Lily kuo ngāue mai ʻo feʻunga mo e taʻu nai ʻe 20 ʻi he vaʻá ko ha tokotaha liliu lea ʻo e lea faka-Tamili. Naʻe kau mai ʻa Norma ki Pēteli he taʻu ʻe 13 kuo maliu atú ʻi he hili e mole atu hono husepānití. Tuku kehe ʻa ʻena faʻifaʻitakiʻanga lelei ʻi he hoko ko e ongo meʻa ngāue tōtōivi mo loto-tōnungá, ko ha tākiekina fakaefāʻūtaha kinaua ʻi he fāmili Pētelí kotoa. ʻOkú na manako ke fakafiefiaʻi ʻa e kau ʻaʻahí, pea ʻokú na fiefia ʻi he feohi mo e kau mēmipa taʻu siʻi ange ʻo e fāmilí, ʻo vahevahe atu ʻa e fiefia ʻo e moʻui faka-Kalisitiane ʻi ha ngaahi taʻu lahí. Pea ʻoku fetongi ʻe he kau taʻu siʻi ko ení ʻa e meʻa ko iá ʻaki ʻenau fakaafeʻi kinaua ki honau ngaahi lokí ki ha feohi pea mo fai ha tokoni ʻo ka fiemaʻu. He faʻifaʻitakiʻanga lelei moʻoni ē!

ʻI hono ikuʻi ʻa e ngaahi faikehekehe ʻokú ne fakatupunga ʻa e fekeʻikeʻi mo e loto-kehekehe ʻi he ngaahi feituʻu lahi, ko e kau ngāue pole ko ʻení ʻoku nau ngāue fiefia fakataha ke tokoniʻi ʻa e niʻihi kehé ʻi he tuʻunga ko e kau mēmipa ʻo e fāmili fāʻūtaha ʻo e Pēteli ʻi ʻInitiá.—Sāme 133:1.

[Fakamatala ʻi lalo]

[Maʻuʻanga ʻo e Tā ʻi he peesi 8]

ʻĀtakai: Mountain High Maps® Copyright © 1997 Digital Wisdom, Inc.