Līpooti ʻa e Kau Fanongonongo ʻo e Puleʻangá
Naʻe Fakatōliʻa ʻEne Ngaahi Fiemaʻu Fakalaumālié
KO SAIPALÓ ko ha motu ʻi he tuliki fakatokelau-hahake ʻo e Tahi Metiteleniané. ʻI he taimi ʻo e Tohitapú, naʻe ʻiloa ai ʻa Saipalo ʻi hono kopá pea mo hono papa leleí. Naʻe fanongonongo ʻe Paula mo Pānepasa ʻa e ongoongo lelei ʻo e Puleʻangá ʻi ai lolotonga ʻa ʻena ʻuluaki fononga fakamisinalé. (Ngāue 13:4-12) ʻI he ʻahó ni, ʻoku kei ʻi ai ha ola ʻaonga ʻo e ongoongo leleí ʻi he moʻui ʻa e kau Saipalo tokolahi. Ko e moʻoni, ʻoku hoko tonu ʻeni ʻia Lucas, ko ha tangata taʻu 40 tupu. ʻOkú ne fakamatala:
“Naʻe fāʻeleʻi au ʻi ha fāmili ko e fānau ʻe toko fitu ʻi ha faama pulu. Mei heʻeku kei siʻí, naʻá ku manako ki he lautohí. Ko e tohi naʻá ku saiʻia taha aí ko ha pulusinga siʻisiʻi ʻo e Ngaahi Konga Tohitapu Faka-Kalisi Kalisitiané. ʻI hoku taʻu hongofulú, naʻá ku fokotuʻu ai mo ha ngaahi kaumeʻa ha kiʻi kulupu ako Tohitapu. Kae kehe, naʻe ʻikai ke tuʻu ʻo fuʻu fuoloa, koeʻuhi naʻe ui ʻe he niʻihi ʻo e kakai taʻumotuʻa ange ʻi he koló kimautolu ko e kau tui tokāteline hala.
“Ki mui ai, lolotonga ʻeku ako ʻi he ʻIunaite Seteté, naʻá ku feʻiloaki ai mo ha kakai mei ha ngaahi ʻātakai fakalotu lahi. Naʻe toe tafunaki ʻe he meʻá ni ʻeku holi ki he ngaahi meʻa fakalaumālié. Naʻá ku fakamoleki ha ngaahi ʻaho lahi ʻi he laipeli ʻo e ʻunivēsití ʻi hono ako ʻa e faʻahinga kehekehe ʻo e ngaahi lotú. Naʻá ku toe ʻaʻahi foki ki ha ngaahi siasi ʻe niʻihi, ka neongo ʻeku ngaahi feingá, naʻe ʻikai pē ke u fiemālie fakalaumālie.
“ʻI he ʻosi ʻeku ngaahi feinga akó, naʻá ku foki ki Saipalo peá u tali ai ha ngāue ʻi he tuʻunga ko e talēkita ʻo ha leepi fakafaitoʻo. Ko ha tangata matuʻotuʻa ko Antonis hono hingoá, ko e taha ʻo e Kau Fakamoʻoni ʻa Sihová, naʻá ne faʻa ʻaʻahi mai kiate au ki hoku feituʻu ngāueʻangá. Kae kehe, ko ʻene ngaahi ʻaʻahí, naʻe fakatokangaʻi ia ʻe he Siasi ʻOfotokisī Kalisí.
“ʻIkai fuoloa, naʻe ʻaʻahi mai ha mataotao teolosia ʻo ne ʻai au ke u loto-siʻi ʻi heʻeku talanoa mo e Kau Fakamoʻoni ʻa Sihová. Koeʻuhi naʻe akoʻi au ʻi heʻeku kei siʻí naʻe maʻu ʻe he Siasi ʻOfotokisī Kalisí ʻa e moʻoní, naʻá ku holomui ai peá u taʻofi ʻeku fetalanoaʻaki mo Antonis kae kamata leva ke u fetalanoaʻaki mo e mataotao teolosiá ki he Tohitapú. Naʻá ku toe ʻaʻahi foki ki ha ngaahi monasiteliō lahi ʻi Saipalo. Naʻe aʻu ki heʻeku fononga ki he fakatokelau ʻo Kalisí ke ʻaʻahi ki he Moʻunga Athos, ʻa ia ʻoku pehē ko e moʻunga toputapu taha ia ʻi he māmani faka-Kalisitiane ʻOfotokisií. Neongo ia, naʻe teʻeki ai pē ke tali ai ʻeku ngaahi fehuʻi faka-Tohitapú.
“Naʻá ku lotu leva ki he ʻOtuá ke ne tokoniʻi au ke u maʻu ʻa e moʻoní. Taimi nounou mei ai, naʻe toe haʻu ʻa Antonis ke ʻaʻahi mai kiate au ʻi hoku feituʻu ngāueʻangá, pea naʻá ku ongoʻi ko ha tali eni ʻa ʻeku lotú. Ko ia, naʻe ʻikai te u toe ʻaʻahi ki he mataotao teolosiá kae kamata leva ke u ako ʻa e Tohitapú mo Antonis. Naʻe hokohoko atu ʻeku fakalakalaká, pea ʻi ʻOkatopa 1997, naʻá ku fakahāhā ai ʻeku fakatapui kia Sihová ʻaki ʻeku papitaiso ʻi he vaí.
“Ko hoku uaifí pea mo homa ongo ʻofefine lahí, naʻá na taʻu 14 mo 10 ʻi he taimi ko ení, naʻa nau tomuʻa fakafepaki. Ka koeʻuhi ko ʻeku ʻulungaanga leleí, naʻe fakapapauʻi ai ʻe hoku uaifí ke ne maʻu ha fakataha ʻe taha ʻi he Fale Fakatahaʻangá. Naʻe maongo loloto kiate ia ʻa e anga-lelei ʻa e Kau Fakamoʻoní pea mo e mahuʻingaʻia fakafoʻituitui naʻa nau fakahāʻí. Naʻe maongo tautefito kiate ia ʻa ʻenau ngāueʻaki ʻa e Tohitapú. Ko hono olá, naʻe tali ʻe hoku uaifí mo hoku ongo ʻofefine lahí ha ako Tohitapu mo e Kau Fakamoʻoni ʻa Sihová. Fakaʻuta atu ki heʻeku fiefiá ʻi he taimi naʻe papitaiso ai ʻa e toko tolú ni ʻi he Fakataha-Lahi Fakavahe ‘Folofola Fakaekikite ʻa e ʻOtuá’ ʻi he 1999!
“ʻIo, ko ʻeku fekumi ki he moʻoní naʻe fakatōliʻa ia. ʻI he lolotongá ni ko homau fāmilí kotoa, ʻa ia ko hoku uaifí mo e fānau ʻe toko fā, ʻoku mau fāʻūtaha ʻi he lotu maʻa ʻa Sihová.”