ʻAloʻi ʻo Sīsuú—Founga mo e ʻUhinga Naʻe Hoko Aí
“ʻOKU taʻemalava ia!” ʻE leaʻaki eni ʻe he faʻahinga tokolahi ʻoku ʻikai ko e kau Kalisitiané, ʻi heʻenau fanongo ki he talanoa fekauʻaki mo e ʻaloʻi ʻo Sīsuú. ʻOku nau ongoʻi ʻoku taʻefakasaienisi ke tui ʻe lava ke tuʻituʻia ha taʻahine tāupoʻou pea fanauʻi ha foha ʻo taʻekau ai ha tokoni ʻa ha tamai fakaetangata. Ko e hā hoʻo fakakaukaú?
ʻI he 1984, naʻe pulusi ai ʻe he The Times ʻo Lonitoní ha tohi naʻe fakaʻuhinga ai ki he meʻá ni, ʻo pehē: “ʻOku ʻikai ʻuhinga totonu ke ngāueʻaki ʻa e saienisí ko ha fakakikihi ia ki he ngaahi maná. Ke tui ʻe ʻikai lava ke hoko ʻa e ngaahi maná ʻoku tatau pē ia mo e lahi ʻo e tui ke tui ai ʻe lava ke hoko iá.” Ko e tohí naʻe fakamoʻoni ai ʻa e kau palōfesa ʻe toko 14 ʻo e saienisí ʻi he ngaahi ʻunivēsiti Pilitāniá. Naʻa nau pehē: “ʻOku mau tali fiefia ʻa e ʻaloʻi ʻe he tāupoʻoú, ko e ngaahi mana ʻi he Kōsipelí, pea mo e toetuʻu ʻa Kalaisí ko e ngaahi meʻa fakahisitōlia.”
Neongo ia, ʻoku lava ke mahino ʻa e hoko ha tokotaha ʻo puputuʻu ʻi he ʻuluaki fanongo ki he talanoa fekauʻaki mo e ʻaloʻi fakaetāupoʻou ʻo Sīsuú. Ko e faʻē tāupoʻou tonu ʻa Sīsuú naʻá ne puputuʻu ʻi hono tala ange ʻe he ʻāngelo ʻa e ʻOtuá: “Ko ʻeni, te ke tuʻituʻia, pea te ke ʻaloʻi ha tama, pea te ke fakahingoa ia ko Sisu.” ʻI he tali ki aí, naʻe ʻeke ʻe Mele: “ʻE hoko fēfē ia? he ʻoku teʻeki te u ʻiloa ha tangata?” Naʻe fakamatalaʻi ange leva ʻe he ʻāngeló ʻe fakahoko ʻe he ʻOtuá ʻa e mana ko ení fakafou ʻi Hono laumālie māʻoniʻoní, ʻi he tānaki ange ki ai: “ʻOku ʻikai ha foʻi folofola ʻa e ʻOtua ʻe taʻemalava.” (Luke 1:31, 34-37) Ko e moʻoni ko e Tokotaha naʻá ne fakatupu ʻa e founga fakaofo ʻo e fakatupu ʻo e tangatá ʻe toe lava ke ne fakatupunga ʻa hono tuʻituʻiaʻi mo hono ʻaloʻi ʻo Sīsū mei ha tāupoʻou anga-maʻá. Kapau naʻe fakatupu ʻe he ʻOtuá ʻa e ʻunivēsí mo hono ngaahi lao tonu matemateé, ʻe toe lava ke ne ngāueʻaki ha sela ko ha fua mei he taungafanau ʻo Melé ke faʻuʻaki ha ʻAlo fakaetangata haohaoa.
ʻUhinga Naʻe Fiemaʻu Aí
Ko e tangata anga-fakaʻotua ko Siosefá naʻe fakamaʻu ia mo Mele ʻi he taimi naʻá ne tuʻituʻia aí. ʻI ha misi, naʻe fakamatalaʻi ai ʻe ha ʻāngelo ʻa e ʻOtuá kia Siosefa ʻa e ʻuhinga fakaofo naʻe feitama ai ʻa e tāupoʻou naʻe teu mali mo iá. Naʻe pehē ʻe he ʻāngeló: “ʻOua naʻa ke teteki ke ʻomi ʻa Mele ko ho uaifi; he ko ia kuo ne tuʻituʻia ai ʻoku mei he Laumalie Maʻoniʻoni. Pea te ne ʻaloʻi ha tama, pea te ke fakahingoa ko Sisu; he ko ia ia te ne fakamoʻui hono kakai mei heʻenau ngāhi angahala.” (Mātiu 1:20, 21) Ko e hingoa Sīsuú ʻi he lea faka-Hepeluú ʻoku ʻuhingá “Ko Sihova ʻa e Fakamoʻuí.” ʻOku fakamanatu mai ai kia kitautolu ʻa e fiemaʻu ʻo e fakamoʻui mei he angahalá mo e maté pea mo e tokonaki ʻa e ʻOtua ko Sihová ki he fakamoʻui ko iá fakafou ʻia Sīsuú.
Koeʻuhi naʻe angahala ʻa e ʻuluaki tangata ko ʻĀtamá, ko e kotoa ʻo ʻene fānaú naʻe fanauʻi mai ia ʻi he taʻehaohaoa, fakataha mo ha hehema ke maumauʻi ʻa e ngaahi lao ʻa e ʻOtuá. (Loma 5:12) ʻE lava fēfē ke fakahaofi ʻa e hako ʻo ʻĀtamá mei he angahalá pea maʻu ʻa e haohaoá? Ko ha toe moʻui fakaetangata haohaoa ʻe taha, ʻo fehoanaki ʻa hono mahuʻingá ki he moʻui ʻa ʻĀtamá, naʻe pau ke totongi ia ke mafamafatatau ʻa e meʻafua ʻo e fakamaau totonú. Ko e ʻuhinga ia naʻe ʻai ai ʻe he ʻOtuá ke hoko ʻa e ʻaloʻi fakaemana ʻo e tangata haohaoá, ʻa Sīsū, pea ko e ʻuhinga ia naʻe fakaʻatā ai ʻe Sīsū ʻa hono ngaahi filí ke nau tāmateʻi iá. (Sione 10:17, 18; 1 Timote 2:5, 6) Hili ʻa e toetuʻu ʻa Sīsū pea hāʻele hake ki he moʻui fakahēvaní, naʻe lava ke ne lea ai ʻi he tuipau: “Naʻa ku mate, pea vakai ʻoku ou moʻui ʻo lauikuonga pea taʻengata; pea ʻoku ʻiate au ʻa e ngaahi kī ʻo Mate mo Hetesi [faʻitoka anga-maheni ʻo e faʻahinga ʻo e tangatá].”—Fakahā 1:18.
ʻAki ʻa e ongo kī fakaefakatātā ʻo Mate mo Hētesí, ʻoku fakaava ai ʻe Sīsū ʻa e hala ki he faʻahinga angahalaʻia ʻo e tangatá ke nau toe maʻu ʻa e meʻa naʻe fakamoleki ʻe ʻĀtamá. Naʻe fakamatala ʻa Sīsū: “Ko au pē ko e Toetuʻu, pea mo e Moʻui: ko ia ʻoku tui pikitai kiate au, ne ongo kuo pekia, ka te ne moʻui pē: pea ʻilonga ʻa ia ʻoku moʻui mo tui pikitai kiate au ʻe ʻikai ʻaupito te ne mate, ʻo taʻengata.” (Sione 11:25, 26) Ko ha talaʻofa fakaofo moʻoni ia! Pea neongo ia, ʻoku ʻi ai ha toe ʻuhinga lahi ange ki hono ʻaloʻi ʻo Sīsuú.
Ko e ʻUhinga Mahuʻinga Tahá
Ko e tuʻituʻiaʻi ʻo Sīsū ʻi he manava ʻo Melé naʻe ʻikai ko e kamata ia ʻo ʻene moʻuí. “Kuo u ʻalu hifo mei he langi,” ko ʻene fakahaaʻi mahinó ia. (Sione 6:38) Naʻe moʻui ʻa Sīsū ʻi he nofoʻanga laumālié fakataha mo ʻene Tamai fakahēvaní mei he kamataʻanga ʻo e fakatupú. Ko hono moʻoní, ʻoku fakamatalaʻi ia ʻe he Tohitapú ko e “Kamataʻanga ʻo e Fakatupu ʻe he ʻOtua.” (Fakahā 3:14) Naʻe sio tonu hifo ʻa Sīsū mei hēvani ki he angatuʻu ʻa ha ʻāngelo fulikivanu ʻa ia naʻá ne fakatafokiʻi ʻa e ʻuluaki ongo meʻa fakaetangatá mei he pule ʻa e ʻOtuá. Naʻe ʻoange ʻe he meʻá ni kia Sīsū ʻa e ʻuhinga mahuʻinga taha ki heʻene loto ke ʻaloʻi mai ko ha ʻAlo fakaetangata haohaoa ʻo e ʻOtuá. Ko e hā ia?
Ke fakamoʻoniʻi ko ʻene Tamai fakahēvaní ʻokú ne maʻu ʻa e totonu ke puleʻi ʻa e ʻunivēsí. ʻI he nofoʻaki loto-tōnunga ai pē mei hono ʻaloʻí ʻo aʻu ki heʻene pekia ʻi he māmaní, naʻe fakahāhā ai ʻe Sīsū ʻa ʻene loto-lelei ke fakamoʻulaloaʻi ia tonu ki he founga ʻa Sihova ki hono puleʻi ʻa ʻEne ngaahi meʻa fakatupú. Ki muʻa ʻi heʻene pekia ʻi he nima ʻo e ngaahi fili ʻo e ʻOtuá, naʻe fakahaaʻi mahino ʻe Sīsū ʻa e ʻuhinga ki heʻene loto-lelei ke fou ʻi he ʻalunga ʻo e pekia fakaefeilaulaú. Naʻá ne pehē naʻe hoko ia koeʻuhi ke ʻilo ʻe māmani naʻá ne ʻofa ʻi he Tamaí. (Sione 14:31) Kapau ko e ʻuluaki ongo meʻa fakaetangatá, ʻa ʻĀtama mo ʻIvi, naʻá na fakatupulekina ʻa e ʻofa peheé, naʻe mei malava pē ke na hoko ʻo loto-tōnunga ʻi he malumalu ʻo hona ʻahiʻahi mātuʻaki faingofua angé.—Senesi 2:15-17.
Naʻe toe fakaeʻa ʻi he loto-tōnunga ʻa Sīsuú ʻa e ʻāngelo fulikivanu ko Sētané, ko ha tokotaha loi. Naʻe lauʻikovi loi ʻe Sētane ʻa e ʻOtuá mo e tangatá ʻaki hono fakahaaʻi ʻi he ʻao ʻo e kau ʻāngelo ʻi hēvaní: “Ko e meʻa kotoa ʻoku maʻu ʻe ha tangata te ne tukuange ia koeʻuhi ko ʻene moʻuí.” (Siope 2:1, 4, Tanakh—The Holy Scriptures) Naʻe tukuakiʻi halaʻi ʻe Sētane ʻe talangataʻa ʻa e kotoa ʻo e faʻahinga ʻo e tangatá ki he ʻOtuá ke haofakiʻi ai ʻenau moʻuí.
Ko e ongo ʻīsiu naʻe lave ki ai ki muʻá naʻe poleʻi ai ʻa e māʻoniʻoni mo e totonu ʻa e tuʻunga pule ʻa e ʻOtuá. Ke fakaleleiʻi iá, naʻe loto-lelei ʻa Sīsū ke ʻaloʻi mai ko ha tangata pea fakamoʻoniʻi ʻa ʻene faitōnunga ʻo aʻu ki he maté.
Ko ia ai, ko e ʻuhinga tefito ki he ʻaloʻi ʻo Sīsū ʻi he māmaní, hangē ko ia naʻá ne lea tonu ʻakí, “koeuhi [ke ne] fakamooni ki he mooni.” (Sione 18:37, PM) Naʻá ne fai ia ʻaki hono fakahaaʻi ʻi he leá pea ʻi he ngāué ko e tuʻunga-pule ʻa e ʻOtuá ʻoku māʻoniʻoni fakalūkufua pea ko e fakamoʻulaloa ki aí ʻe iku ia ki he fiefia tuʻuloa. Naʻe toe fakamatalaʻi ʻe Sīsū naʻá ne haʻu ki he māmaní ke foaki ʻa ʻene moʻui fakaetangatá “ke huhuʻi ʻaki ha tokolahi,” ʻo fakaʻatā ai ʻa e hala ki he faʻahinga angahalaʻia ʻo e tangatá ke nau maʻu ʻa e haohaoá mo e moʻui taʻengatá. (Maake 10:45) Ke mahinoʻi ʻe he faʻahinga ʻo e tangatá ʻa e ngaahi meʻa mātuʻaki mahuʻinga ko ení, naʻe fiemaʻu ha lēkooti ʻo e ʻaloʻi ʻo Sīsuú. Tānaki atu ki ai, ko e ngaahi meʻa naʻe hoko takatakai ʻi he ʻaloʻi ʻo Sīsuú ʻoku ʻi ai mo e toe ngaahi lēsoni mahuʻinga kehe ai, hangē ko ia ʻe fakahaaʻi ʻi he kupu hoko maí.
[Fakatātā ʻi he peesi 4]
ʻE lava fēfē ke fakahaofi ʻa e hako ʻo ʻĀtamá mei he angahalá?