Fakatahataha Fiefia ʻa e “Kau Fanongonongo Faivelenga ʻo e Puleʻangá”

ʻOKU luluʻi ʻe he ngaahi faingataʻa fakaeʻulungāngá, fakaʻekonōmiká, mo e fakapolitikalé ʻa e māmaní. Kae kehe, ʻi he lotolotonga ʻo e taʻemanonga kotoa ko ení, naʻe fakatahataha ai ʻa e Kau Fakamoʻoni ʻa Sihová ki ha ngaahi Fakataha-Lahi Fakavahe melino ʻaho ʻe tolu ko e “Kau Fanongonongo Faivelenga ʻo e Puleʻangá.” Kamata ʻi Mē 2002, naʻe fai takatakai ai ʻi he kolopé ʻa e ngaahi fakatahataha ko ení.

Ko e ngaahi fakataha-lahí naʻe fakamoʻoniʻi ko e ngaahi taimi fakafiefia moʻoni ia. Tau fakamanatu nounou ʻa e polokalama fakatupu langa hake makatuʻunga ʻi he Tohitapú.

Fakamamafaʻi ʻi he ʻAho ʻUluakí ʻa e Faivelenga ʻa Sīsuú

Ko e kaveinga ʻo e ʻaho ʻuluaki ʻo e fakataha-lahí ko e “Faʻifaʻitaki ki he Faivelenga ʻa Hotau ʻEiki ko Sīsuú.” (Sione 2:​17) Ko e malanga “Fiefia ʻi he Fakatahataha ʻi he Tuʻunga ko e Kau Fanongonongo ʻo e Puleʻangá” naʻe fakaafeʻi loto-māfana ai ʻa e faʻahinga ʻi aí ke nau kau ʻi he fiefia kuo fakamatalaʻi maʻu ʻaki pē ʻa e ngaahi fakataha-lahi ʻa e kakai ʻa e ʻOtuá. (Teutalonome 16:15) Ko e malanga ko ení naʻe hoko atu ai ʻa e ngaahi fakaʻekeʻeke ʻo e kau malanga faivelenga ʻo e ongoongo leleí.

Ko e malanga “Maʻu ʻa e Fiefia Lahi ʻia Sihova Tonu” naʻe kāpui fakafoʻi veesi ai ʻa e Sāme 37:​1-​11. Naʻe naʻinaʻi mai ai kia kitautolu ke ʻoua te tau hoko ʻo “haʻaki hohaʻa” ʻi he hā ngali lavameʻa ʻa e kakai fulikivanú. Neongo ʻe fakamatalahalaʻi nai kitautolu ʻe he faʻahinga fulikivanú, ʻe fakaeʻa ʻe Sihova ʻi hono taimi totonú ko hai moʻoni ʻene kakai loto-tōnungá. Ko e malanga “Fakahaaʻi ʻOku Mou Houngaʻia” naʻe lāulea ai ki he founga ʻe lava ke tau fakahaaʻi ai ʻa e houngaʻia ʻi he ʻOtuá. Ko e kau Kalisitiane kotoa pē kuo pau ke nau fai “ha feilaulau fakafetaʻi” kia Sihova. (Hepelu 13:15) Ko e moʻoni, ko e lahi ʻo e taimi ʻoku tau līʻoa ki he ngāue ʻa Sihová ʻoku fakatuʻunga ia ʻi heʻetau houngaʻiá pea mo hotau ngaahi tuʻungá.

Ko e malanga ʻi he tefitoʻi fakakaukaú naʻe fakakaveinga ia ko e “Ueʻi ʻe he Faivelengá ʻa e Kau Fanongonongo ʻo e Puleʻangá.” Naʻe fakahaaʻi ai ʻa Sīsū Kalaisi ko hotau faʻifaʻitakiʻanga lelei taha ia ʻo e faivelengá. Hili hono fokotuʻu ʻa e Puleʻanga fakahēvaní ʻi he 1914, naʻe fiemaʻu ki he kau Kalisitiane moʻoní ʻa e faivelenga ke nau fanongonongo ʻa e ongoongo lelei ko iá. Naʻe lave ʻa e tokotaha malangá ki he fakataha-lahi ʻi Cedar Point, Ohio, U.S.A., ʻi he 1922 pea fakamanatu mai kia kitautolu ʻa e ui fakahisitōlia ko ia: “Tuʻuaki ʻa e Tuʻí mo hono Puleʻangá”! ʻI he faai mai ʻa e taimí, ko e faivelenga ʻa e kau sevāniti loto-tōnunga ʻa e ʻOtuá naʻá ne ueʻi kinautolu ke nau talaki ʻa e ngaahi moʻoni fakaofo ʻo e Puleʻangá ki he ngaahi puleʻangá kotoa.

Ko e malanga “Taʻemanavahē ʻi Hono ʻIloʻi ʻOku Kau ʻa Sihova mo Kitautolu,” naʻe fai ʻi he hoʻatā ʻo e ʻaho ʻuluakí, naʻe fakahaaʻi ai ko e kakai ʻa e ʻOtuá ko ha tāketi makehe ia ʻa Sētane. Kae kehe, neongo ʻa e fakafepaki ʻoku tau fetaulaki mo iá, ko ʻetau fakakaukauloto ki he ngaahi faʻifaʻitakiʻanga ʻi onopooni ʻo e tuí ʻokú ne ʻomai kia kitautolu ʻa e loto-toʻa ke fehangahangai taʻemanavahē ai mo e ngaahi ʻahiʻahí pea mo e fakatauelé.​—Aisea 41:10.

Naʻe hoko mai ʻi he polokalamá ha malanga fakakongokonga konga tolu ʻi he kaveinga “ʻOku Fakaivimālohiʻi Kitautolu ʻe he Kikite ʻa Maiká ke ʻAʻeva ʻi he Huafa ʻo Sihová.” Ko e tokotaha malanga ʻuluakí naʻá ne fakahoa ʻa e tōlalo fakaeʻulungaanga, tafoki mei he moʻoni fakalotú, mo e tuli ki he meʻa fakamatelie ʻi he ʻaho ʻo Maiká pea mo hotau taimí. Naʻá ne pehē: “Ko ʻetau ʻamanaki ki he kahaʻú ʻe papau ia kapau te tau fakatupulekina ha loto talangofua pea fakapapauʻi ʻoku māʻoniʻoni hotau ʻulungāngá pea ʻoku fakafonuʻaki ʻetau moʻuí ʻa e ngaahi ngāue ʻo e anga-līʻoa fakaʻotuá—pea kapau ʻe ʻikai ʻaupito ngalo ʻia kitautolu ʻe hoko moʻoni mai ʻa e ʻaho ʻo Sihová.”​—2 Pita 3:​11, 12.

Ko e tokotaha malanga hono ua ʻi he malanga fakakongokongá naʻá ne fakamatala ki hono fakahalaiaʻi ʻe Maika ʻa e kau taki ʻo Siutá. Naʻa nau ngaohikoviʻi ʻa e kakai masiva mo ʻikai hanau maluʻí. Ka naʻe toe tomuʻa tala ʻe Maika ʻa e ikuna ʻa e lotu moʻoní. (Maika 4:​1-5) ʻI hono fakaivia ʻe he laumālie māʻoniʻoni ʻo Sihová, ʻoku tau fakapapauʻi ke fanongonongo ʻa e pōpoaki fakaivimālohi ko eni ʻo e ʻamanakí. Kae fēfē kapau ʻoku tau ongoʻi ʻoku taʻofi kitautolu ʻe he mahamahakí pe ongoʻi fakangatangata ʻi ha toe founga kehe? Naʻe pehē ʻe he tokotaha malanga hono tolú: “Ko e ngaahi fiemaʻu ʻa Sihová ʻoku fakaʻatuʻi pea toe ala lava ke aʻusia.” Naʻá ne hoko atu ke lāulea ki he ngaahi tafaʻaki kehekehe ʻo e Maika 6:​8, ʻa ia ʻoku tau lau ai: “Ko e ha ʻa e meʻa ʻoku ʻeke ʻe Sihova kiate koe? Ka ko e fai fakalao [“fakamaau totonu,” NW], mo e manako ki he mēsi [“ʻofa ki he anga-ʻofá,” NW], pea ke taka angavaivai [“anga-fakanānā,” NW] ʻi hoʻo feangai mo ho ʻOtua?”

Koeʻuhi ko e hōloa fakaeʻulungaanga ʻa e māmaní ʻoku lava ke ne uesia ʻa e kau Kalisitiané, ko kitautolu kotoa kuo tau maʻu ʻaonga mei he malanga kuo fakakaveinga ko e “Tauhi Maʻu ʻa e Anga-Maʻá ʻAki Hono Maluʻi Ho Lotó.” Hangē ko ení, ko ʻetau hanganaki anga-maʻá ʻe tokoni ia kia kitautolu ke maʻu ai ha nofo mali fiefia. ʻI he tuʻunga ko e kau Kalisitiané, kuo pau ke ʻoua ʻaupito te tau maʻu naʻa mo e fakakaukau ke kau ʻi he fehokotaki fakasino taʻetāú.​—1 Kolinito 6:​18.

Ko e malanga “Maluʻi mei he Kākaá” naʻe fakahaaʻi ai ʻoku tau tōʻongafai fakapotopoto ʻo hangē ko ha meʻa ʻoku koná ʻa e ngaahi mioʻi, ngaahi konga moʻoni, mo e loi fakahangatonu ʻoku fakamafola holo ʻe he kau tafoki mei he moʻoní. (Kolose 2:8) Pehē foki, kuo pau ke ʻoua naʻa tau kākaaʻi kitautolu ʻi he fakakaukau ʻe lava ke tau fakatōliʻa ʻetau ngaahi holi angahalaʻiá ʻo taʻeʻiai hano ngaahi nunuʻa fakatupu maumau.

Ko e “Lotu ki he ʻOtua Moʻoni Pē Tahá” ʻa e kaveinga ʻo e malanga fakaʻosi ʻo e ʻuluaki ʻahó. ʻI he hoko ʻo toe faingataʻa ange ʻa e ngaahi tuʻunga ʻi he māmaní, he fakalototoʻa moʻoni ē ko ia ke ʻiloʻi kuo vavé ni ke fakahoko mai ʻe Sihova ʻa ʻene māmani foʻou māʻoniʻoní! Ko hai ʻe nofo aí? Ko e faʻahinga pē ʻoku nau lotu kia Sihová. Ke tokoniʻi kitautolu, ko ʻetau fānaú, mo ʻetau kau ako Tohitapú ke aʻusia ʻa e taumuʻa ko ení, naʻe tukuange mai ai ʻe he tokotaha malangá ʻa e tohi ako foʻou ko e Lotu ki he ʻOtua Moʻoni Pē Tahá. He fiefia ē ko kitautolu ʻi hono maʻu iá!

Fakamamafaʻi ʻi he ʻAho Hono Uá ʻa e Faivelenga ki he Meʻa ʻOku Leleí

Ko e ʻaho hono ua ʻo e fakataha-lahí ko hono kaveingá ko e “Faivelenga ki he Meʻa ʻOku Leleí.” (1 Pita 3:​13) Naʻe lāulea ʻa e ʻuluaki tokotaha malangá ki he konga Tohitapu ʻo e ʻahó. Naʻá ne fakamamafaʻi ko ha fetalanoaʻaki tuʻumaʻu mo mohu ʻuhinga ʻi he konga tohi ʻo e ʻahó ʻoku fakatupulekina ai ʻetau faivelengá.

Naʻe hoko mai leva ai ʻa e malanga fakakongokonga “Kau Fanongonongo ʻo e Puleʻangá ʻA Ia ʻOku Nau Fakalāngilangiʻi ʻEnau Ngāue Fakafaifekaú.” Naʻe fakamamafaʻi ʻi he ʻuluaki kongá ʻa e fiemaʻu ke tofa totonu ʻa e Folofola ʻa e ʻOtuá. (2 Timote 2:​15) Ko ʻetau ngāueleleiʻaki ʻa e Tohitapú ʻoku fakaʻatā ai ia ke ‘hoko ʻo malohi’ ʻi he moʻui ʻa e kakaí. (Hepelu 4:​12) ʻOku totonu ke tau fakahanga ʻetau tokangá ki he Tohitapú pea fakaʻuhinga fakatupu tuipau ki ai. Ko e konga hono ua ʻo e malanga fakakongokongá naʻe enginaki mai ai kia kitautolu ke tau toutou fai ha toe ʻaʻahi ki he kakai mahuʻingaʻiá. (1 Kolinito 3:6) ʻOku fiemaʻu ʻa e teuteu mo e loto-lahi ke toe foki vave ai ki he faʻahinga mahuʻingaʻia kotoa pē. Ko e konga hono tolú naʻe fakahinohino mai ai ke vakai ki he tokotaha taki taha ʻoku tau fetaulaki mo iá ʻe malava ke hoko ia ko ha ākonga pea fakahaaʻi mai ai ko hono tuʻuaki ha ako Tohitapu ʻi he muʻaki ʻaʻahí ʻe lava ke taki atu ia ki he fiefia ʻi hono tokoniʻi ʻa e faʻahinga tāutaha ke hoko ko e kau ākongá.

Ko e “ʻUhinga ke ‘Lotu Taʻetuku’ Aí” ʻa e kaveinga ʻo e malanga hono hokó. ʻOku enginaki ʻa e Tohitapú ki he kau Kalisitiané ke nau hanga ki he ʻOtuá ki he tataki ʻi he tafaʻaki kotoa pē ʻo e moʻuí. ʻOku fiemaʻu ke tau vaheʻi ʻa e taimi ki he lotu fakatāutahá. ʻIkai ngata aí, kuo pau ke tau kītaki ʻi he lotu, he ʻe fakaʻatā nai ai kitautolu ʻe Sihova ke hanganaki lotu ʻi ha taimi ki muʻa ke hoko ʻo hā mahino mai ʻa ʻene talí.​—Semisi 4:8.

Ko e malanga “ʻOku Fakatupu Langa Hake ʻa e Fetalanoaʻaki Fakalaumālié” naʻe uki mai ai kia kitautolu ke ngāueʻaki ʻetau meʻaʻofa ko e leá ke ʻaonga kia kitautolu pea mo e niʻihi kehé. (Filipai 4:8) Ko e ngaahi hoa malí mo e fānaú ʻoku fiemaʻu ki ai ha fetalanoaʻaki fakalaumālie fakaʻaho. Ke lavaʻi iá, ʻoku totonu ke feinga ʻa e ngaahi fāmilí ke kai fakataha ʻi ha houa kai ʻe taha pe lahi ange ʻi he ʻaho taki taha, ʻo malava ai ke fai ha fetalanoaʻaki fakatupu langa hake.

Naʻe fakaʻosiʻaki ʻa e polokalama pongipongí ʻa e malanga fakalotomāfana ko e “Founga ʻOku Taki Atu Ai ʻa e Fakatapuí mo e Papitaisó ki he Fakamoʻuí.” Ko e kau teu papitaisó naʻa nau maʻu ʻa e ʻilo, ngāueʻi ʻa e tuí, fakatomala, tafoki mei he faihalá, pea fakatapui kinautolu ki he ʻOtuá. Hili hono papitaisó, ko e fakamatala ia ʻa e tokotaha malangá, kuo pau ke nau hokohoko atu ke tupulaki fakalaumālie pea ke tauhi maʻu ʻenau faivelengá mo e ʻulungaanga leleí.​—Filipai 2:​15, 16.

ʻI he hoʻatā efiafi ko iá, naʻe fakamamafaʻi ai ʻa e ongo poini tefito ʻe ua ʻi he malangá ko e “Anga-Fakanānā pea Tauhi Ho Matá ke Huʻufataha.” Ko e anga-fakanānaá ʻoku ʻuhinga iá ko hono maʻu ha vakai totonu ki hotau ngaahi ngataʻangá mo hotau tuʻunga ʻi he ʻao ʻo e ʻOtuá. ʻOku tokoniʻi kitautolu ʻe he anga-fakanānaá ke tauhi hotau matá ke “huʻufataha”—ʻo hangataha ki he Puleʻanga ʻo e ʻOtuá, ʻo ʻikai ki he ngaahi meʻa fakamatelié. Kapau te tau fai eni, ʻoku ʻikai fiemaʻu ke tau loto-moʻua he ʻe tokonaki mai ʻe Sihova ʻetau ngaahi fiemaʻú.​—Mātiu 6:​22-​24, 33, 34.

Ko e tokotaha malanga hono hokó naʻá ne fakahaaʻi ʻa e ʻuhinga ʻoku totonu ai ke tau “Falala Kakato kia Sihova ʻi he Taimi ʻo e Faingataʻá.” ʻE lava fēfē ke tau fekuki mo e ngaahi meʻa hangē ko ia ko e ngaahi vaivaiʻanga fakafoʻituituí mo e ngaahi palopalema fakapaʻangá pe fakaemoʻui leleí? Tau kole kia Sihova ki ha poto ʻaonga pea kole tokoni mei he niʻihi kehé. ʻI he ʻikai tōngofua ki he ilifiá pe siva ʻa e ʻamanakí, ʻoku totonu ke tau ʻai ke mālohi ʻetau falala ki he ʻOtuá ʻaki hono lau ʻene Folofolá.​—Loma 8:​35-​39.

Ko e malanga fakakongokonga fakaʻosi ʻo e fakataha-lahí ko hono kaveingá “Ko e Tuʻunga ʻo ʻEtau Tuí ʻi Hono Siviʻi ʻe he Ngaahi ʻAhiʻahi Kehekehe.” Naʻe fakamanatu mai kia kitautolu ʻe he ʻuluaki kongá ʻoku fehangahangai ʻa e kau Kalisitiane moʻoni kotoa pē mo e fakatangá. ʻOku hoko ia ko ha fakamoʻoni, ʻai ke mālohi ʻetau tuí, pea ʻomai kia kitautolu ha faingamālie ke fakahāhā ai ʻetau mateaki ki he ʻOtuá. Neongo ʻoku ʻikai te tau tuku ʻetau moʻuí ki ha fakatuʻutāmaki ʻoku ʻikai fiemaʻu, ʻe ʻikai ʻaupito te tau ngāueʻaki ʻa e ngaahi ʻuhinga taʻefakatohitapú ke fakaʻehiʻehi ai mei he fakatangá.​—1 Pita 3:​16.

Ko e tokotaha malanga hono ua ʻi he malanga fakakongokonga ko ení naʻá ne lave ki he ngaahi fehuʻi felāveʻi mo e tuʻu-ʻataá. Ko e muʻaki kau Kalisitiané naʻe ʻikai ko e kau fakafisingaʻi ʻo e taú, ka naʻa nau ʻiloʻi ko ʻenau mateaki tefitó ke fai ia ki he ʻOtuá. Hangē pē ko e ʻaho ní, ʻoku piki mālohi ʻa e Kau Fakamoʻoni ʻa Sihová ki he tefitoʻi moʻoni: ʻOku “ʻikai ʻo māmani ʻa kimoutolu.” (Sione 15:19) Koeʻuhi ko e ngaahi ʻahiʻahiʻi ʻo ʻetau tuʻu-ʻataá ʻoku lava ke malanga vave hake ia, ʻoku fiemaʻu ki he ngaahi fāmilí ke nau vaheʻi ha taimi ke fakamanatu ai ʻa e ngaahi fakahinohino ʻa e Tohitapú ʻi he kaveinga ko ení. Hangē ko ia naʻe fakahaaʻi ʻi he malanga hono tolu ʻi he malanga fakakongokonga ko ení, ko e taumuʻa ʻa Sētané ʻoku ʻikai fakatefitó ke tāmateʻi kitautolu, ka ke tenge kitautolu ke hoko ʻo taʻefaitōnunga. ʻI he kātakiʻi loto-tōnunga ʻa e manukí, ngaahi tenge ki he ʻulungaanga taʻetāú, mamahi fakaeongó, mo e mahamahakí, ʻoku tau ʻoatu ai ʻa e fakahīkihiki kia Sihova.

Ko e fakaafe māfana “ʻUnuʻunu Ofi kia Sihova” ʻa e kaveinga ʻo e malanga fakaʻosi ʻo e ʻahó. Ko hono mahinoʻi ʻa e ngaahi ʻulungaanga tefito ʻo Sihová ʻoku tohoakiʻi ai kitautolu kiate ia. ʻOkú ne ngāueʻaki ʻa hono mālohi taʻefakangatangatá ke maluʻi ʻa hono kakaí, tautefito ʻi he tuʻunga fakalaumālié. Ko ʻene fakamaau totonú ʻoku ʻikai fefeka ka ʻoku ueʻi ai ia ke ne ʻai ke ala maʻu ʻa e moʻui taʻengatá ʻe he tokotaha kotoa ʻoku ngāue fai ki he totonú. Ko e poto ʻo e ʻOtuá ʻoku hā mahino ia ʻi he founga ʻokú ne ngāueʻaki ai ʻa e faʻahinga taʻehaohaoa ʻo e tangatá ke nau hiki ʻa e Tohitapú. Ko e meʻa fakamānako tahá ko ʻene ʻofá, ʻa ia naʻe ueʻi ai ia ke ne fai ha tokonaki maʻá e fakamoʻui ʻo e faʻahinga ʻo e tangatá fakafou ʻia Sīsū Kalaisi. (Sione 3:​16) Naʻe fakaʻosiʻaki ʻe he tokotaha malangá ʻa hono tukuange mai ʻa e tohi foʻou fakalotomāfana ko e Draw Close to Jehovah.

Fakahangataha ʻa e ʻAho Hono Tolú ʻi he Faivelenga ki he Ngaahi Ngāue Leleí

Ko e kaveinga ʻo e ʻaho hono tolu ʻo e fakataha-lahí “Ko ha Kakai ʻOku Faivelenga ki he Ngaahi Ngāue Leleí.” (Taitusi 2:​14) Naʻe kamata ʻa e pongipongí ʻaki ha fetalanoaʻaki fakafāmili ʻi he konga tohi ʻo e ʻahó. Naʻe hoko mai ai ʻa e malanga “ʻOku ʻia Sihova ʻa Hoʻo Falalá?” Kuo tukuhalaʻi ʻe he ngaahi puleʻangá ʻenau falalá ʻaki ʻenau falala ki he poto mo e mālohi pē ʻonautolú. Kae kehe, ʻi hono kehé, ko e kau sevāniti ʻa Sihová ʻoku nau falala loto-toʻa mo fiefia kiate ia neongo ʻa e ngaahi fakatamakí.​—Sāme 46:​1-3, 7-​11.

Ko e konga ʻoku fakakaveinga ko e “Toʻutupu​—Palani ki he Kahaʻú Fakataha mo e Kautaha ʻa Sihová” naʻe lave ai ki he fehuʻi ko ení: ʻOku lava fēfē ke maʻu moʻoni ʻe ha talavou ʻa e meʻa lelei taha ʻi he moʻuí? ʻOku ʻikai malava eni ʻi he kumi ki he paʻangá, koloá mo e tuʻungá. Ko hotau Tokotaha-Fakatupú ʻokú ne uki anga-ʻofa ʻa e toʻutupú ke nau manatuʻi ia lolotonga ʻenau kei siʻí. Naʻe fakaʻekeʻeke ʻe he tokotaha malangá ʻa e niʻihi kuo nau ngāue mālohi ʻi he ngāue faka-Kalisitiané lolotonga ʻa e tuʻunga talavoú, pea naʻe lava ke tau ʻiloʻi ʻenau fiefiá. Pea ko e meʻa ʻaonga moʻoni ē ko hono maʻu ʻa e tuleki foʻou Youths​—What Will You Do With Your Life?, naʻe faʻufaʻu ia ke tokoniʻi ʻa e Kau Fakamoʻoni kei īkí ke nau fakatoka ʻa e makatuʻunga ki ha kahaʻu taʻengata fakataha mo e kautaha ʻa Sihová!

Naʻe hoko mai ai ʻa e tulama faka-Tohitapu fakatupu tokanga ko e “Tuʻu Mālohi ʻi he Ngaahi Taimi Faingataʻá.” Naʻe fakamatalaʻi nounou ai ʻa e ngāue lōloa ʻa Selemaia mei heʻene kei talavoú ʻo aʻu ki he fakaʻauha ʻo Selusalemá, ʻa ia naʻá ne kikiteʻi faivelengá. Naʻe ongoʻi taʻetaau ʻa Selemaia ki heʻene vāhenga-ngāué, ka naʻá ne fakahoko ia ʻi he fehangahangai mo e fakafepakí, pea naʻe fakahaofi ia ʻe Sihova.​—Selemaia 1:​8, 18, 19.

Naʻe hoko atu ʻi he tulamá ʻa e malanga “Hangē ko Selemaiá​—Fanongonongo Taʻemanavahē ʻa e Folofola ʻa e ʻOtuá.” Ko e kau fanongonongo lolotonga ʻo e Puleʻangá ʻoku nau faʻa hoko ko e tāketi ʻo e ngaahi fakamatala loi mo e fakamatala fakalotokovi. (Sāme 109:​1-3) Ko ia ai, hangē ko Selemaiá, ʻe lava ke tau fekuki mo e fakalotosiʻí ʻaki ʻa e fiefia ʻi he Folofola ʻa Sihová. Pea ʻoku tau falala ko e faʻahinga ʻoku nau faitau kia kitautolú ʻe ʻikai te nau ikuna.

Naʻe taimi tonu moʻoni ʻa e malanga maʻá e kakaí, ʻa ia naʻe fakakaveinga “Kuo Kamata Liliu ʻa e Anga ʻo e Maama ko Eni.” Kuo fakaʻilongaʻi ʻaki hotau taimí ʻa e liliu mataʻāʻā. Naʻe tomuʻa tala ʻe he Tohitapú ko e ngaahi tuʻunga peheé, ʻo kau ai ha kalanga fekauʻaki mo e “lelei mo tuʻumalie,” ʻe taki atu ia ki he ʻaho fakamaau fakamanavahē ʻa e ʻOtuá. (1 Tesalonaika 5:3) Te ne fakahoko mai ʻa e ngaahi liliu fakaofo—ko e ngataʻanga ʻo e taú, faihiá, fakamālohí, pea naʻa mo e mahakí kotoa. ʻI he ʻikai leva ke falala ki he fokotuʻutuʻu ʻo e ngaahi meʻa ko ení, ko e taimi eni ke tuli ai ki he anga-līʻoa fakaʻotuá pea tauhi maʻu ʻa e ʻulungaanga maʻá.

Ko ha fakamatala fakanounou ʻo e lēsoni Taua Leʻo ki he uiké naʻe hoko atu ai ʻa e malanga fakaʻosi ʻo e fakataha-lahí, naʻe fakakaveinga ko e “Mohu ʻi he Ngaahi Ngāue Lelei ʻi he Tuʻunga ko e Kau Fanongonongo Faivelenga ʻo e Puleʻangá.” Naʻe fakahaaʻi ʻe he tokotaha malangá ʻa e founga ʻo hono ueʻi fakalaumālie kitautolu ʻe he polokalamá pea fakalotolahiʻi kitautolu ke falala kia Sihova. ʻI he fakaʻosí, naʻe naʻinaʻi mai ai ke tau hoko ʻo maʻa, ʻofa, pea hoko ko e kau fanongonongo faivelenga ʻo e Puleʻanga ʻo e ʻOtuá.​—1 Pita 2:​12.

ʻAki ha laumālie hangē ko e kau sevāniti ʻa Sihova ʻi he ʻaho ʻo Nehemaiá, naʻa tau foki fiefia moʻoni ki ʻapi ʻi he ngaahi tāpuaki fakalaumālie naʻe maʻu ʻi he ngaahi Fakataha-Lahi Fakavahe “Kau Fanongonongo Faivelenga ʻo e Puleʻangá.” (Nehemaia 8:​12) ʻIkai kuo fakafonu koe ʻe he fakataha-lahi fakaueʻiloto ko ení ʻaki ʻa e fiefia mo e fakapapau ke tutui atu ʻi he tuʻunga ko ha tokotaha fanongonongo faivelenga ʻo e Puleʻangá?

[Puha/Fakatātā ʻi he peesi 23]

Ko ha Tohi Tokoni Ako Foʻou!

ʻI he ʻosi ʻa e ʻaho ʻuluaki ʻo e fakataha-lahí, ko e faʻahinga naʻe ʻi aí naʻa nau fiefia ʻi hono tukuange mai ʻa e tohi foʻou ko e Lotu ki he ʻOtua Moʻoni Pē Tahá. Kuo faʻufaʻu ia ke ako ai mo e faʻahinga kuo nau fakakakato ha ako ʻo e tohi ʻIlo ʻA Ia ʻOku Taki Atu ki he Moʻui Taʻengatá pea ʻe ʻai ke mālohi taʻetoeveiveiua ai ʻa e tui ʻa e faʻahinga ʻoku nau “hehema totonu ki he moʻui taʻengatá.”—Ngāue 13:​48, NW.

[Maʻuʻanga]

Fakatātā ʻi he takafi ʻo e tohí: U.S. Navy photo

[Puha/Fakatātā ʻi he peesi 24]

Tokoni ke Hoko Ai ʻo Ofi Ange ki he ʻOtuá

Ko e tokotaha malanga fakaʻosi ʻo e ʻaho hono ua ʻo e fakataha-lahí naʻá ne fanongonongo ʻa e tukuange mai ʻo e tohi foʻou ko e Draw Close to Jehovah. ʻOku kau ki ai ʻa e konga tefito ʻe fā, ko e taha ki he ngaahi ʻulungaanga tefito taki taha ʻo Sihová—ʻa e mālohí, fakamaau totonú, potó, mo e ʻofá. Ko e konga taki taha ʻo e tohí ʻoku ʻi ai ha vahe ʻoku fakahaaʻi ai ʻa e founga ʻo hono fokotuʻu ʻe Sīsū Kalaisi ʻa e ngaahi fakatātā lahi ʻo e ngāue ʻa e ngaahi ʻulungaanga ʻo e ʻOtuá. Ko e taumuʻa tefito ʻo e tohi foʻou ko ení ke tokoniʻi kitautolu mo ʻetau kau ako Tohitapú ke langa hake ai ha vahaʻangatae ofi ange mo mālohi ange mo Sihova ko e ʻOtuá.

[Puha/Fakatātā ʻi he peesi 26]

Tataki Fakalaumālie ki he Toʻutupú

Ko e ʻaho hono tolu ʻo e fakataha-lahí naʻe fakaʻilongaʻi ʻaki ia hono tukuange mai ha tuleki makehe kuo fakakaveinga ko e Youths​—What Will You Do With Your Life? Naʻe faʻufaʻu ia ke tokoniʻi ʻa e Kau Fakamoʻoni kei īkí ke nau fai ʻa e ngaahi fili totonu fekauʻaki mo honau kahaʻú, ʻoku ʻomai ʻe he tuleki foʻou ko ení ha faleʻi Fakatohitapu ki hono langa hake ha ngāue taʻengata ʻi he ngāue ʻa Sihová.