Līpooti ʻa e Kau Fanongonongo ʻo e Puleʻangá
Ngaahi Ola Fakafiefia mei he Kātakí mo e Kīvoí
NAʻE tomuʻa tala ʻe Sīsū Kalaisi ʻo pehē ʻi he ngaahi ʻaho fakaʻosí “ʻe fakaaʻau ʻo momoko ʻa e ʻofa ʻa e tokolahi.” Ko hono olá, ʻi he konga lahi ʻo e māmaní he ʻahó ni, ko e kakaí fakalūkufua ʻoku ʻikai te nau mahuʻingaʻia ʻi he ongoongo lelei ʻo e Puleʻangá. Naʻa mo e niʻihi ʻoku nau taʻetokaʻi ʻa e lotú.—Mātiu 24:12, 14.
Neongo ia, ʻi he tuí mo e kātakí ʻoku lavameʻa ai ʻa e kau malanga ʻo e Puleʻangá ʻi he fetaulaki mo e polé ni, ʻo hangē ko ia ʻoku fakahaaʻi mai ʻe he meʻa naʻe hokosia ʻi he Lepupilika Sekí.
Naʻe talanoa ha ongo Fakamoʻoni ʻe toko ua ki ha fefine lolotonga ia naʻe tāpuni pē ʻa e matapaá. Taimi nounou mei ai, naʻe ava siʻisiʻi hake ʻa e matapaá, pea ala mai ha nima ʻo toʻo atu ʻa e makasini Taua Leʻo mo e Awake! naʻe tuʻuaki ʻe he ongo Fakamoʻoní. Naʻe pehē mai ha leʻo “mālō,” pea tāpuniʻi mai ʻa e matapaá. “ʻOku totonu ke ta toe ʻaʻahi ki ai?” ko e fifili ia ʻa e ongo Fakamoʻoní. Ko e toko taha ʻia kinaua, ko ha tāimuʻa, pe faifekau taimi-kakato, naʻá ne fakakaukau ke toe foki ki ai, ka ko e meʻa tatau naʻe toe hokó, pea naʻe hokohoko atu ʻeni ʻi ha taʻu ʻe taha.
ʻI he fakapapauʻi ʻoku totonu ke liliu ʻene fakaofiofí, naʻe lotu ʻa e tāimuʻá kia Sihova ki ha tokoni. Ko e taimi hono hoko naʻá ne tuʻuaki ai ʻa e ongo makasiní, naʻá ne ʻeke ki he fefiné ha ongo fehuʻi anga-fakakaumeʻa: “ʻOkú ke fēfē hake? Naʻe fēfē hoʻo lau ʻa e ongo makasiní?” ʻI he ʻuluaki taimí, naʻe ʻikai ha tali mai, ka ʻi he hili ha toe ʻaʻahi lahi ange, naʻe kamata ke anga-fakakaumeʻa ange ʻa e fefiné. ʻI he taimi ʻe taha naʻá ne fakaava lahi ai ʻa e matapaá, ka naʻe nounou pē ʻa e fetalanoaʻakí.
ʻI he vakai ki he toumoua ʻa e fefiné ke talanoa ʻi he matapaá, naʻe fakakaukau ʻa e tāimuʻá ke fai ha tohi kiate ia ke fakamatalaʻi ʻa e taumuʻa ʻo e ngaahi ʻaʻahí pea ke tuʻuaki ha ako Tohitapu ʻi ʻapi. Faifai pē, hili ha taʻu ʻe taha mo e konga ʻo e feinga anga-kātakí, naʻe lavameʻa ai ʻa e tāimuʻá ʻi hono kamata ha ako Tohitapu mo e tokotaha-ʻapí. Naʻá ne ʻohovale pea naʻá ne loto-toʻa ʻi he taimi naʻe tala ange ai ki mui ʻe he fefiné: “Kuó u tui ki he ʻOtuá talu pē mei he taimi naʻá ke kamata ʻomai ai kiate au ʻa e ngaahi makasiní.”
Ko e moʻoni, ko e kātakí mo e kīvoí ʻe lava ke na ʻomai ha ngaahi ola fakafiefia ʻi hono malangaʻi ʻa e Puleʻangá pea mo e ngāue ngaohi-ākongá.—Mātiu 28:19, 20.