Ngaahi Fehuʻi mei he Kau Lautohí

Ko e hā naʻe fakaʻatā ai ʻe Tēvita, ko ha sevāniti faitōnunga ʻa Sihova, ʻa hono uaifi ko Maikalé ke ne maʻu ha ʻīmisi telafimi, pe ʻaitoli, hangē ko ia ʻoku fakahaaʻi ʻi he 1 Samiuela 19:​12, 13?

ʻUluakí, tau vakai nounou angé ki he potutohí. ʻI he taimi naʻe aʻu ai ki he uaifi ʻo Tēvitá ʻa e ongoongo ʻo e faʻufaʻu fakafufū ʻa Tuʻi Saula ke tāmateʻi ʻa Tēvitá, naʻá ne fai ha tali vave ki ai. ʻOku pehē ʻe he Tohi Tapú: “Naʻe tuku hifo ʻe Maikale ʻa Tevita ʻi he katupa: pea ne ʻalu, ʻo hola, ʻo hao. Pea toʻo ʻe Maikale ʻa e telafimi, [ʻa ia ʻoku hā mahino ko e lahi mo e fōtunga ʻo ha tangata] ʻo ne tuku ki he mohenga, mo ha ʻufiʻufi fulufuluʻi kosi ʻi hono ʻulu, ʻo ne kafu ʻaki ha pulupulu.” ʻI he taimi naʻe haʻu ai ʻa e kau talafekau ʻa Saulá ke puke ʻa Tēvitá, naʻe tala ange ʻe Maikale kia kinautolu: “ʻOku mahaki.” Naʻe toloi ʻi he faʻufaʻu ko ení ʻa hono kumí, pea naʻe lavameʻa ai ʻa Tēvita ʻi heʻene holá.—1 Samiuela 19:​11-16.

Ko e ngaahi meʻa ne maʻu ʻi he ʻākeolosiá ʻoku pehē ai ʻi he kuonga muʻá, naʻe tauhi ai ʻa e ngaahi ʻīmisi telafimí ʻo ʻikai ki hono ngāueʻaki fakalotú pē, kae pehē foki ki he ngaahi taumuʻa fakalao. Hangē ko hono fakapapauʻi ʻe he ngaahi ngāue fakalao mo e ngaahi tohi-tuku kuo hiki, ʻa e ngaahi totonu ki he koloa tukufakaholo he ʻaho ní, naʻe pehē pē ʻa e ngaahi ʻīmisi telafimí ʻi he kuonga muʻá. ʻOku hā mahino, ko e maʻu ʻo e telafimí ʻe lava ai ʻi he malumalu ʻo e ngaahi tuʻunga pau, ʻo ʻoange ki he foha-ʻi-he-fonó ʻa e totonu ke ne maʻu ʻa e tofiʻa ʻa ʻene tamai-ʻi-he-fono kuo maté. ʻOku lava ke fakamatalaʻi ʻe he meʻá ni ʻa e ʻuhinga, ʻi ha taimi ki muʻa ange, naʻe ʻave ai ʻe Lesieli ʻa e ngaahi ʻīmisi telafimi ʻa ʻene tamaí mo e ʻuhinga naʻe mātuʻaki loto-hohaʻa ai ʻene tamaí ke toe maʻu mai kinautolú. ʻI he tuʻunga ko iá, ko e husepāniti ʻo Lesielí, ʻa Sēkope, naʻe ʻikai te ne ʻilo ki he meʻa naʻe fai ʻe hono uaifí.​—Senesi 31:​14-​34.

ʻI he taimi naʻe hoko ai ʻa e kau ʻIsilelí ko ha puleʻangá, naʻa nau maʻu ʻa e Fekau ʻe Hongofulú, ko e fika ua aí ʻoku tapui fakahangatonu ai ʻa hono ngaohi ʻo e ngaahi ʻaitolí. (Ekisoto 20:​4, 5) Ki mui ai, naʻe lave ʻa e palōfita ko Sāmiuelá ki he lao ko ení ʻi heʻene lea kia Tuʻi Saulá. Naʻá ne pehē: “Ko e angahala fakafiemana ʻa e angatuʻu, pea ko e talangataʻa ko e fakahiteni tofu pe mo e tauhi aitoli [pe telafimi].” (1 Samiuela 15:23) ʻI he ʻuhinga ko ení, ʻoku ʻikai ngalingali ko e telafimí naʻe tauhi ia ki he ngaahi taumuʻa ʻo e koloa tukufakaholo ʻi ʻIsilelí. Neongo ia, ko e founga motuʻa ko eni ʻo e tui taʻeʻuhinga faka-Siú ʻoku hā naʻe hokohoko atu ia ʻi he ngaahi fāmili ʻIsileli ʻe niʻihi. (Fakamaau 17:​5, 6; 2 Tuʻi 23:24) Ko e tauhi ko ia ʻe Maikale ha ʻīmisi ʻi heʻene koloá ʻoku fakahuʻunga ai naʻe ʻikai kakato ʻa hono lotó kia Sihova. Naʻe ʻikai ke ʻilo ʻa Tēvita fekauʻaki mo e ʻīmisi telafimí pe naʻá ne fakaʻatā ia koeʻuhi ko Maikalé ko e ʻofefine ia ʻo Tuʻi Saula.

Ko e vakai ʻa Tēvita ki he līʻoa maʻataʻatā kia Sihová ʻoku fakahāhā ia ʻi he ngaahi leá ni: “ʻOku lahi ʻa Sihova, pea ʻoku totonu ke lahi hono fakamaloʻia: ʻoku hulu hono ngeia ʻi he ngaahi ʻotua kotoa. He ko e aitoli pe ʻa e ngaahi ʻotua ʻo e ngaahi faʻahinga: ka naʻe ngaohi ʻa e langi ʻe Sihova.”—1 Kalonikali 16:​25, 26.

[Fakatātā ʻi he peesi 29]

Ko hono ua ʻo e Fekau ʻe Hongofulú naʻe tapui ai ʻa hono ngaahi ʻo e ʻaitolí ʻo hangē ko e telafimi ʻoku fakahaaʻi hení

[Maʻuʻanga]

From the book The Holy Land, Vol. II, 1859