Ngaahi Fehuʻi mei he Kau Lautohí
ʻI he taimi naʻe tohi ai ʻe he ʻapositolo ko Sioné ʻo pehē “ko e ʻofa haohaoa ʻoku ne kapusi ʻa e manavahe,” ko e hā naʻá ne ʻuhinga ki ai ʻi he “ʻofa haohaoa,” pea ko e hā ʻa e “manavahe” ʻoku kapusi aí?
“ʻOku ʻikai ha manavahe ʻia ʻOfa,” ko e tohi ia ʻa e ʻapositolo ko Sioné, “kaekehe ko e ʻofa haohaoa ʻoku ne kapusi ʻa e manavahe: he ʻoku ʻi ai ha tautea ʻi he manavahe. Ka ko ia ʻoku manavahe kuo teʻeki ke fakahaohaoa ia ʻi he ʻofa.”—1 Sione 4:18.
ʻOku fakahaaʻi ʻi he potutohí naʻe lāulea ʻa Sione ki he tauʻatāina ʻi he leá—tautefito ki he vā ʻi he vahaʻa ʻo e ʻofa ki he ʻOtuá mo e lea tauʻatāina kiate Iá. ʻOku lava ke hā eni mei he meʻa ʻoku tau lau ʻi he veesi 17: “Ko e meʻa ko eni ko e fakahaohaoa ʻo e kau ʻa ʻofa mo kitautolu, ʻa ʻetau lotolahi [pe lea tauʻatāina] ʻi he ʻaho ʻo e Fakamāu.” Ko e tuʻunga ʻo e ʻofa ʻa ha Kalisitiane ki he ʻOtuá pea ongoʻi ʻa e ʻofa ʻa e ʻOtuá kiate iá ʻoku ʻi ai hono kaunga hangatonu ki heʻene lea tauʻatāiná—pe ko e ʻikai—ʻi heʻene fakaofiofi ki he ʻOtuá ʻi he lotú.
Ko e kupuʻi lea “ʻofa haohaoa” ʻoku mohu ʻuhinga. Hangē ko hono ngāueʻaki ʻi he Tohi Tapú, ko e foʻi lea “haohaoa” ʻoku ʻikai ke ʻuhinga maʻu pē ia ki he haohaoa ʻi he ʻuhinga fakaʻaufulí, ʻa ia, ko e tuʻunga māʻolunga tahá, ka ʻoku faʻa ʻuhinga ia ki ha tuʻunga. Ko e fakatātaá, ʻi heʻene Malanga he Moʻungá, naʻe pehē ai ʻe Sīsū: “Ka mou haohaoa pe ʻa kimoutolu; ʻo hange ʻoku haohaoa ʻa hoʻomou Tamai Fakalangi.” Naʻe tala ʻe Sīsū ki hono kau muimuí kapau naʻa nau ʻofaʻi pē ʻa e faʻahinga ʻoku ʻofa kia kinautolú, ʻe taʻekakato, taʻefeʻunga mo mele ʻenau ʻofá. ʻOku totonu ke nau haohaoa, pe ʻomai ki he tuʻunga kakató ʻa ʻenau ʻofá, ʻaki hono fakakau atu ki ai naʻa mo honau ngaahi filí. ʻI he founga meimei tatau leva, ʻi he taimi naʻe tohi ai ʻa Sione fekauʻaki mo e “ʻofa haohaoa,” naʻá ne lea fekauʻaki mo e ʻofa ki he ʻOtuá ʻa ia ʻoku ʻaufuatō, fakahoko kakato pea kāpui ai ʻa e tafaʻaki kotoa ʻo e moʻui ʻa ha taha.—Mātiu 5:46-48; 19:20, 21.
ʻI he fakaofiofi ki he ʻOtuá ʻi he lotú, ʻoku lāuʻilo lelei ai ha Kalisitiane ʻokú ne angahalaʻia mo taʻehaohaoa. Kae kehe, kapau ko ʻene ʻofa ki he ʻOtuá mo ʻene ongoʻi ʻa e ʻofa ʻa e ʻOtuá kiate iá ʻoku fakahoko kakato, ʻoku ʻikai taʻofi ia ʻe he manavahē ki hono fakahalaiaʻi pe siʻakí. ʻI hono kehé, ʻokú ne fiefia ʻi he lea tauʻatāina ʻi hono fakahaaʻi ʻa e meʻa ʻoku ʻi hono lotó pea ʻi he kole ki ha fakamolemole makatuʻunga ʻi he feilaulau huhuʻi, ʻa ia naʻe tokonaki ʻofa mai ʻe he ʻOtuá fakafou ʻia Sīsū Kalaisí. ʻOkú ne ongoʻi fakapapau ko ʻene ngaahi kolé ʻoku ongoʻi lelei ia ʻe he ʻOtuá.
ʻE lava fēfē ke ‘fakahaohaoa ʻi he ʻofá’ ha taha pea “kapusi” ai ʻa e manavahē ki he fakahalaiá pe siʻakí? “Ko ia oku ne fai ki he ene folofola [ʻa e ʻOtuá], kuo fakahaohaoa mooni iate ia ae ofa ae Otua,” ko e lau ia ʻa e ʻapositolo ko Sioné. (1 Sione 2:5, PM) Fakakaukau angé: Kapau naʻe ʻofa mai ʻa e ʻOtuá kia kitautolu lolotonga ia ko e kau angahala kitautolú, ʻikai te ne ʻofa ʻo toe lahi ange ʻia kitautolu kapau ʻoku tau fakatomala moʻoni pea tōtōivi ʻi he “fai ki he ene folofola”? (Loma 5:8; 1 Sione 4:10) Ko hono moʻoní, kehe pē ke tau faitōnunga ai pē, ʻe lava ke tau maʻu ʻa e fakapapau tatau naʻe maʻu ʻe he ʻapositolo ko Paulá ʻi heʻene lea fekauʻaki mo e ʻOtuá: “Seuke, kapau naʻe ʻikai mamae ʻe he ʻEne ʻAfio ki hono ʻAlo moʻoni, ka ka tukuange ia ke pekia koeʻuhi ko kitautolu fulipe, pea fefe ai haʻane mamae ke foaki mai mo ia ʻa e meʻa kotoa pe.”—Loma 8:32.