Fehuʻi mei he Kau Lautohí

Naʻe tala ange ʻe Sīsū ki heʻene kau fanongó: “Ka mou haohaoa . . . ʻo hange ʻoku haohaoa ʻa hoʻomou Tamai Fakalangi.” ʻE lava fēfē ke “haohaoa” ʻa e faʻahinga ʻo e tangatá he ʻaho ní?—Mt. 5:48.

Ko e kī ki hono tali ʻa e fehuʻi ko ení ʻoku fakatuʻunga ia ʻi hono mahinoʻi ʻa e anga hono ngāueʻaki ʻa e foʻi lea ko e “haohaoa” ʻi he Tohi Tapú. ʻOku ʻikai ko e meʻa kotoa pē ʻoku fakamatalaʻi ʻe he Tohi Tapú ʻoku “haohaoa” ʻoku pehē nai ʻi ha ʻuhinga fakaʻaufuli. Ko e moʻoni, ʻoku maʻu ʻe Sihova ʻa e haohaoa fakaʻaufuli pehē. Ko e kakaí, pe ko e ngaahi meʻá ʻoku lava ke haohaoa pē ʻi ha ʻuhinga fakangatangata. Ko e foʻi lea faka-Hepelū mo faka-Kalisi ʻi he Tohi Tapú naʻe liliu ko e “haohaoa” ʻoku faʻa ʻuhinga iá ko e “kakato,” “matuʻotuʻa,” pe “taʻemele” fakatatau ki he ngaahi tuʻunga ʻoku fokotuʻu mai ʻe ha tuʻunga mafai. ʻI he lea he ʻaho kotoa pē, ko e foʻi leá ʻoku meimei ngāueʻaki ia ai ʻi ha ʻuhinga fakangatangata.

Ko ʻĀtama mo ʻIví naʻe fakatupu haohaoa fakaeʻulungaanga, fakalaumālie mo fakaesino kinaua. Naʻá na haohaoa fakatatau ki he tuʻunga naʻe fokotuʻu ʻe hona Tokotaha-Fakatupú. Koeʻuhi ko e talangataʻá, naʻe ʻikai te na aʻu ai ki he tuʻunga ko ení pea ko ia naʻe mole ai ʻa e haohaoá meia kinaua mo ʻena fānaú. Ko ia fakafou ʻia ʻĀtama naʻe hoko mai ai ʻa e angahalá, taʻehaohaoá mo e maté ki he faʻahinga ʻo e tangatá.—Loma 5:12.

Kae kehe, hangē ko ia naʻe fakamahinoʻi ʻe Sīsū ʻi he Malanga he Moʻungá, naʻa mo e kakai taʻehaohaoá ʻe lava ke nau haohaoa ʻi ha ʻuhinga fakangatangata. ʻI he malanga ko iá, naʻá ne fokotuʻu mai ai ʻa e ngaahi tuʻunga ki he ʻofa haohaoá, pe kakató. Ko e ʻofa eni hangē ko ia kuo fakahaaʻi ʻe he ʻOtuá ki he faʻahinga ʻo e tangatá. Naʻe pehē ʻe Sīsū: “Mou ʻofaʻi homou ngāhi fili, pea hufia ʻa kinautolu ʻoku nau fakatangaʻi kimoutolu. Koeʻuhi ke mou hokosi hoʻomou Tamai ʻoku ʻi Hevani: he ʻoku ne fakahopo ʻene laʻā ki he kovi mo e lelei, pea ʻoku ne fakaʻuha ki he faitotonu mo e faihala.” (Mt. 5:44, 45) ʻI hono fakahāhā ʻa e ʻofá ʻo aʻu ki he lahi ko ení, ʻe faʻifaʻitaki ai ʻa e kau ākonga ʻa Sīsuú ki he faʻifaʻitakiʻanga haohaoa ʻa e ʻOtuá.

ʻI he ʻahó ni, ʻoku feinga mālohi ai ʻa e Kau Fakamoʻoni ʻa Sihova ʻi māmani lahí ke tauhi maʻu ha tuʻunga māʻolunga pehē ʻo e ʻofá ki he niʻihi kehé. ʻOku nau holi ke tokoniʻi ʻa e kakai ʻo e puipuituʻa, matakali mo e lotu kehekehe ke nau hoko ki ha ʻilo totonu ʻo e moʻoni Fakatohitapú. ʻI he ngaahi fonua ʻe 236, ʻoku lolotonga fai ai ʻe he Kau Fakamoʻoní ʻa e ngaahi ako Tohi Tapu laka hake he 7,000,000 mo e faʻahinga tāutaha mahuʻingaʻiá.

“Kapau te mou ʻofaʻi ʻa kinautolu pe ʻoku ʻofa mai, ko e meʻa ia ʻe fakakoloa?” ko e ʻeke ia ʻe Sīsuú. “ʻIkai ʻoku fai pehē mo e kau popilikane? Pea kapau ʻoku mou fetapa ki homou kainga pe, ko e hā ha meʻa ʻoku mou fai ʻoku hulu atu? ʻikai ʻoku fai ʻe he Senitaile foki ʻa e meʻa ko ia?” (Mt. 5:46, 47) Ko e kau Kalisitiane moʻoní ʻoku ʻikai te nau fakahāhā ʻa e filifilimānako ki he kakai ʻo e puipuituʻa fakaeako pe fakafaʻahinga ʻe niʻihi; pea ʻoku ʻikai te nau fakaaʻu atu pē ʻa e ʻofá ki he faʻahinga ʻoku malava ke nau totongi fakafokí. ʻI hono kehé, ʻoku nau tokoniʻi ʻa e masivá mo e puké, ʻa e iiki mo e lalahi. ʻI he ngaahi founga peheé, ʻoku lava ke faʻifaʻitaki ai ʻa e kau Kalisitiané ki he ʻofa ʻa Sihová pea nau hoko ai ʻo haohaoa ʻi ha ʻuhinga fakangatangata.

ʻE faifai ange pea tau malava ke maʻu ʻa e haohaoa naʻe fakamoleki ʻe ʻĀtamá? ʻIo, fakafou ʻi he tui ki he feilaulau huhuʻi ʻa Sīsuú, ko e faʻahinga talangofua ʻo e tangatá te nau aʻusia kakato ha tuʻunga haohaoa lolotonga ʻa e Pule Taʻu ʻe Afe ʻa Kalaisí, ʻi he taimi ʻe ‘holoki ai ʻe he ʻAlo ʻo e ʻOtuá ʻa e ngaahi ngaue ʻa e Tevoló.’—1 Sione 3:8.