Ko e Huhuʻí ʻOku Hakeakiʻi Ai ʻa e Tuʻunga Māʻoniʻoni ʻo e ʻOtuá
HILI ʻa e angatuʻu ʻa ʻĀtama mo ʻIví, naʻe fakahaaʻi ai ʻe Sihova ʻa ʻene taumuʻa ke fokotuʻu ha Hako ʻa ia ʻe fakavolu ʻa hono muiʻivaʻé. (Senesi 3:15) Naʻe fakahoko eni ʻi he taimi naʻe fakatupunga ai ʻe he ngaahi fili ʻo e ʻOtuá ʻa e pekia ʻa Sīsū Kalaisi ʻi ha ʻakau fakamamahí. (Kaletia 3:13, 16) Naʻe ʻikai ha angahala ʻa Sīsū, he naʻe tuʻituʻiaʻi fakaemana ia ʻi he manava ʻo ha tāupoʻou ʻe he mālohi ʻo e laumālie māʻoniʻoní. Ko ia ai, ko hono taʻataʻa naʻe lilingí ʻe lava ke ngāueʻaki ia ko e totongi huhuʻi ke fakatauʻatāinaʻiʻaki ʻa e faʻahinga ʻo e tangatá, ʻa ia naʻa nau maʻu tukufakaholo ʻa e angahalá mo e maté meia ʻĀtamá.—Loma 5:12, 19.
ʻOku ʻikai ha meʻa ʻe lava ke ne taʻofi ʻa e ʻOtua Māfimafi-Aoniú, ʻa Sihova, mei heʻene fakahoko ʻa e meʻa ʻokú ne fakataumuʻa ki aí. Ko ia ai, ʻi he hili e tō ʻa e tangatá ki he angahalá, naʻe lava ke vakai mai ʻa Sihova ia kuo ʻosi fai ʻa e totongi huhuʻí pea naʻe mei lava ke ʻi ai ʻene ngaahi feangainga mo e faʻahinga naʻa nau ngāueʻi ʻa e tui ki hono fakahoko ʻo ʻene ngaahi talaʻofá. Naʻe ʻai ʻe he meʻá ni ke malava ʻa e hako angahalaʻia ʻo ʻĀtamá, hangē ko ʻĪnoke, Noa, mo ʻĒpalahamé ʻo ʻaʻeva pea aʻu ʻo fakakaumeʻa ki he ʻOtuá ʻo ʻikai fakameleʻi ai ʻa Hono tuʻunga māʻoniʻoní.—Senesi 5:24; 6:9; Semisi 2:23.
Ko e faʻahinga tāutaha ʻe niʻihi ʻa ia naʻa nau tui kia Sihová naʻa nau fai ʻa e ngaahi angahala mamafa. Ko Tuʻi Tēvita ko e fakatātā ia ʻe taha. Te ke ʻeke nai, ‘ʻOku anga-fēfē ʻa e lava ke hokohoko atu hono tāpuakiʻi ʻe Sihova ʻa Tuʻi Tēvita hili ʻene fai ha tono mo Patisepa pea hoko atu ai ki hono fakatupunga ʻo e mate ʻa hono husepānití, ʻa ʻUlaiá?’ Ko ha meʻa mahuʻinga tefito ia ʻa e fakatomala moʻoni mo e tui ʻa Tēvitá. (2 Samiuela 11:1-17; 12:1-14) Makatuʻunga ʻi he feilaulau ʻa Sīsū Kalaisi ʻi he kahaʻú, ne lava ke fakamolemoleʻi ai ʻe he ʻOtuá ʻa e ngaahi angahala ʻa e tokotaha fakatomala ko Tēvitá pea kei tauhi maʻu ai ʻa ʻEne fakamaau totonú mo ʻene tuʻunga māʻoniʻoni ʻaʻaná. (Sāme 32:1, 2) ʻI he fakamoʻoni ki he meʻá ni, ʻoku fakamatalaʻi ʻe he Tohi Tapú ʻa e fakahoko fakaofo taha ʻo e huhuʻi ʻa Sīsuú, ʻa ia ko e pehē “ke fakaha ene maonioni [ʻa e ʻOtuá] i he fakamolemole oe agahala kuo fai” ʻi he kuohilí pea “i he kuoga ni.”—Loma 3:25, 26, PM.
ʻIo, ʻoku tafe mai ʻa e ngaahi ʻaonga lahi ki he faʻahinga ʻo e tangatá koeʻuhi ko e mahuʻinga ʻo e taʻataʻa ʻo Sīsuú. Makatuʻunga ʻi he huhuʻí, ʻe lava ke maʻu ai ʻe he faʻahinga fakatomala angahalaʻia ʻo e tangatá ha vahaʻangatae vāofi mo e ʻOtuá. Tānaki atu ki ai, ʻoku fakaʻatā ʻe he huhuʻí ʻa e hala ki ha toetuʻu ʻa e maté ki he māmani foʻou ʻa e ʻOtuá. ʻE kau ai ʻa e kau sevāniti faitōnunga ʻa e ʻOtuá ʻa ia naʻa nau mate ki muʻa ke totongi ʻe Sīsū ʻa e huhuʻí pea naʻa mo e tokolahi naʻa nau mate ʻi he taʻeʻilo pea naʻe ʻikai te nau lotu kiate Iá. ʻOku pehē ʻe he Tohi Tapú: “ʻE faifai pea hoko ha toetuʻu ʻa e angatonu mo e angahala fakatouʻosi.” (Ngāue 24:15) ʻI he taimi ko iá, makatuʻunga ʻi he huhuʻí ʻe foaki ai ʻe Sihova ki he faʻahinga talangofua kotoa ʻo e tangatá, ʻa e moʻui taʻengatá. (Sione 3:36) Naʻe fakamatala ʻe Sīsū tonu: “Naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” (Fakaʻītali ʻamautolu; Sione 3:16) Ko e ngaahi ʻaonga kotoa ko ení ʻe tafe mai ia ki he faʻahinga ʻo e tangatá koeʻuhi ko hono tokonaki mai ʻe he ʻOtuá ʻa e feilaulau huhuʻí.
Kae kehe, ko e tafaʻaki tuʻu-ki-muʻa fekauʻaki mo e huhuʻí, ʻoku ʻikai ko e ngaahi ʻaonga ʻoku tau maʻu mei aí. Ko e meʻa ʻoku mahuʻinga angé ko e meʻa ʻoku fai ʻe he huhuʻi ʻa Kalaisí ki he huafa ʻo Sihová. ʻOku fakamoʻoniʻi ai ko Sihová ko ha ʻOtua ʻo e fakamaau totonu haohaoa, ʻa ia ʻoku lava ke ne feangainga mo e faʻahinga angahalaʻia ʻo e tangatá pea kei maʻa ai pē mo māʻoniʻoni. Kapau naʻe ʻikai fakataumuʻa ʻa e ʻOtuá ke tokonaki mai ʻa e huhuʻí, naʻe ʻikai mei malava ha hako ʻo ʻĀtama, naʻa mo ʻĪnoke, Noa, mo ʻĒpalahame, ke ʻaʻeva mo Sihova pe hoko ko hono kaumeʻa. Naʻe ʻiloʻi eni ʻe he tokotaha-tohi-sāmé peá ne tohi ai: “Ka ne ke nofo, ʻe Iaa, ke lama kovi, ko hai ha taha ʻe tuʻu, Atonai?” (Sāme 130:3) He totonu moʻoni ē ke tau fakamālō fakatouʻosi kia Sihova ʻi hono fekauʻi mai ʻa hono ʻAlo ʻofaʻangá ki he māmaní pea kia Sīsū ʻi heʻene foaki loto-lelei ʻa ʻene moʻuí ko ha huhuʻi maʻatautolú!—Maake 10:45.