Ko e Laumālie ʻo e Kilisimasí ʻi he Taʻú Kotoa?

“Kolōlia ki he ʻOtua ʻi langi taupotu, pea ko e melino ki māmani ki he kakai kuo hoifua [pe loto-lelei] ki ai.”—Luke 2:14.

ʻOKU maheni ʻa e kakai ʻe laui miliona mo e ngaahi lea ko eni ʻa e kau ʻāngelo ʻa e ʻOtuá ʻi heʻenau fanongonongo ʻa e ʻaloʻi ʻo Sīsuú ki he kau tauhi-sipi ʻa ia naʻa nau leʻohi ʻenau ngaahi tākangá ʻi he poʻulí. Lolotonga ʻa e taimi ʻoku taukaveʻi ʻe he ngaahi siasí naʻe ʻaloʻi ai ʻa Sīsuú, ʻoku fai ai ʻe he tokolahi ʻo e kau Kalisitiane lau peé ha feinga makehe ke fakaleleiʻi ʻa honau ʻulungāangá. Ko e tokanga ʻi he taimi Kilisimasí ki he fiefiá, melinó mo e loto-leleí—ʻa e ngaahi ʻulungāanga naʻe lave ki ai ʻi he fanongonongo fakaeʻāngeló—ʻoku faʻa lave ki ai ko e laumālie ʻo e Kilisimasí.

Ko e ngaahi tōʻonga lelei peheé ʻoku aʻu ʻo tohoakiʻi ki ai ʻa e tokanga ʻa e kakai ʻoku ʻikai ke nau kātoangaʻi ko ha ʻaho mālōlō fakalotu ʻa e Kilisimasí. ʻOku nau houngaʻia foki mo kinautolu ʻi he ngaahi ongoʻi māfana ʻoku hā ngali pouaki ʻe he kātoangá ni. ʻI hono ʻomai ʻe he taimi Kilisimasí ʻa e taimi ʻatā mei he akó pe ngāué, ʻoku ʻoatu ai ʻe he ʻaho mālōloó ki he kakaí ha faingamālie ke nau mālōlō ai, ke fakamoleki ʻa e taimi mo honau ngaahi fāmilí, mo e ngaahi kaumeʻá, pe ke nau maʻu pē ai ha taimi fiefia. Ko e moʻoni, ʻoku vakai ʻa e kakai loto-moʻoni tokolahi ki he Kilisimasí ko ha taimi tefito ia ke fakalāngilangiʻi ai ʻa Sīsū Kalaisi.

Ko e hā pē ʻa e ʻuhinga ʻoku nau ʻai ki he Kilisimasí, ko e tokolahi tahá ʻoku nau loto ke fakahaaʻi ʻoku faʻa taimi nounou pē ha ngaahi ongoʻi lelei ʻoku fakatupunga ʻe he ʻaho mālōloó. ʻOku vave ʻa e toe foki ʻa e kakaí ki heʻenau tōʻonga anga-mahení. Ko ha ʻēsei naʻe fakakaveinga “Ko e Laumālie ʻo e Kilisimasí,” naʻe pulusi ʻi ha tohi ʻe he Royal Bank ʻa Kānatá, naʻe pehē ai: “Ko e fuʻu tokolahi ʻoku nau lau ko e ‘kau Kalisitiané’ ʻoku nau feinga pē ke taau mo e hingoa ko iá ʻi ha ngaahi uike siʻi ʻi he taʻu kotoa pē, ʻi hono fakahāhā ʻa e loto-lelei ki honau kaungā faʻahinga ʻo e tangatá ʻo ʻosi pē ʻi he hili ʻa e Taʻu Foʻoú, ʻa ia ʻoku lava ke nau toe foki ai ki heʻenau moʻui siokitá mo ʻenau taʻemahuʻingaʻia ʻi he lelei ʻa e niʻihi kehe ʻo e faʻahinga ʻo e tangatá.” Ko e meʻa ʻoku “fehālaaki moʻoni” ʻi he laumālie ʻo e Kilisimasí, ko e hoko atu ia ʻa e tohi tatau, ko e ʻikai ke maʻu ia ʻe he kakaí ʻi he “taʻú kotoa.”

Pe ʻokú ke tui tatau mo e fakamatala ko iá pe ʻikai, ʻoku langaʻi hake ai ʻa e ngaahi fehuʻi mahuʻinga. ʻE faifai ange pea malava ʻa e kakaí ʻo fakahāhā ʻa e nima-homó mo e femahinoʻakí ʻi ha tuʻunga tuʻuloa? ʻOku ʻi ai ha ʻamanaki moʻoni ʻe fakahoko ʻa e fanongonongo fakaeʻāngelo ʻi he pō ʻaloʻi ʻo Sīsuú? Pe ko e ʻamanaki ki he melino moʻoní ko ha misi pē ia?