Ngaahi Fehuʻi mei he Kau Lautohí
Ne ʻi ai ha vaʻe ʻo e ngata ko ia naʻe lea kia ʻIví?
Hangē ko ia ʻoku lēkooti ʻi he Senesi 3:14, naʻe folofola ʻa Sihova ko e ʻOtuá ki he ngata ko ia naʻá ne kākaaʻi ʻa ʻIvi ʻi he ngoue ko ʻĪtení. Naʻe pehē ʻe he ʻOtuá: “Ko e meʻa ʻi hoʻo fai pehe, ʻe lahi taha hoʻo malaʻia ʻi he manu lalata kotoa pe, mo e manu kaivao kotoa pe; te ke ʻalu ʻaki ho kete, pea te ke kai efu ʻi he ngaahi ʻaho kotoa pe ʻo hoʻo moʻui.” ʻOku ʻikai ke fakahaaʻi pau mai ia ʻe he Tohi Tapú ko e manu ko ia naʻe ngāueʻaki ʻi hono fakataueleʻi ʻo ʻIví naʻá ne ʻuluaki maʻu ki muʻa ha vaʻe ka ne mole meiate ia. Lolotonga ko e fakalea ʻo e Senesi 3:14 ʻoku tataki nai ai ha niʻihi ke nau fakakaukau pehē, ʻoku ʻikai fiemaʻu ke tau fakaʻosiʻaki naʻe maʻu ʻe he fanga ngatá ha vaʻe ki muʻa ʻi he fakamalaʻiaʻi ko ení. Ko e hā hono ʻuhingá?
Koeʻuhi ʻi hono tefitó ko e tokotaha moʻoni naʻe fakamāuʻi ʻe Sihová ko Sētane—ʻa e laumālie taʻehāmai naʻá ne ngāuehalaʻaki ʻa e monumanu māʻulalo ko iá. ʻOku fakamatalaʻi ʻe he Tohi Tapú ko Sētané ko e “ko e tamai ia ʻa e loi” pea ko e “Ngata ʻo onoʻaho.” Ko e ongo kupuʻi leá ni fakatouʻosi ʻoku ngalingali naʻe ʻuhinga ia ki hono ngāueʻaki ʻe Sētane ha monumanu hāmai, ko ha ngata, ko ʻene tokotaha-lea ia ke fakaʻaiʻai ai ʻa ʻIvi ke ne talangataʻa ki he fekau ʻa e ʻOtuá.—Sione 8:44, Kōsipeli ʻe Fā; Fakahā 20:2.
Naʻe fakatupu ʻe he ʻOtuá ʻa e fanga ngatá, pea ʻoku ngalingali naʻe fakahingoa ʻe ʻĀtama ʻa e fanga ngatá ki muʻa ia ʻi he foʻi ngāue kākā naʻe fai ʻe Sētané. Ko e ngata ʻikai te ne ʻilo ha meʻa naʻe lea kia ʻIví naʻe ʻikai ko ia naʻe kākaá. Naʻe ʻikai te ne ʻiloʻi naʻe ngāue taʻetotonu ʻaki ia ʻe Sētane, pea naʻe ʻikai lava ke ne mahinoʻi ʻa e fakamaau naʻe fai ʻe he ʻOtuá ki he kau talangataʻá.
Ko e hā leva naʻe lea ai ʻa e ʻOtuá ʻo fekauʻaki mo hono fakamāʻulaloʻi ʻa e sino ʻo e ngatá? Ko e tōʻonga ʻa ha ngata ʻi hono ʻātakai fakanatulá, ʻi heʻene ngaolo ʻi hono keté mo ʻene ʻai ki tuʻa hono ʻeleló ʻo hangē ko e ʻai ke ne ʻemo ʻa e efú, ʻoku fakatātaaʻi feʻungamālie ai ʻa e tuʻunga ololalo ʻo Sētané. ʻI heʻene maʻu ki muʻa ha tuʻunga māʻolunga ko e taha ʻo e kau ʻāngelo ʻa e ʻOtuá, ne tuku kiate ia ʻa e tuʻunga māʻulalo ʻoku lave ki ai ʻi he Tohi Tapú ko Tātalusi.—2 Pita 2:4, NW.
ʻIkai ko ia pē, ʻi he lava ke fakalaveaʻi ʻe ha ngata moʻoni ha muiʻivaʻe ʻo ha tangata, ko Sētane ʻi hono tuʻunga ololaló te ne ‘laiki ʻa e muivaʻe’ ʻo e “hako” ʻo e ʻOtuá. (Senesi 3:15) Ko e konga tefito ʻo e hako ko iá naʻe fakamoʻoniʻi ko Sīsū Kalaisi, ʻa ia naʻá ne faingataʻaʻia fakataimi ʻi he nima ʻo e kau fakafofonga ʻo Sētané. Ka ko e ʻulu fakaefakatātā ʻo e ngatá, ʻe iku ʻo laiki tuʻuloa ia ʻe Kalaisi mo hono ngaahi kaungāmeʻa ko e kau Kalisitiane pani kuo nau toetuʻú. (Loma 16:20) Ko ia ai, ko hono fakahoko ʻe he ʻOtuá ʻene fakamalaʻia ki he ngata hāmaí naʻe fakatātaaʻi totonu ai ʻa e tuʻunga ololalo mo e fakaʻauha fakaʻosi ʻo e “Ngata ʻo onoʻaho” taʻehāmai, ko Sētane ko e Tēvoló.