Meʻa ʻOku Tau Ako Meia Sīsū

Fekauʻaki mo e Puleʻanga ʻo e ʻOtuá

Ko e Hā ʻa e Puleʻanga ʻo e ʻOtuá?

Ko e Puleʻanga ʻo e ʻOtuá ko ha founga-pule ia ʻe pule ki he māmaní kātoa. Naʻe pehē ʻe Sīsū: “Ko e lotu eni ke mou faí, . . . Ke hoko mai ho Puleʻangá. Ke fai ho finangaló ʻi māmani, ʻo hangē ko ia ʻoku fai ʻi Hēvaní.”—Mātiu 6:9, 10, Ko e Taulua; Taniela 2:44.

Ko hai ʻe hoko ko e kau pule ʻo e Puleʻanga ʻo e ʻOtuá?

Naʻe ʻaloʻi mai ʻa Sīsū ke hoko ko e Pule ʻo e Puleʻanga ʻo e ʻOtuá. Naʻe tala ʻe ha ʻāngelo ki he faʻē ʻa Sīsuú: “ʻE foaki kiate ia ʻe he ʻEiki ko e ʻOtua ʻa e taloni ʻo ʻene kui ko Tevita: pea te ne tuʻi.” (Luke 1:30-33) Tānaki atu ki ai, naʻe fili ʻe Sīsū ʻa e niʻihi ʻo hono kau muimuí ke nau pule fakataha mo ia. Naʻá ne pehē ki heʻene kau ʻapositoló: “Ko kimoutolu ia kuo nofoʻi maʻu mo au ʻi hoku ngaahi ʻahiʻahi. Pea ko au ʻoku ou tuʻutuʻuni ha puleʻanga moʻomoutolu, ʻo hange ko e tuʻutuʻuni ha puleʻanga moʻoku ʻe heʻeku ʻEiki.” (Luke 22:28, 29; Taniela 7:27) Ko ha toko 144,000 fakakātoa ʻo e kau muimui ʻo Sīsuú te nau pule fakataha mo ia.—Fakahā 5:9, 10; 14:1.

ʻE tuʻu ʻi fē ʻa e Puleʻangá?

Ko e Puleʻanga ʻo e ʻOtuá ʻe pule mai ia mei hēvani. Naʻe pehē ʻe Sīsū ki heʻene kau ākongá: “Pea neongo te u ʻalu ʻo teuteu ha potu moʻomoutolu [ʻi hēvani], ka ʻoku ou toe haʻu pe, pea te u maʻu kimoutolu kiate au; koeʻuhi ko e potu ʻoku ou ʻi ai, ke mou ʻi ai foki. . . . koeʻuhiā ko ʻeku ʻalu ki he Tamai.”—Sione 14:2, 3, 12; Taniela 7:13, 14.

Ko e hā ʻe fai ʻe he Puleʻanga ʻo e ʻOtuá fekauʻaki mo e koví?

ʻE fakamaʻa ʻe Sīsū ʻa e foʻi māmaní mei he kakai fulikivanú. Naʻe pehē ʻe Sīsū: “ʻO ka ʻiloange ʻe hoko mai ʻa e Fanautama ʻa Tangata [Sīsū], kuo ne ʻai hono nāunau, pea haʻofia ia ʻe he kau angelo kotoa pe, te ne toki nofo ʻi hono taloni langilangiʻia: pea ʻe fakatahataha ki hono ʻao ʻa e ngāhi kakai kotoa pe; pea te ne vaheʻi kinautolu, . . . pea ʻe ʻalu atu ʻa kinautolu ni [faʻahinga fulikivanú] ki he tautea taʻengata: ka ko e fai lelei ki he moʻui taʻengata.”—Mātiu 25:31-34, 46.

Ko hai ʻe nofo ʻi he māmaní ʻo hoko ko e faʻahinga ʻe pule mai ki ai ʻa e Puleʻangá?

Naʻe pehē ʻe Sīsū: “Monūʻiaā ka ko kinautolu ʻoku faʻa kataki: he ʻe to moʻonautolu ʻae fonua.” (Mātiu 5:5; Sāme 37:29; 72:8) ʻE fonu ʻa e māmaní ʻi he kakai ʻa ia ʻoku nau ako ke feʻofaʻaki naʻa mo e taimí ni. Naʻe pehē ʻe Sīsū ki hono kau muimuí: “Ko e tuʻutuʻuni foʻou ʻoku ou tuku kiate kimoutolu, Ke mou feʻofaʻaki: hange ā ko ʻeku ʻofaʻi kimoutolu, ke pehē foki hoʻomou feʻofaʻaki. Ko e meʻa kó é ʻe ʻilo ai ʻe he kakai kotoa pē ko e kau ako kimoutolu aʻaku, ʻo kapau ʻe ai haʻamou feʻofaʻaki.”—Sione 13:34, 35.

Ko e hā ʻe fai ʻe he Puleʻanga ʻo e ʻOtuá ki he faʻahinga ʻo e tangatá ʻi he māmaní?

ʻE fakamoʻui ʻe Sīsū ʻa e faʻahinga ʻo e tangatá mei he mahamahakí. Lolotonga ʻene ʻi māmaní, naʻe lea ai ʻa Sīsū ki he fuʻu kakaí ʻo kau ki he “Puleʻanga ʻo e ʻOtua, ʻo ne fakamoʻui ʻa kinautolu naʻe tangi ki ha faitoʻo.” (Luke 9:11) Hili ʻene sio ʻi ha vīsone kia Sīsū kuo toetuʻú, naʻe pehē ʻe he ʻapositolo ko Sioné: “Pea u vakai ha langi foʻou mo ha fonua foʻou . . . Pea ongo mai ha fuʻu leʻo mei he taloni, ʻoku ne pehē, Ko eni, ko e tapanekale ʻo e ʻOtua, ʻoku tuʻu mo e kakai . . . Pea te ne holoholo ʻa e loʻimata kotoa pē mei honau mata; pea ʻe ʻikai toe ai ha mate.”—Fakahā 21:1-4.

ʻE fakafoki ʻe he Puleʻanga ʻo e ʻOtuá ʻa e Palataisí ki he māmaní. Ko ha tokotaha faikovi ʻa ia naʻe tautea mate fakataha mo Sīsū naʻá ne pehē: “ʻE Sisu, manatuʻi au, ʻo ka ke ka hoko mai kuo ke puleʻanga.” Pea pehē ange ʻe Sīsū kiate ia: “Ko au e, ʻoku ou tala atu, ko e ʻaho ni te ke ʻi Palataisi mo au.”—Luke 23:42, 43; Aisea 11:4-9.

Ki ha fakamatala lahi ange, sio ki he vahe 8 ʻo e tohi Ko e Hā ʻOku Akoʻi Moʻoni ʻe he Tohi Tapú?a

[Fakamatala ʻi lalo]