Faifakamoʻoni ʻi he Feituʻu Faiʻanga Fakataú

ʻI HEʻENE ʻi he kolo ko ʻAtenisí, naʻe ʻalu ai ʻa e ʻapositolo ko Paulá ʻi he ʻaho kotoa pē ki he feituʻu faiʻanga fakataú ke malangaʻi ʻa e ongoongo lelei fekauʻaki mo Sīsuú. (Ng. 17:17) Naʻe fili ʻe Paula ʻa e feituʻu faiʻanga fakataú koeʻuhi ko e feituʻu tefito ia naʻe lahi ʻi ai ʻa e kakai ʻAtenisí.

ʻI he meimei taʻu ʻe 2,000 mei ai, ʻoku kei ngāueʻaki ʻe he kakai ʻa Sihová ʻa e feituʻu faiʻanga fakataú ke fakamafola ai ʻa e pōpoaki ʻo e Puleʻanga ʻo e ʻOtuá. Ko e hā hono ʻuhingá? Koeʻuhi ʻoku malava ke maʻu ai ʻa e kakai tokolahi. ʻI he ʻahó ni, ko e feituʻu faiʻanga fakataú nai ko ha falekoloa lahi pe ko ha fuʻu fale ʻoku fakalokiloki ai ha ngaahi fakatauʻanga koloa kehekehe. ʻI he hili hono maʻu ʻe he Kau Fakamoʻoni ʻe niʻihi ha ngofua mei he pule ʻo ha falekoloa, kuo nau ngāueʻaki ai ha tēpile pe ko ha kiʻi tuʻuʻanga ke fakaʻaliʻali ai ʻa e ngaahi tohi Fakatohitapú.

Ko e fakatātaá, ʻi ha fuʻu fale ʻoku fakalokiloki ai ha ngaahi fakatauʻanga koloa kehekehe ʻi New Jersey, ʻAmelika, naʻe fakaʻaliʻali ai ʻi ha tuʻunga fakamānako ha ngaahi tohi fekauʻaki mo e kaveinga, “Tauhi Maʻu ʻa e Ngaahi Tuʻunga Mahuʻinga ʻa e Fāmilí—Anga-Fēfē?” Ko e hā ʻa e olá? ʻI he foʻi ʻaho pē taha, naʻe ʻave ai ʻa e tohi ʻe 153 ʻi he ngaahi lea ʻe ono.

Ko ha fefine naʻe fakaofiofi atu ki he tuʻuʻanga tohí, naʻá ne fanongo tokanga ki he fakamatala naʻe fai ʻe he taha ʻo e Kau Fakamoʻoní. Naʻe tui foki ʻa e fefiné ʻoku mahuʻinga ke tau fakakaukau ki he ʻOtuá ʻi heʻetau moʻuí pea ʻi hotau fāmilí. Naʻá ne ʻave ai ʻa e ʻū tohi ko ení: Ako mei he Faiako Lahí, Ko e Fakapulipuli ʻo e Fāmili Fiefiá pea mo e Ngaahi Fehuʻi ʻOku ʻEke ʻe he Toʻutupú—Tali ʻOku ʻAongá.

ʻI he hoʻatā efiafí, naʻe lue fakalaka hake ha tangata he ʻū tohi naʻe fakaʻaliʻalí ko ʻene kamata hū ki he falekoloa naʻe hoko atu aí. Naʻá ne sio ʻo mahuʻingaʻia ʻi he tohi ʻOku ʻEke ʻe he Toʻutupú. Ko e tuofefine naʻe tuʻu he ʻū tohí naʻá ne fakatokangaʻi atu ʻa ʻene fieʻiló. Naʻá ne ʻeke ange, “ʻOku ʻi ai ha tohi ʻokú ke mahuʻingaʻia ai?” Naʻe kamo ʻa e tangatá ʻo ne tuhu ki he tohi, ʻOku ʻEke ʻe he Toʻutupú. Naʻe ʻoange ʻe he tuofefiné kiate ia ʻa e tohí, ʻa ia naʻá ne ʻosi ala mai ke toʻo. Naʻe pehē ʻe he tangatá ko ʻene fānaú ʻoku toko tolu. Pea ʻi he hoko atu ʻa e fetalanoaʻakí, naʻá ne pehē ai ʻokú ne fai ha ngaahi talanoa mo kinautolu ʻo tuʻo taha he uike. Ko ʻene ongo tamaiki lalahí ʻokú na taʻu hongofulu tupu. ʻI heʻene sio hifo he tohí, naʻá ne pehē ai ʻe faingofua ʻaupito ke ne ngāueʻaki ia ke faiʻaki ha niʻihi ʻo ʻenau ngaahi talanoa fakafāmilí. Naʻe toe fakahanga foki ʻe he tokotaha malangá ʻene tokangá ki he tohi Ko e Fakapulipuli ʻo e Fāmili Fiefiá, ʻo fakapapauʻi ange kiate ia ʻe malava ke ne maʻu ai mo hono uaifí ha ngaahi faleʻi ʻaonga ʻaupito ki hono fai ʻo e ngaahi fili ʻi he fāmilí. Naʻe houngaʻia ʻa e tangatá ʻi he fokotuʻu ko iá, peá ne fai ha tokoni, peá ne tali mo e fokotuʻu ke ʻaʻahi ange ha taha kiate kinautolu.

Naʻe fēfē ʻa e ongoʻi ʻa e Kau Fakamoʻoní fekauʻaki mo e ʻaho ko eni ʻo ʻenau faifakamoʻoni ʻi he feituʻu faiʻanga fakataú? Naʻe pehē ʻe he tuofefine ʻe taha: “Naʻá ku saiʻia ʻaupito ʻi he founga malanga ko ení. He meʻa lelei moʻoni ia ne u hokosiá!” Ko e tuofefine ʻe taha naʻá ne pehē: “ʻOku folofola ʻa Sihova ko e ongoongo leleí ʻe malangaʻi ki he ngataʻanga ʻo māmaní. ʻI he ʻahó ni, ʻi Paramus, New Jersey, naʻe maongo ai ʻa e ongoongo lelei ko ení ki he kakai ʻi he ngaahi lea kehekehe. Ko ha meʻa lelei ʻeku kau ʻi he fokotuʻutuʻu ko ení. Naʻe fiefia ʻa e tokotaha kotoa naʻe kau ki aí. Pea ʻi he fakaʻosinga ʻo e ʻahó naʻe ʻikai ha taha ʻe fie foki.”

ʻE lava ke ke fakalahi ʻa e ngaahi founga ʻokú ke malangaʻi ai ʻa e ongoongo leleí? Ko ʻetau founga tefitó ko e ʻalu mei he fale ki he fale. (Ng. 20:20) Kae kehe, ʻe malava ke ke fakakaukau ke faifakamoʻoni ʻi he feituʻu faiʻanga fakataú pe ʻi he falekoloá?