Līpooti ʻa e Kau Fanongonongo ʻo e Puleʻangá
“I he Botu Fakatau i he Aho Kotoabe”
NAʻE ngāueʻaki ʻe he ʻapositolo ko Paulá ʻa e faingamālie kotoa pē ke fakamafola atu ai ʻa e pōpoaki ʻo e Puleʻangá. Koeʻuhi ke kumi ki he faʻahinga tāú, naʻá ne fakaʻuhinga “i he fale lotu moe kakai Siu . . . mo ia i he botu fakatau i he aho kotoabe.”—Ngāue 17:17, PM.
Ko e faivelenga peheé kuo hoko ko e ʻulungaanga ia ʻo e kau lotu moʻoni ʻa Sihová talu mei he ʻuluaki senituli T.S. (Mātiu 28:19, 20) ʻI he ʻahó ni, ʻoku ngāueʻaki tatau pē ʻe he Kau Fakamoʻoni ʻa Sihová ʻa e ngaahi founga kehekehe ʻi heʻenau tokoniʻi faivelenga ʻa e faʻahinga loto-faitotonú ke nau hoko ʻo maʻu ha ʻilo totonu ʻo e moʻoní. (1 Timote 2:3, 4) Ko e meʻa hono hoko naʻe hokosia ʻi ʻAositelēliá ʻokú ne fakatātaaʻi ʻeni.
ʻI he ʻaho ʻe nima he uike taki taha, ʻoku taufetongi ai ʻa Sid mo Harold ʻi hono tokangaʻi ha kiʻi fakahāhā ʻo e tohi faka-Tohitapú ʻi ha veʻe tauʻanga lēlue ʻi Senē. Kuó na vahevahe atu ʻa e ongoongo lelei ʻo e Puleʻanga ʻo e ʻOtuá ʻi he foungá ni ʻi he taʻu nai ʻe nima he taimí ni. Ko Sid, ʻa ia ʻokú ne taʻu 95, ʻokú ne fakamatala: “ʻI heʻeku taʻu 87, naʻe ʻikai leva te u toe malava ke fakaʻuli ʻi ha kā. Naʻe fakalotomamahiʻi au ʻe he meʻa ko iá koeʻuhi he naʻá ku saiʻia ʻi he ngāue faifakamoʻoni ki he kakaí. ʻI he ʻaho ʻe taha lolotonga ʻa ʻeku ofi atu ki ha feituʻu takimamata manakoa naʻe ui ko Echo Point ʻi Katoomba, naʻá ku sio ai ki ha tokotaha ʻaati ʻokú ne fakatau atu ha ngaahi tāvalivali ʻo e funga fonuá. Naʻá ku fakakaukauloto ki he ngaahi tāvalivalí peá u pehē pē ʻiate au, ‘ʻOku ʻi ai ʻeku ngaahi fakatātā lelei ange ai ʻi heʻeku kato malangá—pea ko ha kiʻi meʻa siʻisiʻi pē ʻa hono totongí!’ Ko ia naʻá ku fakakaukau ai ke ʻai ha kiʻi tuʻuʻanga fakaʻaliʻali, ʻo fokotuʻu ia ʻi ha feituʻu manakoa, pea tuʻuaki ki he kau fonongá ʻa e tohi faka-Tohitapu fakatātā fakaʻofoʻofa kuo tufaki ʻe he Kau Fakamoʻoni ʻa Sihová.
“ʻI he taʻu ʻe fā kuohilí, naʻá ku hiki ai ʻa e tuʻuʻangá ki Senē, pea kau fakataha mo au ʻa Harold. ʻOkú ma taufetongi ʻi hono tokangaʻi ʻo e tuʻuʻangá mo ngāue fakataha mo ʻemau ngaahi fakatahaʻanga fakafeituʻú.” Ko Harold, ʻokú ne taʻu 83 he taimí ni, ʻokú ne pehē: “ʻI he Mōnité ki he Falaité ko e kakai tokosiʻi ʻaupito pē ʻoku ʻi ʻapí. Ko ia, ko hono vahevahe atu ʻa e pōpoaki ʻo e Puleʻangá ʻi he founga ko ʻení ʻokú ne tuku ai kimaua ki he feituʻu ʻoku ʻi ai ʻa e kakaí. ʻOku fakanatula pē ʻa ʻema maʻu ʻa e ngaahi ola lelei ange. Ko ʻema tohi ʻoku tuku atú ʻoku mātuʻaki tuʻu-ki-muʻa ia ʻi he fonuá ni.”
“Neongo kuó ma fokotuʻutuʻu kimaua ʻi he ngaahi feituʻu kehekehe ʻe fā pe nima ʻi he faai mai ʻa e ngaahi taʻú,” ko e lau ia ʻa Sid, “ʻoku ʻikai fuoloa ia kuo ʻilo kimaua. ʻOku haʻu ʻa e kakai ʻe niʻihi kiate kimaua ki ha tohi. Ko e niʻihi kehe ʻoku ʻi ai ʻenau ngaahi fehuʻi ʻoku nau loto ke tali. Pea ʻoku loto pē ʻa e niʻihi ia ke talanoa ʻi ha ngaahi miniti siʻi. Ko e taimi pē ʻeni ʻoku haʻu ai ʻa ʻeku ngaahi toe ʻaʻahí kiate aú,” ko ʻene lea katá ia.
“ʻOku mahuʻingaʻia moʻoni ʻa e kakai tokolahi ʻi he Tohitapú,” ʻoku tānaki mai ʻe Harold. “ʻI he māhina ʻe taha naʻe kamata ai ʻa e toko fā ke ako ʻa e Tohitapú mo e Kau Fakamoʻoní ko e ola ia ʻo e tohi naʻa nau maʻu meiate kimauá pea koeʻuhi ko e ngaahi fehuʻi naʻe malava ke ma tali mei he Tohitapú. Ko e ngaahi meʻa hangē ko ia ʻoku hokosiá ʻokú ne fakalototoʻaʻi lahi kimaua.”
ʻI he hangē ko Sid mo Harold—pea hangē ko e ʻapositolo ko Paulá—ʻoku ngāueʻaki ʻe he Kau Fakamoʻoni ʻa Sihová ʻi he feituʻu kotoa pē ʻa e ngaahi founga kotoa pē ʻoku ala lavá ke fakamafola atu ai ʻenau pōpoaki mātuʻaki mahuʻingá. Ko ia, ko e “ongoongolelei” ʻoku hokohoko atu ʻa hono malangaʻí “ki mamani katoa.”—Mātiu 24:14.