ʻOku ʻi Ai ha Huafa ʻo e ʻOtuá?

Tali anga-mahení:

▪ “Ko hono huafá ko e ʻEiki.”

▪ “ʻOku ʻikai ke ʻi ai hano huafa fakafoʻituitui.”

Ko e hā naʻe leaʻaki ʻe Sīsuú?

▪ “Ko ia ke pehe ni haʻamoutolu lotu: Ko ʻemau Tamai ʻoku ʻi Hevani, ke tapuhā ho Huafa.” (Mātiu 6:9) Naʻe tui ʻa Sīsū ʻoku ʻi ai e huafa ʻo e ʻOtuá.

▪ “Kuo u fakaʻilo kiate kinautolu ho huafa, ʻio, pea te u fakaʻilo pē: koeʻuhi ke ʻiate kinautolu ʻa e ʻofa kuo ke ʻofa ʻaki kiate au, pea ke u ʻiate kinautolu foki mo au.” (Sione 17:26) Naʻe fakaʻilo ʻe Sīsū ʻa e huafa ʻo e ʻOtuá.

▪ “ʻE ʻikai ʻaupito te mou toe sio kiate au, kaeʻoua ke mou pehē, Hoto ʻofa kiate ia ʻoku hoko mai ʻi he huafa ʻo e ʻEiki [pe Sihová].” (Luke 13:35; Sāme 118:26) Naʻe ngāueʻaki ʻe Sīsū ʻa e huafa ʻo e ʻOtuá.

KO E ʻOtuá tonu ʻokú ne tala mai ʻa hono huafá. ʻOku lēkooti ʻa ʻene pehē: “Ko Sihova au; ko hoku hingoa ia.”a (Aisea 42:8) Ko e huafa Sihová ʻa e faʻunga faka-Tonga ʻoku ʻiloa taha ʻo e huafa faka-Hepelū naʻe uiʻaki ia ʻe he ʻOtuá. Te ke ʻohovale nai ke ʻiloʻi ko e huafa faka-Hepelū laulōtaha ko ení ʻoku hā tuʻo laui afe ia ʻi he ngaahi maniusikilipi Tohi Tapu motuʻá. Ko hono moʻoní, ʻoku toutou hā tuʻo lahi ange ia ʻi ha toe hingoa kehe pē ʻoku lave ki ai ʻi he Tohi Tapú.

ʻE tali nai ʻe he niʻihi ʻa e fehuʻi, “Ko hai ʻa e huafa ʻo e ʻOtuá?” ʻaki ʻenau pehē, “ko e ʻEiki.” Kae kehe, ko hono moʻoní ʻoku ʻikai fakatupu ʻilo tatau ia mo hono tali ʻa e fehuʻi, “Ko hai naʻe ikuna ʻi he filí?” ʻaki ʻa e pehē, “ko e kanititeití.” ʻOku ʻikai ko ha ongo tali mahino eni, koeʻuhi ko e “ʻEikí” mo e “kanititeití” ʻoku ʻikai ko ha ongo hingoa ia.

Ko e hā naʻe fakahaaʻi mai ai ʻe he ʻOtuá kia kitautolu ʻa hono huafá? Naʻá ne fai iá koeʻuhi ke lava ʻo tau ʻiloʻi lelei ange ia. Ke fakatātaaʻi, ʻe ui nai ha tokotaha ko e Tangataʻeiki, Pule, Tamai, pe Kui, ʻo fakatefito ʻi he ngaahi tuʻungá. ʻOku fakahaaʻi ʻe he ngaahi hingoa fakalakanga ko ení ha meʻa fekauʻaki mo ia. Ka ko e hingoa ʻo e tokotahá ʻokú ne fakamanatu mai ʻa e meʻa kotoa pē ʻoku tau ʻiloʻi fekauʻaki mo iá. ʻI he tuʻunga meimei tatau, ko e ngaahi hingoa fakalakanga ko e ʻEiki, Māfimafi-Aoniu, Tamai, mo e Tokotaha-Fakatupú ʻoku tohoakiʻi ai ʻa e tokangá ki he ngaahi tafaʻaki kehekehe ʻo e ngāue ʻa e ʻOtuá. Ka ko hono huafa fakafoʻituituí pē, ʻa e Sihová, ʻoku fakamanatu mai ai ʻa e meʻa kotoa pē ʻoku tau ʻilo fekauʻaki mo iá. ʻE lava fēfē ke ke ʻiloʻi moʻoni ʻa e ʻOtuá ʻo ʻikai te ke ʻiloʻi ʻa hono huafá?

ʻOku mahuʻinga ʻo ʻikai ngata pē ʻi hono ʻiloʻí ka ke toe ngāueʻaki foki ʻa e huafa ko iá. Ko e hā hono ʻuhingá? Koeʻuhi he ʻoku tala mai ʻe he Tohi Tapú: “ʻIlonga ʻa ia ʻe tautapa ki he huafa ʻo e ʻEiki [pe Sihová] ʻe fakamoʻui.”—Loma 10:13; Sioeli 2:32.

[Fakamatala ʻi lalo]

[Fakatātā ʻi he peesi 6]

ʻE ui nai ha tokotaha ko e Tangataʻeiki, Pule, Tamai, pe Kui, ʻo fakatefito ʻi he ngaahi tuʻungá.

Ka ko hono hingoa fakafoʻituituí ʻoku fakamanatu mai ai ʻa e meʻa kotoa pē ʻoku tau ʻilo fekauʻaki mo iá