Meʻa ʻOku Tau Ako Meia Sīsū

Founga ke Maʻu Ai ʻa e Fiefiá

Ko e hā ʻa e kī ki he fiefiá?

▪ Naʻe lave ʻa Sīsū ki he fiefiá ʻi heʻene muʻaki ngaahi lea ʻi he konga ki muʻa ʻo ʻene malanga ʻiloa tahá. Naʻá ne pehē: “Monūʻiaā pe fiefia ē ka ko kinautolu ʻoku ongoʻi masiva honau laumalie.” (Mātiu 5:3) Naʻá ne ʻuhingá ki he hā? Ko e hā ʻa e fiemaʻu fakalaumālie kia kitautolu?

Ke moʻuí, ʻoku fiemaʻu ke tau mānava, inu, mo kai, ʻo hangē pē ko e fanga monumanú. Ka ke hoko ʻo fiefiá, kuo ʻi ai ʻa e fiemaʻu kia kitautolu ʻa ia ʻoku ʻikai ke maʻu ia ʻe he fanga monumanú—ko e fiemaʻu ko ia ke mahinoʻi ʻa e taumuʻa ʻo e moʻuí. Ko e Tokotaha-Fakatupu pē ʻo e moʻuí ʻe lava ke ne fakalato ʻa e fiemaʻu ko iá. Ko ia, naʻe pehē ʻe Sīsū: “Oku ikai moʻui ʻa e tangata ʻi he ma pe, ka ʻi he ngāhi folofola kotoa pe ʻoku ʻalu atu mei he fofonga ʻo e ʻOtua.” (Mātiu 4:4) Ko e faʻahinga ʻoku nau lāuʻilo ki heʻenau fiemaʻu fakalaumālié ʻoku nau fiefia koeʻuhí he ʻoku nau ʻunuʻunu ofi kia Sihova, ʻa e “ʻOtua Mohu Monuʻia pe fiefiá,” pea ʻokú ne ʻoange kia kinautolu ha meʻa ʻoku mātuʻaki mahuʻinga ki he fiefiá—ko e ʻamanaki.—1 Timote 1:11.

Naʻe anga-fēfē hono ʻomai ʻe Sīsū ʻa e ʻamanakí?

▪ “Oku monuia pe fiefia ae agamalu: he te nau maʻu ae fonua,” ko e lea ia ʻa Sīsuú. (Mātiu 5:5, PM) Naʻe ʻoange ʻe Sīsū ʻa e ʻamanaki ki he faʻahinga ʻo e tangatá ʻaki hono faitoʻo ʻa e kakai puké pea mo hono fokotuʻu hake ʻa e kakai maté ki he moʻui ʻi he māmaní. Naʻá ne toe haʻu mo ha pōpoaki ʻo e ʻamanaki. Naʻá ne fakamatalaʻi: “Naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” (Sione 3:16) Ko e kakai ʻoku talangofua ki he ʻOtuá te nau maʻu ʻa e moʻui taʻengata ʻi he māmaní. ʻE lava ke ke fakaʻuta atu ke moʻui ʻi he lotolotonga ʻo e kakai anga-maluú pea ʻikai ʻaupito ke toe hoholo ʻo motuʻa? ʻOku ʻikai ha ofo ʻi he pehē ʻe he Folofola ʻa e ʻOtuá: “ʻI he fai ʻo hoʻomou ʻamanaki, mou fiefia.” (Loma 12:12) Naʻe toe lāulea ʻa Sīsū ki he founga ke maʻu ai ʻa e fiefiá he taimí ni.

Ko e hā ʻa e founga moʻui fakafiefia naʻe akoʻi ʻe Sīsuú?

▪ Naʻe ʻoange ʻe Sīsū ha akonaki ʻaonga fekauʻaki mo e ngaahi meʻa hangē ko e vahaʻangatae fakafoʻituituí, nofo malí, anga-fakatōkilaló, mo e vakai totonu ki he ngaahi meʻa fakamatelié. (Mātiu 5:21-32; 6:1-5, 19-34) Ko e muimui ki he faleʻi ʻa Sīsuú ʻe tokoniʻi ai koe ke ke maʻu ʻa e fiefiá.

Ko e nima-homó ʻoku ʻomai ai ʻa e fiefia. (Ngāue 20:35) Ko e fakatātaá, naʻe pehē ʻe Sīsū: “Ka ke ka fai ha katoanga, tala ia ki he kau masiva, ʻa e mamatea, ʻa e heke, ʻa e kui: pea te ke toki monūʻia pe fiefia; he ʻoku ʻikai haʻanau meʻa ke totongi ʻaki kiate koe.” (Luke 14:13, 14) ʻOku hoko mai ʻa e fiefiá, ʻo ʻikai ki he faʻahinga ʻoku nau kumi ki ai maʻanautolú, ka ki he faʻahinga ʻoku kumi ki ai maʻá e niʻihi kehé.

Ko e hā ʻa e matavai lahi taha ʻo e fiefiá?

▪ Ko hono fai ʻa e ngaahi meʻa maʻá e niʻihi kehé ʻe lava ke ʻai ai koe ke ke fiefia, ka ko hono fai ʻa e ngaahi ngāue maʻá e ʻOtuá ʻe lava ke ʻai ai koe ke ke fiefia lahi ange. Naʻa mo e fiefia ʻoku maʻu ʻe ha mātuʻa ʻoku nau ʻofa ki heʻenau fānaú heʻikai lava ke fakatatau ia ki ai. ʻOku hā mahino eni mei he meʻa naʻe hoko ʻi he taimi ʻe taha lolotonga hono akoʻi ʻe Sīsū ʻa e kakaí. “Naʻe kalanga mai ha fefine mei he kakai, ʻo ne pehē kiate ia, Monūʻiaā pe fiefia ē ka ko e mănava naʻa ke tokoto ai, mo e ongo huhu naʻa ke huhu ai!” Ka naʻá ne pehē: “ʻA, ʻoku monūʻia pe fiefia ʻa kinautolu ʻoku maʻu ʻa e folofola ʻa e ʻOtua, ʻo tauhi ki ai.”—Luke 11:27, 28.

Naʻe maʻu ʻe Sīsū tonu ʻa e fiemālie mo e fiefia ʻi hono fai ʻa e finangalo ʻo ʻene Tamai fakahēvaní. Ko e finangalo ʻo e ʻOtuá ke fanongo ʻa e kakaí fekauʻaki mo e ʻamanaki ʻo e moʻui taʻengatá. ʻIkai ko ia pē, hili hono fakamatalaʻi ʻa e ʻamanaki ko ení ki ha tokotaha mahuʻingaʻia, naʻe pehē ʻe Sīsū: “Ko ʻeku meʻakai e, ko e tuli ke fai ʻa e finangalo ʻo ia naʻa ne fekau mai au.” (Sione 4:13, 14, 34) ʻE lava mo koe foki ke ke hokosia ʻa e fiefia ʻi hono fai ha meʻa ʻoki fakahōifua ki he ʻOtuá ʻaki hono vahevahe atu ʻa e moʻoni Fakatohitapú ki he niʻihi kehé.

Ki ha fakamatala lahi ange, sio ki he vahe 1 ʻo e tohi ko ení, Ko e Hā ʻOku Akoʻi Moʻoni ʻe he Tohi Tapú? ko e pulusi ʻe he Kau Fakamoʻoni ʻa Sihová.

[Fakatātā ʻi he peesi 17]

Ko e fiefia moʻoní ʻoku haʻu ia mei hono fakalato ʻetau fiemaʻu ke mahinoʻi ʻa e taumuʻa ʻo e moʻuí