‘Tau Omi ae Feilaulau kia Jihova’
ʻI HE taimi ʻoku fakaaʻu atu ai ʻe ha taha ha tōʻonga anga-ʻofa kiate koé, ʻoku fēfē hoʻo fakahāhā ʻa hoʻo houngaʻiá? Fakakaukau angé ki he founga naʻe fakahāhā ʻaki ʻe he kau ʻeikitau ʻi ʻIsilelí ʻenau houngaʻiá hili ha fepaki fakakautau mo e kau Mitianí. Naʻe fai ʻa e taú hili e faiangahala ʻa ʻIsileli ʻi he fekauʻaki mo Pēali-Peoli. Naʻe ʻoange ʻe he ʻOtuá ʻa e ikuna maʻa hono kakaí, pea ko e ngaahi koloa veté naʻe vahevahe ia ʻi he kau sōtia ʻe toko 12,000 mo e toenga ʻo ʻIsilelí. Fakatatau ki he fakahinohino ʻa Sihová, naʻe foaki ai ʻe he kau sōtiá ha konga ʻo honau ʻinasí ki he kau taulaʻeikí, pea ko e kau ʻIsileli kehé naʻa nau foaki ha konga meimei tatau ki he kau Līvaí.—Nom. 31:1-5, 25-30.
Kae kehe, ko e kau ʻeikitaú naʻa nau loto ke fai ʻa e meʻa lahi ange. “Kuo fai e hoo kau tamaioeiki ae lau oe kakai tau akinautolu oku mau bule ki ai, bea oku ikai ha tagata kuo to iate kimautolu,” ko ʻenau tala ange ia kia Mōsesé. ʻI he feilaulau kia Sihová, naʻa nau fili ke foaki ʻa e koula mo e ngaahi meʻa teuteu kehekehe. Ko e mamafa fakakātoa ʻo e ngaahi meʻa teuteu koulá naʻe laka hake ia ʻi he pāuni ʻe 500 (kilokalami ʻe 190).—Nom. 31:49-54, PM.
ʻI he ʻahó ni, ʻoku pehē hono ueʻi ʻa e kakai tokolahi ke nau fakahāhā ʻenau houngaʻia ki he meʻa kuo fai ʻe Sihova maʻanautolú. ʻIkai ko ia pē, ko e ngaahi ongoʻi pehē ʻo e houngaʻiá ʻoku ʻikai fakangatangata pē ia ki he kau sevāniti fakatapui ʻa e ʻOtuá. Ko e fakatātaá, fakakaukau atu ki ha fakaʻuli pasi ʻa ia naʻá ne ʻave mo fakafoki mei he sitētiumé ha kulupu ʻo e kau fakafofonga ki he fakataha-lahi fakavahaʻapuleʻanga ʻa ia naʻe fai ʻi Bologna, ʻĪtali, ʻi he 2009. Koeʻuhi ko ha fakaʻuli mātuʻaki tokanga ia fakataha mo ha laumālie anga-mokomoko, ko e faʻahinga naʻa nau heka ʻi heʻene pasí naʻa nau fakakaukau ke fai ha kiʻi tohi fakamālō pea mo ʻoange ha kiʻi tipi fakataha mo e tohi Ko e Hā ʻOku Akoʻi Moʻoni ʻe he Tohi Tapú? ʻI he meʻa ko iá, naʻe tali mai ʻe he fakaʻulí: “ʻOku ou tali fiefia ʻa e kātí mo e tohí, ka ʻoku ou fakafoki atu ʻa e paʻangá koeʻuhí ʻoku ou loto ke foaki atu ia ke mou lava ai ʻo hokohoko atu ʻa e ngāue ʻoku mou lolotonga faí. Neongo ʻoku ʻikai ko e taha au ʻo e Kau Fakamoʻoni ʻa Sihová, ʻoku ou loto ke fai ʻa e foaki ko ení koeʻuhí kuó u sio ʻoku mou fai ʻa e ngaahi meʻá tuʻunga ʻi he ʻofa.”
ʻI hono ueʻi ʻe he houngaʻia ki he meʻa kuo fai ʻe Sihova maʻaú, ko e founga ʻe taha ke fakahāhā ai hoʻo houngaʻiá ko hono fai ha ngaahi foaki ki he ngāue ʻa e Kau Fakamoʻoni ʻa Sihova ʻi māmani lahí. (Mt. 24:14) Ko e ngaahi founga ʻoku fili ʻe he niʻihi ke fai ʻaki ʻenau foakí ʻoku fakahokohoko ia ʻi he puha ʻoku ʻoatu hení.
[Puha ʻi he peesi 20, 21]
NGAAHI FOUNGA ʻOKU FILI AI ʻA E NIʻIHI KE FAI HA FOAKÍ
NGAAHI MEʻAʻOFA KI HE NGĀUE ʻI MĀMANI LAHÍ
ʻOku tuku mavahe, pe vaheʻi ʻe he tokolahi ha paʻanga, ʻa ia ʻoku nau tuku ki he ngaahi puha meʻaʻofa kuo leipolo ko e “Ngāue ʻi Māmani Lahí.”
ʻI he māhina taki taha, ʻoku ʻoatu ai ʻe he ngaahi fakatahaʻangá ʻa e paʻanga ko ení ki he ʻōfisi ʻo e Kau Fakamoʻoni ʻa Sihova ʻa ia ʻokú ne tokangaʻi ʻa honau ngaahi fonuá taki taha. Ko e ngaahi tokoni paʻanga loto-fiefoakí ʻe lava ke toe ʻoatu fakahangatonu ia ki he Watchtower Bible and Tract Society of New Zealand, PO Box 75142, Manurewa, Manukau 2243, pe ki he ʻōfisi vaʻa ʻo e Kau Fakamoʻoni ʻa Sihová ʻokú ne tokangaʻi ho fonuá. Ko e ngaahi sieke ʻoku ʻave ki he tuʻasila ʻi ʻolungá ʻoku totonu ke ʻai ke ala totongi ia ki he “Watch Tower.” Ko e ngaahi siueli pe ngaahi koloa mahuʻinga kehé ʻe lava foki ke tokoni nai ʻaki. Ko ha tohi nounou ʻo fakamatalaʻi ai ko e ngaahi meʻa peheé ko ha foaki fakahangatonu ia ʻoku totonu ke ʻave fakataha mo e ngaahi meʻaʻofa ko ení.
FOKOTUʻUTUʻU ʻO E TOKONI ʻOFÁ PE NŌ ʻIKAI HA TUPU
ʻE tuku nai ʻa e paʻangá ki ha talāsiti ke ngāueʻaki ʻi Nuʻu Sila pe ʻi māmani lahi. Kapau ʻe fiemaʻu ʻe he tokotaha-foakí, ʻe lava ke fakafoki ʻa e paʻanga ko ení ʻi hano kole. Ki ha fakamatala lahi ange, kātaki ʻo fetuʻutaki ʻi he tohi ki he ʻŌfisi Tauhi Paʻangá ʻi he tuʻasila kuo hiki ʻi ʻolungá.
FOAKI ʻOSI PALANI
Tānaki atu ki he ngaahi meʻaʻofa paʻanga fakahangatonú, ʻoku ʻi ai ʻa e ngaahi founga kehe ʻo e foakí ke ʻaonga ki he ngāue ʻo e Puleʻangá ʻi māmani lahí. ʻOku kau ki heni ʻa e:
Maluʻi: ʻE lava ke tohi-tuku nai ki he Sōsaieti Taua Leʻo Tohi Tapu mo e Tuleki ʻi Nuʻu Silá ha tohi fakamoʻoni maluʻi moʻui pe ko ha fokotuʻutuʻu ʻo ha vāhenga mālōlō.
Ngaahi ʻInasi mo e Ngaahi Pōnite: ʻE foaki atu nai ʻa e ngaahi ʻinasi mo e ngaahi pōnite ki he Sōsaieti Taua Leʻo ʻi Nuʻu Silá ko ha meʻaʻofa fakahangatonu.
Kelekele: ʻE lava nai ke foaki ha konga kelekele ʻe ala fakatau ʻi hano fai ha meʻaʻofa fakahangatonu pe ʻi he tuʻunga ʻo ha konga ʻapi ʻoku nofoʻi, ʻi hano tauhi ha kelekele ʻo e tokotaha-foakí, ʻa ia ʻe lava ke hokohoko atu ʻene nofo aí ʻi heʻene kei moʻuí. Fetuʻutaki ki he ʻōfisi vaʻa ʻi ho fonuá ki muʻa ke foaki fakalao ha kelekele.
Ngaahi Tohi-Tuku mo e Ngaahi Talāsiti: ʻE foaki nai ha koloa pe paʻanga ki he Sōsaieti Taua Leʻo Tohi Tapu mo e Tuleki ʻi Nuʻu Silá fakafou ʻi ha tohi-tuku fakahoko fakalao, pe ʻe ʻai nai ʻa e hingoa ʻo e Sōsaieti Taua Leʻó ke tohi-tuku ki ai ha aleapau ʻo ha talāsiti. Ko ha talāsiti ʻoku maʻu ʻaonga mei ai ha kautaha fakalotu ʻe tokonaki mai nai ai ha ngaahi ʻaonga pau ki he tukuhaú.
Ki ha fakamatala lahi ange, ʻe lava ke ke fetuʻutaki ki he ʻŌfisi Tauhi Paʻangá, ʻi ha faitohi pe ʻi he telefoní, ʻi he tuʻasila kuo fakahā ʻi ʻolungá, pe ko e ʻōfisi vaʻa ʻokú ne tokangaʻi ho fonuá.