ʻOku Mou Maʻu ʻa e ʻUhinga Lelei ke Fiefia
MEI HE kiʻi sela moʻui valevale tahá ki he ngaahi kaniva kāfakafa kuo fakakulupu ʻi he ngaahi pupunga mo e ngaahi fuʻu pupunga lalahí, ʻoku tapua atu mei he fakatupú ʻa e fokotuʻutuʻu maau. ʻOku ʻikai ʻaupito fakaʻohovale eni, he ko e Tokotaha-Fakatupú ‘ʻoku ʻikai ko e ʻOtua fakatupu maveuveu.’ (1 Kol. 14:33) Ko e fokotuʻutuʻu ʻa e ʻOtuá ki he lotú ʻoku toe fakaofo foki. Fakakaukau ki he meʻa kuo fai ʻe Sihová. Kuó ne faʻu ki he fokotuʻutuʻu maau fakaeʻuniveesi ʻe taha ʻa e ngaahi meʻamoʻui ʻatamai poto ʻe laui teau miliona—fakaesino pea pehē ki he fakalaumālie—ʻoku nau maʻu ʻa e tauʻatāina ke fili, ʻo nau fāʻūtaha ʻi he lotu maʻá. He meʻa fisifisimuʻa moʻoni ia!
ʻI ʻIsileli ʻo e kuonga muʻá, ko e konga fakaemāmani ʻo e kautaha ʻa e ʻOtuá naʻe fakatātaaʻi ʻaki ia ʻa Selusalema, ʻa ia naʻe tuʻu ai ʻa e temipale ʻo Sihová pea naʻe nofo ai mo ʻene tuʻi paní. Naʻe fakahaaʻi ʻe ha pōpula ʻIsileli ʻi Pāpilone ʻa ʻene ngaahi ongoʻi ki he kolo māʻoniʻoní ʻo peheni: “Ke piki ki hoku ʻoaoʻingutu ʻa hoku ʻelelo e, ʻo kapau ʻe ʻikai te u manatua koe; ʻo kapau ʻe ʻikai te u tuku ki muʻa ʻa Selusalema ʻi hoku fungani fiefia.”—Sāme 137:6.
Ko e anga ia hoʻo ongoʻi fekauʻaki mo e kautaha ʻa e ʻOtuá he ʻaho ní? ʻOkú ne ʻomai ʻa e fiefia lahi ange kiate koe ʻi ha toe meʻa kehe pē? ʻOku mahinoʻi ʻe hoʻo fānaú ʻa e hisitōlia mo e ngāue ʻa e konga fakaemāmani ʻo e kautaha ʻa e ʻOtuá? ʻOku nau mahinoʻi ko e konga kinautolu ʻo ha fetokouaʻaki fakaemāmani lahi ʻo e Kau Fakamoʻoni ʻa Sihová? (1 Pita 2:17) Ko e hā ʻoku ʻikai te ke ngāueʻaki ai ʻa e ngaahi fokotuʻu ko ení ʻi ho efiafi Lotu Fakafāmilí koeʻuhi ke fakalahi ai ʻa e houngaʻia ʻa ho fāmilí ki he kautaha ʻa Sihová?
ʻAʻau ʻa e “Ngaahi Taimi Fuoloa”
ʻI he taʻu taki taha, naʻe fakatahataha ai ʻa e ngaahi fāmili ʻIsilelí ke kātoangaʻi ʻa e Pāsová. ʻI he taimi naʻe fokotuʻu ai ʻa e kātoangá, naʻe fakahinohino ʻe Mōsese ki he kakaí: “Ka faifai pea fehuʻi kiate koe ʻe ho foha ʻamui, ʻo pehe, Ko e ha e? pea te ke tali ki ai, Ko e nima malohi naʻe ʻomi ai kimautolu ʻe Sihova mei Isipite, mei he fale hopoate.” (Eki. 13:14) Ko e ngaahi feangainga ʻa Sihova mo e kau ʻIsilelí naʻe ʻikai fiemaʻu ke fakangaloʻi ia ʻi he hisitōliá. Ko e moʻoni, naʻe muimui ʻa e ngaahi tamai ʻIsileli tokolahi ki he fekau ʻa Mōsesé. ʻI he ngaahi toʻutangata ki muí, naʻe lotu ai ha tokotaha ʻIsileli: “ʻE ʻOtua, kuo ongo ki homau telinga, kuo aʻau mai ʻe homau tupuʻanga, ʻa e ngaue naʻa ke feia ʻi honau kuonga, ʻi he ngaahi taimi fuoloa.”—Sāme 44:1.
Ki ha tokotaha kei siʻi he ʻahó ni, ko e hisitōlia ʻo e Kau Fakamoʻoni ʻa Sihová laka hake ʻi he taʻu ʻe 100 fakamuimuí pe ofi ki ai ʻoku toe hā ngali hangē ia ko e “ngaahi taimi fuoloa.” ʻE lava fēfē ke ke ʻai ke hā moʻoni ʻa e ngaahi meʻa ko ení ki hoʻo fānaú? Ke fai peheé, ʻoku ngāueʻaki ʻe he ngaahi mātuʻa ʻe niʻihi ʻa e Jehovah’s Witnesses—Proclaimers of God’s Kingdom, ko e Yearbook, ko e ngaahi talanoa ki he moʻuí kuo pulusi ʻi heʻetau ʻū tohí, mo e ngaahi fakamatala kehe ʻo e hisitōlia fakateokalatí, ʻo kau ai ʻa ʻetau DVD foʻou fekauʻaki mo e kakai ʻa e ʻOtuá ʻi onopōní. Ko e ngaahi vitiō felāveʻi mo e fakatangaʻi ʻa hotau fanga tokoua ʻi he Sovieti ʻIunioni ki muʻá mo e Siamane Nasí ʻoku akoʻi ai ʻa e ngaahi fāmilí ke nau falala kia Sihova lolotonga ʻa e ngaahi ʻahiʻahí. Fakakau ʻa e fakamatala peheé ʻi ho efiafi Lotu Fakafāmilí. ʻE ʻai ʻe he meʻa ko iá ke mālohi ʻa e tui ʻa hoʻo fānaú telia naʻa nau fetaulaki mo e ngaahi pole ki heʻenau anga-tonú.
Kae kehe, ko ha malanga fekauʻaki mo e hisitōliá, ʻe fakapipikoʻia vave nai ai ʻa e ʻatamai ʻo e fānaú. Ko ia fakakau ki ai ʻa hoʻo fānaú. Ko e fakatātaá, te ke kole nai ki ho fohá ke ne fili ha fonua ʻokú ne mahuʻingaʻia aí, fekumi ki he hisitōlia fakateokalati ʻo e fonua ko iá, pea fakahaaʻi ʻa e niʻihi ʻo e meʻa kuó ne akó ki hono fāmilí. ʻI hoʻo fakatahaʻangá, ʻoku ʻi ai nai ʻa e kau Kalisitiane mo ha lēkooti ʻo e ngāue faitōnunga fuoloa ʻa ia te nau kau mai nai ʻi ha efiafi ʻe taha ʻi hoʻo lotu fakafāmilí. Mahalo pē ʻe lava ke fakaʻekeʻeke kinautolu ʻe ho ʻofefiné ke ʻomai ʻenau fakakaukaú, ʻo ʻai ke nau talanoa ki heʻenau ngaahi hokosiá. Pe te ke lava ke ʻai hoʻo kiʻi tamá ke ne tā ha fakatātā ʻo e ngaahi meʻa mahuʻinga fakateokalatí, hangē ko e langa ʻo ha vaʻa, ko ha fakataha-lahi fakavahaʻapuleʻanga, pe ko hono ngāueʻaki ʻo ha kalamafoni ʻi he ngāue fakafaifekau fale-ki-he-falé.
Ako ki he Anga Hono “Fai ʻe he Konga Taki Taha ʻa ʻEne Ngāué”
Naʻe fakahoa ʻe he ʻapositolo ko Paulá ʻa e fakatahaʻanga Kalisitiané ki he “sino kakato, kuo fakatahaʻi pea ʻai ke fepikitaki fakataha ʻe he uoua kotoa pē ʻokú ne pukepuké, [ʻa ia] ʻoku tupu pea langa hake ia tonu ʻi he ʻofa, ʻi he fai ʻe he konga taki taha ʻa ʻene ngāué.” (Ef. 4:16, New International Version) Ko e ako fekauʻaki mo e anga ʻo e ngāue ʻa e sino fakaetangatá ʻoku fakalahi ai ʻetau houngaʻia mo e ʻapasia ki hotau Tokotaha-Fakatupú. ʻI he tuʻunga meimei tatau, ʻi he taimi ʻoku tau sivisiviʻi ai ʻa e anga ʻo e ngāue ʻa e fakatahaʻanga ʻi māmani lahí, ʻoku tau ofo ʻi he “poto faifio ʻa e ʻOtua.”—Ef. 3:10.
ʻOku fakamatalaʻi ʻe Sihova ʻa e anga ʻo e ngāue ʻa ʻene kautahá, ʻo kau ai ʻa hono konga fakahēvaní. Ko e fakatātaá, ʻokú ne tala mai kia kitautolu naʻá ne ʻuluaki ʻoange ha meʻa fakahā kia Sīsū Kalaisi, ʻa ia naʻá ne hanga leva ʻo “fekau atu ʻi heʻene angelo, ke fakaha fakatātā atu ia ki heʻene tamaioʻeiki ko Sione: ʻa ia kuo ne fakamatala.” (Fkh. 1:1, 2) Kapau ʻoku fakahaaʻi mai ʻe he ʻOtuá ʻa e anga ʻo e ngāue ʻa e konga taʻehāmai ʻo ʻene kautahá, ʻikai te ne loto ke tau mahinoʻi ʻa e anga hono “fai ʻe he konga taki taha ʻa ʻene ngāué” ʻi he māmaní?
Hangē ko ení, kapau kuo vave ke ʻaʻahi atu ʻa e ʻovasia sēketí ki hoʻo fakatahaʻangá, ko e hā ʻoku ʻikai te ke lāulea ai mo ho fāmilí ki he ngaahi fatongia mo e monū ʻo e kau ʻovasia fefonongaʻakí? ʻOku anga-fēfē ʻenau tokoniʻi ʻa kitautolu taki taha? Ko e ngaahi fehuʻi kehe ʻe lava ke lāulea ki aí ʻe kau ai eni: Ko e hā ʻoku mahuʻinga ai ke līpooti ʻa e ngāue fakafaifekaú? ʻOku anga-fēfē hono fakapaʻanga ʻa e kautaha ʻa e ʻOtuá? ʻOku anga-fēfē hono fokotuʻutuʻu ʻa e Kulupu Pulé, pea ʻoku anga-fēfē ʻene tokonaki mai ʻa e meʻakai fakalaumālié?
ʻI he taimi ʻoku tau mahinoʻi ai ʻa e anga hono fokotuʻutuʻu ʻa e kakai ʻa Sihová, ʻoku tau maʻu ʻaonga ai ʻo ʻikai toe siʻi hifo ʻi he founga ʻe tolu: ʻOku fakalahi ai ʻetau houngaʻia ʻi he faʻahinga ʻoku nau ngāue mālohi maʻatautolú. (1 Tes. 5:12, 13) ʻOku ueʻi ai kitautolu ke tau poupouʻi ʻa e ngaahi fokotuʻutuʻu fakateokalatí. (Ng. 16:4, 5) Fakaʻosí, ʻoku ʻai ai ke mālohi ʻa ʻetau falala ki he faʻahinga ʻoku takimuʻá, ʻi heʻetau sio ki he makatuʻunga Fakatohitapu ʻo e ngaahi fili mo e ngaahi fokotuʻutuʻu kuo faí.—Hep. 13:7.
“Sio Fakafoʻimeʻa ki Hono Ngaahi Palasi”
“Foli ʻa Saione, ʻo fakatakamilo ʻa tuʻa: Lau hono ngaahi taua. Ako ke maʻu loto hono puke, sio fakafoʻimeʻa ki hono ngaahi palasi e; koeʻuhi ke ke fakamatala fakaʻaufuli ki ha toʻutangata ʻe hoko ʻamui.” (Sāme 48:12, 13) Naʻe fakaʻaiʻai ai ʻe he tokotaha-tohi-sāmé ʻa e kau ʻIsilelí ke nau sio fakalautelau ki Selusalema. ʻE lava ke ke fakaʻuta atu ki he ngaahi manatu mahuʻinga naʻe fevahevaheʻaki ʻe he ngaahi fāmili ʻIsileli ʻa ia naʻa nau fononga ki he kolo māʻoniʻoní ki he ngaahi kātoanga fakataʻú pea nau sio ai ki hono temipale fakaʻofoʻofá? Kuo pau pē naʻe ueʻi kinautolu ke nau “fakamatala fakaʻaufuli ki ha toʻutangata ʻe hoko ʻamui.”
Fakakaukau ki he kuini ʻo Sipá, ʻa ia naʻá ne ʻuluaki veiveiua ʻi he ngaahi līpooti fekauʻaki mo e pule fisifisimuʻa ʻa Solomoné pea mo hono fuʻu potó. Ko e hā naʻá ne fakatuipauʻi kiate ia naʻe moʻoni ʻa e ngaahi meʻa naʻá ne fanongo aí? “Naʻe ʻikai te u tui ki he meʻa naʻe lau,” ko ʻene leá ia, “kaeʻoua ke u haʻu ʻo sio ki ai hoku mata ni.” (2 Kal. 9:6) ʻIo, ko e meʻa ʻoku tau sio ki ai ʻaki hotau “mata” ʻe lava ke ne uesia lahi kitautolu.
ʻE lava fēfē ke ke tokoniʻi hoʻo fānaú ke nau sio ki he ngaahi meʻa fakaofo ʻi he kautaha ʻa Sihová ʻaki honau “mata”? Kapau ʻoku ʻi ai ha ʻōfisi vaʻa ʻo e Kau Fakamoʻoni ʻa Sihová ofi ki ho ʻapí, fai ha feinga ke ʻaʻahi ki ai. Ko e fakatātaá, ko Mandy mo Bethany, naʻá na tupu hake ʻi he maile nai ʻe 900 (kilomita ʻe 1,500) mei he ʻapi Pēteli ʻi hona fonuá. Neongo ia, naʻe palani ʻe heʻena ongo mātuʻá ke toutou fai ha fononga ʻo ʻaʻahi ki he ngaahi fale ʻi he vaʻá, tautefito ʻi he lolotonga ʻa e kei tupu hake ʻa hona ongo ʻofefiné. “Ki muʻa ke ma ʻaʻahi ki Pētelí, naʻá ma fakakaukau naʻe fuʻu maau pea ko e meʻa pē ia ke fai ʻe he kau vaivai,” ko ʻena fakamatalá ia. “Ka naʻá ma fetaulaki ai mo e toʻutupu naʻa nau ngāue mālohi maʻa Sihova pea ʻoku nau fiefia ai! Naʻá ma sio ai ko e kautaha ʻa Sihová naʻe mahulu atu ia ʻi he kiʻi feituʻu pē naʻá ma nofo aí, pea ko e ʻaʻahi taki taha ki he Pētelí naʻe ʻomai ai kia kimaua ha ivi fakalaumālie lahi ange.” Ko e sio fakalautelau ki he kautaha ʻa e ʻOtuá naʻá ne ueʻi ʻa Mandy mo Bethany ke na kamata tāimuʻa, pea naʻe aʻu ʻo fakaafeʻi kinaua ke na ngāue ʻi he Pētelí ʻi he tuʻunga ko e ongo ngāue pole fakataimi.
ʻOku tau maʻu ha toe founga ke “sio” ai ki he kautaha ʻa Sihová, ko ha founga naʻe ʻikai lava ke maʻu ʻe he kau ʻIsileli ʻo e kuonga muʻá. ʻI he ngaahi taʻu ki mui ní, kuo maʻu ai ʻe he kakai ʻa e ʻOtuá ʻa e ngaahi vitiō mo e DVD ʻoku ʻi ai ʻa e ngaahi tafaʻaki kehekehe ʻo e kautaha ʻa e ʻOtuá, hangē ko e: Jehovah’s Witnesses—Organized to Share the Good News, Our Whole Association of Brothers, To the Ends of the Earth, mo e United by Divine Teaching. ʻI hoʻo sio mo ho fāmilí ki he ngāue mālohi ʻa e kau ngāue Pētelí, kau ngāue tokoní, kau misinalé, mo e fanga tokoua ʻoku nau teuteu mo fokotuʻutuʻu ʻa e ngaahi fakataha-lahí, ʻe tupulaki moʻoni ai ʻa e houngaʻia ʻa ho lotó ki he fetokouaʻaki ʻi māmani lahí.
Ko e fakatahaʻanga kotoa pē ʻa e kakai ʻa e ʻOtuá ʻoku nau fakahoko ha ngafa mahuʻinga ʻi hono malangaʻi ʻa e ongoongo leleí mo hono poupouʻi ʻa e kau Kalisitiane ʻi he feituʻu ko iá. Kae kehe, vaheʻi ha taimi mo ho fāmilí ke fakamanatuʻi ai ʻa e ‘kotoa ʻo homou fanga tokoua ʻi he māmaní.’ ʻE tokoniʻi koe mo hoʻo fānaú ʻe he meʻá ni ke mou hanganaki ‘tuʻu maʻu ʻi he tuí,’ ʻi he ʻiloʻi ʻoku mou maʻu ʻa e ʻuhinga lelei ke fiefia.—1 Pita 5:9, NW.
[Puha/Fakatātā ʻi he peesi 18]
Kautaha ʻa e ʻOtuá—Ko ha Tuʻunga-Lea Lelei ke Ako
ʻOku tau maʻu ʻa e ngaahi tokonaki lahi fau ke tokoniʻi ʻa e tokotaha kotoa ke ako lahi ange fekauʻaki mo e hisitōlia pea mo e ngāue ʻa e kautaha ʻa Sihová. Ko e ngaahi fehuʻi hokó ʻe tokoniʻi nai ai koe ke ke kamata:
☞ Naʻe anga-fēfē kamata ʻa e ngāue ʻa e kau ʻovasia fefonongaʻaki ʻi onopōní? —Jehovah’s Witnesses—Proclaimers of God’s Kingdom, peesi 222-227.
☞ Ko e hā naʻe mahuʻinga fekauʻaki mo e “ʻAho ʻo e Fānaú” ʻi he ʻAsemipilī Fakateokalati 1941?—Jehovah’s Witnesses—Proclaimers of God’s Kingdom, peesi 86, 88.
☞ ʻOku anga-fēfē hono fai ʻe he Kulupu Pulé ʻa e ngaahi filí?—“Bearing Thorough Witness” About God’s Kingdom, peesi 108-114.