Tokoniʻi ʻa e Tamaikí Ke Nau Hoko ʻo Alāanga mo e Kautaha ʻa Sihová

ʻOKU loto ʻa e fānaú ke ako. Fakakaukau atu ki he ngaahi fehuʻi kuo pau nai naʻe maʻu ʻe he fānau ʻIsileli ʻi ʻIsipité ʻi he poʻuli hifo ʻo e ʻuluaki Pāsová: ‘Ko e hā e ʻuhinga naʻe pau ai ke mate ʻa e lamí?’ ‘Ko e hā e ʻuhinga ʻoku hanga ai ʻe he Tamaí ʻo vali totoʻi ʻa e matapaá?’ ‘Ko ʻetau ʻalú ki fē?’ Ko hono tali lelei ʻe Sihova ʻa e ngaahi fehuʻi peheé ʻoku hā mahino ia mei he meʻa kuó ne fekauʻi ki he ngaahi tamai ʻIsilelí. Naʻe tala ʻe Sihova kia kinautolu fekauʻaki mo e ngaahi fakamanatu ʻi he kahaʻú ʻo e Pāsová: “Ka faifai pea lea kiate kimoutolu ʻe hoʻomou fanau, ʻo pehe, Ko e ha ʻa e feinga-ngaue ni kiate kimautolu? pea te mou tali, Ko e feilaulau Pasova ia kia Sihova, koeʻuhi ko ʻene lakai ʻa e ngaahi fale ʻo haʻa Isileli ʻi Isipite, ʻi heʻene tautea ʻa e kau Isipite, ka ne fakahaofi hotau ngaahi fale.” (Eki. 12:24-27) Ki mui aí, naʻe fakamanatu ʻe Sihova ki he ngaahi mātuʻa ʻIsilelí fekauʻaki mo e mahuʻinga hono tali e ngaahi fehuʻi ʻenau fānaú fekauʻaki “mo e ngaahi fekau mo konisitutone” kuo fekau ʻe Sihová.—Teu. 6:20-25.

ʻOku hā mahino, naʻe finangalo ʻa Sihova ke malava ʻa e fānaú ke maʻu ʻa e ngaahi tali fakafiemālie ki heʻenau ngaahi fehuʻi fekauʻaki mo e lotu moʻoní—ʻa e ngaahi tali te ne ueʻi ai kinautolu ke ʻofa kia Sihova ko honau ʻOtua mo e Faifakahaofi. ʻI he ʻahó ni, ʻoku fiemaʻu ʻe Sihova ʻa e meʻa tatau ki heʻetau tamaikí. Ko e founga ʻe taha ʻa ia ʻe lava ai ʻe he ngaahi mātuʻá ʻo fakahūhū ki heʻenau fānaú ʻa e ʻofa loto-moʻoni ki he ʻOtuá mo hono kakaí ko hono tokoniʻi kinautolu ke nau alāanga mo e kautaha ʻa Sihová pea ke mahinoʻi ʻa e anga ʻo ʻenau maʻu ʻaonga mei hono ngaahi fokotuʻutuʻú. Ko ia tau lāulea angé ki he ngaahi founga ʻa ia ʻe lava ke tokoniʻi ai ʻa e tamaikí ke nau ako ʻa e ngaahi fakaikiiki lahi ange fekauʻaki mo e kautaha ʻa e ʻOtuá.

Ko e Fakatahaʻanga Fakafeituʻú

ʻOku fiemaʻu ke ʻilo ʻe he tamaikí ʻa e fakatahaʻanga ko ia ʻoku kau ki ai ho fāmilí. Ke fakahoko iá, ko kimoutolu ko e ngaahi mātuʻá ʻoku fiemaʻu ke mou ʻalu mo hoʻomou fānaú ki he ngaahi fakataha faka-Kalisitiané kotoa. ʻI he founga ko iá, ʻoku mou muimui ai ki he sīpinga naʻe fokotuʻu ʻe Sihova maʻá e kau ʻIsilelí, ʻa ia naʻe fekau: “Fakataha ʻa e kakai, ʻa e kau tangata, mo e kau fefine, mo e tamaiki . . . , koeʻuhi ke nau fanongoa, pea koeʻuhi ke nau maʻu akonaki, mo ʻapasia kia Sihova ko homou ʻOtua, pea ke nau tokanga ke fai ʻa e ngaahi meʻa kehekehe ʻo e lao ni; pea ke fanongo ʻe heʻenau fanau ʻa ia ʻoku ʻikai te nau ʻilo ia, pea ke nau ako ke ʻapasia kia Sihova ko homou ʻOtua.”—Teu. 31:12, 13.

Mei he kei valevalé, ʻe lava ʻa e fānaú ke kamata ako fekauʻaki mo e Folofola ʻa Sihová. Naʻe pehē ʻe he ʻapositolo ko Paulá fekauʻaki mo Tīmote: “Talu hoʻo valevale kuo ke maheni mo e Tohitapu.” (2 Tim. 3:15) ʻI he ngaahi fakataha ʻi he Fale Fakatahaʻangá, naʻa mo e fānau kei iiki ʻaupitó ʻoku kamata ke nau mahinoʻi ʻa e fakamatala ʻoku ʻomai aí pea hoko ʻo alāanga mo e ngaahi hiva ʻo e Puleʻangá. ʻI aí, ʻoku nau ako ai ke ngāueʻaki mo tokaʻi ʻa e Tohi Tapú mo e ʻū tohi Fakatohitapú. ʻIkai ko ia pē, ʻi heʻetau ngaahi fakatahá te nau ongoʻi ʻoku lotolotoi ai ha ʻulungaanga ʻa ia ʻokú ne fakaʻilongaʻi ʻa e kau muimui moʻoni ʻo Kalaisí—ʻa e ʻofa moʻoní. Naʻe pehē ʻe Sīsū: “Ko e tuʻutuʻuni foʻou ʻoku ou tuku kiate kimoutolu, Ke mou feʻofaʻaki: hange ā ko ʻeku ʻofaʻi kimoutolu, ke pehē foki hoʻomou feʻofaʻaki. Ko e meʻa kó é ʻe ʻilo ai ʻe he kakai kotoa pē ko e kau ako kimoutolu aʻaku, ʻo kapau ʻe ai haʻamou feʻofaʻaki.” (Sione 13:34, 35) Ko e ʻofa māfana mo e malu moʻoni ko ia ʻoku hā mahino ʻi he Fale Fakatahaʻangá ʻe fakamānako ia ki he fānaú pea ʻe tokoniʻi ai kinautolu ke ʻai hono maʻu ʻa e ngaahi fakataha faka-Kalisitiané ko ha konga tuʻumaʻu ia ʻo ʻenau moʻuí.

ʻI hoʻo ʻai ia ko hoʻo tōʻonga ia ke aʻu vave ki he Fale Fakatahaʻangá pea nofo ʻi ha kiʻi taimi hili e ʻosi ʻa e fakatahá, ʻe maʻu ai ʻe hoʻo fānaú ha faingamālie ke nau fakakaumeʻa. ʻI he ʻikai tuku kinautolu ke feohi pē mo e fānau kehé, ko e hā ʻoku ʻikai ke ke fakafeʻiloaki ai kinautolu ki he fanga tokoua mo e fanga tuofāfine ʻo e toʻu kotoa pē? Kapau te nau aʻu ʻo ʻilo ʻa e faʻahinga taʻumotuʻa angé, ko hoʻo fānaú te nau maʻu ai ha tānekina ʻo e hokosia mo e poto fakafiefia. Hangē pē ko ia ko Sākalaia ʻo e kuohilí, ʻi hono tuʻunga ko ha faiako “ia ʻi he manavahe kia Elohimi,” naʻá ne hoko ko ha tākiekina lelei kia kiʻi ʻŪsaia, ʻa e Tuʻi ʻo Siutá, ʻe pehē pē ʻa e hoko ʻa e faʻahinga ʻi he ʻahó ni kuo nau tauhi faitōnunga kia Sihova ʻi ha ngaahi taʻu lahi ʻo fai ha tākiekina lelei ki he tamaikí. (2 Kal. 26:1, 4, 5) Lolotonga ʻa e ʻi he Fale Fakatahaʻangá, ʻe toe lava ke ke fakamatalaʻi ki hoʻo fānaú ʻa e ngāue ʻa e laipelí, ko e papa fakahinohinó, mo e ngaahi tafaʻaki kehe.

Ko e Kautaha Fakamāmani Lahi

ʻOku fiemaʻu ke mahinoʻi ʻe he fānaú ko e fakatahaʻanga fakafeituʻú ko e konga ia ʻo ha kautaha fakamāmani lahi ʻo e ngaahi fakatahaʻanga ʻe 100, 000 tupu. Fakamatalaʻi ʻa e ngaahi tafaʻaki ʻo e kautahá ni, anga ʻo ʻene ngaahi ngāué, mo e ngafa ʻo e fānaú ʻi hono poupouʻi ʻa ʻene ngāué. Fakahā kia kinautolu ʻa e ʻuhinga ʻokú ke fakatuʻamelie atu ai ki he ngaahi ʻasemipilī fakasēketí, ngaahi fakataha-lahi fakavahé, mo e ngaahi ʻaʻahi ʻa e ʻovasia sēketí.—Sio ki he puha “Ngaahi Kaveinga ke Lāulea ki Ai Lolotonga ʻa e Lotu Fakafāmilí,” ʻi he peesi 28.

ʻI hoʻo maʻu ʻa e faingamālié, fakaafeʻi ʻa e kau ʻovasia fefonongaʻakí, kau misinalé, ngaahi mēmipa ʻo e fāmili Pētelí, mo e kau faifekau taimi-kakato kehé ki ho ʻapí ki ha houa kai. ʻOua ʻaupito naʻá ke fakakaukau ʻoku ʻikai ke ʻi ai hanau taimi maʻá e tamaikí. Ko e kau sevāniti taimi-kakato ko ení ʻoku nau fai ʻa e feinga ke faʻifaʻitaki kia Sīsū, ʻa ia naʻá ne faʻa tali lelei maʻu pē ʻa e fānaú peá ne lea kiate kinautolu. (Mk. 10:13-16) Ko e fanongo ki he kau sevāniti pehē ʻa Sihová ʻi heʻenau fakamatala ki heʻenau ngaahi hokosiá mo fakatokangaʻi ʻa ʻenau fiefia ʻi he ngāue toputapú, ko hoʻo fānaú foki te nau ʻai nai ai ʻa e ngāue fakafaifekau taimi-kakató ko ʻenau taumuʻá ia.

Ko e hā mo ha toe meʻa ʻe lava ke ke fai ʻi he tuʻunga ko ha fāmilí ke tokoniʻi ʻa hoʻo fānaú ke hoko ʻo alāanga lahi ange mo e kautaha ʻa Sihová? Ko e niʻihi eni ʻo e ngaahi fokotuʻu: ʻAi ko ha foʻi taumuʻa fakafāmili ia ke lāulea ki he tohi Jehovah’s Witnesses—Proclaimers of God’s Kingdom. Fakamamafaʻi ʻa e anga-līʻoa, anga-fakatōkilalo, mo e mateaki kuo fakahāhā ʻe he kau sevāniti ʻa Sihová. Fakahaaʻi ʻa e anga hono hanga ʻe Sihova ʻo ngāueʻaki kinautolu ke fakamafola ʻa e ongoongo leleí ʻi he kotoa ʻo e māmaní. Ngāueʻaki ʻa e ngaahi foʻi vitiō kuo tokonaki ʻe he kautaha ʻa Sihová ke akoʻiʻaki ʻa e ngaahi lēsoni mahuʻingá mei he kuohilí mo e lolotongá. Kapau te ke malava, ʻaʻahi ki he ʻōfisi vaʻá mo e ʻapi Pēteli ʻi ho fonuá pea naʻa mo e ngaahi fonua kehé nai. Ko e ngaahi ʻaʻahi pehē ʻe maongo ai ki hoʻo fānaú ʻa e anga ʻo e fokotuʻutuʻu maau ʻoku fai ʻe he tafaʻaki fakamāmani ʻo e kautaha ko ia ʻa Sihova ʻi he malumalu ʻo e tataki ʻa e kalasi tamaioʻeiki anga-tonú ke tokonaki ʻa e meʻakai mo e tataki fakalaumālie maʻá e fanga tokoua ʻi māmani lahí, ʻo hangē tofu pē ko ia naʻe hoko ʻi he ʻuluaki senituli T.S.—Mt. 24:45-47; Ng. 15:22-31.

Feʻunuʻaki ʻa e Fakamatalá ki he Tama Taki Taha

ʻI hono akoʻi hoʻo fānaú, manatuʻi ʻa e founga naʻe fakahinohinoʻiʻaki ʻe Sīsū ʻene kau ʻapositoló. Naʻá ne pehē kia kinautolu ʻi he taimi ʻe taha: “ʻOku kei toe lahi ʻeku meʻa ke lea ki ai kiate kimoutolu, ka ʻoku ʻikai te mou faʻa kataki ʻi he taimi ni.” (Sione 16:12) Naʻe ʻikai ke hanga ʻe Sīsū ʻo fakafulutāmakiaʻi ʻene kau ākongá ʻaki ha ʻotu fakamatala. Ka, naʻá ne akoʻi māmālie kia kinautolu ʻa e ngaahi moʻoni mahuʻinga kae lava ke nau mahinoʻi totonu ia. ʻI ha founga tatau, ʻoua ʻe fakafulutāmakiaʻi hoʻo fānaú. ʻI hono fafanga kinautolu ʻaki ʻa e fanga kiʻi kongokonga, kae fai tuʻumaʻu, ʻo e ʻilo fakaekautahá, te ke pukepuke ai ʻenau mahuʻingaʻiá mo ʻai kinautolu ke nau ako fekauʻaki mo e fakatahaʻanga Kalisitiané ko ha hokosia fakafiefia. ʻI he liliu ʻa e ngaahi fiemaʻu ʻa hoʻo fānaú, ʻe lava ke ke toe ʻai mo fakalahi ʻa e meʻa kuo nau ʻosi akó.

Ko e fakatahaʻanga Kalisitiané ko ha mālohiʻanga ia ʻo e ivi fakalaumālie, pea ko e tamaiki ʻoku nau kau faivelenga ʻi heʻene ngaahi ngāué ʻoku nau mateuteu lelei ange ai ke talitekeʻi ʻa e tākiekina ʻa e māmani ʻo Sētané. (Loma 12:2) ʻOku mau tuipau te ke maʻu ʻa e fiefia lahi ʻi hono tokoniʻi hoʻo fānaú ke nau hoko ʻo alāanga mo e kautaha ʻa Sihová. ʻI heʻene tāpuakí, fakatauange ke nau pīkitai mateaki ai pē ki ai pea ki he ʻOtua ʻofa ʻa ia ʻoku tau tauhí.

[Puha/Fakatātā ʻi he peesi 28]

Ngaahi Kaveinga ke Lāulea ki Ai Lolotonga ʻa e Lotu Fakafāmilí

Ko e niʻihi eni ʻo e ngaahi kaveinga ʻoku nau felāveʻi mo e ngaahi meʻa fakaekautahá ʻa ia ʻe lava ke mou lāulea ki ai ʻi hoʻomou efiafi Lotu Fakafāmilí.

▪ Fakamanatu ʻa e hisitōlia ʻo e fakatahaʻanga fakafeituʻú. ʻAnefē pea naʻe anga-fēfē hono fokotuʻú? Ko fē ʻa e ngaahi Fale Fakatahaʻanga naʻe ngāueʻaki ʻe he fakatahaʻangá? ʻI he fetalanoaʻaki ko ení, fēfē ke fakaafeʻi ha mēmipa fuoloa ʻo e fakatahaʻangá ki homou ʻapí ke ne tali ʻa e ngaahi fehuʻi ʻa hoʻo fānaú?

▪ Fakamatalaʻi ʻa e taumuʻa ʻo e ngaahi fakataha kehekehe ʻa e fakatahaʻangá mo e ngaahi fakatahataha lalahi angé pea ʻe fēfē ha maʻu ʻaonga mei ai ʻa e fānaú.

▪ Lāulea ki he taumuʻa ʻo e ngaahi akoʻanga kehekehe naʻe fokotuʻu ʻe he kautaha ʻa Sihová. Vahevahe ʻa e ngaahi hokosia ʻoku fakahaaʻi ai ʻa e ngaahi fua lelei ʻoku maʻu ʻe he niʻihi ʻoku nau maʻu tohi fakamoʻoni mei he ngaahi akoʻangá ni.

▪ Tokoniʻi ʻa e tamaikí ke nau sio ki he mahuʻinga ʻo e hoko ko ha tokotaha malanga tuʻumaʻu ʻo e ongoongo leleí. Fakahaaʻi kiate kinautolu ʻa e tokoni ʻe lava ke nau fai ki he līpooti fakamāmani lahi ʻoku pulusi ʻi he Yearbook of Jehovah’s Witnesses.

▪ Lāulea ki he ngaahi tafaʻaki kehekehe ʻo e ngāue taimi-kakató ʻoku ʻatā ki he tamaiki ʻi he kautaha ʻa Sihová. Ko e vahe 10 ʻo e tohi Fokotuʻutuʻu Maau ke Fai ʻa e Finangalo ʻo Sihová ko ha matavai lelei ia ʻo e maʻuʻanga fakamatalá.

▪ Tokoniʻi ʻa e tamaikí ke nau mahinoʻi ʻa e ʻuhinga ʻo e muimui ki ha ngaahi fokotuʻutuʻu ʻe niʻihi ʻi he fakatahaʻangá. Fakamatalaʻi ʻa e ʻuhinga ʻoku ʻikai totonu ke nau fai ai ha meʻa ʻiate kinautolu pē mei he kautaha ʻa Sihová, naʻa mo e ngaahi meʻa īkí. Fakahaaʻi kiate kinautolu ʻa e founga ke nau tokoni ai ki he maau ʻi he fakatahaʻangá ʻaki ʻa e muimui ʻi he tataki ʻa e kau mātuʻá.

[Fakatātā]

Ko hoʻo fānaú te nau maʻu ʻaonga mei he fakakaumeʻa ki he kau sevāniti ngāue fuoloá

[Fakatātā ʻi he peesi 26]

Hangē ko ia ʻi ʻIsileli ʻo e kuohilí, ʻoku feinga ʻa e ngaahi mātuʻá he ʻahó ni ke ʻoatu ha ngaahi tali fakafiemālie ʻi he taimi ʻoku ʻeke ai ha ngaahi fehuʻi fekauʻaki mo e kautaha ʻa Sihová