ʻEke Heʻetau Kau Lautohí . . .

ʻOku Ō ʻa e Kau Kalisitiane Faitōnunga Kotoa pē ki Hēvani?

▪ Kuo lau ʻe he tokolahi ʻa e lea fakafiemālie ʻa Sīsuú: “Naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” (Sione 3:16) Ne ʻuhinga ʻa Sīsuú ko e kau lotu faitōnunga kotoa pē ʻa ʻene Tamaí, ʻa Sihova ko e ʻOtuá, te nau ō ki hēvani ke maʻu ai ʻa e moʻui taʻengatá he fiefia moʻoni?

Fakatokangaʻi ange ʻa e fakamatala fakatupu-fakakaukau ʻa Sīsuú: “Kuo teʻeki ke ʻalu hake ha toko taha ʻo hu ki langi, ngata pe ʻiate ia naʻe ʻalu hifo mei he langi, ko e Fanautama ʻa Tangata.” (Sione 3:13) ʻOku fakahuʻunga he meʻá ni ko e kau lotu faitōnunga he kuohilí, hangē ko Noa, ʻĒpalahame, Mōsese, mo Tēvitá, naʻe ʻikai te nau ō ki hēvani. (Ngāue 2:34) Ko fē leva ne nau ō kotoa ki aí? ʻI hono fakanounoú: Ko e kau faitōnunga ʻo e kuonga muʻá ʻoku nau ʻi he faʻitoká, ʻo mohe ʻi he maté, ʻikai toe ʻilo ha meʻa, ʻo tatali ai ki he toetuʻú.—Koheleti 9:5, 6; Ngāue 24:15.

Ko e ʻuluaki fakamatala ʻa e Tohi Tapú ki he moʻui fakahēvani hili ʻa e maté ne toe fai mo ia foki ʻe Sīsū. Naʻá ne tala ki heʻene kau ʻapositoló te ne teuteu ha potu moʻonautolu ʻi hēvani. (Sione 14:2, 3) Ko e meʻa eni naʻe foʻou ki he kakai ʻa e ʻOtuá. Ne fakamatala ki mui ʻa e ʻapositolo ko Paulá ʻo pehē, ʻi he hili e pekia ʻa Sīsū mo ʻene toetuʻu ki hēvaní, ko Sīsū ‘ne ne tofa maʻa ʻene kau ākongá ha hala foʻou mo moʻui’—ko ha hala kuo teʻeki ai ke fononga ai ha toe tangata kehe ki muʻa.—Hepelu 10:19, 20.

ʻOku ʻuhinga ení mei ai ʻo faai mai ʻe ō ʻa e faʻahinga kotoa pē ki hēvani? ʻIkai, he ko e toetuʻu ki hēvaní ʻoku felāveʻi vāofi ia mo ha vāhenga-ngāue kuo ʻoange pē ki he niʻihi ʻo e faʻahinga ʻo e tangatá. ʻI honau efiafi fakaʻosi fakatahá, naʻe tala ai ʻe Sīsū ki heʻene kau ʻapositoló te nau ‘nofo ki ha ngaahi taloni, ʻo fakamaau’ ʻi hono Puleʻanga fakahēvaní. Ko ia ai, ko e pule fakataha mo Sīsū ʻi hēvaní naʻe pau ke hoko ia ko honau vāhenga-ngāue.—Luke 22:28-30.

Tuku kehe e kau ʻapositoló, ʻe toe ʻoange ki he niʻihi kehe he faʻahinga ʻo e tangatá ʻa e vāhenga-ngāue fakaofo ko ení. ʻI ha vīsone, ne mamata ai ʻa e ʻapositolo ko Sioné kia Sīsū fakataha mo ha kulupu ʻo e faʻahinga kuo toetuʻú ʻi hēvani kuo fakamatalaʻi “ko e puleʻanga mo e ngaahi taulaʻeiki: Pea te nau Hau ʻi mamani.” (Fakahā 3:21; 5:10) Ko e toko fiha ʻo kinautolu te nau ʻi aí? Hangē pē ko ia ʻi he founga-pule kotoa pē, ko ha tokolahi fakangatangata pē ʻoku pulé. ʻOku pehē pē foki e Puleʻanga fakahēvani ko ení. Ko Sīsū, ʻa e Lami ʻa e ʻOtuá, ʻe pule fakataha mo e kaungāpule ʻe toko 144,000 “naʻe fakatau mei he kakai.”—Fakahā 14:1, 4, 5.

Ko e moʻoni, ko e toko 144,000 ko ha fika siʻisiʻi ia ʻi he fakahoa atu ki he tokolahi ʻo e faʻahinga faitōnungá kotoa, he kuohilí mo e lolotongá ni. Ka ʻoku mahinongofua eni koeʻuhí ko e toko 144,000 ʻoku nau toetuʻu ki hēvaní ki ha vāhenga-ngāue toputapu makehe ʻo e ngāué. Kapau ʻoku fiemaʻu ke ke langa ha fale, te ke aleapau mo e kau langa pōtoʻi kotoa pē ʻi ho feituʻú? ʻIkai. Te ke fiemaʻu e tokolahi pē ko ē ʻoku fiemaʻu ki he ngāué. ʻI he founga meimei tatau, ʻoku ʻikai fili e faʻahinga faitōnunga kotoa pē ʻe he ʻOtuá ki he monū makehe ʻo e pule fakataha mo Kalaisi ʻi hēvaní.

Ko e founga-pule fakahēvani ko ení te ne fakahoko e muʻaki taumuʻa ʻa e ʻOtuá ki he faʻahinga ʻo e tangatá. Ko Sīsū mo hono kaungāpule ʻe toko 144,000 te nau tokangaʻi hono liliu e māmaní ki ha palataisi fakaemāmanilahi, ʻa ia ʻe moʻui fiefia taʻengata ai e fuʻu tokolahi taʻefaʻalaua ʻo e faʻahinga faitōnungá. (Aisea 45:18; Fakahā 21:3, 4) ʻE kau heni ʻa e faʻahinga ko ia ʻoku ʻi he manatu ʻa e ʻOtuá, ʻa ia te nau toetuʻú.—Sione 5:28, 29.

Ko e kau lotu faitōnunga kotoa pē ʻa Sihova—he kuohilí pe lolotongá ni—ʻe lava ke nau maʻu ʻa e meʻaʻofa fakaofo ko e moʻui taʻengatá. (Loma 6:23) Ko ha tokosiʻi te nau maʻu e moʻui ʻi hēvani ki ha vāhenga-ngāue makehe, pea ko e tokolahi tahá te nau maʻu e moʻui he māmaní ʻi ha palataisi fakaemāmanilahi.