Ko ʻEnau Ngaahi Meʻa Hulu Atú ʻOku Fakalatoʻaki ha Fiemaʻu
KO E taʻú ko e 49 T.S. ko Pita, Sēmisi mo Sione—“naʻe hā ko e ngaahi poú”—naʻa nau ʻoange ki he ʻapositolo ko Paulá mo hono kaungāngāue ko Panepasá ha fekau. Naʻe pau ke nau manatuʻi ʻa e kau Kalisitiane masivá ʻi heʻenau malanga ki he ngaahi puleʻangá. (Kal. 2:9, 10) Naʻe fakahoko fēfē ʻa e fatongia ko ení?
ʻOku fakahaaʻi mei he ngaahi tohi ʻa Paulá ʻa e tokanga naʻá ne fai ki he meʻá ni. Ko e fakatātaá, ki he kau Kalisitiane ʻi Kolinitoó, naʻá ne tohi: “ʻI he fekauʻaki . . . mo e tātānaki maʻá e kakai tapú, mou muimui ʻi he ngaahi fakahinohino naʻá ku ʻoatu ki he ngaahi fakatahaʻanga ʻo Kalētiá. ʻI he ʻuluaki ʻaho ʻo e uike kotoa pē, ko e tokotaha taki taha ʻo kimoutolu ke ne tuku mavahe ha meʻa ʻo fakatatau ki he meʻa ʻokú ne maʻú, koeʻuhi ke ʻoua naʻa fai ha ngaahi tātānaki ʻi he taimi te u aʻu atu aí. Ka ʻi heʻeku aʻu atu ki hená, te u fekau atu ʻa e kau tangata naʻa mou pehē ʻi hoʻomou ngaahi tohí ʻoku nau tāú ke nau ʻave ʻa hoʻomou foaki ʻofá ki Selusalema.”—1 Kol. 16:1-3.
ʻI heʻene tohi fakamānavaʻi hono ua ki he kau Kolinitoó, naʻe toe fakahaaʻi ai ʻe Paula ʻa e taumuʻa ʻo e tātānakí. Koeʻuhí ko e “fakafou ʻi ha vahevahe tatau, ʻoku hoko ai hoʻomou ngaahi meʻa ʻoku hulu atu ʻi he taimi ní ʻo fakalatoʻaki ʻenau fiemaʻú.”—2 Kol. 8:12-15.
ʻI he taimi naʻe tohi ai ʻa Paula ki he kau Kalisitiane ʻi Loma ʻi he 56 T.S. nai, naʻe mei kakato ʻa e tātānakí. Naʻá ne pehē: “ʻOku teu ke u fononga ki Selusalema ke tokoni ki he kakai tapú. He ko e faʻahinga ʻi Masitōnia mo ʻĀkeiá kuo nau loto-lelei ke vahevahe atu ʻenau ngaahi meʻá ko ha tokoni ki he kau masiva ʻi he lotolotonga ʻo e kakai tapu ʻi Selusalemá.” (Loma 15:25, 26) Naʻe fakahoko ʻe Paula hono fekaú taimi nounou pē mei ai, ʻi heʻene foki ki Selusalema pea puke pōpula aí, naʻá ne tala ki he Kōvana Loma ko Filiké: “Naʻá ku aʻu mai . . . ke ʻomai ha ngaahi foaki ʻofa ki hoku fonuá, pea ke fai ha ngaahi feilaulau.”—Ngā. 24:17.
Ko e laumālie naʻe fakahāhā ʻe he kau Kalisitiane ʻi he ʻuluaki senitulí ʻoku hā mahino ia ʻi he meʻa naʻe leaʻaki ʻe Paula ki he kau Masitōniá. Naʻá ne pehē naʻa nau “hanganaki kole fakamātoato mai ʻiate kinautolu pē ke nau maʻu ʻa e monū ʻo hono fai ha foaki ʻofa.” Naʻe naʻinaʻi ʻa e ʻapositoló ki he kau Kolinitoó ke nau muimui ki he faʻifaʻitakiʻanga ko iá. Naʻá ne pehē: “Tuku ki he tokotaha taki taha ke ne fai ʻa e meʻa tofu pē ko ia kuó ne fakapapauʻi ʻi hono lotó, ʻo ʻikai ʻi he taʻefiefiefai pe ʻi hono kounaʻi, he ʻoku ʻofa ʻa e ʻOtuá ʻi ha tokotaha foaki fiefia.” Ko e hā naʻá ne ueʻi ʻa e ngaahi fakatahaʻangá ke fakahāhā ʻa e nima-homo peheé? Ko e holi ʻi mui aí naʻe ʻikai “ko e fai pē ke tokonaki lelei ai maʻá e ngaahi fiemaʻu ʻa e kakai tapú, ka ke hoko foki ʻo hulu fau ʻi he ngaahi fakahaaʻi ʻo e fakafetaʻi lahi ki he ʻOtuá.” (2 Kol. 8:4; 9:7, 12) Ko ʻetau nima-homó ʻe ʻi ai nai hono ngaahi taumuʻa meimei tatau. ʻE tāpuakiʻi moʻoni ʻe Sihova ko e ʻOtuá ha laumālie lelei mo taʻesiokita pehē—pea ko ʻene tāpuakí ʻoku fakakoloa moʻoni ia ki ha tokotaha.—Pal. 10:22.
FOUNGA ʻOKU FILI AI ʻA E NIʻIHI KE TOKONI KI HE NGĀUE ʻI MĀMANI LAHÍ
Hangē ko ia ʻi he ʻaho ʻo e ʻapositolo ko Paulá, ko e tokolahi he ʻahó ni naʻa nau “tuku mavahe ha meʻa,” pe vaheʻi, ha paʻanga pea tuku ia ʻi he ngaahi puha tokoni ʻa e fakatahaʻangá kuo leipolo ko e “Ngāue ʻi Māmani Lahí.” (1 Kol. 16:2) ʻI he māhina taki taha, ʻoku ʻoatu ai ʻe he ngaahi fakatahaʻangá ʻa e ngaahi tokoni ko ení ki he ʻōfisi ʻo e Kau Fakamoʻoni ʻa Sihova ʻa ia ʻokú ne tokangaʻi ʻa honau fonuá. ʻOku toe malava kiate koe ke ʻave hangatonu ha ngaahi tokoni ki ha kautaha fakalao ʻoku ngāueʻaki ʻe he Kau Fakamoʻoni ʻa Sihová ʻi ho fonuá. Ke ʻiloʻi ʻa e hingoa ʻo e kautaha fakalao tefito ʻoku ngāueʻaki ʻe he Kau Fakamoʻoni ʻa Sihova ʻi ho fonuá, kātaki fetuʻutaki ki he ʻōfisi vaʻa ʻokú ne tokangaʻi ʻa e fonuá. Ko e tuʻasila ʻo e ʻōfisi vaʻá ʻe lava ke maʻu ia ʻi he www.jw.org. Ko e faʻahinga tokoni ʻe lava ke ke ʻave fakahangatonú ko eni:
NGAAHI TOKONI FAKAHANGATONU
Ngaahi tokoni paʻanga, siueli, pe meʻa fakafoʻituitui mahuʻinga kehe.
Kau ai ha tohi ʻoku fakahaaʻi ai ʻa e paʻanga pe ngaahi meʻa ko ha tokoni fakahangatonu.
FOKOTUʻUTUʻU ʻO E TOKONI FAI FAKATUʻUNGA
Ngaahi tokoni paʻanga fakataha mo e tuʻunga ʻa ia ʻe lava ke fakafoki mai ai kapau ʻe fiemaʻu ʻe he tokotaha tokoní.
Fakakau ai ha tohi ʻoku fakahaaʻi ai ko e tokoní ʻoku fai fakatuʻunga.
PALANI TOKONI ʻOFA
Tānaki atu ki he ngaahi meʻaʻofa paʻangá mo e koloa mahuʻinga fakafoʻituituí, ʻoku ʻi ai ʻa e ngaahi founga kehe ʻo e foakí ke ʻaonga ki he ngāue ʻi māmani lahi ʻo e Puleʻangá. ʻOku lisi kinautolu ʻi lalo. Tatau ai pē pe ko e hā ʻa e founga pe ngaahi founga te ke saiʻia ke ngāueʻakí, kātaki ʻuluaki fetuʻutaki ki he ʻōfisi vaʻa ʻokú ne tokangaʻi ho fonuá ke sio pe ko e ngaahi founga fē ʻe ala ngāueʻaki ʻi he fonuá. Koeʻuhi ko e ngaahi fiemaʻu fakalaó mo e ngaahi lao tukuhaú ʻoku kehekehe, ʻoku mahuʻinga ke ke kumi faleʻi ki he kau faleʻi tukuhau mo e fakalao tāú ki muʻa ke ke fili ʻa e founga lelei taha ke tokoni aí.
Maluʻi: Ko ha tokoni ʻoku fai, ʻaki hono fakahaaʻi ʻa e kautaha ʻoku ngāueʻaki ʻe he Kau Fakamoʻoni ʻa Sihová ko e tokotaha ia ʻoku tohi tuku ki ai ʻa e maluʻi moʻui pe ko ha vāhenga mālōlō.
Ngaahi ʻAkauni Pangikē: Ko e ngaahi ʻakauni pangikeé, ngaahi setifikeiti tipōsiti, pe ngaahi ʻakauni vāhenga mālōlō fakafoʻituitui kuo fokotuʻu ko ha talāsiti pe ʻai ke ala totongi ʻi he taimi maté ki ha kautaha ʻoku ngāueʻaki ʻe he Kau Fakamoʻoni ʻa Sihová ʻo fakatatau mo e ngaahi fiemaʻu ʻa e pangikē fakalotofonuá.
Ngaahi ʻInasi mo e Ngaahi Pōnite: Ko e ngaahi ʻinasi mo e ngaahi pōnite kuo foaki ki ha kautaha ʻoku ngāueʻaki ʻe he Kau Fakamoʻoni ʻa Sihová ko ha meʻaʻofa fakahangatonu pe fakafou ʻi ha aleapau ʻAve ʻi he Maté.
Kelekele: Ko ha kelekele ʻoku ala fakatau ʻoku foaki ki ha kautaha ʻoku ngāueʻaki ʻe he Kau Fakamoʻoni ʻa Sihová, ʻaki hano ʻai ko ha meʻaʻofa fakahangatonu, pe ʻi he tuʻunga ʻo e konga ʻapi ʻoku nofoʻi, ʻi hano tauhi ha kelekele ʻo e tokotaha-foakí, ʻa ia ʻe lava ke hokohoko atu ʻene nofo aí ʻi heʻene kei moʻuí.
Meʻaʻofa Totongi Fakataʻu: Ko ha paʻanga pe ko ha ngaahi maluʻi ʻoku foaki ki ha kautaha ʻoku ngāueʻaki ʻe he Kau Fakamoʻoni ʻa Sihová ʻi he malumalu ʻo ha fokotuʻutuʻu ʻa ia ʻoku maʻu ai ʻe he tokotaha-foakí, pe tokotaha kuo fakamafaiʻi ʻe he tokotaha-foakí, ha totongi pau fakataʻu ʻi he taʻu taki taha ʻo ʻene moʻuí. ʻOku maʻu ʻe he tokotaha-foakí ha toʻo tukuhau vāhenga ʻi he taʻu ʻa ia naʻe fokotuʻu ai ʻa e meʻaʻofa totongi fakataʻú.
Ngaahi Tohi-Tuku mo e Ngaahi Talāsiti: Ko e koloá pe paʻangá ʻe lava ke tohi-tuku ia ki ha kautaha ʻoku ngāueʻaki ʻe he Kau Fakamoʻoni ʻa Sihová fakafou ʻi ha tohi-tuku kuo fakahoko fakalao pe tohi-tuku ki ai ha aleapau ʻo ha talāsiti. Ko e fokotuʻutuʻu ko ení ʻe tokonaki mai nai ai ha ngaahi lelei pau ki he tukuhaú.
Hangē ko ia ʻoku fakahuʻunga ki ai ʻa e fakalea “palani tokoni ʻofá,” ko e ngaahi faʻahinga tokoni ko ení ʻoku faʻa fiemaʻu ki ai ha palani ʻi he tafaʻaki ʻa e tokotaha-foakí. Ke tokoni ki he niʻihi tāutaha ʻoku nau holi ke maʻu ʻaonga mei he ngāue ʻi māmani lahi ʻa e Kau Fakamoʻoni ʻa Sihová fakafou ʻi ha founga ʻo e foaki tokoni ʻofá, kuo teuteu ai ha polosiua ʻoku fakakaveinga ko e Charitable Planning to Benefit Kingdom Service Worldwide. Ko e polosiuá naʻe hiki ia ke tokonaki mai ai ʻa e fakamatala ʻi ha ngaahi founga kehekehe ʻe lava ke faiʻaki ʻa e ngaahi foakí ʻi he taimí ni pe ʻamui ange, ʻo hangē ko ia ko e fakafou ʻi ha meʻaʻofa ʻi he maté. Ko e fakamatala ʻoku kāpui ʻi he polosiua ko ení heʻikai lava ke ngāueʻaki kakato ia ʻi ho tuʻunga koeʻuhi ko e tukuhaú pe ngaahi lao kehe ʻi ho fonuá. Ko ia ai, hili hono lau ʻa e polosiuá, ʻoku totonu ke ke kumi faleʻi ki ho kau faleʻi fakalao pe tukuhau ʻamoutolú. ʻI hono ngāueʻaki ʻa e ngaahi founga ʻo e foaki ʻofa peheé, kuo malava ai ʻa e tokolahi ke tokoni ki hono poupouʻi ʻetau ngaahi ngāue fakalotú mo e ngāue ʻofa ʻi he māmani lahí pea fakalahi ʻenau ngaahi maʻu ʻaonga ʻi he tukuhaú. Kapau ʻoku ala maʻu ʻi ho fonuá, ʻe lava ke maʻu ʻa e polosiuá ʻaki hano kole ha tatau mei he sekelitali ʻo e fakatahaʻanga fakalotofonuá.
Ki ha fakamatala lahi ange, ʻe lava ke ke fetuʻutaki ʻi he faitohi pe ʻi he telefoni ki he ʻōfisi vaʻa ʻokú ne tokangaʻi ho fonuá.