ʻOku Tāpuakiʻi Lahi ʻe Sihova ha Laumālie Loto-Fiefoaki
KUO fakangeingeiaʻi ʻe hotau Tokotaha-Fakatupú ʻa e tangatá ʻaki ʻa e meʻaʻofa taʻehanotatau ʻo e tauʻatāina ke filí. ʻIkai ko ia pē, ʻokú ne tāpuakiʻi lahi ʻa e faʻahinga ʻoku nau ngāueʻaki taʻesiokita ʻenau tauʻatāina ke filí ke ʻai ke laka ki muʻa ʻa e lotu moʻoní pea fai ʻenau tafaʻakí ke fakamāʻoniʻoniʻi hono huafa māʻoniʻoní pea poupouʻi ʻene taumuʻa maʻongoʻongá. ʻOku ʻikai fiemaʻu ʻe Sihova ke tau talangofua fakafatongia ʻoku ueʻi ʻe he fakamanamana mo e fakamālohi. Ka, ʻokú ne fakamahuʻingaʻi lahi ʻa e anga-līʻoa loto-fiefoakí ʻoku ueʻi ʻe he ʻofa moʻoni mo e houngaʻia lolotó.
Ko e fakatātaá, ʻi he taimi naʻe ʻi he toafa Sainaí ai ʻa e kau ʻIsilelí, naʻe fakahinohinoʻi kinautolu ʻe Sihova ke langa ha feituʻu faiʻanga lotu. Naʻá ne pehē: “Ke mou toʻo mai haʻamou meaʻofa kia Sihova: ʻIlonga ha taha ʻoku loto lelei ki ai, ke ke ʻomi ʻene hapai kia Sihova.” (ʻEki. 35:5) ʻE lava ke foaki ʻe he ʻIsileli taki taha ha meʻa pē naʻe lava ke ne foaki, pea ko e tokoni loto-fiefoaki taki taha—tatau ai pē pe ko e hā ia pe ko e hā hono lahí—ʻe lava ke ngāueʻaki ia ʻi ha founga feʻungamālie ke fakahokoʻaki ʻa e taumuʻa fakaʻotuá. Ko e hā ʻenau talí?
Ko “kinautolu kotoa pe naʻe oʻi ʻe honau loto,” mo “kinautolu naʻe fakalotolelei ʻe honau laumalie,” naʻa nau fai ha foaki loto-lelei, ʻaki ha “loto fie fai.” Naʻe ʻomai loto-lelei ʻe he tangata mo e fefine ha meʻa ki he ngāue ʻa Sihová: ko e pine, hau, mama, koula, siliva, kopa, filo pulū, filo fulufuluʻisipi vāleti, filo kula ʻahoʻaho, līneni lelei, fulufuluʻi kosi, kiliʻi sipi tangata kuo fakalanu kulokula, kiliʻisila, papa sitimi, maka mahuʻinga, paʻame, mo e lolo. Faai atu pē, “ko e meʻa kuo maʻu naʻe feʻunga mo e fai ʻo e ngāue kotoa pe, ʻo hulu atu.”—ʻEki. 35:21-24, 27-29; 36:7.
Ko e meʻa naʻe fiefia lahi taha ai ʻa Sihová, naʻe ʻikai ko e ngaahi foaki fakamatelié, ka ko e laumālie loto-fiefoaki ʻa e faʻahinga naʻa nau poupouʻi ʻa e lotu maʻá. Naʻe toe ueʻi foki kinautolu ke foaki honau taimí pea ngāue. “Koe kau fefine kotoabe nae loto boto naa nau lalaga aki ho nau nima,” ko e lau ia ʻa e fakamatalá. Ko hono moʻoní, ko e “kau fefine kotoabe aia nae lagaʻi akinautolu e ho nau loto i he boto, naa nau fi ae fulufuluʻi koji.” Pehē foki, naʻe ʻoange ʻe Sihova kia Pesalili ʻa e “boto moe loto-matala moe faa ilo, i he gaahi gaue fakatufuga kotoabe.” Ko hono moʻoní, naʻe fakafonu ʻaki ʻe he ʻOtuá ʻa Pesalili mo ʻAholiapi ʻa e pōtoʻi naʻá na fiemaʻu ke faiʻaki ʻa e ngāue kotoa naʻe tuʻutuʻuni ke na faí.—ʻEki. 35:25, 26, 30-35, PM.
ʻI he taimi naʻe fakaafeʻi ai ʻe Sihova ʻa e kau ʻIsilelí ke nau fai ha tokoní, naʻá ne falala kakato ko ha “taha ʻoku loto lelei ki ai” te ne poupouʻi ʻa e lotu moʻoní. Ko ia ai, naʻá ne tāpuakiʻi lahi ʻa e kau loto-fiefoakí ʻaki ʻa e tataki mo e fiefia taʻehanotatau. Naʻe fakahaaʻi ʻe Sihova ʻi he taimi ʻokú ne tāpuakiʻi ai ʻa e laumālie loto-fiefoaki ʻene kau sevānití, ʻe lava ke ne fakapapauʻi heʻikai ke nau masiva ʻi ha meʻa pe pōtoʻi ke fakahoko ʻene taumuʻá. (Saame 34:9) ʻI hoʻo tauhi taʻesiokita kia Sihová, ʻokú ne fakapapauʻi te ne tāpuakiʻi hoʻo laumālie loto-fiefoakí.