“Kuo Faifai Ange Peá U Ma‘u ‘a e Tau‘atāina Mo‘oní”

KO HOKU KUOHILÍ:

Naʻe fāʻeleʻi au ʻi Moundsville, ko ha kolo lōngonoa ʻi he veʻe Vaitafe Ohio ʻi he fakatokelau ʻo West Virginia, ʻAmelika. Ko e fika ua au ʻi he fānau ʻe toko faá, ʻa ia ko e toko tolu tangata, ko ia naʻe tātātaha ha taimi te mau ongoʻi tuēnoa ai ʻi homau ʻapí. Naʻe ngāue mālohi ʻeku ongo mātuʻá, ko e kakai faitotonu pea ʻofa ki he niʻihi kehé. Naʻe ʻikai lahi ʻemau paʻangá, ka naʻe maʻu maʻu pē ʻemau fiemaʻú. ʻI he tuʻunga ko e Kau Fakamoʻoni ʻa Sihová, naʻe fai heʻeku ongo mātuʻá hona lelei tahá ke uhuʻi ʻa e ngaahi tefitoʻi moʻoni ʻo e Tohi Tapú kiate kimautolu mei he kei īkí.

Kae kehe, ʻi he taimi naʻá ku hoko ai ko ha talavoú, naʻe kamata ke tohoakiʻi mamaʻo hoku lotó mei he meʻa naʻe akoʻi mai kiate aú. Naʻá ku veiveiua pē pe ko ha moʻui ʻoku tataki ʻe he ngaahi tefitoʻi moʻoni Fakatohitapú ʻe lava ke mohu ʻuhinga pe fakafiemālie. Naʻá ku fakakaukau ko e tauʻatāina fakaʻaufulí ko e founga pē ia ki he fiefia moʻoní. ʻIkai fuoloa mei ai, naʻe tuku leva ʻeku maʻu ʻa e ngaahi fakataha faka-Kalisitiané. Ko e toko ua ʻi heʻemau fānaú naʻe kau mo au ʻi he ʻalunga angatuʻú. Naʻe fai ʻe heʻemau ongo mātuʻá ʻa e meʻa kotoa naʻá na malavá ʻi he feinga ke tokoniʻi kimautolu, ka naʻa mau talitekeʻi ʻena ngaahi feingá.

Naʻe halaʻatā ke u ʻilo ko e tauʻatāina ko ia ʻoku ou holi ki aí te ne taki atu au ki he ngaahi tōʻonga fakatupu ʻauhá. ʻI he ʻaho ʻe taha lolotonga ʻeku foki ki ʻapi mei he akó naʻe fakaʻaliʻali mai ʻe ha kaumeʻa ha foʻi sikaleti. Naʻá ku toʻo ia. Naʻe kamata mei he ʻaho ko iá, naʻá ku tali ʻa e ngaahi tōʻonga fakatupu ʻauha lahi. ʻI he faai atu ʻa e taimí, naʻá ku ngāuekoviʻaki ʻa e faitoʻo kona tapú mo e ʻolokaholó pea hoko ʻo moʻui taʻetaau. ʻI he ngaahi taʻu hokohoko mai aí, naʻe fakalaka atu ʻeku ngāueʻaki ʻa e faitoʻo kona tapú ki he ngaahi kalasi ʻoku mālohi mo toe kovi ange pea hoko ʻo maʻunimā au ʻe he lahi ʻo kinautolu. ʻI he fakalilifu mo vave ange hono maʻunimā aú, naʻá ku kamata ke fakatau atu ʻa e faitoʻo kona tapú ke poupouʻiʻaki ʻeku founga moʻuí.

ʻI he mālohi taha ʻo ʻeku feinga ke tukunoaʻi hoku konisēnisí, naʻá ne toutou fakamanatu mai kiate au ko e founga naʻá ku moʻui aí naʻe hala. Kae kehe, naʻá ku ongoʻi kuo mahua ʻa e ipú pea ʻe ʻikai toe lava ke tānaki. Neongo ʻa e takatakai ʻiate au ʻa e kakai ʻi he ngaahi pātí mo e konisetí, naʻá ku faʻa ongoʻi tuēnoa mo loto-mafasia. ʻI he taimi ʻe niʻihi, naʻá ku fakakaukau atu ki heʻeku ongo mātuʻá ʻokú na anga-lelei mo faitotonu peá u fifili ki he founga naʻá ku fuʻu hē mamaʻo aí.

FOUNGA HONO LILIU ʻE HE TOHI TAPÚ ʻA ʻEKU MOʻUÍ:

Neongo naʻe ʻikai haʻaku toe ʻamanaki, naʻe ʻikai pehē ʻa e niʻihi kehé. ʻI he taʻu 2000, naʻe fakaafeʻi au ʻe heʻeku ongo mātuʻá ke maʻu ha fakataha lahi ʻa e Kau Fakamoʻoni ʻa Sihová. Naʻá ku ʻalu taʻefieʻalu pē. Naʻá ku ʻohovale, pehē foki ki hoku tuofefine mo hoku taʻokete ko ia naʻá na mavahé.

Lolotonga ʻa e ʻi he fakataha lahí, naʻá ku manatuʻi hake naʻá ku ʻi he feituʻu tatau ʻi he taʻu ki muʻá nai ʻi ha koniseti rock. Ko e faikehekehe naʻá ku sio ki aí naʻe malave ki hoku lotó. ʻI he konisetí, ko e falé naʻe fonu ʻi he vevé mo e ʻahuʻi sikaletí. Ko e tokolahi taha ʻo e kau sio konisetí naʻe ʻikai ke nau anga-fakakaumeʻa pea ko e pōpoaki ʻi he ngaahi fasí naʻe fakalotomafasia. Ka ʻi he fakataha lahí, naʻe takatakai ʻiate au ʻa e kakai fiefia moʻoni—ko e kakai naʻa nau talitali lelei au, neongo naʻe ʻikai ke mau felōngoaki ʻi he ngaahi taʻu lahi. Ko e falé naʻe maʻa pea ko e pōpoakí ko ha ʻamanaki lelei ki he kahaʻú. ʻI he sio ki he tākiekina lelei ʻa e moʻoni ʻo e Tohi Tapú naʻá ne ʻai au ke u fifili pe ko e hā koā naʻá ku talitekeʻi ai iá!—ʻAisea 48:17, 18.

ʻI he hili pē ʻa e fakataha-lahí, naʻá ku loto ke foki ki he fakatahaʻanga faka-Kalisitiane. Ko hoku taʻoketé mo hoku tuofefiné, naʻe toe ueʻi foki mo kinaua he meʻa naʻá na sio ai ʻi he fakataha-lahí peá na loto ke na foki. Ko e kotoa kimautolu toko tolú naʻa mau tali ha ako Tohi Tapu.

Ko e veesi Tohi Tapu naʻe tautefito ʻene ueʻi aú ko e Sēmisi 4:8, ʻa ia ʻoku pehē: “ʻUnuʻunu ofi ki he ʻOtuá, pea te ne ʻunuʻunu ofi mai kiate kimoutolu.” Naʻá ku ʻiloʻi kapau ʻoku ou loto ke ʻunuʻunu ofi ki he ʻOtuá, kuo pau ke fakamaʻa ʻeku founga moʻuí. ʻI he ngaahi liliú, naʻá ku loto ke tuku hono ngāueʻaki ʻa e tapaká mo tuku hono ngāuekoviʻaki ʻa e faitoʻo kona tapú mo e ʻolokaholó.—2 Kolinitō 7:1.

Naʻá ku tukuange hoku kaungāmeʻa motuʻá pea fetongi kinautolu ʻaki ʻa e faʻahinga foʻou—mei he kau lotu kia Sihová. Ko e mātuʻa Kalisitiane naʻá ma ako Tohi Tapú naʻá ne fuʻu tokoni lahi kiate au. Naʻá ne toutou telefoni mai kiate au pea haʻu ʻo vakai au pe naʻá ku fēfē. Ko e taha ia ʻi hoku ngaahi kaumeʻa ofi tahá, ʻo aʻu mai ki he ʻahó ni.

ʻI he faʻahitaʻu failau ʻo e 2001, naʻá ku fakahāhā ai ʻeku fakatapui ki he ʻOtuá ʻaki ʻa e papitaiso ʻi he vaí, pea pehē ki hoku taʻoketé mo hoku tuofefiné. ʻE lava ke ke fakakaukau atu ki he fiefia ʻa ʻeku ongo mātuʻá mo e tehina faitōnungá ʻi he taimi naʻe toe fāʻūtaha ai homau fāmilí ʻi he lotu kia Sihová.

FOUNGA ʻO ʻEKU MAʻU ʻAONGÁ:

Naʻá ku faʻa fakakaukau ko e ngaahi tefitoʻi moʻoni ʻo e Tohi Tapú naʻe fuʻu fefeka, ka ʻoku ou vakai ki ai he taimí ni ko ha maluʻanga taʻehanotatau. Naʻá ku maʻu ʻa e mālohi mei he Tohi Tapú ke tuku ʻeku ngāueʻaki mo fakatau atu ʻa e faitoʻo kona tapú pea hoko ko ha tokotaha lelei ange.

ʻOku ou maʻu ʻa e monū ʻo e hoko ko ha konga ʻo e fetokouaʻaki ʻi māmani lahi ʻo e kau lotu ʻa Sihová. Ko e kakai ko ení ʻoku nau feʻofaʻaki moʻoni pea ʻoku nau fāʻūtaha ʻi he tauhi ki he ʻOtuá. (Sione 13:34, 35) Ko e fetokouaʻaki ko iá naʻe hoko mai ai ha tāpuaki mātuʻaki makehe—ko hoku uaifi ko Adrianne ʻa ia ʻoku ou ʻofa lahi ai mo koloaʻaki. ʻOku ʻomai ai kiate kimaua ʻa e fiefia lahi ke tauhi fakataha ki hotau Tokotaha-Fakatupú.

ʻI he ʻikai tuli ki ha ʻalunga siokita ʻi he moʻuí, ʻoku ou loto-lelei he taimí ni ke hoko ko ha faifekau taimi-kakato, ʻo akoʻi ʻa e kakaí ki he founga te nau lava ai mo kinautolu foki ʻo maʻu ʻaonga mei he Folofola ʻa e ʻOtuá. Ko e ngāue ko ení kuó ne ʻomai kiate au ʻa e fiefia lahi taha ʻi he moʻuí. ʻOku lava ke u leaʻaki mo e tuipau kakato ko e Tohi Tapú naʻá ne liliu ʻeku moʻuí. Kuo faifai ange peá u maʻu ʻa e tauʻatāina moʻoní.