ʻOku Malava Moʻoni ha Moʻui Mohu ʻUhinga?

HE MOʻONI Ē ko e ngaahi lea ko iá! Ko e moʻui ʻi he māmani ko ení ʻoku faʻa fonu ʻi he “ongosia mo e muna.” Mahalo kuó ke fifili, ‘ʻOku malava moʻoni ke maʻu ha moʻui mohu ʻuhinga he taimí ni?’

Ko e fakatātaá, ko Maria. Ko ha tokotaha ia naʻe longomoʻui, ka ʻi he taimí ni ʻi hono taʻu 84 kuó ne hoko ʻo toka mohenga. ʻOku kei lelei pē hono ʻatamaí, ka ko hono sinó kuo ʻikai kei ngāue lelei. ʻE lava fēfē ke ne ongoʻi ko ha moʻui peheé ʻoku mohu ʻuhinga?

Fēfē Koe? Te ke ʻeke hifo nai kiate koe ʻi ha taimi pe ʻoku mohu ʻuhinga hoʻo moʻuí? Ko hoʻo ngāué nai ʻoku lahi, fakatupu helaʻia mo fakatupu ʻita. Ko hoʻo ngaahi feingá pe ngāué ʻoku ʻikai ke fakatokangaʻi. Neongo kapau ʻoku ʻi ai haʻo kiʻi lavameʻa ʻokú ke ongoʻi taʻemalu fekauʻaki mo ho kahaʻú. ʻI ha ngaahi taimi te ke ongoʻi tuēnoa pe loto-mafasia. ʻOku taʻefetaulaki mo fekeʻikeʻi nai hoʻo moʻui fakafāmilí. Mahalo kuo mole ha taha naʻá ke ʻofa ai ʻi he maté. Ko ha tangata ko hono hingoá ko André naʻe fuʻu ofi ki heʻene tamaí, ʻa ia naʻe puke fakafokifā pea mate. Kia André ko ha tā naʻe ongo pea ko ha koto ngeʻesi ʻa ia ʻokú ne ongoʻi ʻe ʻikai lava ke faitoʻo.

Tatau ai pē pe ko e hā ʻa e faingataʻa ʻoku tau fehangahangai nai, ʻoku ʻi ai ʻa e meʻa ʻoku fuʻu fiemaʻu ke tau ʻiloʻi: ʻOku malava moʻoni ha moʻui mohu ʻuhinga? ʻOku lava ke tau maʻu ʻa e talí ʻi he moʻui ʻa ha tangata naʻá ne ʻaʻeva ʻi he māmaní ʻi he taʻu ʻe 2000 nai kuo maliu atú—ʻa Sīsū Kalaisi. Neongo ʻa e ngaahi fakafaingataʻaʻiaʻanga kotoa naʻá ne fehangahangai mo iá, naʻe maʻu moʻoni ʻe Sīsū ha moʻui mohu ʻuhinga. Ko ia, te tau lava kapau te tau muimui ʻi heʻene faʻifaʻitakiʻangá.