Langaʻi ke Tupu ʻi Hono Fai ha Ngaahi Toe ʻAʻahi ʻAki ha Taumuʻa
1 Ke tokoni kiate kinautolu ʻoku nau fie fanongó, ʻoku mātuʻaki mahuʻinga ke tau hokohoko atu hono tokonaki kiate kinautolu ʻa e tafe mai ʻa e meʻakai fakalaumālié ʻaki ʻa e ngaahi toe ʻaʻahi. ʻE tokoni māmālie ʻa ʻetau ngaahi toe ʻaʻahí ke langaʻi ʻa ʻenau tupu fakalaumālié. (1 Kol. 3:6-9) Ka, ke fai ʻa ʻetau ngaahi toe ʻaʻahí ʻaki ha taumuʻa, ʻoku fie maʻu kiate kitautolu ke tau teuteu ki muʻa pea mo fakakaukau ki he toko taha ko iá.
2 Toe ʻAʻahi Kiate Kinautolu Naʻa Tau Tuku Ai ha Tuleki: Naʻe tuku nai ʻa e tuleki ko e Moʻui ʻi ha Māmani Foʻou Melinó ʻi he ʻuluaki ʻaʻahí.
ʻI he ʻosi hono fakamanatu fuonounou pē ʻa e meʻa naʻe ʻosi fai ʻa e fetalanoaʻaki ki aí, te tau ʻeke nai ha meʻa ʻo hangē ko ʻení:
◼ “Ko e puleʻanga fē te ne fakahoko mai ʻa e ngaahi liliu ko ʻení? [Tuku ke ne tali.] ʻOku ʻikai ha toe veiveiua te ke fiefia mo koe ke ke moʻui ʻi he ngaahi tuʻunga pehē ni. Ka ʻe lava fēfē ke tau maʻu tāutaha ʻa e ngaahi tuʻunga peheé?” Pea fai nai ha lave ki he fakamatala ʻi he kaveinga tokoni ko e “Founga Haʻo Malava Ke Kau Ai.” Kapau ʻoku fie fanongo, ʻe lava ke fakahanga ʻa e tokangá ki he tohi ko e Moʻui Taʻengatá, vahe 15, “Ko e Hoko ko ha Tokotaha ʻi he Malumalu ʻo e Founga-pule ʻa e ʻOtuá.” Te tau fetalanoaʻaki nai ʻi he ongo ʻuluaki palakalafí pea ʻeke ʻa e fehuʻi: “ʻOku totonu ke ueʻi fēfē kitautolu ʻe he ako ʻo fekauʻaki mo e ʻOtua?” ʻE fai nai ha fokotuʻutuʻu ke tali ʻa e fehuʻí mo toe hoko atu ʻa e fetalanoaʻaki ʻi he vahe pē ko iá ʻi he ʻaʻahi hono hoko maí.
3 ʻI heʻetau toe ʻaʻahi kiate kinautolu ʻa ia naʻa tau tuku ai ʻa e kiʻi tohi ko e “ʻOku ʻI Ai Ha ʻOtua ʻOku Tokanga Mai?,” te tau pehē nai:
◼ “ʻI heʻeku ʻaʻahi fakamuimui maí, naʻá ta fetalanoaʻaki ai ki he ngaahi palōpalema lahi ʻoku moʻua ai ʻa e kakaí pea mo e meʻa naʻe talaʻofa ʻe he ʻOtuá te ne fai ʻo fekauʻaki mo ia. ʻE vavé ni ʻa hono fakangata ʻe he ʻOtuá ʻa e faingataʻaʻiá? ʻOku hā ʻa e tali fakatupu tokanga ʻi he palakalafi 28-31 ʻo e kiʻi tohi naʻá ta sio ki aí.” Kole ki he toko taha ʻapí ke ne ʻomai ʻene tataú kapau ʻoku faingamālie. ʻI he ʻosi ha lave ki ha ngaahi palakalafi ʻe niʻihi, te tau ʻeke nai: “Ko e hā ʻoku fie maʻu ke tau fai ka tau maʻu ʻa e ʻaonga mei he ngaahi talaʻofa ʻa e ʻOtua?” Ko e fakamatala ʻi he palakalafi 32-37, “Ko Ha Fokotuʻutuʻu Foʻou Angatonu,” ʻi he peesi 23-28 ʻe fakaeʻa nai ia ki ha fetalanoaʻaki ʻi he ʻaʻahi hono hoko maí.
4 Toe ʻAʻahi ki he Faʻahinga ʻa ia Naʻa Tau Tuku Ai ha Makasini: Kapau naʻá ke fili ha kupu naʻe fie fanongo ki ai ʻa e toko taha ʻapí, fakahā atu ki ai mo ha toe ngaahi poini mei he kupú ʻi hoʻo toe ʻaʻahí, ʻo fakahanga ʻa hoʻo fakamatalá ki ha konga Tohi Tapu tefito pē ʻe taha mo e fakamatala ʻoku ʻasi ai ʻo fekauʻaki mo iá. Kapau ʻoku hoko atu pē ʻa ʻene fie fanongó, te ke lāulea nai ʻo fekauʻaki mo e ngaahi ʻaonga ʻo e makasiní. Pehē foki, ke fakahanga ʻa e tokangá ki he ʻīsiu hono hoko mai ʻo e makasiní kapau ʻoku ʻi ai ha kupu ʻoku fakamatala ki he kaveinga tatau pē. Ka ʻikai, te tau fakahanga ʻa e tokangá nai ki he fakamatala ʻi he tohi ko e Moʻui Taʻengatá ʻi he kaveinga ko iá pea mo fokotuʻutuʻu ke fai ha fetalanoaʻaki ki ai ʻi heʻetau ʻaʻahi hono hoko maí.
5 Ko ʻetau fakahā ʻa e tokanga fakaekita ki hono fai ʻa e ngaahi toe ʻaʻahí ʻaki ha taumuʻa ʻo aʻu ki hono fakamulitukú, ʻe fakahāhā ai ʻa ʻetau ʻofa ki he kakaí pea mo Sihova. (Sione 13:34, 35) ʻOfa ke tau hokohoko atu ke langaʻi ʻa e tupu fakalaumālie ʻa kinautolu ʻi hotau feituʻú ʻaki hono fai maʻu pē ʻa e ngaahi toe ʻaʻahí ʻaki ha taumuʻa.