Naʻe Sio ʻa ʻIlaisa ki he Ngaahi Saliote Afi​—ʻOkú Ke Pehē?

Naʻe loto ʻa e tuʻi ʻo Sīliá ke kumi pea puke ʻa e palōfita ʻa e ʻOtuá ko ʻIlaisá. Naʻá ne fanongo naʻe ʻi Tōtani ʻa ʻIlaisa, ko ha kolo ʻaaʻi ʻi ha funga māʻolunga. Lolotonga ʻa e poʻulí, naʻe fekau atu ai ʻe he tuʻí ʻene kau taú ki Tōtani, fakataha mo e kau tau hoosi mo e kau tau saliote. ʻI he tō ʻa e laʻaá, naʻa nau ʻātakaiʻi ʻa e koló.—2 Tuʻi 6:13, 14.

ʻI he tuʻu hake ʻa e sevāniti ʻa ʻIlaisá ʻo ʻalu ki tuʻá, naʻá ne sio ai ki he kau tau ʻa e filí peá ne hoko ʻo ilifia. Naʻá ne kalanga: “ʻOiaue, Tangataʻeiki, ko e ha ʻataua ʻe fai?” Naʻe pehē ʻe ʻIlaisa: “ʻOua te ke manavasiʻi: he ʻoku toko lahi ʻa e kau mo kitaua ʻi he kau mo kinautolu.” Naʻe lotu leva ʻa e palōfitá: “ʻEiki, ke ke fakaʻa muʻa hono mata ke ne mamata.” ʻOku hoko atu ʻa e talanoá: “Pea fakaʻa ʻe he ʻEiki ʻa e mata ʻo e talavou; ʻo ne sio: pea ta ʻoku fonu ʻa e moʻunga na ʻi he tau hoosi afi mo e saliote, ʻo takatakai kia Ilaisa.” (2 Tuʻi 6:15-17) Ko e hā ʻe lava ke tau ako mei hení?

Neongo naʻe ʻātakaiʻi ʻa ʻIlaisa ʻe he kau tau Sīliá, naʻá ne nonga pē. Naʻá ne falala kia Sihova pea ʻilo naʻe maluʻi ia ʻe Sihova. ʻOku ʻikai ke tau ʻamanekina ha ngaahi mana ʻi he ʻahó ni, ka ʻoku hā mahino mai kia kitautolu ʻoku maluʻi ʻe Sihova ʻene kakaí ʻi he tuʻunga ko ha kulupú. ʻE lava ke tau pehē ʻoku lava ke tau sio foki ki he kau tau hoosi mo e kau tau saliote afi ʻoku nau maluʻi kitautolu. Kapau ʻoku tau tui ʻoku maluʻi ʻe Sihova hono kakaí pea kapau ʻoku tau falala maʻu pē kiate ia, te tau ongoʻi malu pea maʻu ʻene tāpuakí. (Saame 4:8) Tau lāulea angé ki he founga ʻe lava ke tau maʻu ʻaonga ai mei he ngaahi meʻa kehe naʻe hoko ʻi he moʻui ʻa ʻIlaisá.

KAMATA NGĀUE ʻA ʻILAISA KIA ʻILAISIĀ

ʻI he ʻaho ʻe taha, ʻi he taimi naʻe palau ai ʻe ʻIlaisa ha ngoue, naʻe haʻu kiate ia ʻa e palōfita ko ʻIlaisiaá ʻo fakatui hono pulupulú ʻiate ia. ʻI hono fai ení, naʻe fakaafeʻi ai ʻe ʻIlaisiaá ʻa ʻIlaisa ke hoko ko ʻene tamaioʻeiki, ʻa ia ko ʻene sevāniti. Naʻe fakaafeʻi ʻe ʻIlaisa hono ngaahi kaungāmeʻá ki ha fuʻu kai meʻakai, lea māvae ki heʻene tangataʻeikí mo e fineʻeikí, pea mavahe mei ʻapi ke muimui ʻia ʻIlaisiā. (1 Tuʻi 19:16, 19, 21) Koeʻuhí naʻe loto-lelei ʻa ʻIlaisa ke fai ha meʻa pē naʻe loto ʻa e ʻOtuá ke ne fai, naʻe malava ʻe Sihova ke ngāueʻaki ia ʻi he ngaahi founga lahi pea fakanofo ia ki mui ko ha palōfita ko e fetongi ʻo ʻIlaisiā.

Naʻe ngāue ʻa ʻIlaisa kia ʻIlaisiā ʻi he taʻu ʻe ono nai. Lolotonga ʻa e taimi ko iá, ʻoku pehē ʻe he Tohi Tapú ko ʻIlaisá ko e tokotaha ia naʻá ne “ligi vai ki he nima” ʻo ʻIlaisiaá. (2 Tuʻi 3:11, PM) ʻOku ʻuhinga iá ki he hā? ʻI he taimi ko iá, naʻe anga-maheni ʻa e kai ʻaki ʻe he kakaí honau nimá. Hili ha houa kai, naʻe lingi ʻe he sevānití ʻa e vaí ʻi he nima ʻo hono ʻeikí ke fanofano. Ko ia ko e niʻihi ʻo e ngaahi ngāue ʻa ʻIlaisá naʻe hā ngali siʻisiʻi nai pe taʻemahuʻinga. Ka naʻá ne ongoʻi ko ha monū ia ke hoko ko e sevāniti ʻa ʻIlaisiaá.

ʻI ha founga meimei tatau, ʻoku loto-lelei ʻa e kau Kalisitiane tokolahi ke nau fai ha faʻahinga ngāue pē ʻi he ngāue taimi-kakató. Ko e hā hono ʻuhingá? Koeʻuhí ʻoku nau tui kia Sihova pea loto ke ʻoatu kiate ia honau lelei tahá. Ko e fakatātaá, ʻoku mavahe ʻa e niʻihi mei ʻapi ke ngāue ʻi Pēteli pe ʻi he ngaahi ngāue langá. ʻOku nau fai nai ʻa e ngaahi ngāue ʻe vakai ki ai ʻa e tokolahi ʻoku siʻisiʻi mo taʻemahuʻinga. Ka ʻoku ʻikai ha taha ʻo kitautolu ʻoku totonu ke fakakaukau pehē. ʻOku fakamahuʻingaʻi lahi ʻaupito ʻe Sihova ʻa e ngāue kotoa ʻoku fai ʻe heʻene kau sevānití.—Hep. 6:10.

NAʻE ʻIKAI KE FOʻI ʻA ʻILAISA ʻI HEʻENE NGĀUÉ

Ki muʻa ke ʻohake ʻe he ʻOtuá ʻa ʻIlaisiā “ki he langi ʻaki ha ʻahiohio,” naʻá ne ʻave ʻa e palōfitá ʻi ha fononga. Naʻe tala ange ʻe ʻIlaisiā kia ʻIlaisa naʻe ʻikai fiemaʻu ia ke na ʻalu, ka naʻe tali ange ʻe ʻIlaisa: “[ʻE ʻikai] haʻaku liʻaki koe.” Lolotonga ʻa e fonongá, naʻe toe tuʻo ua hono tala ange ʻe ʻIlaisiā kiate ia ke ne nofo pē, ka naʻe fakafisi ʻa ʻIlaisa. (2 Tuʻi 2:1-6) Naʻe nofoʻaki mateaki ʻa ʻIlaisa kia ʻIlaisiā, ʻo hangē pē ko e nofoʻaki mateaki ʻa Lute kia Nāomí. (Lute 1:8, 16, 17) Naʻe ongoʻi ʻe ʻIlaisa ko ha monū ia ke ngāue kia ʻIlaisiā koeʻuhí ko e ngāue ia naʻe ʻoange ʻe he ʻOtuá ke ne faí.

Naʻe fokotuʻu ʻe ʻIlaisa ha faʻifaʻitakiʻanga lelei maʻatautolu. Te tau fakamahuʻingaʻi lahi ʻaupito ha faʻahinga ngāue ʻoku ʻomai kia kitautolu ke fai ʻi he kautaha ʻa e ʻOtuá, kapau te tau manatuʻi maʻu pē ʻoku tau ngāue kia Sihova. ʻOku ʻikai ha monū ʻe toe lahi ange ai.—Saame 65:4; 84:10.

“TALA MAI PE KO E HA TE U FAI MAʻAU”

ʻI he fononga atu ʻa e ongo tangatá, naʻe pehē ange ʻe ʻIlaisiā kia ʻIlaisa: “Tala mai pe ko e ha te u fai maʻau ʻi he teʻeki ke ʻave au.” Naʻe tali ange ʻe ʻIlaisa: “Tuku muʻa ke to kiate au ha ʻinasi loua mei ho laumalie.” Hangē ko ia naʻe fai ʻe Solomone ʻi he ngaahi taʻu ki muʻá, naʻe kole ʻe ʻIlaisa ha meʻa te ne tokoniʻi ia ke lelei ange ai ʻene ngāue kia Sihová. (1 Tuʻi 3:5, 9; 2 Tuʻi 2:9) Ko e hā naʻe kole ʻe ʻIlaisá? ʻI ʻIsileli, ko ha ʻinasi lōua ʻo ha tofiʻa ʻe ʻalu ia ki he ʻuluaki foha ʻo ha tangata, ʻa hono ʻea tefitó. (Teu. 21:15-17) Ko ia naʻe kole ʻe ʻIlaisa ke ne hoko ko e ʻea ʻo ʻIlaisiā, pe fetongi ʻa ʻIlaisiā ʻi he tuʻunga ko e palōfitá. Pehē foki, naʻá ne kole ke maʻu ʻa e laumālie pe fakakaukau ʻa ʻIlaisiaá, koeʻuhí naʻá ne loto ke maʻu ʻa e loto-toʻa mo e faivelenga tatau ki he lotu moʻoní ʻa ia naʻe maʻu ʻe ʻIlaisiaá.—1 Tuʻi 19:13, 14.

Naʻe anga-fēfē tali ʻa ʻIlaisiā ki he kole ʻene sevānití? Naʻe pehē ʻe he palōfitá: “Kuo ke kole ki ha meʻa faingataʻa: ka ʻo kapau te ke sio kiate au ʻi hoku ʻave meiate koe, pea ʻe hoko atu; pea kapau ʻe ʻikai, pea ʻe ʻikai hoko atu.” (2 Tuʻi 2:10) Ko e tali ʻa ʻIlaisiaá naʻe ʻuhinga ki he meʻa ʻe ua. ʻUluakí, ko e ʻOtuá pē ʻe lava ke ne fili pe ʻe maʻu ʻe ʻIlaisa ʻa e meʻa naʻá ne kole ki aí. Uá, kapau naʻe loto ʻa ʻIlaisa ke maʻu ia, naʻe pau ke ne nofo mo ʻIlaisiā, ʻo tatau ai pē pe ko e hā nai ʻe hokó.

MEʻA NAʻE SIO KI AI ʻA ʻILAISÁ

Naʻe ʻoange ʻe he ʻOtuá kia ʻIlaisa ʻa e meʻa naʻá ne kolé? ʻOku pehē ʻe he Tohi Tapú: “ʻI heʻena ōō atu pe mo talanoa, ʻiloange, ko e saliote afi ena mo e fanga hoosi afi, ʻo fakamavae kinaua; pea naʻe ʻohake ʻa Ilaisia ʻe he ʻahiohio ki he langi. Pea sio ki ai ʻa Ilaisa.”a Ko e tali ia ʻa Sihova ki he kole ʻa ʻIlaisá. Naʻe sio ʻa ʻIlaisa ki hono ʻave ʻa ʻIlaisiā meiate iá, maʻu ʻa e ʻinasi lōua ʻo e laumālie ʻo ʻIlaisiaá, pea hoko ko e palōfita ʻa e ʻOtuá ʻo fetongi ia.—2 Tuʻi 2:11-14.

Naʻe toʻo hake ʻe ʻIlaisa ʻa e pulupulu naʻe tō mai meia ʻIlaisiaá ʻo ne tui. ʻI he taimi naʻe sio ai ʻa e kakaí ʻoku tui ʻe ʻIlaisa ʻa e pulupulu ko iá, naʻa nau ʻiloʻi ko e palōfita ia ʻa e ʻOtuá he taimi ní. Ki mui ai, naʻá ne toe fakahaaʻi ko ia ʻa e palōfita ʻa e ʻOtuá ʻaki hono fakamavaeua ʻa e vai ʻi he Vaitafe Sioataní.

Kuo pau pē naʻe ʻikai ʻaupito ngalo ʻia ʻIlaisa ʻene sio ki hono ʻohake ʻa ʻIlaisiā ʻi ha ʻahiohio. ʻE ofo ha taha pē ʻi haʻane sio ki ha kau tau saliote mo e kau tau hoosi afi! Naʻe fakamoʻoniʻi ʻe he meʻá ni kia ʻIlaisa naʻe ʻoange ʻe Sihova kiate ia ʻa e meʻa naʻá ne kolé. ʻI he taimi ʻoku tali ai ʻe he ʻOtuá ʻetau ngaahi lotú, ʻoku ʻikai ke tau maʻu ha vīsone ki ha kau tau hoosi mo ha kau tau saliote afi. Ka ʻoku tau kei maʻu ʻa e fakamoʻoni māʻalaʻala ʻoku ngāueʻaki ʻe he ʻOtuá hono mālohi lahí ke tokoniʻi kitautolu ke tau fakapapauʻi ʻe fakahoko hono finangaló. Pea ʻi he taimi ʻoku tau sio ai ʻoku tāpuakiʻi ʻe Sihova ʻa e konga fakaemāmani ʻo ʻene kautahá, ʻoku hangē ia ʻoku tau sio ki heʻene saliote fakalangí ʻoku ngaʻunu ki muʻa.—ʻIsi. 10:9-13.

Naʻe hokosia ʻe ʻIlaisa ʻa e ngaahi meʻa lahi ʻa ia naʻe fakatuipauʻi ai kiate ia ʻa e mālohi lahi ʻo Sihová. Ko e moʻoni, naʻe ʻai ʻe he laumālie māʻoniʻoni ʻo e ʻOtuá ke malava ʻe he palōfitá ʻo fakahoko ʻa e mana ʻe 16. Ko e liunga ua ia ʻo e mana naʻe fai ʻe ʻIlaisiaá.b Ko e taimi hono ua naʻe sio ai ʻa ʻIlaisa ki he kau tau hoosi mo e kau tau saliote afí naʻe ʻi Tōtani, ʻi he taimi naʻe ʻātakaiʻi ai ia ʻe he kau tau Sīliá.

NAʻE FALALA ʻA ʻILAISA KIA SIHOVA

Neongo naʻe ʻātakaiʻi ia ʻe he ngaahi filí ʻi Tōtani, naʻe hanganaki nonga pē ʻa ʻIlaisa. Ko e hā hono ʻuhingá? Koeʻuhí naʻá ne maʻu ʻa e tui mālohi kia Sihova. ʻOku tau fiemaʻu foki ʻa e tui mālohi. Tau lotu ʻo kole ʻa e laumālie māʻoniʻoni ʻo e ʻOtuá koeʻuhí ke lava ʻo tau fakahāhā ʻa e tuí mo e ngaahi ʻulungaanga kehe ʻa ia ko e konga ia ʻo e fua ʻo e laumālié.—Luke 11:13; Kal. 5:22, 23.

Ko e meʻa naʻe hoko ʻi Tōtaní kuo pau pē naʻá ne ʻoange kia ʻIlaisa ʻa e ʻuhinga lahi ange ke falala ai kia Sihova mo ʻene ngaahi kongakau ʻāngeló. Naʻe fekau atu ʻe he ʻOtuá ʻene kau ʻāngeló ke ʻātakaiʻi ʻa e koló pea maluʻi ʻa ʻIlaisa mei he filí. Naʻe fakahaofi leva ʻe he ʻOtuá ʻa ʻIlaisa mo ʻene sevānití ʻaki hono fakakuihi ʻa e filí. (2 Tuʻi 6:17-23) ʻI he taimi ko ia ʻo e fakatuʻutāmakí, pea pehē ki he ngaahi tuʻunga kehé, naʻe fakahaaʻi ʻe ʻIlaisa ʻa e tui mo e falala kakato kia Sihova.

Hangē ko ʻIlaisá, tau falala kia Sihova ko e ʻOtuá. (Pal. 3:5, 6) Kapau te tau fai pehē, ʻe ‘ʻaloʻofa mai ʻa e ʻOtuá, ʻo fai hotau tapuekiná.’ (Saame 67:1) Ko e moʻoni ʻoku ʻikai ke ʻātakaiʻi kitautolu ʻe ha kau tau saliote mo e kau tau hoosi afi, ka ʻoku maʻu he ʻahó ni ʻe he kakai ʻa Sihová ʻene maluʻí. Pea ʻi he kahaʻú, ʻe maluʻi ʻe Sihova hono kakaí ʻi he “mamahi lahi.” (Māt. 24:21; Fkh. 7:9, 14) ʻO ka toki aʻu ki he taimi ko iá, tau manatuʻi maʻu pē ko e “ʻOtua ko e hufanga moʻotaua.”—Saame 62:8.