Fāinga ke ʻOfa ki he ʻOtuá

ʻOku faingataʻa ki he kakai ʻe niʻihi ke ʻofa ki he ʻOtuá. Kia kinautolu, ko e ʻOtuá ʻoku hā ngali faingataʻa ke mahinoʻi, mamaʻo pe anga-fakamamahi. Fakakaukau angé ki he ngaahi lea ko ení:

• “Naʻá ku lotu ki he ʻOtuá ki ha tokoni, ka ʻi he taimi tatau, naʻá ku ongoʻi ʻokú ne mamaʻo ʻaupito, ʻo taʻemalava ke aʻu ki ai. Kiate au, ko e ʻOtuá ʻokú ne fiemaʻu pē ʻa e meʻa mei he kakaí kae ʻikai tokanga ki heʻenau ngaahi ongoʻí.”—Marco, ʻĪtali.

• “Neongo naʻá ku loto-moʻoni ke tauhi ki he ʻOtuá, ka naʻe hā ngali naʻá ne mamaʻo fakaʻaufuli. Naʻá ku fakakaukau ko e ʻOtuá naʻe anga-fefeka ʻokú ne tauteaʻi pē kitautolu. Naʻe ʻikai ke u tui naʻá ne maʻu ʻa e ngaahi ongoʻi ʻofá.”—Rosa, Kuatemala.

• “ʻI heʻeku kei siʻí, naʻá ku tui ko e ʻOtuá ʻokú ne fakasio ʻetau ngaahi faihalá pea mateuteu ke tauteaʻi kitautolu kapau naʻa tau tuha mo ia. Ki mui ai, naʻá ku vakai ki ai ʻokú ne anga-momoko. Ko e ʻOtuá naʻe hangē ia ko ha palēmia ʻokú ne levaʻi ʻa e ngaahi meʻa ʻa e kakai ʻokú ne pule ki aí—ka ʻoku ʻikai ke mahuʻingaʻia moʻoni ʻia kinautolu.”—Raymonde, Kānata.

Ko e hā hoʻo fakakaukaú? ʻOku taʻeʻofa ʻa e ʻOtuá? Ko e kau Kalisitiané naʻa nau faʻa langaʻi ʻa e fehuʻi ko iá ʻi he laui senituli. Ko hono moʻoní, lolotonga ʻo e Kuonga Lotolotó, ko e tokolahi taha ʻo e Puleʻanga-Haʻa-Kalisitiané naʻe ʻikai ʻaupito ke nau lotu kinautolu ki he ʻOtua Māfimafi-Aoniú. Ko e hā hono ʻuhingá? Naʻe mate manavahē ʻa e kakaí ʻiate ia. Naʻe fakalea ʻo peheni ʻe ha faihisitōlia ko Will Durant: “ʻE anga-fēfē ke lotu ha tokotaha angahala ki ha taloni ʻoku taumamaʻo mo fakamanavahē?”

Naʻe anga-fēfē ʻa e hoko ʻo e vakai ki he ʻOtuá ʻoku “taumamaʻo mo fakamanavaheé?” Ko e hā ʻoku akoʻi moʻoni ʻe he Tohi Tapú fekauʻaki mo e ʻOtuá? ʻE lava ʻe he ako ki he moʻoni fekauʻaki mo e ʻOtuá ʻo tokoniʻi koe ke ke ʻofa kiate ia?