Faʻifaʻitaki ki he Tokotaha ʻOkú Ne Talaʻofa Mai ʻa e Moʻui Taʻengatá
“Mou hoko ko e kau faʻifaʻitaki ki he ʻOtuá, ʻi he tuʻunga ko e fānau ʻofeina.”—ʻEF. 5:1.
1. Ko e hā ʻa e malava ʻe lava ke ne tokoniʻi kitautolu ke tau faʻifaʻitaki kia Sihová?
NAʻE fakatupu ʻe Sihova kitautolu mo e malava ke mahinoʻi ʻa e anga ʻo e ongoʻi ʻa e niʻihi kehé, neongo kapau kuo teʻeki ai ke tau hokosia ia. (Lau ʻa e ʻEfesō 5:1, 2.) ʻE lava fēfē ke tokoniʻi kitautolu ʻe he malava ko ení ke tau faʻifaʻitaki kia Sihova? Pea ko e hā ʻoku fiemaʻu ai ke tau tokanga ki he anga ʻetau ngāueʻaki ʻa e malava ko ení?
2. ʻOku anga-fēfē ongoʻi ʻa Sihova ʻi he taimi ʻoku tau faingataʻaʻia aí?
2 Kuo talaʻofa mai ʻe Sihova ha kahaʻu fakaofo heʻikai ke toe ʻi ai ha faingataʻa. ʻE lava ke fakatuʻotuʻa atu ʻa e kau paní mo e “fanga sipi kehe” ki he moʻui taʻengatá, ʻi hēvani pe ʻi māmani. (Sione 10:16; 17:3; 1 Kol. 15:53) Ka ʻoku mahinoʻi ʻe Sihova ʻetau ongoʻi mamahí ʻi he taimi ʻoku tau hokosia ai he ʻahó ni ʻa e ngaahi meʻa ʻoku koví. ʻI he kuohilí, naʻe ongoʻi mamahi ʻa Sihova ʻi he faingataʻaʻia hono kakaí ʻi ʻIsipité. “Naʻe hoko ha mamahi ki Heʻene ʻAfio.” (ʻAi. 63:9) Pea ki mui ai, ʻi he taimi naʻe toe langa ai ʻe hono kakaí ʻa hono temipalé pea manavahē ki honau ngaahi filí, naʻe mahinoʻi ʻe Sihova ʻa e anga ʻenau ongoʻí. Naʻá ne tala ange kia kinautolu: “Ko ia ʻoku ne ala kiate kimoutolu ʻoku ne ala ki he tamaʻimata ʻo ʻene ʻAfio.” (Sāk. 2:8) Hangē pē ko e ongoʻi ʻofa ha faʻē ki heʻene pēpeé, ʻoku ongoʻi ʻofa ʻa Sihova ki heʻene kau sevānití pea loto ke tokoniʻi kinautolu. (ʻAi. 49:15) ʻOku tau faʻifaʻitaki ki he ʻofa ʻa Sihová ʻi he taimi ʻoku tau feinga ai ke mahinoʻi ʻa e anga ʻo e ongoʻi ʻa e niʻihi kehé ʻaki ʻa e sioloto atu ʻoku tau ʻi honau tuʻungá.—Saame 103:13, 14.
FAʻIFAʻITAKI ʻA SĪSŪ KIA SIHOVA PEA ʻOFA ʻI HE KAKAÍ
3. Naʻe anga-fēfē ongoʻi ʻa Sīsū fekauʻaki mo e kakaí?
3 Naʻe mahinoʻi ʻe Sīsū ʻa e anga ʻo e ongoʻi ʻa e kakaí ʻi he taimi naʻa nau faingataʻaʻia aí, neongo naʻe teʻeki ai ʻaupito ke ne hokosia ia. Ko e fakatātaá, naʻá ne ʻiloʻi naʻe faingataʻa ʻa e moʻuí ki he kakai tokolahi. Naʻe lohiakiʻi kinautolu ʻe he kau taki lotú pea fokotuʻu ʻa e ngaahi lao naʻe ʻikai mei he ʻOtuá. Naʻe manavahē ʻa e kakaí ki he kau taki ko ení. (Māt. 23:4; Mk. 7:1-5; Sione 7:13) Neongo naʻe ʻikai ʻaupito manavahē ʻa Sīsū ʻia kinautolu mo ʻikai ʻaupito tui ki heʻenau ngaahi loí, naʻe malava ke ne mahinoʻi ʻa e anga ʻo e ongoʻi ʻa e kakaí. Naʻe loto-mamahi lahi ʻa Sīsū ʻi heʻene sio ki hono ngaohikoviʻi kinautolú. Naʻe liʻaki taʻetokoniʻi kinautolu “ʻo hangē ha fanga sipi taʻeʻiai hanau tauhí.” (Māt. 9:36) Naʻe ako ʻa Sīsū mei heʻene Tamaí ke ʻofa ʻi he kakaí pea hoko ʻo “manavaʻofa mo angalelei.”—Saame 103:8.
4. ʻI he taimi naʻe sio ai ʻa Sīsū ki he faingataʻaʻia ʻa e kakaí, ko e hā naʻá ne faí?
4 ʻI he taimi naʻe sio ai ʻa Sīsū ki he faingataʻaʻia ʻa e kakaí, naʻá ne tokoniʻi kinautolu koeʻuhí naʻá ne ʻofa ʻia kinautolu. Naʻá ne hangē tofu pē ko ʻene Tamaí. Ko e fakatātaá, ʻi he taimi ʻe taha hili ʻa e fononga lōloa ʻa Sīsū mo ʻene kau ākongá ke malangá, naʻa nau helaʻia pea fiemaʻu ke nau mālōlō ʻi ha feituʻu lōngonoa. Ka naʻe sio ʻa Sīsū naʻe tatali mai kiate ia ʻa e kakai tokolahi. Naʻá ne mahinoʻi naʻa nau fiemaʻu ʻene tokoní, ko ia neongo naʻá ne helaʻia, “naʻá ne kamata akoʻi kiate kinautolu ʻa e ngaahi meʻa lahi.”—Mk. 6:30, 31, 34.
HOKO ʻO ANGA-ʻOFA HANGĒ KO SIHOVÁ
5, 6. Kapau ʻoku tau loto ke anga-ʻofa ʻo hangē ko Sihová, ko e hā kuo pau ke tau faí? ʻOmai ha fakatātā. (Sio ki he ʻuluaki fakatātā ʻi he kupú ni.)
5 Kapau ʻoku tau loto ke anga-ʻofa ʻo hangē ko Sihová, ko e hā kuo pau ke tau faí? Fakakaukau ki he tuʻungá ni. ʻOku ʻi ai ha kiʻi talavou ko Alan. ʻOkú ne fakakaukau fekauʻaki mo ha tokoua taʻumotuʻa ʻa ia ʻoku ʻikai lava ʻo lue lelei pea ʻoku kovi ʻene sió. ʻOku fakakaukau ʻa Alan ki he ngaahi lea ʻa Sīsū: “Hangē tofu pē ko ia ʻoku mou loto ke fai atu ʻe he kakaí kiate kimoutolú, fai pehē pē kiate kinautolu.” (Luke 6:31) Ko ia naʻe ʻeke hifo ʻe Alan kiate ia, ‘Ko e hā ʻoku ou loto ke fai mai ʻe he niʻihi kehé?’ ʻOkú ne pehē, ‘ʻOku ou loto moʻoni ke mau malemale!’ Ka naʻe ʻikai lava ʻa e tokoua taʻumotuʻa ko ení ʻo lele mo malemale. Ko ia, ko e hā ʻoku fiemaʻu moʻoni ʻe Alan ke ʻeke hifo kiate iá, ‘Kapau ko e tokouá au, ko e hā te u loto ke fai mai ʻe he niʻihi kehé?’
6 Neongo ʻoku kei siʻi ʻa Alan, ʻokú ne feinga ke sioloto atu ki he anga ʻo ʻene ongoʻí kapau naʻá ne motuʻa. ʻOkú ne fakamoleki ʻa e taimi mo e tokoua taʻumotuʻá pea fanongo lelei ʻi he taimi ʻokú ne talanoa aí. ʻOkú ne kamata leva ke mahinoʻi ʻa e faingataʻa ki he tokouá ke lau Tohi Tapú mo lue mei he fale ki he fale ʻi he ngāue fakafaifekaú. ʻOku sio ʻa Alan ki he founga ʻe lava ai ke ne tokoniʻi ia pea loto ke fai ha meʻa pē te ne malavá maʻá e tokouá. ʻI heʻetau mahinoʻi ʻa e anga ʻo e ongoʻi ʻa e niʻihi kehé pea fakahāhā kia kinautolu ʻa e ʻofá, te tau hoko ai ʻo hangē ko Sihová.—1 Kol. 12:26.
Hoko ʻo anga hangē ko Sihová (Sio ki he palakalafi 7)
7. ʻE lava fēfē ke tau mahinoʻi ʻa e meʻa ʻoku hokosia ʻe hotau fanga tokouá?
7 ʻOku ʻikai faingofua maʻu pē ke mahinoʻi ʻa e meʻa ʻoku hokosia ʻe he niʻihi kehé, tautefito kapau kuo teʻeki ai ke tau hokosia ia. Ko e fakatātaá, ko e tokolahi hotau fanga tokouá ʻoku nau mamahi koeʻuhí ʻoku nau puke pe lavea pe koeʻuhí ko e hoholo ke motuʻá. ʻOku faingataʻaʻia lahi ʻa e niʻihi koeʻuhí ko e loto-mafasia pe hohaʻa tōtuʻa pe koeʻuhí naʻe ngaohikoviʻi kinautolu ʻi he kuohilí. ʻOku tauhi toko taha hake ʻe he niʻihi ʻa e fānaú pe ʻi ai ha ngaahi mēmipa ʻi he fāmilí ʻoku ʻikai ke nau tauhi kia Sihova. Ko e tokotaha kotoa ʻoku ʻi ai ʻenau ngaahi palopalema, pea ko e lahi taha ʻo e ngaahi palopalema ko iá ʻoku kehe ia mei haʻatautolú. Ka ʻoku tau loto ke fakahāhā ʻa e ʻofa ki he niʻihi kehé mo tokoniʻi kinautolu. Ko ia, ko e hā ʻe lava ke tau faí? ʻE kehekehe nai ʻa e fiemaʻu ʻa e tokotaha taki taha. Ko ia kapau te tau fanongo lelei pea hanganaki feinga ke mahinoʻi ʻa e anga ʻo e ongoʻi ʻa e tokotaha ko iá, te tau ʻiloʻi ai ʻa e founga lelei taha ke tokoniʻi iá. Mahalo ʻe lava ke tau fakamanatu ange kiate ia ʻa e anga ʻo e ongoʻi ʻa Sihova fekauʻaki mo ʻene palopalemá. Pe ʻoku malava nai ke tau fai ha tokoni kiate ia ʻi ha ngaahi founga kehe. ʻI heʻetau fai ení, ʻoku tau faʻifaʻitaki ai kia Sihova.—Lau ʻa e Loma 12:15; 1 Pita 3:8.
HOKO ʻO ANGA-LELEI HANGĒ KO SIHOVÁ
8. Ko e hā naʻá ne tokoniʻi ʻa Sīsū ke hoko ʻo anga-leleí?
8 ʻOku anga-lelei ʻa Sihova ki he kakai kotoa pē. (Luke 6:35) Pea ʻoku hangē tofu pē ʻa Sīsū ko ʻene Tamaí. Ko e hā naʻá ne tokoniʻi ʻa Sīsū ke ne anga-lelei ki he kakaí ʻi he taimi naʻá ne ʻi māmani aí? Naʻá ne sioloto atu ki he anga ʻenau ongoʻi fekauʻaki mo e meʻa nai te ne leaʻaki pe faí. Ko e fakatātaá, naʻe haʻu kia Sīsū ha fefine naʻá ne fai ha ngaahi meʻa kovi. Naʻá ne tangi lahi ʻo tō ai hono loʻimatá ʻi he vaʻe ʻo Sīsuú. Naʻe lava ke sio ʻa Sīsū ki heʻene ongoʻi fakaʻiseʻisa moʻoni ʻi he ngaahi meʻa kovi naʻá ne faí pea kuó ne fakatomala. Naʻe ʻiloʻi ʻe Sīsū kapau naʻá ne anga-kovi kiate ia, ʻe ongoʻi kovi ange ʻa e fefiné. Ko ia naʻá ne fakaongoongoleleiʻi ʻa e lelei naʻe fai ʻe he fefiné pea fakamolemoleʻi ia. Naʻe toe lea lelei ʻa Sīsū ki ha Fālesi ʻa ia naʻe ʻikai ke ne loto-tatau mo e meʻa naʻá ne fai ki he fefine ko ení.—Luke 7:36-48.
9. Ko e hā ʻe lava ke ne tokoniʻi kitautolu ke hoko ʻo anga-lelei hangē ko Sihová? ʻOmai ha fakatātā.
9 ʻE lava fēfē ke tau hoko ʻo anga-lelei hangē ko Sihová? ʻOku fiemaʻu ke tau tomuʻa fakakaukau pea toki lea pe fai ha meʻa koeʻuhí ke tau anga-fakaalaala ki he niʻihi kehé pea ʻoua ʻe fakalotomamahiʻi kinautolu. Naʻe tohi ʻa Paula ko ha Kalisitiane “ʻoku ʻikai fiemaʻu ia ke ne kē, ka ʻoku fiemaʻu ke ne hoko ʻo anga-fakaalaala ki he tokotaha kotoa pē.” (2 Tīm. 2:24) Ko e fakatātaá, fakakaukau fekauʻaki mo e founga ʻe lava ke ke hoko ai ʻo anga-lelei ʻi he ngaahi tuʻunga ko ení: Kapau ʻoku ʻikai ke lelei ʻa e ngāue ʻa hoʻo tokotaha ngāué, ko e hā te ke faí? Kapau ʻoku haʻu ki he Fale Fakatahaʻangá ha tokoua kuó ne liʻaki ʻa e fakatahá ʻi ha ngaahi māhina, ko e hā te ke leaʻaki kiate iá? Kapau ʻokú ke ʻalu ʻo malanga pea tala atu ʻe ha taha ʻokú ne fuʻu femoʻuekina, ʻe lava fēfē ke ke anga-lelei kiate ia? Kapau ʻoku ʻeke atu ʻe ho uaifí ʻa e ʻuhinga naʻe ʻikai te ke tala ange ai ha palani naʻá ke fai, te ke lea kiate ia ʻi ha founga anga-lelei? ʻOku fiemaʻu ke tau sioloto atu ki he anga ʻo e ongoʻi ʻa e niʻihi kehé mo e anga ʻo e kaunga nai ʻetau leá kia kinautolú. Te tau ʻiloʻi leva ʻa e meʻa ʻoku totonu ke tau leaʻaki mo faí ke hoko ai ʻo anga-lelei hangē ko Sihová.—Lau ʻa e Palōveepi 15:28.
HOKO ʻO POTO HANGĒ KO SIHOVÁ
10, 11. ʻE lava fēfē ke tau ako meia Sihova pea hoko ʻo poto? ʻOmai ha fakatātā.
10 ʻOku poto ʻaupito ʻa Sihova, pea ʻe lava ke ne fili ke vakai atu ki he meʻa ʻe hoko ʻi he kahaʻú. Neongo ʻoku ʻikai ke tau ʻiloʻi ʻa e kahaʻú, ʻe lava foki ke tau hoko ʻo poto. Anga-fēfē? Ki muʻa ke fai ha fili, ʻe lava ke tau sioloto atu ki heʻene kaunga kia kitautolu pe niʻihi kehé. ʻOku totonu ke ʻoua te tau hangē ko e kau ʻIsilelí. Naʻe ʻikai ke nau fakakaukau fekauʻaki mo e meʻa ʻe hoko kia kinautolu kapau te nau talangataʻa kia Sihova. Pea naʻe ʻikai ke nau fakakaukau ki honau vahaʻangatae mo iá mo e meʻa kotoa naʻá ne fai maʻa kinautolú. Koeʻuhí naʻe mahinoʻi eni ʻe Mōsese, naʻá ne ʻiloʻi naʻe teu ke fai ʻe he kau ʻIsilelí ʻa e meʻa naʻe kovi. Naʻá ne pehē: “Koe buleaga majiva fakakaukau boto akinautolu, bea oku ikai ha loto faa ilo foki iate kinautolu. Taumaia kuo nau boto, koeuhi ke nau ilo ae mea ni, koeuhi ke nau tokaga ki ho nau ikuaga!”—Teu. 31:29, 30; 32:28, 29, PM.
11 Ko e fakatātaá, kapau ʻokú ke faialea, manatuʻi ko e taimi ʻokú ke manako ai ʻi ha taha, ʻoku faingataʻa ke ke mapuleʻi hoʻo ngaahi ongoʻí mo e ngaahi holi fakaefehokotaki fakasinó. Ko ia ʻoua ʻe fai ha meʻa ʻe lava ke uesia ai ho vahaʻangatae mahuʻinga mo Sihová! ʻI hono kehé, hoko ʻo poto pea fakaʻehiʻehi mei he fakatuʻutāmakí. Fanongo ki he akonaki fakapotopoto ʻa Sihová: “Ko e fakapotopoto ʻoku ne sio ki he kovi, ʻo ne toi: Ka ko e hehemangofua ʻoku nau laka atu pe, ʻo moʻua ai.”—Pal. 22:3.
MAPULEʻI ʻA E MEʻA ʻOKÚ KE FAKAKAUKAU KI AÍ
12. ʻE lava fēfē ke fakatuʻutāmaki kia kitautolu ʻa e meʻa ʻoku tau fakakaukau ki aí?
12 ʻOku mapuleʻi ʻe he tokotaha potó ʻa e meʻa ʻokú ne fakakaukau ki aí. ʻE lava ke tokoni pe fakatuʻutāmaki kia kitautolu ʻa ʻetau ngaahi fakakaukaú, ʻo hangē pē ko e lava ke tokoni pe fakatuʻutāmaki kia kitautolu ʻa e afí. Kapau te tau ngāueleleiʻaki ʻa e afí, ʻe lava ke tau ngāueʻaki ia ki he feimeʻatokoní. Ka ʻo kapau heʻikai ke tau tokanga, ʻe lava ke vela hotau falé pea tau mate ai. ʻOku meimei tatau ia mo ʻetau ngaahi fakakaukaú. ʻI he taimi ʻoku tau fakakaukau ai ki he ngaahi meʻa ʻoku tau ako meia Sihová, ʻoku lelei ia kia kitautolu. Ka ʻo kapau ʻoku tau hanganaki fakakaukau ki he ʻulungaanga taʻetaau fakaefehokotaki fakasinó pea sioloto atu ʻoku tau fai ʻa e ngaahi meʻa ʻoku koví, te tau holi tōtuʻa ki he ngaahi meʻa ko ení ʻo tau hoko nai ai ʻo fai ia. ʻE lava ke ngata ai hotau kaumeʻa mo Sihová.—Lau ʻa e Sēmisi 1:14, 15.
13. Ko e hā naʻe sioloto atu ki ai ʻa ʻIvi fekauʻaki mo ʻene moʻuí?
13 ʻE lava ke tau ako mei he faʻifaʻitakiʻanga ʻa e ʻuluaki fefiné, ʻa ʻIvi. Naʻe fekau ʻe Sihova kia ʻĀtama mo ʻIvi ke ʻoua te na kai ʻa e fua ʻo e “ʻAkau ʻo e ʻIlo-ʻo-e-lelei-mo-e-kovi.” (Sēn. 2:16, 17) Ka naʻe tala ange ʻe Sētane kia ʻIvi: “ʻE ʻikai ʻaupito te mo mate: Kae kehe, ʻoku meaʻi ʻe he ʻOtua ko e ʻaho te mo kai ai ʻe ʻa ai homo mata, pea te mo hoko ke hange ko e ʻOtua, hoʻomo ʻilo ʻa e lelei mo e kovi.” Naʻe sioloto atu ʻa ʻIvi ki he lelei ange ʻene moʻuí kapau te ne fili pē ʻe ia ʻa e meʻa naʻe leleí mo e meʻa naʻe koví. Naʻá ne hanganaki fakakaukau fekauʻaki mo e meʻá ni pea ‘vakai ko e ʻakaú ʻoku lelei ki he kaí pea matamatalelei ki he matá.’ Ko e hā leva naʻe hokó? “Pea ne hanga ʻo toli hono fua, ʻo kai, pea ne ʻange foki ki hono husepaniti naʻe ʻiate ia; pea kai mo ia.” (Sēn. 3:1-6) Ko e olá, naʻe “hū ʻa e angahalá ki he māmaní pea mo e maté fakafou ʻi he angahalá.” (Loma 5:12) Naʻe totonu ke ʻoua ʻe hanganaki fakakaukau ʻa ʻIvi fekauʻaki mo hono fai ʻa e meʻa naʻe halá!
14. Ko e hā ʻa e fakatokanga ʻoku ʻomai ʻe he Tohi Tapú fekauʻaki mo e ʻulungaanga taʻetaau fakaefehokotaki fakasinó?
14 Ko e moʻoni, ko e angahala ʻa ʻIví naʻe ʻikai kau ai ʻa e ʻulungaanga taʻetaau fakaefehokotaki fakasinó. Ka ʻoku fakatokanga mahino mai ʻa e Tohi Tapú ke ʻoua te tau hanganaki sioloto atu ʻoku tau fai ha ʻulungaanga taʻetaau fakaefehokotaki fakasino. Naʻe pehē ʻe Sīsū: “Ko e tokotaha kotoa ʻoku hanganaki fakasio ki ha fefine ke tafunaki ki ai ʻene holí kuó ne ʻosi tonoʻi ia ʻi hono lotó.” (Māt. 5:28) Pehē foki, naʻe fakatokanga ʻa Paula: “ʻOua naʻa tomuʻa fai ha faʻufaʻu ke fai ʻa e ngaahi holi ʻo e kakanó.”—Loma 13:14.
15. Ko e hā ʻa e ngaahi koloa ʻoku totonu ke tau tokangataha ki aí, pea ko e hā hono ʻuhingá?
15 ʻOku toe pehē ʻe he Tohi Tapú ʻoku totonu ke tau tokangataha ki hono fakahōifuaʻi ʻa Sihová pea ʻoua ʻe hanganaki fakakaukau ki he hoko ʻo koloaʻiá. Neongo kapau ʻoku koloaʻia ha taha, heʻikai lava moʻoni ʻe heʻene paʻangá ke maluʻi ia. (Pal. 18:11) Naʻe pehē ʻe Sīsū ʻoku fakavalevale ki ha taha kapau ʻokú ne faʻoaki ha ngaahi koloa lahi maʻana kae ʻikai hanganaki fakamuʻomuʻa ʻa Sihova ʻi heʻene moʻuí. Ko e tokotaha ko iá ʻoku “ʻikai koloaʻia ki he ʻOtuá.” (Luke 12:16-21) ʻI he taimi ʻoku tau faʻoaki koloa ai “ʻi hēvani” ʻaki hono fai ʻa e ngaahi meʻa ʻoku hōifua ai ʻa Sihová, ʻoku tau ʻai ai ia ke ne fiefia pea tau fiefia foki mo kitautolu. (Māt. 6:20; Pal. 27:11) Pea ko ha vahaʻangatae lelei mo Sihova ʻoku mahuʻinga ange ia ʻi ha toe meʻa.
ʻOUA ʻE HANGANAKI LOTO-MOʻUA
16. Ko e hā ʻe lava ke ne tokoniʻi kitautolu ʻi he taimi ʻoku tau loto-moʻua aí?
16 Kapau ʻoku tau feinga ke koloaʻia ʻi he māmani ko ení, te tau loto-moʻua lahi ai. (Māt. 6:19) Naʻe pehē ʻe Sīsū ko e faʻahinga ʻoku loto-moʻua maʻu pē ki he paʻangá ʻe faingataʻa ke nau hanganaki fakamuʻomuʻa ʻa e Puleʻanga ʻo e ʻOtuá ʻi heʻenau moʻuí. (Māt. 13:18, 19, 22) Pehē foki, ʻoku loto-moʻua maʻu pē ʻa e kakai ʻe niʻihi fekauʻaki mo e ngaahi meʻa kovi ʻe hoko nai kia kinautolú. Ka ʻo kapau ʻoku tau hanganaki loto-moʻua, te tau hoko nai ai ʻo puke pe aʻu ʻo kamata ke mole ʻetau tui kia Sihová. ʻI hono kehé, kuo pau ke tau falala ʻe tokoniʻi kitautolu ʻe Sihova. ʻOku pehē ʻe he Tohi Tapú “ka hu ʻa e hohaʻa ki he loto ʻo ha tangata, ʻoku ne pelukiʻi ia: Ka ʻoku fakafiefiaʻi ʻe ha lea lelei.” (Pal. 12:25) Ko ia kapau ʻokú ke loto-moʻua ki ha meʻa, talanoa ki ha tokotaha ʻoku tauhi kia Sihova pea ʻokú ne ʻiloʻi lelei koe. ʻE lava ʻe ha mātuʻa, ko ho husepānití pe uaifí, pe ko ha kaumeʻa lelei ke ne fakalototoʻaʻi koe ke falala kia Sihova pea tokoniʻi koe ke fakasiʻisiʻi hoʻo loto-moʻuá.
17. ʻE lava fēfē ke tokoniʻi kitautolu ʻe Sihova ʻi he taimi ʻoku tau loto-moʻua aí?
17 ʻOku mahinoʻi lelei ange ʻe Sihova ʻa e anga ʻetau ongoʻí ʻi ha toe taha pea ʻe lava ke ne tokoniʻi kitautolu ke ongoʻi nonga ange ʻi he taimi ʻoku tau loto-moʻua aí. Naʻe tohi ʻe Paula: “ʻOua ʻe hoko ʻo loto-moʻua ʻi ha faʻahinga meʻa, ka ʻi he meʻa kotoa pē fakafou ʻi he lotu mo e hū tōtōaki fakataha mo e fakafetaʻi, mou ʻai ke ʻilo ai hoʻomou ngaahi kolé ʻe he ʻOtuá; pea ko e nonga ʻa e ʻOtuá ʻa ia ʻoku fakalaka atu ʻi he mahino kotoa pē te ne maluʻi homou lotó pea mo homou ngaahi mafai fakaefakakaukaú fakafou ʻia Kalaisi Sīsū.” (Fil. 4:6, 7) Ko ia ʻi he taimi ʻokú ke loto-moʻua aí, fakakaukau ki he tokoni ʻoku ʻomai ʻe Sihova ke ʻai ke mālohi ai pē hoʻo kaumeʻa mo iá, hangē ko e tokoni mei he fanga tokouá mo e fanga tuofāfiné, kau mātuʻá, tamaioʻeiki anga-tonú, kau ʻāngeló mo Sīsū.
18. ʻE lava fēfē ʻe heʻetau malava ke sioloto atu ki he ngaahi meʻá ʻo tokoniʻi kitautolú?
18 Hangē ko ia kuo tau akó, ʻoku tau faʻifaʻitaki kia Sihova ʻi he taimi ʻoku tau ngāueʻaki ai ʻetau malavá ke mahinoʻi ʻa e anga ʻo e ongoʻi ʻa e niʻihi kehé. (1 Tīm. 1:11; 1 Sio. 4:8) Te tau fiefia ʻi heʻetau fakahāhā ʻa e ʻofa mo e anga-lelei ki he niʻihi kehé, ʻi heʻetau fakakaukau ki he ngaahi ola ʻo e meʻa ʻoku tau faí pea fakaʻehiʻehi mei he loto-moʻua maʻu peé. Tau sioloto atu ki he tuʻunga ʻo e moʻuí ʻi he malumalu ʻo e pule ʻa e Puleʻangá pea fai hotau lelei tahá ke faʻifaʻitaki kia Sihova.—Loma 12:12.