Ko ha Meʻaʻofa Taʻehanotatau

KO E kiʻi meʻa fakamata peni vahevahe hangē ha kiʻi vaká ʻoku ʻi he nima ʻo Jordan ʻoku hā ngali ʻikai mahuʻinga. Neongo ia, ko e koloa mahuʻinga taha ia kiate iá. ʻOku pehē ʻe Jordan, “ko Russell, ko ha kaungāmeʻa taʻumotuʻa ia ʻo e fāmilí, naʻá ne ʻomai ia kiate au ʻi heʻeku kei siʻí.” Hili e mate ʻa Russell, naʻe ʻiloʻi ʻe Jordan naʻe ʻi ai ʻa e ngafa mātuʻaki mahuʻinga naʻe fakahoko ʻe Russell ki heʻene kui tangatá mo ʻene ongo mātuʻá, ʻi heʻene fakafiemālie kiate kinautolu ʻi he taimi ʻo ʻenau faingataʻaʻiá. “ʻI he taimí ni kuó u ʻilo ʻa e meʻa lahi ange fekauʻaki mo Russell,” ko e lau ia ʻa Jordan, “ko e kiʻi meʻaʻofa ko ení ʻoku mahuʻinga ange ia kiate au ʻi ha toe meʻa.”

Hangē ko e hokosia ʻa Jordan ʻoku fakatātaaʻi ai, ko ha meʻaʻofa ʻe mahuʻinga siʻisiʻi nai pe ʻikai hano mahuʻinga ʻi he vakai ʻa e kakai ʻe niʻihi. Kae kehe, ko ha tokotaha ʻokú ne tali ʻi he houngaʻia ʻa e meʻaʻofá te ne koloaʻaki mo fakamahuʻingaʻi lahi ia. ʻOku fakamatala ʻa e Tohi Tapú ki ha meʻaʻofa ʻoku taʻefakatataua hono mahuʻingá ʻi he ngaahi lea ʻiloa ko ení: “Naʻe ʻofa lahi ʻaupito ʻa e ʻOtuá ki he māmaní ʻo ne foaki ai hono ʻAlo tofu-pē-taha-ne-fakatupú, koeʻuhi ko e tokotaha kotoa pē ʻokú ne ngāueʻi ʻa e tui kiate iá ke ʻoua naʻa ʻauha ka ne maʻu ʻa e moʻui taʻengatá.”—Sione 3:16.

Ko ha meʻaʻofa ia ʻoku lava ke ne ʻoange ki he tokotaha ʻokú ne maʻú ʻa e moʻui taʻengata! ʻOku ʻi ai nai ha meʻaʻofa ʻoku toe mahulu ange ai hono mahuʻingá? Neongo ʻoku ʻikai nai fakatokangaʻi ʻe he niʻihi ʻa e mahuʻinga ʻo e meʻaʻofa ko ení, ko e kau Kalisitiane moʻoní ʻoku nau fakamahuʻingaʻi ia ko ha meʻa ʻoku “mahuiga.” (Saame 49:8, PM; 1 Pita 1:18, 19) Kae kehe, ko e hā naʻe foaki ai ʻe he ʻOtuá ʻa e moʻui hono ʻAló ko ha meʻaʻofa ki he māmaní?

ʻOku fakamatalaʻi ʻe he ʻapositolo ko Paulá ʻa e ʻuhingá ʻi he ngaahi leá ni: “Ko e fou mai ʻi he tangata pē taha ʻa e hū ʻa e angahalá ki he māmaní pea mo e maté fakafou ʻi he angahalá, pea ko ia kuo mafola ai ʻa e maté ki he tangata kotoa pē.” (Loma 5:12) Ko e ʻuluaki tangatá, ʻa ʻĀtama, naʻe faiangahala ʻi heʻene talangataʻa ʻiloʻilo pau ki he ʻOtuá pea naʻá ne faingataʻaʻia ʻi he nunuʻa ʻo e maté. Naʻe fakafou mai ʻia ʻĀtama ʻa e maté ki he kotoa hono hakó—ʻa e māmani ʻo e faʻahinga ʻo e tangatá.

“Ko e totongi ʻoku ʻoatu ʻe he angahalá ko e mate, ka ko e meʻaʻofa ʻoku foaki ʻe he ʻOtuá ko e moʻui taʻengata ʻia Kalaisi Sīsū ko hotau ʻEikí.” (Loma 6:23) Ke fakatauʻatāinaʻi ʻa e faʻahinga ʻo e tangatá mei he fakahalaiaʻi ki he maté, naʻe fekau mai ʻe he ʻOtuá hono ʻAló, ʻa Sīsū Kalaisi, ke feilaulauʻi ʻene moʻui haohaoá maʻá e māmaní. Pea makatuʻunga ʻi he feilaulau ko iá, ʻoku ʻiloa ko e “huhuʻi,” ko e faʻahinga kotoa ʻoku nau ngāueʻi ʻa e tui kia Sīsuú te nau maʻu ʻa e moʻui taʻengatá.—Loma 3:24.

ʻI he fekauʻaki mo e ngaahi tāpuaki kotoa ʻoku fakaaʻu atu ʻe he ʻOtuá ki he faʻahinga ʻoku nau lotu kiate iá ʻo fakafou ʻia Sīsū Kalaisí, naʻe pehē ʻe Paula: “Fakafetaʻi ki he ʻOtuá koeʻuhi ko ʻene meʻaʻofa taʻetotongi taʻealafakamatalaʻí.” (2 Kolinitō 9:15) ʻIo, ko e huhuʻí ʻoku fakaofo ʻaupito he ʻoku ʻikai lava ke tau fakamatalaʻi kakato ia. Ka, ko e hā ʻoku tautefito ai ʻa e fakaofo ʻa e huhuʻí ʻi he kotoa ʻo e ngaahi meʻaʻofa anga-ʻofa ʻa e ʻOtuá ki he faʻahinga ʻo e tangatá? ʻI he founga fē ʻoku hoko ai eni ko ha meʻaʻofa taʻehanotatau ʻa e ʻOtuá?a Pea ʻe fēfē haʻatau tali ʻa e meʻaʻofa ko iá? ʻOku mau fakaafeʻi atu koe ke ke lau ʻa e tali Fakatohitapu ki he ngaahi fehuʻí ni ʻi he ongo kupu hoko maí.