Ko e Hā ʻE Fai ʻe he ʻOtuá?

Kapau ʻokú ke ʻi ha tuʻunga faingataʻa, ʻoku ʻikai ha toe veiveiua hoʻo fiemaʻu ha kaumeʻa lelei ke tokoni atu kiate koe. ʻI he foʻi fakakaukau ko iá, ʻoku pehē ʻe he niʻihi ko e ʻOtuá ʻoku ʻikai ko ha kaumeʻa koeʻuhi ʻoku nau pehē ʻoku ʻikai fai ʻe he ʻOtuá ha meʻa maʻanautolu. Ko hono moʻoní, kuo ʻikai ngata pē hono fai ʻe he ʻOtuá ʻa e ngaahi meʻa lahi ke tau maʻu ʻaonga mei ai ka te ne toe fakangata ʻa e ngaahi palopalema mo e faingataʻa ʻoku tau fehangahangai mo ia ʻi he ʻaho ní. Ko e hā ʻe fai ʻe he ʻOtuá?

FAKANGATA KOTOA ʻA E FULIKIVANÚ

ʻE fakangata ʻe he ʻOtuá ʻa e kotoa ʻo e fulikivanú ʻaki hono toʻo atu hono tupuʻangá. ʻOku fakapapauʻi mai ʻe he Tohi Tapú ʻa hono tupuʻangá ʻi heʻene pehē: “Ko e māmaní kotoa ʻoku tokoto ia ʻi he mafai ʻo e tokotaha fulikivanú.” (1 Sione 5:19) Ko e ‘tokotaha fulikivanu’ ko iá ʻoku ʻikai ko ha tokotaha kehe ia mei he tokotaha naʻe ui ʻe Sīsū “ko e pule ʻo e māmani ko ení,” ʻa Sētane ko e Tēvoló. (Sione 12:31) Ko e tupuʻanga tefito ʻo e ngaahi tuʻunga fakamamahi ʻi he māmaní ko e tākiekina ʻe Sētane ʻa e faʻahinga ʻo e tangatá. Ko e hā ʻe fai ʻe he ʻOtuá?

Ko Sihova ko e ʻOtuá ʻe vavé ni ke ne ngāueʻaki ʻa hono ʻAló, ʻa Sīsū Kalaisi, ke ne “fakakaʻanga ai ʻa e tokotaha ʻokú ne malava ke fakatupunga ʻa e maté, ʻa ia, ko e Tēvoló.” (Hepelū 2:14; 1 Sione 3:8) Ko e moʻoni, ʻoku fakahaaʻi mai ʻe he Tohi Tapú ko e Tēvoló tonu ʻokú ne ʻiloʻi “ʻoku toe siʻi pē hono taimí” ki muʻa pea fakaʻauha iá. (Fakahā 12:12) ʻE toʻo atu foki ʻe he ʻOtuá ʻa e faʻahinga kotoa ʻoku nau fakatupunga ʻa e fulikivanú.​—Saame 37:9; Palōveepi 2:22.

NGAOHI ʻA E MĀMANÍ KO HA PALATAISI

ʻI he hili hono toʻo atu ʻa e kotoa ʻo e fulikivanú mei he māmaní, ʻe fakahoko ʻe hotau Tokotaha-Fakatupú ʻene taumuʻa taʻengata ki he faʻahinga ʻo e tangatá mo e māmaní. Ko e hā te tau fakatuʻotuʻa atu ki aí?

Melino mo e maluʻanga tuʻuloa. “Ko e anga-vaivaí te nau maʻu ʻa e māmaní, pea te nau maʻu ʻa e fiefia lahi ʻi he melino hulu fau.”​—Saame 37:11.

Meʻakai fakatupu moʻui lelei pea lahi fau. “ʻE lahi fau ʻa e uité ʻi he māmaní; ʻe mahutafea ʻa e tumutumu ʻo e ngaahi moʻungá.”​—Saame 72:16.

Ngaahi ʻapi lelei pea mo e ngāue fakafiemālie. “Te nau langa fale pea nofo ai, pea te nau tō ngoue kālepi pea kai ʻa hono fuá. . . . Ko e ngāue ʻa honau nimá ʻe fiefia kakato ai ʻa e faʻahinga kuó u filí.”​—ʻAisea 65:21, 22.

ʻOkú ke fakaʻamu ke ke sio ʻi he ngaahi tuʻunga ko iá? ʻE vavé ni ke hoko ia ko e meʻa anga-maheni ki he tokotaha kotoa pē.

FAKANGATA ʻOSI ʻA E PUKÉ MO E MATÉ

ʻOku huʻu atu ʻa e tokotaha kotoa ʻi he ʻahó ni ki he puké pea faai atu pē ʻo mate, ka ʻe ʻikai ke toe hoko ia. ʻOku vavé ni ke ngāueʻaki ʻe he ʻOtuá ʻa e ʻaonga ʻo e feilaulau huhuʻi naʻe fai ʻe Sīsuú ki he “tokotaha kotoa pē ʻokú ne ngāueʻi ʻa e tui kiate iá ke ʻoua naʻa ʻauha ka ne maʻu ʻa e moʻui taʻengatá.” (Sione 3:16) Ko e hā hono olá?

Fakangata ʻosi ʻa e puké. “ʻE ʻikai ha taha ʻoku nofo ai te ne pehē: ‘ʻOku ou puke.’ Ko e kakai ʻoku nofo ʻi he fonuá ʻe fakamolemoleʻi ʻa ʻenau faihalá.”​—ʻAisea 33:24.

ʻE ʻikai toe fakamamahiʻi ʻe he maté ʻa e tangatá. “Te ne folofua ʻa mate ʻo taʻengata, pea ʻe holoholo ʻe he ʻEiki Hau ko Sihová ʻa e loʻimatá mei he mata kotoa pē.”​—ʻAisea 25:8.

ʻE moʻui taʻengata ʻa e kakaí. “Ko e meʻaʻofa ʻoku foaki ʻe he ʻOtuá ko e moʻui taʻengata ʻia Kalaisi Sīsū ko hotau ʻEikí.”​—Loma 6:23.

Ko e faʻahinga kuo maté ʻe toe fakafoki mai. “ʻE ʻi ai ʻa e toetuʻu fakatouʻosi ʻa e māʻoniʻoní mo e taʻemāʻoniʻoní.” (Ngāue 24:15) Te nau maʻu ʻaonga mei he meʻaʻofa ʻa e ʻOtuá ko e huhuʻí.

ʻE anga-fēfē hono fakahoko kotoa eni ʻe he ʻOtuá?

FOKOTUʻU HA FOUNGA-PULE HAOHAOA

ʻE fakahoko ʻe he ʻOtuá ʻene taumuʻa ki he faʻahinga ʻo e tangatá mo e māmaní ʻo fakafou ʻi ha founga-pule fakahēvani, fakataha mo Kalaisi Sīsū ko e Tokotaha Pule kuo fakanofó. (Saame 110:1, 2) Ko e founga-pule ia pe puleʻanga, naʻe akoʻi ʻe Sīsū ki hono kau muimuí ke nau lotu fekauʻaki mo iá ʻi he ngaahi leá ni: “Ko ʻemau Tamai ʻoku ʻi hēvani, . . . ke hoko mai ho Puleʻangá.”​—Mātiu 6:9, 10.

ʻE ngāueʻaki ʻe he Puleʻanga ʻo e ʻOtuá hono mafaí ki he māmaní pea toʻo ʻosi kotoa ʻa e mamahí mo e faingataʻá mei ai. Ko e Puleʻanga ko ení ʻa e founga-pule lelei taha kuo faifai ange pea ʻi aí! Ko e ʻuhinga ia naʻe feinga mālohi ai ʻa Sīsū tonu ke fanongonongo ʻa e ‘ongoongo lelei ʻo e Puleʻangá’ lolotonga ʻene ngāue fakafaifekau ʻi he māmaní pea naʻá ne tala ki heʻene kau ākongá ke nau fai ʻa e meʻa tatau.​—Mātiu 4:23; 24:14.

Ko e ʻofa lahi ʻa Sihova ko e ʻOtuá ki he faʻahinga ʻo e tangatá, kuó ne talaʻofa te ne fakahoko kotoa ʻa e ngaahi meʻa fakaofo ko ení maʻanautolu. ʻIkai ʻoku ʻai koe ʻe he ngaahi meʻa ko iá ke ke loto ke ʻiloʻi ia pea ʻunuʻunu ofi kiate ia? Kapau ko hoʻo filí ia ʻe fēfē haʻo maʻu ʻaonga mei ai? ʻE fakamatalaʻi ia ʻi he kupu hono hokó.