Puleʻanga ʻo e ʻOtuá​—Ko ʻEne ʻUhinga kia Sīsuú

Hangē ko ia naʻe lāulea ki ai ʻa e kupu ki muʻá, naʻe fakatefito ʻa e moʻui ʻa Sīsuú ʻi hono “malangaʻi mo fanongonongo ʻa e ongoongo lelei ʻo e Puleʻanga ʻo e ʻOtuá.” (Luke 8:1) Naʻá ne ngāue tōtōivi, lue ʻi ha ngaahi maile ʻe laui ngeau ʻi he fonua ʻo ʻIsilelí ke malava ʻo akoʻi ʻa e kakaí fekauʻaki mo e Puleʻanga ʻo e ʻOtuá. Ko e ngāue fakafaifekau ʻa Sīsuú naʻe lēkooti ia ʻi he ngaahi Kōsipeli ʻe fā, ʻa ia ʻoku ʻi ai ʻa e ngaahi fakamatala laka hake ʻi he 100 ʻo fekauʻaki mo e Puleʻangá. Ko e lahi taha ʻo e ngaahi fakamatala ko iá ʻoku maʻu ʻi he ngaahi lea ʻa Sīsuú, ko ia ai ʻoku pau pē ʻoku nau fakafofongaʻi ha konga pē ʻo e meʻa kotoa naʻá ne leaʻaki fekauʻaki mo e Puleʻanga ʻo e ʻOtuá!—Sione 21:25.

Ko e hā naʻe mātuʻaki mahuʻinga ai ʻa e Puleʻangá kia Sīsū ʻi he taimi naʻá ne ʻi māmani aí? Ko e meʻa ʻe taha, naʻe ʻiloʻi ʻe Sīsū kuo fili ia ʻe he ʻOtuá ke hoko ko e Tokotaha-Pule. (ʻAisea 9:6; Luke 22:28-30) Ka naʻe ʻikai ke tāfataha pē ʻa Sīsū ke ne maʻu ha mafai pe lāngilangi. (Mātiu 11:29; Maʻake 10:17, 18) Naʻá ne pouaki ʻa e Puleʻangá ʻo ʻikai ʻuhinga ki ha lelei pē maʻana. Ko e ʻuhinga tefitó, naʻe mahuʻingaʻia pea ʻoku kei mahuʻingaʻia ʻa Sīsū ʻi he Puleʻanga ʻo e ʻOtuáa koeʻuhí ko e meʻa ʻe fai ʻe he Puleʻangá maʻá e faʻahinga ʻokú ne ʻofa aí—ko ʻene Tamai fakahēvaní mo hono kau muimui faitōnungá.

KO E MEʻA ʻE FAI ʻE HE PULEʻANGÁ MAʻÁ E TAMAI ʻA SĪSUÚ

ʻOku ʻofa loloto ʻa Sīsū ki heʻene Tamai fakahēvaní. (Palōveepi 8:30; Sione 14:31) ʻOkú ne leleiʻia ʻi he ngaahi ʻulungaanga fakaofo ʻa ʻene Tamaí, ʻo hangē ko ʻEne ʻofá, ko ʻEne manavaʻofa, pea mo ʻEne fakamaau totonú. (Teutalōnome 32:4; ʻAisea 49:15; 1 Sione 4:8) Ko ia ai, kuo pau pē naʻe fehiʻa ʻa Sīsū ke fanongo ki he ngaahi loi kuo fakamafola ʻo fekauʻaki mo ʻene Tamaí—ko e ngaahi loi ʻo pehē ʻoku ʻikai tokanga mai ʻa e ʻOtuá ki he faingataʻaʻia ʻa e tangatá pea ko e finangalo ia ʻo e ʻOtuá ke tau faingataʻaʻia. Ko e ʻuhinga eni ʻe taha naʻe vēkeveke ai ʻa Sīsū ke fanongonongo “ʻa e ongoongo lelei ʻo e Puleʻangá”—naʻá ne ʻiloʻi ʻe ʻi ai ʻa e taimi ʻe hanga ai ʻe he Puleʻangá ʻo fakaleleiʻi ʻa e ongoongo ʻo ʻene Tamaí. (Mātiu 4:23; 6:9, 10) ʻE anga-fēfē ʻene fai ení?

Fakafou ʻi he Puleʻangá, ʻe fakahoko ai ʻe Sihova ha ngāue lahi ʻe ʻaonga maʻá e fāmili fakaetangatá. “Te ne holoholo ʻa e loʻimata kotoa pē” mei he mata ʻo e faʻahinga faitōnunga ʻo e tangatá. ʻE toʻo ʻosi ʻe Sihova ʻa e tupuʻanga ʻo e ngaahi loʻimata ko iá, pea fakapapauʻi “ʻe ʻikai ke toe ʻi ai ha mate, pe ha mamahi pe ha tangi pe ha langa.” (Fakahā 21:3, 4) Fakafou ʻi he Puleʻangá, ʻe toʻo ʻosi ai ʻe he ʻOtuá ʻa e faingataʻa kotoa ʻoku tofanga ai ʻa e tangatá.b

ʻOku ʻikai ha ofo ʻi he vēkeveke ko ia ʻa Sīsū ke tala ki he kakaí ʻo fekauʻaki mo e Puleʻangá! Naʻá ne ʻiloʻi ʻe fakaeʻa ai ʻa e fuʻu mālohi mo e manavaʻofa ʻene Tamaí. (Sēmisi 5:11) Naʻe toe ʻiloʻi ʻe Sīsū ko e Puleʻangá ʻe maʻu ʻaonga ai ʻa e faʻahinga ʻokú ne ʻofa aí—ʻa e faʻahinga faitōnunga ʻo e tangatá.

KO E MEʻA ʻE FAI ʻE HE PULEʻANGA ʻO E ʻOTUÁ MAʻÁ E FAʻAHINGA FAITŌNUNGA ʻO E TANGATÁ

Ki muʻa fuoloa ke haʻu ʻa Sīsū ki he māmaní, naʻá ne nofo ʻi hēvani mo ʻene Tamaí. Naʻe ngāueʻaki ʻe he Tamaí ʻa e ʻAló ke fakatupu mai ʻa e ngaahi meʻá—ko e fakaofo ʻo e langí mo hono ngaahi fetuʻu mo e kaniva taʻefaʻalauá ki hotau palanite fakaʻofoʻofá mo e ngaahi meʻa moʻui ʻoku ʻi aí. (Kolose 1:15, 16) Hiliō ʻi he ngaahi meʻa kotoa ko iá, naʻe hoko ʻa e faʻahinga ʻo e tangatá ko e “fiefiaaga” ia ʻo Sīsū.—Palōveepi 8:31, PM.

ʻOku fakahaaʻi ʻa e ʻofa ʻa Sīsū ʻi he faʻahinga ʻo e tangatá ʻi heʻene ngāue fakafaifekaú. Mei he kamataʻangá pē, naʻá ne fakamahino ʻa e ʻuhinga naʻá ne haʻu ai ki he māmaní ke “talaki ʻa e ongoongo leleí” ki he faʻahinga naʻa nau fiemaʻu iá. (Luke 4:18) Ka naʻe fai ʻe Sīsū ʻa e meʻa lahi ange ʻo ʻikai ko e leaʻaki pē ʻo fekauʻaki mo hono tokoniʻi ʻa e kakaí. ʻI he taimi ki he taimi, naʻá ne fakahāhā ʻa ʻene ʻofa ki he faʻahinga ʻo e tangatá. Ko e fakatātaá, ʻi he taimi naʻe fakatahataha mai ai ha fuʻu kakai tokolahi ke fanongo ki he malanga ʻa Sīsuú, “naʻá ne ongoʻi fakaʻofaʻia ʻiate kinautolu, peá ne fakamoʻui ʻenau kau mahakí.” (Mātiu 14:14) ʻI he taimi naʻe fakahāhā ai ʻe ha tangata naʻá ne maʻu ha mahaki fakamamahi ʻa e tui ʻe lava ʻe Sīsū ʻo fakamoʻui ia kapau te ne loto-moʻoni ki ai, naʻe ueʻi ʻe he ʻofá ʻa Sīsū. Naʻá ne fakamoʻui ʻa e tangatá, peá ne tala ange anga-ʻofa kiate ia: “ʻOku ou loto ki ai. Ke ke maʻa.” (Luke 5:12, 13) ʻI taimi naʻe sio ai ʻa Sīsū ki hono kaumeʻa ko Melé ʻokú ne tengihia ʻi he mate ʻa hono tuongaʻane ko Lāsalosí, “naʻá ne toʻe ʻi loto ʻiate ia” pea “hoko ʻo mamahi” pea “naʻe tangi ʻa Sīsū.” (Sione 11:32-36) Naʻá ne fai ha meʻa naʻe ʻikai ala fakakaukau atu ki ai—ʻi he toe fakamoʻui mai ʻe Sīsū ʻa Lāsalosi neongo kuo mate ʻa Lāsalosi ʻo feʻunga mo e ʻaho ʻe fā!—Sione 11:38-44.

Ko e moʻoni, naʻe ʻiloʻi ʻe Sīsū ko e fakafiemālie naʻá ne ʻoatú naʻe fakataimi pē ia. Naʻá ne lāuʻilo, ko e faʻahinga ko ia naʻá ne fakamoʻuí ʻe vavé ni pe ko ʻamui ange te nau toe puke pea mo e faʻahinga kotoa ko ia naʻá ne fokotuʻu hake mei he maté te nau toe mate. Kae kehe, naʻe toe ʻiloʻi ʻe Sīsū ko e Puleʻanga ʻo e ʻOtuá te ne fakangata ʻosi ʻa e ngaahi palopalema ko iá. Ko e ʻuhinga ia naʻe ʻikai ke fakahoko pē ʻe Sīsū ʻa e ngaahi maná; naʻá ne toe talaki faivelenga ʻa e “ongoongo lelei ʻo e Puleʻangá.” (Mātiu 9:35) Ko ʻene ngaahi maná ʻoku fakahaaʻi ai ha tuʻunga siʻi pē ʻo e meʻa ʻe fai ʻe he Puleʻanga ʻo e ʻOtuá ki he kotoa ʻo e māmaní. Fakakaukau ki he ngaahi talaʻofa ʻi he Tohi Tapú ʻo fekauʻaki mo e taimi ko iá.

• 

  ʻIkai toe ʻi ai ha mahamahaki.

  “ʻE toki fakaava ʻa e mata ʻo e kui, pea toʻo ʻa e telinga ʻo e tuli. Toki hopo ʻa e heke hange ha tia, pea hiki mavava ʻa e ʻelelo ʻo e noa.” Tānaki atu ki ai, “ʻoku ʻikai ha nofo ai te ne pehe, ʻoku ou mahaki”—ʻAisea 33:24; 35:5, 6.

• 

  ʻIkai toe ʻi ai ha mate.

  “E maʻu e he maonioni ae fonua, bea te nau nofo ai o taegata.”—Saame 37:29, PM.

  “Te ne folofua ʻa mate ʻo taʻengata; pea ko Atonai Sihova te ne holoholo ʻa e loʻimata mei he mata fuape.”—ʻAisea 25:8.

• Ko e faʻahinga kuo maté te nau toe moʻui mai.

  “Ko e faʻahinga kotoa ʻi he ngaahi fonualoto fakamanatú te nau fanongo ki hono leʻó pea te nau hū mai ki tuʻa.”—Sione 5:28, 29.

  “ʻE ʻi ai ʻa e toetuʻu.”—Ngāue 24:15.

• 

  ʻIkai ha toe tukuhāusia pe taʻemaʻu ngāue.

  “Pea te nau langa fale, ʻo nofo ai; pea te nau to ngouevaine, pea kai hono fua. ʻE ʻikai te nau langa, kae nofo ai ha taha kehe; ʻe ʻikai te nau to, kae kai ʻe ha taha kehe . . . ko ʻeku fanga pele te nau ʻosiki ʻa e ngaue ʻa honau nima.”—ʻAisea 65:21, 22.

• 

  ʻIkai toe ʻi ai ha tau.

  “ʻOku ne lolololo ʻa e ngaahi tau ʻo aʻu ki he ngataʻanga ʻo mamani.”—Saame 46:9.

  “ʻE ʻikai ofa heleta ha puleʻanga ki ha puleʻanga, pea ʻe ʻikai kei fai ha akotau.”—ʻAisea 2:4.

• 

  ʻIkai toe ʻi ai ha nounou fakameʻatokoni.

  “Kuo foaki ʻe he kelekele hono fua: ʻe tapuakiʻi kitautolu ʻe Elohimi ko hotau ʻOtua.”—Saame 67:6.

  “Bea e i ai ae falukuga oe uite i he fonua i he tumutumu oe gaahi mouga.”—Saame 72:16, PM.

• ʻIkai toe ʻi ai ha masiva.

  “ʻE ʻikai ngalo maʻu ai pe ʻa e kau masiva.”—Saame 9:18.

  “He ʻoku ne fakahaofi ʻa e masiva ʻo ka tangi; Ko e vaivai foki mo ia ʻoku ʻikai hano tokoni. Ko e tuʻutamaki mo e masiva ʻoku ne fakaʻatuʻi, pea ko e ngaahi laumalie ʻo e masiva ʻoku ne fakamoʻui.”—Saame 72:12, 13.

ʻI hoʻo fakakaukau atu ki he ngaahi talaʻofa ko iá ʻi he fekauʻaki mo e Puleʻanga ʻo e ʻOtuá, ʻoku lava nai ke ke sio ki he ʻuhinga naʻe mātuʻaki mahuʻinga ai ʻa e Puleʻangá kia Sīsuú? ʻI heʻene ʻi māmaní, naʻá ne vēkeveke ke talanoa fekauʻaki mo e Puleʻanga ʻo e ʻOtuá ki ha taha pē ʻe fanongo, ʻi heʻene ʻiloʻi ʻe fakangata ʻe he Puleʻangá ʻa e kotoa ʻo e ngaahi palopalema fakamamahi ʻoku tau sio ki ai he ʻaho ní.

ʻOku fakamānako kiate koe ʻa e ngaahi talaʻofa ʻi he Tohi Tapú ʻo fekauʻaki mo e Puleʻangá? Kapau ko ia, ʻe lava fēfē ke ke ako lahi ange fekauʻaki mo e Puleʻanga ko iá? Pea ko e hā ʻe lava ke ke fai ke fakapapauʻi te ke maʻu ʻaonga mei he ngaahi tāpuaki ʻo e Puleʻangá? Ko e kupu fakaʻosi ʻo e ngaahi kupu hokohoko ko ení te ne tali ʻa e ngaahi fehuʻi ko iá.